❇️ قصائد الامام الحسن عليه السلام

#رئيسية

يا گلب زينب * حزنك روايه
صبّر جروحك * هاي البدايه
هل مصيبه بالسم * والنهايه بالدم
---------------
يا گلب الصبر لو جرحك اتفجّر
خل نبضك على الآهات يتصبّر
واذا مركب حياتك بالحزن أبحر
بعد ما ظن سواحل هل بحر تظهر
رحْلِتك صعبه * وتدري بخطرهه
هـوّن لزينب * محنة سفرهه
راح تبدي بالهم * والنهايه بالدم
---------------
يا گلب العقيله وللصبر عنوان
يا بحر الحزن متلاطم الأشجان
تهدّه وصبّر جروحك على النيران
هالليله بداية قصّة الأحزان
بالحسن تبدي * رحلة عذابك
وفرگته أوّل * خطوه لمصابك
وهالأمر تحتّم * والنهايه بالدم
-----------------
يا گلب العقيله اتصبّر اعلى الآه
إذا شفت الحسن دارت عليه دنياه
وغدروا بيه گومه والعدو اتولّاه
يوم الطف تشوف حسين بين اعداه
وحده بالغربه * تحيطه العساكر
يطلب الناصر * اولا من مناصر
وبمصيره تعلم * والنهايه بالدم
---------------
يا گلب الإبه اعليك المحن جمّه
اوبدايتهه الحسن ومصيبته وهمّه
اذا شفته ينازع من جمُر سمّه
راح تشوف بالطف حال ابو اليمه
لسهم المثلث * بضلوعه مرتع
ايهشّم ضلوعه * ومن ظهره يطلع
وضامره ايتخذّم * والنهايه بالدم
---------------
يا كَلب العقيله اصبر على الآلام
اذا شفت الحسن نعشه انرمه بسهام
خل عينك على جروح المصيبه تنام
تدري بكربله شضمّتلك الأيّام
جرح ابو محمد * گطّع وصالك
اوكربله وهمهه * يعيش ابخيالك
والحزن تجسّم * والنهايه بالدم
---------------
يا كَلب العقيله الوالَف التمحين
على مصاب الحسن صبّر دموع العين
وبالطف لمّن تصيبك رِماح البين
تنخّه بالحسن وابچي المصاب حسيـن
يالحسن وينك * عن هالمصيبه
الغسّلك بيده * جثته تـريبه
ويا مصيبه أعظم * والنهايه بالدم
---------------
عقيل الكاظمي / بغداد


مدونتي   youtube   instagram   facebook  telegram

❇️ قصائد الامام الحسن عليه السلام

#كعدة



ما تساوم عالعقيده * وللظلم متصافح ايده
انت للأمة الضمان * وانت صمام الأمان
ما تساوم عالعقيده
--------------
يبن نور الله التجله * لموسى بن عمران عالطور
الشمس من ضيك خلقهه * الخالق والهه اقتبس نور
واجعلك عل كون آيه * بيك يمحي ظلمة الجور
ولمَّن يِمِس دينك خطر * بروحك ترد عنه الضرر
بيك النصر بيك الظفر * بل حرب والسلم منصور
ربك يبارك جهودك * سالم الدين بوجودك
ما يمر بيه الهوان * وانت صمام الأمان
ما تساوم عالعقيده
----------------
انت ريحانة محمد (ص) * رحمة الخالق المعبود
حدّث القرآن عنّك * بذكر ما ينرادله شهود
انشئت في بيت الفضائل * كل فضيله لشخصك تعود
حكمه وشجاعه ومعرفه * والكرم عندك والوفه
والسيرته بهاي الصفه * منهو غيره لأمّته يقود
صورة من جدك محمد (ص) * ومعدنه بشخصك تجسّد
جسّدت أعظم كيان * وانت صمام الأمان
ما تساوم عالعقيدة
--------------
يا مُعزّ المؤمنين و * يا مذل أعداء هل دين
أسد باسل بالمعارك * شاهدك سوح الميادين
حسين چان يسار حيدر * وانت چنت يمين ابو حسين
واللي عمه عيونه الجهل * عن سوح عزمك لو سأل
عندك مواقف مو جُمَل * بالجَمل وبيوم صفين
صارمك قدم مناهج * خطهه برگاب الخوارج
بحرب يوم النهروان * انت صمام الأمان
ما تساوم عالعقيدة
--------------
ومن بعد ما راح حيدر * جرَّدِت عل فتَن بتار
لجل حقك بالخلافه * لا تغصبه گوم الاشرار
او تحكم الأمه عصابه * ظالمه بالسيف والنار
حشّدِت جيشَك يل حسن * لاكن انصارك بالمحن
ركبوا على امواج الفتن * والشرف بَدلوه بالعار
باعوا الحق والقضية * واشتروا حكم آل امية
والزمن شاهد عيان * انت صمام الأمان
ما تساوم عالعقيدة
-----------------
يل حسن ضاعت جهودك * بين جاهل بين خوّان
صادروا حق آل طه * وسلّموه لآل سفيان
اتخيّرِت صلح الأعادي * بدل ما تنزل الميدان
صالحِت بس ما داهنت * لهل الغدر ما أذعنت
همّه اللي خانوا ما خِنت * واجهت موقف الخذلان
موقفك للحق دعاهم * بهل صلح تحقن دماهم
وخصمك لكل عهد خان * وانت صمام الأمان
ما تساوم عالعقيدة
----------------
حاربوك بكل وسيله * ومنهم اتحمّلِت آلام
من بعد طعنة الخِنجر * صوبوا گلبك الظلّام
گطّعوا چبدتك بالسم * والنعش صابوه بسهام
هذي مراسيل القدر * نزلت على نعشك مطر
عِرضَتلك من الطف صور * نحر دامي وجمرة خيام
بالحقد ضيعوا رشدهم * وتستمر جمرة حقدهم
وباقية لهذا الزمان * وانت صمام الأمان
ما تساوم عالعقيدة
---------------
عقيل الكاظمي / بغداد


