TG Telegram Group Link
Channel: الشاعر عقيل الكاظمي
Back to Bottom
❇️ قصائد استشهاد راهب آل محمد صلى الله عليه وآله وسلم الإمام الكاظم عليه السلام

أنه الضاعت سنيني بسجنك المظلم
أنه الذابت جروحي بجرحك المؤلم
----------
من يوم الفتحت اعلى الحياة العين
شفتك نزف ممتد من وريد حسين
وشفتك درع يتحامه بحماك الدين
انه ولو ما وجودك ما صرت مسلم
-----------
صحه ابحبك كياني وعاشت سنيني
اوحروف اسمك سرت بالدم تغذيني
وقلم شِعري بـودادك والف يميني
وصرت انت لشعوري وفكرتي الملهم
------------
وصرت أحزن لحزنك وافرح لفرحك
وليل همومي ينذل بأمل صبحك
أطالع سيرتك واتجرّح بجرحك
واشوفـك ثغـر بالآلام متبسّم
-------------
اوتِلاشت روحي بيك وذابت بحزنك
وخطفتهه السنين وظهرت بسجنك
لـن شافت قيودك وسْمَعَت ونّــك
جريح بصبرك اعلى الضيم متبلسم
-------------
وعشت وياك سجنك بالحزن والهــم
ودمعـي اعليك ينزف مو مدامـع دم
وشفت يوم التلظّت چبدتك بالسم
وشفت اشجنه اعليك الطاغيه المجـرم
-----------
اطلعِتْ يابو الرضا من سجنك اللحدك
عگب ما گطّعوا بالسم هرش چبدك
وبگيت آنه اويه ظلمات السجن بعدك
على الجدران أنحت واكتب وأرسم
-----------------
أنحت صورتك وانحب على غيابك
واكتبلك قصيده بدمعــة مصابــك
سجنك صار مأوى گلوب أحبابـك
ومن صبرك معاني الصبر تستلهم
--------------------
عقيل الكاظمي
❇️ قصائد استشهاد باب الحوائج إلى الله عز وجل الإمام الكاظم عليه السلام



صوت الناعي كبر والمدمع تفجّر
يا موسى ابن جعفر
يا موسى ابن جعفر
-----------------
صوت امن الارض ينحب * صوت امن السمه ينعه
تنوح لسابع اليمة * افلاك السمه السبعه
و أرواح الخليقه اليوم * بهاي المحنه منفجعه
توسَّع ضيق الاحزان * وتضيَّق رحب كل وسعه
وجوّ المحنه غيّم وسور العِز تهدم
والعالم تغيّر
يا موسى ابن جعفر
--------------
كل هذا الجرة بل كون * من لوعة ومصاب وهم
كلها بسبب ما عاناه * چبدك من لهيب السم
وحين انگطعت انفاسك * وحل ميعاد المحتّم
فاضت روحك العظمى * وناح العالم الاعظم
مفجوعه الملايك ومجروحة المناسك
وقرآنك تحسّر
يا موسى ابن جعفر
-----------------
شالت جسمك الأملاك * على روس المعالي انشال
وبصدرك شَرِح أسرار * وبجسمك جَرِح أغلال
الملايك بيه تحف لو سار * تِميل اويه النعش لو مال
رحت يل غالي عن دنياك * اوگِطَعنه منك الآمال
وبموكب جراحك ودّعنه صباحك
ومدمعنه تنثّر
يا موسى ابن جعفر
---------------
نودعك سيدي لمثواك * ويمّك ندفن الارواح
كل شي بهل حياة انصاب * وتكدّر عليك وناح
عگب مصباحك الزاهر * يريته لا طلع مصباح
ولا شعّت عگب شمسك * شمسنه ولا بدرنه لاح
وهل كون ابغيابك مفجوع لمصابك
وبِهْمومك تكدّر
يا موسى ابن جعفر
---------------
انزلت يا بو الرضا بلحدك * اوصُبَح تحت الترب مثواك
بيك الآخره ابتشرت * اوعليك اتكدّرَت دنياك
گبرك أشرگ ابْنورك * وتْضوّه ابسِحِر معناك
وانت اللي گضه عمرك * ابسجن أظلم بظلم اعداك
ذوَّب چبدك السم وذوَّبنه لظى الهم
وجرحك بينه أثر
يا موسى ابن جعفر
-----------------
عقيل الكاظمي
❇️ قصائد استشهاد باب الحوائج إلى الله عز وجل الإمام الكاظم عليه السلام


ليل السجن طال * موحش ظلامه
وآثار الاغلال * تركَتْ علامه
صبحك نسيته * عمرك گضيته
موحش ظلامه
--------------
من ديرة رسول الله لقصر هارون
يا موسى الكليم وأشخصك فرعون
اجيت لدار غربه وتدري مالك عون
وتظل بين الظلم والمعتقل مرهون
ولبحر الهموم * وحدك عبرته
وبصبر ايوب * جرحك صبرته
دربك مشيته * عمرك گضيته
موحش ظلامه
-----------
اسير وللدموع آثارهه بأسرك
وجمرات الحزن ما فارِگَت صدرك
قيودك سيدي الهدمت ركن صبرك
والناگه الهزيلة بيمن تذكرك
بگلبك السجاد * أعلن نحيبه
وبروحك تعيش * زينب غريبه
للطف حييته * عمرك گضيته
موحش ظلامه
---------------
أحييت الطفوف وبيك يومه انعاد
وحيد وغربتك غربة ابو السجاد
حسين بمعركة وحربك سجن واصفاد
حسين بكربلا وطفّك ارض بغداد
ومن عفت الاوطان * وشوفة اعيالك
لوحشه ومطامير * صار ارتحالك
والون خفيته * عمرك گضيته
موحش ظلامه
---------------
جرحك يسألك وتجاوب الحسرة
سجن بغداد اشد لو محنة البصرة
البصرة وجورهه وما بيها من جمره
نسيته بقسوة السندي وعُظُم غدره
بطامورة الموت * لا أمل يمك
للرب تناجيه * وتشكيله همك
حزنك رويته * عمرك گضيته
موحش ظلامه
---------------
ابن شاهگ حَجَر ما بيه كل رحمه
خنگ حتى هواك وحارب النسمه
والفتْ الغرب والوحشه والظلمه
لحد ما چبدك الظامي ارتوه ابسمه
وتاليهه عيناك * نامت على الهم
والجمره بحشاك * وبچبدك السم
دمعك جريته * عمرك گضيته
موحش ظلامه
--------------
غفت عينك يبن جعفر على الآهات
وموتك ما كفه زمرة هبل واللات
صاحو عل جنازه بأخبث الكلمات
وصحنه الطيب وعز الروافض مات
وجرحك لهل يوم * باقي بدمانه
يعيش اعلى ذكراك * ماتم عزانه
وانت البنيته * عمرك گضيته
موحش ظلامه
...................
عقيل الكاظمي
❇️ قصائد استشهاد باب الحوائج إلى الله عز وجل الإمام الكاظم عليه السلام



نور مجدك يشع من ظلام السجن
حققت أعظم نصر
بگلبك الممتحن
من ظلام السجن
---------------
سِر جهادك يبن جعفر سامي عن كل المعايير
من وره القضبان صوتك يوصل لكل الجماهير
وشمس مصباحك الزاهـر تشرق بليل المطامير
تهدي العقـول الحايره
تحيي النفوس الثائره
تصنع ضمائر طاهره
تفدي الاسلام بدماها وتوگف بوجه الأعاصير
تريد من أمتك بسيرتك تنفتن
ثائر بوجه الظلم
وثورتك تنعلن
من ظلام السجن
---------------
هـذا معنى النصر يا من بيك ظل يتفـاخر الدين
حيث نهجك يبن جعفر امتداد لمنهج حسين
غربه وحده وهدف واحد سيّدي ونفس المضامين
وأصبح يزيدك شانئك
وانت الحسين بمبدأك
هامة الظالم موطأك
شما يريد يطفّي نورك سيّدي تزداد تبيين
وصار معنى النصر بسيرتك مقترن
برغـم محنة غربتك
والدليل اليون
من ظلام السجن
---------------
اويبقه سرّك يبن جعفر مثل سرّ حسين محجـوب
الرفع شمس حسين جدك واشرقت من صوب الغروب
أظهرك واظهر حقيقة ثورتك وبنفس الاسلوب
وجعلك صورة حكمته
حيث انت نوره وآيته
واعلى الخلايق حجّته
وبجهادك يبن جعفر صار الك معنى الخلد ثوب
والفخر خادمك والمجد ليك ابن
ومن قيودك للزمن
صوت خالد يرِن
من ظلام السجن
-----------------
رِدِت هذا الصوت يبقى ورنّته تسمعهه الاجيال
والاجيال اليوم تشهد سيدي هل صوت لا زال
وتنشد التاريخ ظلت شچانت مگيّده الأغـلال
وقيودك ترد الخبر
رادت على طول الدهر
تقييد آمال البشر
لاچن برغم القيود بصبرك انعادت الآمال
صابر و لو شفت ليل همّك يجن
سيدي تهل الدمع
وسلوتك بالحزن
من ظلام السجن
----------------
صِرِت تتوسّد احزانك سيدي وغطاك الهمـوم
وصرت تتسلّه بونينك ونين من گلبك المالوم
صـابر وكاظم لغيضك تنتظر ساعة المحتوم
ولو خلصت ايام الشهر
تتغيب انوار الگمر
ولو عادت ايامه ظهر
لچن لو بدرك تغيّب ما اضن يظهر بعد يوم
وگرّبت ساعتك ودمعك على الوجن
وذوّب السم مهجتك
وچبدك المنشحِ
من ظلام السجن
-----------------
عقيل الكاظمي
❇️ قصائد الولادات الشعبانية المباركة


ولادة الامام الحسين عليه السلام




يحسين يحسين * وياك نبقه للأبد
----------
الليلة نضوّي شمعتنه
وبيك نعيش فرحتنه
يا عزنه وكرامتنه
يا نور العدالة اليضوي بدروب الكرامة
يحسين يحسين * إنت أساس المعتقد
-----------
اوياك انولدت الفرحه
ودين الله ارتفع صرحه
يا فجر الهده وصبحه
يا من اسمك لگلب المحب عشگه وغرامه
يحسين يحسين * واعلى العشگ ربنه شهد
-----------
ينور العين يصبيهه
يشمس الدنيه يا ضيهه
هواهه حبك وميهه
يحسين الگلب بمحبتك اعلن هيامه
يحسين يحسين * غذّانه حبك بالمهد
-------------
انت الدين واركانه
وللإسلام قرآنه
وللقرآن برهانه
يا صوت النبي وصورة علي وروح الإمامه
يحسين يحسين * يا قل هو الله أحد
------------
گال الباري چلماته
وبيك اتجلّت آياته
وانت اصبحت مرآته
يا دين الإله وعزّته ودرعه وحسامه
يحسين يحسين * لولاك ربنه منعبد
-------------
واحنه نگول چلمتنه
وبسمك تعله صيحتنه
يا عنوان رايتنه
يا عزنه وذخرنه والأمل يوم القيامه
يحسين يحسين * يوم الحشر انت السند
-----------
#عقيل_الكاظمي
❇️ قصائد الولادات الشعبانية المباركة