مدونتي   youtube   instagram   facebook  telegram

❇️ قصائد الامام الحسن عليه السلام

#وزن #نصاري


مصابك يالحسن طر مهجة الدين
اوبچت من دم عليك اليوم كل عين
----------
عليك العين تبچي اوتون كـل روح
مثل نوح الثكالى لفگـدك تنوح
اونِزَف گلب المحب آهات وجروح
يَمن جَرِّحَتْ چبدك شفرة البين
-----------
عليك غيوم دهرك مطرت اسهـام
شفِت بغياب جدك غصص وآلام
من بيض الليالي لسود الايـام
وأوّلهه بفگد سيّـد الكونين
---------
وثانيهه غصُب حگ الولايه
وثالثهه كسر ضلع الهـدايه
والرابع هوه سيـف المنايه
اوجِسَم راس الوصي الكرار نصّين
-----------
والخـامس فطـر گلب الديانه
اوصِدَع رُكن الهده وهدّم كيانه
يوم اللي نِفَذ سم الخيانه
ابچبدك وانصدع بي چبد ياسين
----------
شفت من دنيتك چم لوعه ومصاب
حِسَبنه اهمومك احنه وتاه الحساب
حِسَبنه ابنعشك اشكم سهم وصواب
اولگينـه مـن سهام الحقـد سبعين
-----------
چبدك يل حسن بالسم تخـذّم
وسْهام النعش هم تنزِف وغـم
وبنفس الحقد گبـرك تهدّم
ونفسَه الهِدَم گبر العسكريين
----------
ذِكَرنه امصابك وجمرتنه تلهب
جِرَت دمعتنه ويّه دموع زينب
اويه زينب نزلت الاملاك تنحب
اونِزَل جبريل يمسح دمعة حسين
----------
عقيل الكاظمي / بغداد


مدونتي   youtube   instagram   facebook  telegram

❇️ قصائد الاربعين

#رئيسية



رجعتي من اليسر لارض المدينه
ودليلچ ما طفت جمرة ونينه
بگلبچ يل عقيله هموم من فگد الاهل لليوم
دليلچ ما طفت جمرة ونينه
---------
رجعتي لديرتچ يا زينب من الشام
وما خمدت بگلبچ جمرة الآلام
طلعتي امن الوطن محروسه بالاكرام
لچن من عگب اخوتچ دارت الأيام
ورجعتي بروحچ جروح المصيبه
يزينب واسمچ الحره الغريبه
وعليچ النايبات اتحوم من فگد الاهل لليوم
دليلچ ما طفت جمرة ونينه
---------
يمن بيچ الخدر يا زينب اتخدّر
ومعاني العفة باسمچ أصبحت تفخر
حتى الريح چان بثايتچ لو مَر
برماح الهواشم چان يتعثر
عجيبه ودارت اعليچ الليالي
وصفيتي بغربتچ من غير والي
وحيده والگلب مهضوم من فگد الاهل لليوم
دليلچ ما طفت جمرة ونينه
---------
شفتي من اليسر ما شفتي من شدّات
وحملتي يل عقيله ابدنيتچ لوعات
واشد محنة يزينب نظرة الشمات
حملتيهه وجذبتي من الهضم حسرات
رجعتي وشفتي الديار الخليه
عليهه انرسمت علوم المنيه
ابمبانيهه الحزن مرسوم من فگد الاهل لليوم
دليلچ ما طفت جمرة ونينه
---------
لديار الاهل رديتي شتشوفين
لا بدر الهواشم لا اخوچ حسين
من عگب اخوتچ هم بعد تغفه العين
بالهم والمناحه اعلى اهلچ تظلين
اوتگضّين العمر بالحسره والنوح
وانتي اللي كتمتي بگلبچ جروح
دموعچ تظهر المكتوم من فگد الاهل لليوم
دليلچ ما طفت جمرة ونينه
---------
كتمتيهه ومثل صبرچ ابد ما صار
حبستي دمعة عيونچ عن الأنظار
وبگت عبرات صدرچ مثل جمر النار
نزفتيهه يزينب عد مباني الدار
حبستي دموع عينچ حدر الضلوع
ولاچن من جرت ما صبّت دموع
صور عن محنتچ وعلوم من فگد الاهل لليوم
دليلچ ما طفت جمرة ونينه
---------
جريتي دموع من دلالچ وهضمه
لمّن شفتي دارچ موحشه وظلمه
ذكرتي حسين ظل بكربله جسمه
وهذا الحال اصبح عگب اليمه
مظلمه الدار من بعد الاماجد
وتظل لخيالهم عينچ تشاهد
مسهره وما لفاهه النوم ** من فگد الاهل لليوم
دليلچ ما طفت جمرة ونينه
---------
عقيل الكاظمي


مدونتي   youtube   instagram   facebook  telegram

❇️ قصائد الاربعين

رئيسية


أبعث سلامي اويه الريح * لزينب وهي بغربتهه
يواسيهه فيض دموعي * ومحنيه تبقه ضلوعي
لزينب وهي بغربتهه
-----------------
يا أجل واعظم قائدة تمّمت نهج الثوره
عِلنت حربهه اعلى الظلم حامله لأقدس فكره
رفعت لواء المبدأ اليحيي النفوس الحره
وشنّت الحرب الدامية وتعلم هيَ المنتصره
سيف الصبر بيديهه * ثوب الخدر لامتهه
واهيه وحيده بهل حال * وانحنت كل الأبطال
لزينب وهي بغربتهه
-----------------
كل الابطال الهه انحنت تقتبس منهه الهمه
واجب على اتراب الأرض يسجد لعد كل قمّه
ولمّن مشت لارض الحرب لحسين گصدت جسمه
طلعت بليل امن الخيم ابهمة گلبهه وعزمه
ما هابت وجيش الگوم * منذهل من هيبتهه
ما يدري يتوجّه وين * وانجسم طايع نصين
لزينب وهي بغربتهه
----------------
طلعت امن اخيام العُلا لجسم المجد مگصدهه
عل خطر تمشي وما أظن جيش الأعادي ايردهه
رفعت نحر سبط النبي لجل الإله ابيدهه
وقدِّمت قربان الوفه أغلى وأعز ما عدهه
وبكل صلابه وإيمان * تتراجع لخيمتهه
وتحامي رضعان حسين * والعايلة تدير العين
لزينب وهي بغربتهه
-----------------
تالي يخليهه الدهر من ديره تمشي لديره
لمجلس يزيد الطاغية وبكل إهانة تثيره
وهذا الدعي مو مبدأي ولا شرف عنده وغيره
شنهو اليردعه عن قتلهه وليش يبقه ابحيره
هذا الأمر بيه تنبيه * عن عظم شخصيتهه
وانفضح ما بين الناس * ايزيد وصبح محني الراس
لزينب وهي بغربتهه
-------------------
سادة الوادم والشرف هامه لشرفكم طأطأ
ونور النبوه لمعدنچ چاسيه من المنشأ
بثوب الجلاله اموشّحه وبيدچ لواء مبدأ
ومهما بلغ جور الخصم يخسه الخصم يتجرّأ
ورجعتي مرفوعة راس * والعايله ابعزتهه
احفظتي الحرم والايتام * ما فلح جور الظلام
لزينب وهي بغربتهه
--------------
چنّي أشوفچ گاصده * لطف كربله اوّاديهه
أولا فرد عگب الفاجعه من الأهل ظل بيهه
جيتي وإلچ شكوة گلب من الهضم تبديهه
ودمعات محبوسه ابجفن بس لخوتچ تجريهه
لو جيتي والبُشرى اوياچ * للضحّت لنهضتهه ؟
ابيمنتچ راية احرار * وبالشام ظلت آثار
لزينب وهي بغربتهه
-----------------
يا أوّل اول ثائرة اتهاجم الجور ابداره
ويا آخر آخر صابره اتبرّد گلبهه بناره
يا ظاهر الحق والعدل يا شارحة أفكاره
يا باطن الثوره الحِوَت نهج الإبه وأسراره
من موطني لأرض الشام * من مهجتي ولوعتهه
أهدي سلامي امن الروح * وي دمع عيني المسفوح
لزينب وهي بغربتهه
--------------
عقيل الكاظمي/ بغداد