ولادة الامام الحسين عليه السلام



حبك يبو اليمه انزرع بينه * وانت اللي بالمحشر تنجينه
طحنه بغرامك يحسين * وعرفنه يا نور العين
أنت اللي بالمحشر تنجينه
------------
طحنه يحسين بغرامك لچن حبك مو بدينه
فرض حبك لچن مو بس فرض يتوجب علينه
لا حكم شرعي ونطبقه وطائفه والهه انتمينه
حبك اصبح بذر خير وعلى الفطره انزرع بينه
لنخاف نار ونطمع بجنه * ولا أجر نطلب بي ونتمنه
عالفطره بي متمسكين * وعرفنه يا نور العين
انت اللي بالمحشر تنجينه
--------------
سيدي والعشگ أصبح محنه للعاشگ وأكثر
بشوفة المحبوب يفرح وفرحته بالگلب تكبر
والعشگ للمحب حتى بروحه واعلى الگلب أثر
وانعرض حبك علينه وعشگناك بعالم الذر
يحسين عشاگك على الفطرة * وما تشرفنه لشخصك بنظرة
ونتنطّر ليوم الدين * وعرفنه يا نور العين
انت اللي بالمحشر تنجينه
--------------
سيدي اليعشگ بنظره للمحب يشتاگ گلبه
وحين يشتاگ لحبيبه لشوفته تجذبه المحبه
وانت يحسين اليحبك امن الزغر بهواك يربه
ويبقه لحظه بأثر لحظه لشوفتك روحه تجذبه
نزورك لون هاج العشگ بينه * وشوفة ضريحك ما تكفّينه
وما ندري نتوجه وين * وعرفنه يا نور العين
انت اللي بالمحشر تنجينه
--------------
نزور گبرك واحنه نعرف بيك حي تنظر وتسمع
والمحب لو دخل گبرك گلبه لا يهده وليهجع
تبقه روحه بأشد حيره وعل ضريح عيونه تدمع
چي يعرفك حي تشوفه وذنبه عن شوفتك يمنع
وما عنده غير زيارتك بيهه * يروي الگلب والروح يحييهه
ويتمنه شوفك كل حين * وعرفنه يا نور العين
انت اللي بالمحشر تنجينه
--------------
الك عود الود تمايل سيدي وبهواك حنيه
واليحب للمحب كون لشوفته يوهب الدنيه
وآنه يحسين بغرامك عندي حتى الموت منيه
بشوفتك ثمر المحبه أحيه واتمتّع ابجنيه
بحبك أعيش وتنگضي سنيني * وموتي اويه شخصك لو يلاگيني
باحضاني اتلگه البين * وعرفنه يا نور العين
انت اللي بالمحشر تنجينه
--------------
#عقيل_الكاظمي
❇️ قصائد الولادات الشعبانية المباركة


ولادة الامام الحسين عليه السلام



يا حسينٌ أنت نورٌ قد تَلالا مَلأَ الكونَ بهاءً وجمالا
أنتَ مِصباحُ الحياةْ
يا سفينةَ النجاةْ
---------------
ابْثالث بشعبان يحسين ازهرت
بنورك الدنيا اوْزِهت وتنوِرَت
ابْمولدك روح الحياة استبشرت
ابْعِطر حبك يا أملهه اتعطِرَت
فَمَلَكْتَ القلبَ يبنَ الأكرمينا نابضاً فيكَ يُنادي واحسينا
وسيبقى للمماتْ
يا سفينةَ النجاةْ
--------------
يا حسين الگلب بهواك انفتن
واصبح بحبك أسير ومُرتَهَن
سيدي أيامنه بذكرك حِلن
روض حبك أحلى من جنة عدن
قد عشِقناكَ بقلبٍ يتوقَّـدْ تلك كانت سُنةَ الهادي محمدْ (ص وآله)
يبنَ خيرِ الكائناتْ
يا سفينةَ النجاةْ
--------------
حُبّك اتوسط گلوب العاشقين
سنة المختار سيد المرسلين
حيث گال المصطفى الهادي الأمين
انت مني وآنه منك يا حسين
بضعةٌ أنت منَ المختارِ طاها هو شمسٌ أنت للشمسِ سناها
يا وليدَ المكرماتْ
يا سفينةَ النجاةْ
--------------
هذا قول المصطفى سيد البشر
بيك والقرآن أكد والسور
بالفجر والنور والحَج والزُمَر
وسورة الأحزاب تشهد بالفخر
آيةُ التطهيرِ أنتَ مُحتواها يَقْرَأُ المعنى جَلِيّاً من تَلاها
والضحى والذارياتْ
يا سفينةَ النجاةْ
----------------
يا حبيب الله وملائكة السماء
يا عزيز النبي وسيد الأوصياء
انت من رب العرش أكرم عطاء
بيك تمّم نور أصحاب الكساء
فَلِأَصحابِ العَبا أنتَ المُقفّى صاغَكَ الباري من الدُرِ المصفّى
يابْنَ خيرِ الأمهاتْ
يا سفينةَ النجاةْ
---------------
يا حبيب المصطفى وروح البتول
حارت ابمعناك يحسين العقول
سر وجودك ما يدانيه الأفول
الكون يفنه وإنت خالد ما تزول
أنتَ نورُ اللهِ للخلقِ تجلَّى وله مهدُكَ قد صارَ محلا
وَلَدَتْكَ المعجزاتْ
يا سفينةَ النجاةْ
-------------
سيدي عشاگك احنه وشيعتك
نبتدي وننهي العمر بمودتك
مثل فطرس حين لاذ بشيمتك
لِذْنه يحسين بسفينة رحمتك
وَرَكِبناها وقد كانَ رَجانا أنْ تكُونَ ساعةَ الحشرِ حِمانا
من جحيمِ السيئاتْ
يا سفينةَ النجاةْ
----------------
#عقيل_الكاظمي
مدونتي instagram
❇️ قصائد الولادات الشعبانية المباركة

ولادة العباس عليه السلام


رايتك والجود يم مهدك علامه
بيهه ربك خصك بدال الإمامه
وحيدر بفضلك شهد وهل كرامة امن المهد
بيهه ربك خصك بدال الإمامه
---------------
ضحك وجه المرتضى وگلبه ابتشر
گبل ما عن مولدك يسمع خبر
يدري هذا اليوم رابع بالشهر
شلون رابع يكتمل بيه الگمر