مدونتي   youtube   instagram   facebook  telegram

❇️ قصائد الاربعين

رئيسية



يا بحر الكرم والجود * يا شبل حيدر * يا منبع وفه وعفه
يا من بزودك للعيلة اكفلتهه
وتوفي بعهودك يا من عاهدتهه
****
امن اليسر للطف عوّدتك * بت حيدر وعيلتهه
ومن وصلت لطف كربلة * وشافت گبور اخوتهه
ركضت لصوب المشرعه * بلهفه وتهل دمعتهه
راحت يم گبر عباس *** زينب رادت تشوفه
وتنشده العده بيا سيف *** گدرت تگطع چفوفه
وچيف تصوّب بعامود * وسهم المگدّر * لعيون الفخر طفّه
شاهدت گبره وتوجّر گلبهه
وصاحت بعبره تبديله عتبهه
يا بحر الكرم والجود * يا شبل حيدر * يا منبع وفه وعفه
*****
صاحت بعبره تعاتبه * والعتب هيّج آلام
حيث بدموع العاطفه * تذكّرت اجمل ايام
مرت عليهه ويه الگمر * واصبحت شبه الاحلام
تگلّه يا گمر دنياي *** والصوت بعتب دوّه
تريد اتذكره بايامه *** اوتِحَشمه بچلمة الخوّه
يا غيره وشهامه اوزود * او عزِم ما يفتر * يا موت الوغه وحتفه
يا من بحربك تتجلّه البساله
ومن عطف گلبك ضي وجهك تلاله
يا بحر الكرم والجود * يا شبل حيدر * يا منبع وفه وعفه
*****
عباس يا رب الوفه * ونور الكرامة اليزهر
هل يوم اذكرك بالمُضه * اوّاجب يحُر تتذكر
ومن العتب تعرف الم * جمرة دليلي التسعر
تذكر من چنت وياي *** يا خويه وتباريني
ومن زغرك ابچف يمناك *** تِنَشف الدمعه من عيني
وهمّي لو عليه ايعود * لشخصك اتصوّر * ابلهفة گلبك وعطفه
مجبل اعليّه وثغرك لو تبسّم
بنورك وضيّه عني ينجلي الهم
يا بحر الكرم والجود * يا شبل حيدر * يا منبع وفه وعفه
***
وآنه يبو فاضل چنت * بنظرة حناني أبراك
ولو طحت مره اعلى الارض * بلهفة گلب أتلگّاك
وأمسح بأيدي هامتك * وعليك احنّ وأرعاك
وعيني تهل گبل عيناك *** لو دمعتك تهملهه
وچنت بكل أحاسيسي *** لچفوفك اقبّلهه
وحرصي ظل عليك يزود * واصبحت تُكبر * يا معدن صعب وصفه
او تنظُرك عيني چاسيني ابحنانك
ابعز تخلّيني مامونه بأمانك
يا بحر الكرم والجود * يا شبل حيدر * يا منبع وفه وعفه
****
اتراقبني خويه ابنظرتك * من زغرك وتبراني
ما تقبل اهمل دمعتي * بعين العطف ترعاني
وآنه من اشوفك تنجلي * عن گلبي كل احزاني
وهذا الامر بي أسرار *** ما أعرف خفاياهه
الّا بيوم ابو الحسنين *** ايدك بيدي خلاهه
اوّاعَدْته تِحامي حدود * خيمة الخِدّر * وهوّه لشخصك ايعرفه
عودك ايريدك تبذل اقصى جهدك
بيدي حط إيدك ويدري اتوفّي عهدك
يا بحر الكرم والجود * يا شبل حيدر * يا منبع وفه وعفه
****
والنعم وفّيت الوعد * ما قصّرت ويايه
لاچن چفوفك من هوت * عل ثره ابكتر الرايه
جارت وجيتك اشتكي * جور وهضم دنيايه
ها ها يا رفيع الشان *** ها يا خدري المرتب
لازم ترد ليّه اجواب *** وتْريّح گلب زينب
ردتك ترد بيّه اردود * لچن ما تگدر * يا وسفه والف وسفه
بشيمتك جينه وبعطفك تلمنه
گوم رد بينه وهوّن من ألمنه
يا بحر الكرم والجود * يا شبل حيدر * يا منبع وفه وعفه
****
عاتبتك وأدري العتب * ايهيّج ابگلبك نارك
لاچن عليمن عتبي لو * گبرك حجب أنوارك
وانت اخويه البل گلب * ما تنمحي آثارك
وعهد الخوّه يا عباس *** تعرف انت تقديره
خلّاني افكّر بيك *** وصار بفكري تأثيره
حيف اللحد يحجب طود * وبدرك اليزهر * گبرك يگدر يخسفه
جروحي تتصبّر بلكن صبري يجدي
لجيتك اتنطّر ودموعي اعلى خدّي
يا بحر الكرم والجود * يا شبل حيدر * يا منبع وفه وعفه
******
عقيل الكاظمي / بغداد



مدونتي   youtube   instagram   facebook  telegram

❇️ قصائد الاربعين

رئيسية



بجور الأيام * وهموم الشام
رديت آنه وأيتامي جيت اشكيلك آلامي
وهموم الشام
-------------
يحسين بهمي وأحزاني * يم گبرك جيت * وباسمك ناديت
أرويلك لوعة أشجاني * وكل ما عانيت * وتسمع يا ريت
نورك من فارگ صيواني * أنحب ظليت * يل ما رديت
عفت الأطفال ورضعاني * وليك اتعنّيت * ولجلك ونيت
جيتك يحسين * بدموع العين
وتمشي اعلى الموت جدامي جيت اشكيلك آلامي
وهموم الشام
-------------
لمن شفتك طايح مرمي * ابحِجر الآجال * اگطعت الآمال
ردّيت وأشعر يبن امي * جبال الأهوال * بيهن زلزال
وانحدرت خويه اعلى اخيمّي * بهموم اثگال * وشفت بهل حال
دهري وجيش اعداي وهمّي * وخيل الأنذال * تسحگ أطفال
وسط الصيوان * خيل العدوان
ومن شبّت نار اخيامي جيت اشكيلك آلامي
وهموم الشام
--------------
ولمن جنّ الليل ابهَمّه * جيت بوجدان * يسعر نيران
همومي الما تنعد ملتمّه * وشفت الأحزان * بدرب الميدان
شفت القاسم طاحت يَمّه * شمعة شبّان * بين الأبدان
والأكبر ذبلت يم جسمه * زهرة إيمان * فوگ التربان
بعين الإحساس * شفت العباس
حاضن زهرة أحلامي وجيت اشكيلك آلامي
وهموم الشام
--------------
جيتك والمدمع متناثر * واشرح آلام * گلبي المنضام
لا ظل سور ولا ظل ساتر * لا عدنه اخيام * يبن الأكرام
محتارة ومكسورة خاطر * بجور الأيام * واحرس أيتام
خويه وباچر ضعني يسافر * بين الظلام * لبلاد الشام
إنت اعلى ارمال * وآنه بهل حال
ولا واحد عني يحامي جيت اشكيلك آلامي
وهموم الشام
--------------
يم جسمك نامت آمالي * وشلت الآهات * بفيض الدمعات
وبارض الشام لگيت گبالي * موج النكبات * واحمل لوعات
ريتك حاضر تنظر حالي * بين الشمّات * أجذب حسرات
ابقصر الظالم شفت آجالي * وسيل العبرات * يِنشف هيهات
والظالم صار * يبن المختار
يضرب راسك جدامي جيت اشكيلك آلامي
وهموم الشام
-------------
جيتك وجروحي تدليني * خويه وأنخاك وگلبي تعنّاك
أتعثر بهموم سنيني * ولوعة دنياك * وابچي لفرگاك
وكل دمعه السالت من عيني * رسمت ذكراك * تجري وتنعاك
للموطن منهو ايودّيني * أمشي اويه اعداك ؟ * وانت بمثواك
شتگول بهاي * يا سور حماي
عگبك دارت أيامي ** جيت اشكيلك آلامي
وهموم الشام
---------------
عقيل الكاظمي/ بغداد


مدونتي   youtube   instagram   facebook  telegram

❇️ قصائد الاربعين

رئيسية



إسمعْ يا يزيدْ ذا صوتُ الشهيدْ
لن تمحو ذكرَنا ولن تُميتَ وَحيَنا
ذا صوتُ الشهيدْ
-------------
وگفت شامخة بوجهك * وهدمت عرشك وحُكمك
وصاحت صوت كِد كيدك * وإسعه سعيك بظلمك
إسمنه يشرف التاريخ * وعار اعلى الزمن إسمك
طموحك چان قتل الدين * وبالطف حقّقِت حلمك
أدْمَيْتَ النحورْ أحرَقْتَ الخدورْ
غيَّبتَ بدرَنا ولن تُميتَ وَحيَنا
ذا صوتُ الشهيدْ
-------------
اشكثر يا طاغية عصرك * من بيتي اذبحِت شبان
وسيدهم حسين الظل * ذبيح اعلى الترب عطشان
تظن روح العقيدة تموت * من يتمزّگ القرآن
ظنك خاب يا ظالم * واهم فكرك وغلطان
إبليسُ اشتراكْ للظلم اصطفاكْ
أمعنتَ غدرنا ولن تُميتَ وَحيَنا
ذا صوتُ الشهيدْ
---------------
آنه زينب وصوتي * يوصّل صرخة المظلوم
اوخلهه تسمع الحكّام * عرش الطاغية ميدوم
خلي اليحكم اعلى الناس * يِحْذر ثورة المحكوم
الدنية فانية وميدوم * غير الواحد القيوم
أنتَ للفناءْ نحنُ للبقاءْ
إنْ تُبْدِ أسرَنا فلنْ تُميتَ وَحيَنا
ذا صوتُ الشهيدْ
------------
زينب هذي صرختهه * اوصداها لهل وكت لازال
اوصرنه بكل زمان نشوف * هاي الصرخه واقع حال
إسم حسين ظل خالد * نشيد تردّده الأجيال
عرشه بكل گلب ساكن * وعرشك ضمّته الآجال
فلْيحيا الحسينْ رمزُ الثائرينْ
قارعتَ أمرَنا ولن تُميتَ وَحيَنا
ذا صوتُ الشهيدْ
--------------
ألفُ وثلثمية عام * ولازال المصاب جديد
وذكرك باقي باللعنات * وذكر حسين بالتمجيد
انذبح عطشان حتى تظل * ترفرف راية التوحيد
ظنك ينمحي إسمه * لاچن هل مَنال بعيد
أهْرَقتَ دِماهْ لكِنَّ الإلهْ
حقَّقَ نصرَنا ولن تُميتَ وَحيَنا
ذا صوتُ الشهيدْ
---------------
دماء أنصار ابو السجاد * تصنع كل زمن أنصار
وسلالة حقدك وظلمك * أصْبح داعش الغدار
أنصار الحسين تموت * على درب وخطى الأحرار
وداعش يصنع الإرهاب * متلبّس ثياب العار
صنّاعُ الدمارْ أعداءُ النهارْ
لنْ تُخفي فجرَنا ولن تُميتَ وَحيَنا
ذا صوتُ الشهيدْ
----------------
عقيل الكاظمي / بغداد