وحين شاهد وجهك وحسنه وجماله
يشبه انوار البدر ليلة كماله
حبك بروحه انولد
وهل كرامة امن المهد
بيهه ربك خصك بدال الإمامه
--------------
شاف من وجهك يشع نور الجمال
شاف باوصافك ملامح للكمال
يمنتك بيهه انولد موت الرجال
ويسرتك منهه نبع ماي الزلال

واسمك العباس يحمل من صفاتك
سطوتك عل معركه وشدة ثباتك
شبل من ذاك الاسد وهل كرامة امن المهد
بيهه ربك خصك بدال الإمامه
---------------
نور وجهك شگ دياجير الظلام
يل كراماتك شهادة امن الكرام
بن إمام وأخو اليمه وعم إمام
وخوة السبطين الك أعظم وسام

لو يصح ثالث عشر لجل الزعامه
منهو أجدر منك بهاي الكرامه
شخصك بهاي انفرد
وهل كرامة امن المهد
بيهه ربك خصك بدال الإمامه
----------------
ما حِزت تاج الإمامة امن الإله
لچن ربك سلّمك بالطف لواه
اولو إمامك بالعطش تلهب احشاه
غير جودك يا بو فاضل ما رواه

ترتوي العصمة بعذب من ماي جودك
ولإمامك عل عهد ترخص وجودك
وانت وقعت العهد وهل كرامة امن المهد
بيهه ربك خصك بدال الإمامه
-------------
والدك قبَّـل يسارك واليمين
وقبَّـل العين التطفيهه السنين
اومن يناغيلك بكلمة يا حسين
ايشاهد بعيناك نظرات الحنين

عينك اعلى حسين روحك ويه زينب
تبتسم مره لجلهه ومره تغضب
عزم گلبك ما برد
وهل كرامة امن المهد
بيهه ربك خصك بدال الإمامه
-------------
من علي اورثت العلم والمعرفه
وامك ترويك من نبع الوفه
من ابوك اورثت عزم العاصفه
ومرضعك غذاك غيره وعاطفه

وامك اللي عل وفه ربّت سنينك
عگدت الرايه يبو الغيره ابيمينك
والأمل بيك انعقد ** وهل كرامة امن المهد
بيهه ربك خصك بدال الإمامه
-----------------
عقيل الكاظمي
❇️ قصائد الولادات الشعبانية المباركة



في ولادة الامام صاحب الزمان عجل الله تعالى فرجه الشريف

يوم (15) شعبان ** مولد حجة الرحمن
خل تفرح جميع الناس ** طشّوا الورد طشوا الياس
عمّ الخير عل أكوان ** بمولد حجة الرحمن
-----------------
هذا اليوم مولد خاتم الانوار * البيه الكون يتنوّر
هذا اليوم مولد حجة الجبار * والاكوان تتنطّر
وابوه وعمّته وامّه ابوسط الدار * لاستقباله يتحضّر
انولد سرّ الإله وأعظم الاسرار * اوگلب العسكري استبشر
اومثل ما گال داحي الباب ** وَصْفه ايحيّر الألباب
لصدره العسكري اتلگّاه ** شاف اجبينه شاف ضواه
يِشِع وجهه ابضوه الايمان ** بمولد حجة الرحمن
--------------
اليوم انولدت الرحمه الإلهية * الغدت للناس مذخوره
وهذا اليوم للشيعة الإمامية * يعيد الامل بظهوره
الوريث الأوحد لهالكرة الارضية * يضوّي العالم بنوره
وكْتاب الإرث قرآن باريّه * وبآياته مذكوره
القصص والأنبياء شهود ** ابكتاب الخالق المعبود
والهادي بأحاديثه ** صدّق كل مواريثه
وأصبح واضح البرهان ** ابمولد حجة الرحمن
---------------
الكلام ايصير يوم اظهوره عالمكشوف * بامر الخالق المعبود
والغاصب فدك بعيونه ريت يشوف * يوم اليظهَر الموعود
الحق يرجع لأهله وهالأمر معروف * ما دام الامل موجود
الامل ينهض بسيفه البالعدل موصوف * والحق يرجع النه اردود
بيده صارم الكرار ** ابگلبه لوعة المختار
وياخذ للنبي ابْثارين ** ثار الضلع ثار حسين
اويرفع للعدل بنيان ** ابمولد حجة الرحمن
--------------
ظهوره اشما تأخّر باقيه الآمال * وما يمحيهه حتى الموت
بتأخير الوعد لا تفرح العُذّال * گوم الجبت والطاغوت
شما طال الامد والصبر مهما طال * لابد يسمعون الصوت
الحق يظهر ابيومه والظلم ينزال * ويّه عصبة الطاغوت
اوترجع هيبة الاسلام ** عگب ما غدرته الايام
الباطل لو ربح جوله ** للحگ والعدل دوله
اوْصبح دستورهه القرآن ** ابمولد حجة الرحمن
-------------
گالوا وين غايبكم المهدي راح * گلنه غاب عن العين
گالوا وين ماشي بالارض سوّاح (1) * گلنه إبن مريم وين
گالوا للسمه صاعد ابغير اجناح * ابقدرة خالق التكوين
گلنه الامر ما يحتاج للايضاح * ضنوة سيد الكونين
بارينه لغيابه اختار ** اوْحِجَب شخصه عن الأنظار
لعيسى صعّده لسماه ** وغايبنه الإله اخفاه
انحِجَب عن الإنس والجان ** ابمولد حجة الرحمن
--------------
ويوم (15) كل عام ننتظره * بيه يجمعنه مولوده
اوْندعي يا الهي عجّل بأمره * وگرُّب يوم موعوده
واجمعنه اويه جيشه لو بزغ فجره * اونَوْر الكون بوجوده
اوْ لو متنه الهي احيينه للنصره * واحشرنه مع اجنوده
صدگ نتشرّف ابملگاه ** ونتوفّق نصير اوياه
صدگ بارواحنه نفديه ** ونستشهد ابّين ايديه
هذا الفوز بالرضوان ** ابمولد حجة الرحمن
--------------
(1) كلمة قالها وهابي في مناظرة مع الدكتور التيجاني السماوي
الامارات #عقيل_الكاظمي
من ديوان خواطر الافكار ص / 33
❇️ هوسات الولادات الشعبانية المباركة