❇️ قصائد الاربعين

نزلة



يا كعبةَ اليقينْ نهتفُ يا حُسَينْ
------------
جيناك يا مظلوم مشاية
تمشي مهجنه وحبك الغاية
ومثل الگصد للعلگمي ومايه
نرفع الك يحسين هالراية
بِسمِكَ كلَّ حينْ نَهتِفُ يا حُسَينْ
------------- 
جيناك بالهم والگلب عازم
نضحيلك الدم والثغر باسم
ايوذرنه سيف الوذر القاسم 
وباري العباد بهالعشگ عالم
بلهفةِ الحزينْ نهتفُ يا حُسينْ
-----------
جيناك نرخصلك دمه المنحر
ميهمنه نحيه نموت نتفجر
نواسيك بمصيبة علي الأكبر
وعن مبدأك هيهات نتغير
والعزمُ لا يَلِينْ نهتفُ يا حُسينْ
----------
يحسين اجينه اليوم زوارك
وذابت مهجنه ابسچة اخطارك
نضحي مثل ما ضحت انصارك
ونترجه يوم الناخذ بثارك
لو قُطِعَ الوتينْ نهتفُ يا حُسينْ
-----------
جيناك مشاية بگلب يلهب
بكل خطوة يحسين الدمع ينصب
ويم گبرك نتاني ضعن زينب
ننشدهه وين الخدر المرتب
بالدمعِ والأنينْ نهتفُ يا حُسينْ
----------
جيناك نبچيك بدمع هامل
عرفناك حر وموقفك باسل
عدنه عهد وياك متواصل
عالحگ أبد منجامل الباطل
باللهِ نستعينْ ** نهتفُ يا حُسينْ
---------
عقيل الكاظمي / بغداد

❇️ قصائد الاربعين

رئيسية


هاك  استمع نوحي * هاك احسب جروحي
شفت اشكثر آلام * من كربلة والشام 
--------------
يخويه امن اليسر جيت بگلب يلهب
زينب آنه وانت اللي اتعرف زينب
بيه جروح ابد ما بطّلت تنحب
وبجفني نزف آهات ما ينضب
واحزاني ما تنعد * يا خويه يمحمد
وبيا وكت أنضام * من كربلة والشام
---------------
بدموع العتب أرويلك الأخبار
بوادي كربله ما تدري بينه شصار
يمحمد وگف سبط النبي محتار
وحيد بحومته ولا أخوه لا أنصار
ريتك چنت حاضر * لمن طلب ناصر
وتوجّهتله اسهام * من كربلة والشام 
--------------
انت الچنت سيف المرتضى ويدّه
عنِ الحسنين يدفع بيهه كل شده
ألف يا حيف يغفه سيفك بغمده
واخوك حسين ما بين العده وحده
ريتك چنت يمه * وتشاركه ابهمه
اعليه جارت الايام * من كربلة والشام  
---------------
لو حاضر چنت لحسين وتعينه
على ايساره الگمر وانت على يمينه
ما نامت على راس الرمح عينه
ولا خيل العده طبّت صواوينه
حسين انذبح ضامي * واحترگت خيامي
وانهارت الاحلام * من كربلة والشام
-------------
يمحمد وصار الما يمرّ ابّال
أنه الما چان ينشاف لخيالي خيال
شافوني أسيره امچتفه بحبال
وراس حسين اخويه برمح بيد انذال
فوگ الرمح راسه * وتتلاهب انفاسه
لمصيبة الايتام * من كربلة والشام 
------------
وبهاذي رَجِعتي امن السبي وهَمّه
شفت دار الأهل عگب الأهل ظلمه
البهجه امطشره ، والوحشه ملتمه
بدار حسين ، كل شي يلهج بإسمه
بس الحزن بيهه * من عگب اهاليهه
ومنكّسه الأعلام * من كربلة والشام  
--------------  
عقيل الكاظمي / بغداد