للاكبر عليه السلام

بالمهد وعيونه بعيون الحسين
والحسين بشوفته يكحل العين
نوره نور المصطفى ونفس الجبين
ومن حيدر زودة وايمانه

عقيل الكاظمي
❇️ قصائد الولادات الشعبانية


والله * روحي تهواكم
والله * گلبي والاكم
والله * لا مينساكم ** يا آل أحمد
-------------
انتم كياني ومبدأي وكل حياتي
من ساعة المولد لساعة مماتي
انتو السفينة البيهه أضمن نجاتي
يا دنيتي وديني وصيامي وصلاتي
والله * حبكم بروحي
والله * ايطيّب جروحي
والله * گلبي ناداكم ** يا آل أحمد
----------------
جدكم رسول الله ونبيه محمد
روح الرسالة البيهه ربنه توحد
وحيدر أبوكم والإمام المسدد
ليث الإله البسمه كل حق تأيّد
والله * وامكم الزهره
والله * شمعة العتره
والله * ابضيهه سوّاكم ** يا آل أحمد
----------------
ومنكم كريم العتره ثاني الأئمه
ذاك الذي ابصلحه، صلح شأن الامه
وحسين اخوه البل فخر عالي نجمه
لدين الإله وشيّده بفيض دمه
والله * انتو وجداني
والله * انتو إيماني
والله * أفنى لولاكم ** يا آل أحمد
--------------
وزين العباد البل فضل ما مثيلة
والثفنات، اعلى المكارم دليلة
والباقر العلم اللي ما صح بديلة
بس جعفر ابنه اللي ورث كل فضيلة
والله * جعفر الصادق
والله * بل صدق ناطق
والله * جلَّ معناكم ** يا آل أحمد
---------------
والكاظم اللي كل فضيلة بخصالة
وابنه الرضا والباري تمم كماله
وبدر الجواد الساطع بضي جماله
والهادي نوره الباهر ابهل سلاله
والله * خصكم الباري
والله * بكل فضل جاري
والله * بفضله علّاكم ** يا آل أحمد
-------------
والعسكري ابدلالي عسكر غرامه
والخاتِم ابنه البيده ختم الإمامه
غايب واتاني لجيْته تظهر علامه
وادعي لظهوره بل فرج والسلامه
والله * انتو آمالي
والله * أول وتالي
والله * باقي ويّاكم ** يا آل أحمد
-------------
عقيل الكاظمي
❇️ ابوذية ولادة الامام المهدي عجل الله تعالى فرجه الشريف


متى تظهر يغايبنه ولك نار
وعلى العالم يهل بدرك ولك نار
الك فوك النهر راية ولك نار
ابدليلك سرت وي نار الثنية
------------
عقيل الكاظمي

سطع نوره مله الآفاق ناره
العذول ابمولده تلتهب ناره
المهدي للهُدى مصباح ناره
بيه اتنوّرت كل البرية
-------------
عقيل الكاظمي

گصه جوع المفارگ منتضرنه (تضورنا جوعا)
ولا نعرف التنفع من تضرنه (الضرر)
نصيح العجل وانت منتضرنه (الانتظار)
نصير اسباب للطلعه البهية
----------------
عقيل الكاظمي

نوِج كل ساعه يالغايب بلا نار
وبكينه نخبط بظلمة بلا نار
ننظر لعد واقعنه بلا نار
لجن لو نحجي تبرانه المنية
------
عقيل الكاظمي
❇️ ابوذية ولادة الامام الحسن المجتبى عليه السلام


لمهجنه بغير ضي حبك معزنه
كريم وغير ديوانك معزنه
معز المؤمنين انت معزنه
الحسن مفتاح نصر الغاضرية
-------------------
عقيل الكاظمي
❇️ قصيدة ولادة الامام الحسن عليه السلام

(انوار الحسن)
------------
هالليله بانـوار الحسن مزدهره دنيانه
وابتسمت نجوم السمه بأنواره فرحانه
وابتشرت الأرواح هالليـله مولوده
بالبهجه والأفراح هالليـله مولوده
-------------
هالليله طير السعد ردد أناشيده
تطرب دليل المحب أنغام تغريده
يكرر بلحن الفرح هالليله ويعيده
شيعبّر بفرحته وشيگول ترديـده

هالليله بستان الأمـل متفتّحه اوروده
غصن الورد باعذب لحن مال ورگص عوده
نور الهده الوضاح هالليله مولوده
بالبهجه والأفراح هالليله مولوده
-----------
فرحان طير السعد غـرّد بألحانه
يطير ويحط عل شجر ويداعب اغصانه
ويشوف روض الأمل مبتهج بستانه
بثوب الخضار اكتسه والورد ألوانه

چنهه اصبحت جنة عدن تظهر محاسنهه
وإشعاع من نور الحسن جمّل مفاتنهه
عطر الورد فواح هالليله مولوده
بالبهجه والأفــراح هالليله مولوده
-------------
هالـليله غاب البدر وانحجبت انواره
شمس الحسن أشـرقت مـن مشـرق اسراره
جفَّت مياه الأمـل وانگطعت انهاره
وروّاهه جود الحسـن وغمرهه تياره