❇️ قصائد الاربعين

رئيسية


زينب تنادي * يا چتيل العبره
يحسين الك من اليسر ردينه * يا چتيل العبره
----------------
يحسين اجيت بأشد واصعب حاله * وانت تعلم بيهه
وشكوتي امن آلام الدهر واهواله * بس الك أبديهه
يحسين اجيت ودمعتي الهماله * امن الگلب أجريهه
يل چنت دومك * من تهلّ دموعي
اتگلي المثيلچ صعبة تهمل عينه * يا چتيل العبره
----------------
يل چنت تمسح دمعتي بيمينك * وهامتي باليسرة
يحسين عگبك حرگوا صواوينك * وجمره زادت جمره
وحال اليسر يا خويه بيني وبينك * وعفتك اعلى الغبره
وعل رمح راسك * وآنه يشتد عزمي
لمن اشاهد راسك يبارينه * يا چتيل العبره
-----------------
رحنه بيسرنه واليسر أصعب صار * عل حرم باخطاره
وتذكرت خويه الضعن لمن سار * ابطلعته امن دياره
والضعن جدد مشيته بل أخطار * ومثل ليله انهاره
ريتك تشاهد * باليسر حالتنه
وبمجلس ابن زياد من طبينه * يا چتيل العبره
----------------
يحسين اريد اختصر كل هل آلام * و أرد اصل للغاية
يحسين يا خويه اثبتت بارض الشام * او رَف عليهه لوايه
وقسمت بسمك ما تذلني الايام * وبيدي أرفع رايه
ورفعت راية * گمر هاشم بسمك
بمجلس يزيد وعلت بيني وبينه * يا چتيل العبره
----------------
وِرْجعت خويه ابعزتي ومنتصرة * وشوگي ليكم ردني
رحت لگمر هاشم مشيت لگبره * والألم يضهدني
جيت آخذ چفوفه وأرد للزهره * وامك تواعدني
تحمل چفوفه * وتِگف يوم المحشر
تطلب بثار الكافل وچفينه * يا چتيل العبره
-----------------
جيتك عگب ما عفت كافل ضعني * أشتكيلك حالي
يحسين صوبني الدهر وفجعني * وانفطر دلالي
نفس المصاب اللي جره وروّعني * دهري عاده گبالي
طبرة عضيدك * مثل طبرة عودك
وبگيد ابوك لشبلك مگيدينه * يا چتيل العبره
------------------
عقيل الكاظمي / بغداد

❇️ قصائد الاربعين

رئيسية



آه    من گلب زينب آه
آه   واحنه نصرخ وياه
آه     يا جرح ما ننساه   يا مظلوم
-------------
اجينه وعدنه لهفه تسابگ الريح
وشوگ البينه ما يحتاج تصريح
وصلنه لكربله وجمرتنه تلهب
بلكي نشوف ضعن الحره زينب
اوشفناها وسمعنه صوتهه يصيح
جيت     جبت الاحزان وجيت
جيت     امن الدمع ما مليت
جيت     وما نسيتك والله  يا مظلوم
-------------
فتحنه صفوفنه لركب السبايه
نشوف الضعن وين يصير رايه
ابكثر ما بيه من هيبه وقداسه
رجع رغم اليسر مرفوع راسه
لاچن للحزن رافع الرايه
راد   هل ضعن يمك راد
راد   ذكرياتك تنعاد
راد    لمرقدك يتعناه   يا مظلوم
--------------
تعنت ليك نبراس الهواشم
ابملامحهه الدهر من حزنه راسم
يمك هاجت اعليهه المواجع
وبدت تنعاك وتهل المدامع
وبدينه وياهه ننصبلك مآتم
نوح     وارتفع صوت النوح
نوح     وكل گلب بيه جروح
نوح    لمذبحك ظل ينعاه   يا مظلوم
---------------
وگفنه ابين ناعي وبين شاعر
نصبنه للحزن لجلك منابر
وبدت تتناثر حروف المصيبة
دمعه اعليك دمعه اعلى الغريبه
وابد ما طابت جروح المشاعر
هام     كل حرف باسمك هام
هام     بالحزن والالام
هام     يللي جرحك سواه    يا مظلوم
-------------
سكتنه وكل گلب گال اليريده
لحد ما بالشعر خلص رصيده
اوردنه نشوف زينب لمن تنعاك
بسمك صاحت ومن حان ذكراك
بدت تنعاك كل دمعه بقصيده
راح    كل فرح بعدك راح
راح    ولا أمل عگبك لاح
راح    وانت فگدك أرداه     يا مظلوم
--------------
حزينه وعل مناحه تعلم النوح
غريبه وللجروح تزيدهه جروح
آ يحسين صاحت واعتله الصوت
ونت ونَّه حلّ اگبالهه الموت
حضرهه الموت بس ما طلعت الروح
مات    صبري من بعدك مات
مات     أنسى جرحك هيهات
مات    گلبي لو ما ذكراه     يا مظلوم
-------------
عقيل الكاظمي / بغداد