شوف الانهـار الجاريه تمرح بمجراهه
أصبحت عذبه وصافيه والفــرح حلاهه
نور المكـارم لاح هالليله مولوده
بالبهجه والأفراح هالليله مولوده
---------------
وجه الحياة ابتسم وي بسمة الزهره
بمولود ابنهه الحسن ايهنيهه بالبُشـره
والبدر نوره انخسف خجلان من بـدره
والفجر منه اعتذر لمن بـزغ فجـره

قرص الشمس لمن طلع شاف الضحى اگباله
شاهد قرص وجه الحسن امنور السمه ابـداله
شع للفخر مصباح هالليله مولوده
بالبهجه والافـراح هالليله مولوده
--------------
شافت جماله الشمس بالأصـل ذكّرهه
من حيث هيه الفرع والحسن مصدرهه
هاي الحقيقه النبـي المختار يذكرهه
لا مو مجاز وشعــر و حروف اسطّرهه

اسأل بحار المجلسي بكتابه مذكوره
كل ما حوت هاي الشمس مصدرهه من نوره
من رابع الأشباح هالليله مولوده
بالبهجه والأفـراح هالليله مولوده
--------------

عقيل الكاظمي
موال لولادة الامام الحسن المجتبى عليه السلام
............
ابتيار جود الحسن سفن الوره جاريه
فاضت مياه الكرم منه وطفح جاريه
اشجم يتيم ارتوه بجوده وجم جاريه
للضيف عاده يحط بالزاد حمص ذهب
تاهت افكاري شوصّف رشدي مني ذهب
من جوده ريح العطر نسّم علينه ذهب
واللي ذنوبه چثيره من الحسن جاريه
..............
لشاعر الكاظمية الخالد المرحوم ملا حسن الكاظمي
❇️ قصائد استشهاد الامام علي عليه السلام

وزن موشح


اليـوم محرابك طفت أنـواره
والوحـي ابگبرك دفـن أسراره
-----------
غاب نورك مثل متغيب الشموس
وامسه وجه الكون بفراگك عبوس
يلي تفدي ترابك الطاهر نفـوس
افديت روحك للعـدل وافكاره
-----------
ابست ليالي الكون ربك كوّنـه
بيك وبطاها جعل سِر معدنه
انت نصف الكون من ترحل مِنَه
اثلث ليالي وتبتعد عن داره
-----------
ما يصح فجأه يوافيك الممات
تضطرب أركان هاي الكائنات
لـو رحت عنها تفارگهـا الحياة
ويفنى هذا العالم وآثـاره
-----------
وشاء ربك مـن تفـارگ دنيتك
ايمهّد لهاي العـوالم فرگـتك
وبثلثتيـام صـارت غـيبتك
اولبس ليك الدين ثوب اكداره
-----------
وَحْشه هل دنيا ابغيابك يل حبيب
شلون عگبك يا علي العيشه تطيب
شلون تطلع شمس وانوارك تغيب
اوغطى دمّك هل أفق واستاره
-----------
ياللي فگدك عل عوالم ما يهون
يا علي ولجلك بچت كل العـيون
يل كفلت ايتام بايتامك شـلون
لِفَت يمّك والدمع يتجاره
-----------
سمعوا الجرّاح يطلبلك لبن
اوعلى الباب اتسارعوا يا بالحسن
هذا شايل بيده دمعاته الجـرن
اوذاك يخلـط باللبن أعـباره
-----------
يا علي فگدت يتاماك الحنان
تحت ظلك چانت تحس بالامان
يا ربيع العمر بيك الموت حان
اوذبّلت چـف القـدر أزهاره
-----------
عقيل الكاظمي / الشارقة
❇️ قصائد استشهاد الامام علي عليه السلام


معركـة خيـبـر في قصيدة


-------------
التاريـخ ينقـل اخبار للعالم ويبديهه
وهذا خبر عن الباب
وعن معجزة داحيهه
---------------
من حرب خيبر الك اروي الاخبار
لمّن وصل جيش الرسول المختار
للحصن راد ايحرره امن الـكفار
للامه رادلهه الخير ومن الكفر يهديهه
----------------
فرسان خصص من جموع الايمان
ونصّب الأول قائد اعلى الفرسان
راح لحرب خيبر لچن رد خسران
فرسانه صارت تهجيه
وهوه الذي يهجيهه
-----------------
ونصّب الثاني انّوبه بعد الاول
ويدري الرسول بطلعته ويتأمّل
وفكرك لعد هذا الأمر لو حلل
تلگه القياده متلوگ الا لعـد راعيهه
-----------------
وراعيهه حماي الحمه وحامي الجار
ومن شاف سيد الرسل هـذا اللي صار
صاح انطي باچر رايتي للكرار
ما تحلّه الا بيمناه
ولغيره ما انطيهه
----------------
الكرار صار الجيش ينشد عنّه
ما يعرفونه وكل فرد يتمنه
هـوّه الذي مكتوبه ليه الجنّه
وحامي الحمه بهذا الحال عينه الرمد ماذيهه
----------------
وصاح الرسول ايريد حمّاي الدين
جاه الوصي الكرار عود الحسنين
وبلمسه من چف النبوه اعلى العين
بلمسه من چف المختار
لعين الوصي يشفيهه
-----------------
ورايته اتسلمهه الوصي بچفه وصاح
الله أكبر والنصـر ويّا لاح
وبفتح باب الحصن چفه المفتاح
معجزه لسان التاريخ النه بفخر يرويهه
---------------
اتلگاه مرحب للحصن لمن طب
صاح آنه مرحب بالقتال مجرّب
ليوث الحرايب منّي ما تتگرّب
ومني تهاب الابطال
حيث آنه المربيهه
----------------
شتگول يا مرحب شتحچي شتگول
هذا علي سيف الاله المسلول
عن چلمتك يا مرحب انت المسؤول
وهاك اخذ رد الكرار لچلمتك يل حاچيهه
-----------------
عود الحسن من سمع چلمة مرحب
ناده هله بسوح الحرايب مرحب
للحرب عندي صدر واسع مرحب
وبچفي وبسيف الدين
نار الكفر اطفيهه
-----------------
نار الكفر اطفيهه لاچن بالدم
واشعلهه الكم لچن ريتك تعلم
هل نار الكم تستعر بجهنّم
واليزرع الشر بإيد نيران يحصد بيهه
-----------------
آنه الذي سمّتني امّي حيدر
وغذتني أمي بلبن طاهر حيدر
دور الي بسوح الحرب لاچن حيدر
حياه سيد الاكوان
بإيحاء من باريهه
-----------------
وسل سيفه حيدر لچن لمّن سلّه
بيه چتل مرحب واخذ ثاره بچتله
ونال النصر بيده وبيه اتجله
وحقق نصر هذا الدين بيمينه وبماضيهه
----------------
والمعجزه الاُخره الجرت ويه الباب
خلاهه عل خندق جسر للاصحاب
وبيده سندهه وحيّر اهل الالباب
شلون الجسر چف وباب
يعبر الجيش اعليهه
-----------------
وتمّ النصر بل معركه للاسلام
بامر الله وبزود ابو الحمله الضرغام
وتخلّدت معجزه بطول الايّام
مفخره لكل الاجيال ** والدهر ما ناسيهه
----------------
عقيل الكاظمي / بـغــداد/
❇️ قصائد استشهاد الامام علي عليه السلام

رئيسية


صاح العدل بالمحراب فزت ورب الكعبة
وهل صوت خالد لا زال
تسمع صداه الاجيال
فزت ورب الكعبة
-----------
من بعد ما سيف الغدر * ابسجدته لحيدر صابه
صوت انتصار الحگ عِله * اعلى الباطل وأذنابه
وهل صوت للناس انبعث * من حيدر ابمحرابه
گاصـد ينبّه أمّته * لهل صوت شنهو اسبابه
مستبشر بوجه الموت إلمن توجَّه گلبه
ما أثر ابراسه اصواب
لاچن هتف داحي الباب
فزت ورب الكعبه
----------
هل صوت من حيدر ظِهَر * رايد يوعّي الأمّه
بإسلوب فكري واقعي * لهذا النقاش اتفهمه
حيدر استبشر بالأجل * والأجل چان ابعلمه
رايد يغادر دنيته * اويرحل لعالم أسمى
وهذا الأمر راد ادماه وبِدماه حيدر لبّه
وفاز ابجنان الرحمان
وتْعاله صوت الوجدان
فزت ورب الكعبه
-----------
نال النعيم السرمدي * وتنعّم ابجنّاته
ابثوب الشهاده الما حله * وما يحله غير لذاته
ويا ما سِعه وجد واجتهد * بحروبه وبحملاته
لاچنهـــه مذخوره وسعت * تتشرّف ابمرضاته
راد الشهاده ابمسعاه واهيه التفر من حربه
رادته ابمحرابه ايطيح
وبيهه ايتنعّم ويصيح
فزت ورب الكعبه
------------
هاي الاسباب الوضّحت * ليش ابو الحمله استبشر
ابيت الله طاح المرتضى * ابّيته انولد وتطبّر
ورغماً على انف الدهر * كلما مؤذّن كبّر
ابذكر الأذان ابكل فَرِض * اسمه ارتفع وتكرّر
ابمحرابه طاح الكرار واعتله ابحكمة ربه
وصوت الأذان اسمعناه
وذكره اقترن وي معناه
فزت ورب الكعبه
-------------
إلمَن توجّه حيدره * ابگلبه ولسانه و روحه
واشّاف بعيونه وسِمَع * هوّن عليه اجروحه
اتوجّه دليله الخالقه * وبعيونه المشبوحه
شاف الملايك بيه تحف * ودموعهه مسفوحه
وقائد جمعهم جبريل عينه اعلى حيدر تربه
دمعه اعلى حيدر انهار
وينادي حماي الجار
فزت ورب الكعبه
------------
وصارت عقيده ثابته * ابحبّه يقين وإحساس
وبسند عن سيد البشر * حبّه دليل ومقياس
يكشف الطاهر مولده * وابن الزنا ابين الناس
وخلي اليبغضه اعلى النسب * يسأل العرق الدسّاس
ويبقه اليحب حامي الجار يحيه ويموت ابحبه
لجله ايتحمّل أخطار
ويصرخ ابحب الكرار
فزت ورب الكعبه
-----------
عقيل الكاظمي/ بغداد
❇️ قصائد استشهاد الامام علي عليه السلام

رئيسية



صوت الوفه ابوجداني حبك جره ابشرياني
والوالد ايربّيني
والوالده اتغذيني
حبك جره ابشرياني
--------------
يا بالحسن چلمة احبك ما ضن
تكفي اوسِهام العشگ بيه ما ضن
چم عاشگ الذاب ابغرامك وانجن
وآنه الذي بهْواك گلبي اتمحّن
تاخذني نسمة حبك وتردني واصحة بدربك
وروحي الذي تدليني
والوالده اتغذيني
حبك جره ابشرياني
----------------
عشت ابغرامك يا علي وما اهتم
مهما اقاسي بحبك وأتألم
ولو صابني امن الدهر أحزان وغم
أنخاك وبإسمك يحيدر أسلم
إسمك ابطرف لساني وتعلم صدق ايماني
عاشگ انه وتدريني
والوالده اتغذيني
حبك جره ابشرياني
---------------
يا عشگ ما بين الجوانح محسوس
بل شده تحضر عندي هل شي ملموس
ما يوم شفتك بالشدايد مايوس
تحضر وضيّك ساطع ايغطي شموس
هذي عقيده بذاتي ومو واهم ابچلماتي
هذا اللي شفته بعيني
والوالده اتغذيني
حبك جره ابشرياني
-----------------
بعيوني شفتك تحضر بأي صوره
اجنود الك كل واحد ينفّذ دوره
جنودك يصيرون لمحبك سوره
ويحموه من هم الزمان وجوره
وهذا الجره ويايه بجور وهظم دنيايه
بكل معضلة تنجيني
والوالده اتغذيني
حبك جره ابشرياني
------------------
يا من گلت للي صنع انوارك
يا رب عِبَدتك عارف باسرارك
لا لجل جنتك لا مخافة نارك
وآنه اقسم بانوارك وآثارك
بحبك تراني امتيّم چي لنّه يجري اويه الدم
هذا العشگ يحييني
والوالده اتغذيني
حبك جره ابشرياني
-----------------
أي وحگ اسمك يبو حسين وسرك
اي وحگ مكنون العلوم بصدرك
حبيتك آنه وأمري طايع أمرك
اويكفيني بس عني رضاك وعذرك
أحظى برضاك الغالي وعذرك لسوء أعمالي
وهذا الامر يكفيني
والوالده اتغذيني
حبك جره ابشرياني
-----------------
عبدك أنه وانت الذي مالكني
امشاركني روحي وبالهوه مشاركني
وأصرخ باسمك يا علي أدركني
ابوحشة ظلام اللحد لا تتركني
وبيك الامل يا حيدر بالبرزخ وبالمحشر
ومن كوثرك ترويني
والوالده اتغذيني
حبك جره ابشرياني
-------------------
#عقيل_الكاظمي
❇️ قصائد استشهاد الامام علي عليه السلام

رئيسية



سودتُ صحيفةَ أعمالي ووكَلْتُ الأمرَ إلى حيدرْ
هو كهفي من نُوَبِ الدنيا
وشفيعي في يومِ المحشرْ
---------
تمّت لي بولاية حيدر النعمه * وشِفِت بمحبته خير ونِعم جمّـه
سوّدت الصحيفه بذنبي وبجرمه * وفوّضت الامور لصاحب العصمه
كهفي بدنيتي ويوم الفزع رحمه * شفيعي وبالحشر استنجد بإسمه
هل يمنَعُني وهو الساقي أنْ أشربَ من حوضِ الكوثر
أمْ يطرُدُني عن مائـدة
وُضِعَتْ للقانِعِ والمعـتَـرْ
--------
حاشا عن الكوثر للمحب يمنع * ما يمنعني وهـو للكرم منبع
بَدِر حبه بحياتي صار اله مطلع * كهفي بدنيتي ويوم الحشر مَفزع
العباده بغير حبه تضر ما تنفع * يا من تنكر آيات الوصي إسمع
إنْ كُنتَ لجَهلِكَ بالآيام جَحَدْتَ مَقام َأبي شُبَّرْ
فاسألْ بدراً وأسالْ أُحُداً
وَسَلِ الأحزابَ وسَلْ خيبـرْ
----------
يالناكر فضل حامي الحمه حيدر * مسؤول اعلى حبه بساعة المحشر
سل بـدر وأُحد والخندق وخيبر * تخبرك منهو لابطـال الحرب دمّـر
هتَف گلبي ابوداده وبالفضل كرر * يمن ليك النبي اعلى اهل الشرف أمّر
قاسُوكَ أبا حسنٍ بِسِواك وَهَلْ بالطَّودِ يُقاسُ الذَّرْ
أنّى ساوَوْكَ بِمَنْ ناوَوْكَ
وَهَلْ ساوَوا نعلي قنبَـرْ
----------
منو مثلك الهادي تباهه باوصافـه * ومنو غيرك صعد وارتقى اعلى اچتافه
وقدّم سيفك الهادي على اسيافه * وتأيَّد بيك نصره وحـقَّـقْ اهدافـه
ما ينفـع المُرجِفْ بيك إرجافه * من حيث الإله اغـمرك بالطـافـه
أفعالُ الخَير ِاذا انتشرت في الناس ِفأنْتَ لها مَصدَرْ
وَإذا ذُكِـرَ المعروفُ فمـا
لِسِواكَ بهِ شيءٌ يُذْكَـْر
----------
وبسيفك لدين المصطفى احييته * وشچـم فـارس البالحرب ارديتـه
وخيبر تشهد وباب الذي ادحيته * ابعزم چفّك حصنهه العالي هدّيته
لون عزمك هو اعلى الكون أفنيته * هضم حقّك عجيبه شلون عانيته
لَو لَمْ تؤمَرْ بالصَّبْرِ وكظْمِ الغَيضِ وَلَيْتَـكَ لَمْ تؤمَـْر
ما نال الأمْرَ أخـو تَيْمٍ
وَتَنَاوَلَهُ عنْهُ حَبْتَـرْ
--------
لو ما بالوصيّه اتچتفت يمناك * مـا عنّ الخلافـه شانئك أقصاك
لجل دينك يحيدر طلكت دنياك * الحفظ هالدين ما لحظه غفت عيناك
أوصافك يحيدر لا زِمَتْ ذِكراك * وأفعـالك حُجَجْ ألْزَمِتْ بيهه اعـداك
أفعـالُكَ مـا كانت فيها إلاّ ذكرى لِمَنِ اذَّكَّـر
آياتُ جلالـِكَ لا تُحصى
وصِفاتُ كَمالِـكَ لا تُحصَرْ
--------
آياتك عظيمه اوّاضِحَه البرهـان * حُجَج يا بالحسن صارت على الأكوان
شما رادت تنكّـل باسمك العـدوان * ذلَّتْ وانت شامخ يا لـوه الإيمان
ما بين الخلايق شانك اعظم شان * مـا ينحصـر معناك بقلم ولسان
مَنْ طَوَّلَ فيكَ مدائِحَهُ عن أدْنى واجِبها قَصَّـرْ
فاقْبلْ يا كَعْبةَ آمالي
مِنْ هَدْي مَديحِيَ ما استَيْسَرْ
--------
الفصيح / السيد رضا الهندي
والشعبي / عقيل الكاظمي
HTML Embed Code:
2024/03/29 09:43:27
Back to Top