❇️ قصائد الاربعين

رئيسية


لِفَت من اليسر مهضومه زينب
تشاهد چم گبر مهضومه زينب
بمصايبهه ومحنهه رجع للطف ضعنهه
تشاهد چم گبر مهضومه زينب
------------
ابمُصايبهه وألمهه * ضعن زينب رجع للغاضريه
بيتاماهه وحرمهه * يسيره وگطعت افجوج الرزيه
المجد رافع علمهه * على بيوت الرساله الأحمديه
الدهر جار وهضمهه * ودعاها ميسرة گوم آل اميه
ورجع بيهه الضعن مهضومه زينب
غريبه بلا وطن مهضومه زينب
ومنو ايردهه لوطنهه رجع للطف ضعنهه
تشاهد چم گبر مهضومه زينب
------------
اگطِعَتْ درب المخاطر * حزينه ونزلت بوادي المناحه
وغِدت تشبح نواظر * على البدر الذي اتغيّب صباحه
عل بدور الزواهر * تحجِّب كل بدِر غيمة جراحه
ونزَف سيل المشاعر * عليهم والگلب أعلن نياحه
تدوّرعن أثر مهضومه زينب
على بدور الفخر مهضومه زينب
انگطع منهم مضنهه اورجع للطف ضعنهه
تشاهد چم گبر مهضومه زينب
-------------
تدَور اجسوم اهلهه * لِگت بس القبور اتدل عليهه
طفت شمعة أملهه * وبگت نار الهضم دوّايه بيهه
حزينه الهم ذهلهه * ومشت لگبـور اهلهه تعتنيهه
وتعنت للكفلهه * وتكفكف جاري دمعتهه بإديهه
تعنّت للگمر مهضومه زينب
تخبره بيا خبر مهضومه زينب
تريد تخبره عنهه رجع للطف ضعنهه
تشاهد چم گبر مهضومه زينب
--------------
تعاتب والدمع هل * واذا مو للگمر إلمن تعاتب
وهو البيهه تكفل * اوتگله تكفّلت يبن الاطايب
الضعن باسمـك تكلل * وجبتنه بشيمتك لارض المصايب
ابوجودك حاشه ننذل * وبگينه بغيبتك بين النواصب
الگمرعنهه ارتحل مهضومه زينب
على البدر الإفل مهضومه زينب
تريد تسَمعه ونهه رجَع للطف ضعنهه
تشاهِد چم گبر مهضومه زينب
----------------
رحِت واحنه ضمايه * وردت من جودك تروّي ضمانه
وصرت بدر الضحايه * وعلى الشاطي وگع يمك لوانه
عسى سهم المنايه * گبل ما صابك بدالك رمانه
ونشف هل شاطي مايه * ولا يحرمنه منك يا حمانه
مدامعهه تسِح مهضومه زينب
بگلبهه شكم جرح مهضومه زينب
المصـايب ذوّبنهه ورجع للطف ضعنهه
تشاهد چم گبر مهضومه زينب
--------------
مشت عن ابن ابوهه * وتعنّت تنتحب عِد ضنوة امهه
هوت يم گبر اخوهه * ابو اليمه وغدت تشرح هضمهه
تگلّه اختك ولوهه * ابيسرهه وما رحم بيهه خصمهه
الاعادي استوحدوهه * وسافه وجثتك گبرك يضمهه
مشت عنك غصب مهضومه زينب
وحيده وبل غرب مهضومه زينب
النوايب يسّرنهه رجَع للطف ضعنهه
تشاهد چم گبر مهضومه زينب
--------------
عقيل الكاظمي / بغداد

❇️ قصائد الاربعين

رئيسية



يا وطنّه * رد ضعنّه
عفنه الأهل صرعه * بارض الغاضريه
-----------
لاحت مفاوز يثرب بعيناها
وشارف ضعنهه يوصل لسُكناها
هاي العقيله والحرم وياها
وكل بقعه من ارض الوطن تتناها
ومن شافت الحرة مدينة طه
نور النبوّة امن البُعد حيّاها
وحنّت الهه * بيوت اهلهه
وناعيهه ظل ينعه * بارض الغاضرية
------------
ارض المدينه ابتشرت بشوفتهه
لاچن تعاله ونينهه وحسرتهه
شافت ضعن زينب خله امن اخوتهه
وظلت تناشد عن سبب غيبتهه
ونّت الحُرّه وصاحت بعبرتهه
عفت اخوتي نومه بحجر غربتهه
چف اجلهه * ابدم غسلهه
وحالي اختلـف وضعه * بارض الغاضرية
-------------
إلمن تعالت يا وطن هل حسره ؟
لحال الحرم للشام راحت يَسره ؟
آنه الشفت بالطف مصايب كثره
لو عل جبل تهدم ثوابت صبره
اوّلهه ساعات الوداع المُرّه
اوداع الاهل ما بين حُرّ وحرّه
ودعتهم * وفگدتهم
شمعه بأثر شمعه * بارض الغاضريه
-------------
وشفت اخوتي صرعه اعلى وجه التربان
وسيّدهم حسين الذبيح العطشان
لثمت مناحرهم سيوف العدوان
وصدورهم صارت هدف للمُرّان
ظلوا ضحايه بلا غسل لا اجفان
بدمهم غسلهم والچفن بالتربان
وضاع املنه * و روس اهلنه
عل رمح مرتفعه * بارض الغاضرية
--------------
رِحْت وبواسل غالب اتحف بيه
ردّيت وانه اعلـى الهِزل مسبيه
چان الگمر يكشف همومـي بضيه
عفته جسد يم رايته المطويّه
وحسين يغمرنـي بكرامة فيّه
مگطوع راسه وجثته مرميه
گلبه ضامي * جسمه دامي
ريحانة البضعه * بارض الغاضريه
--------------
جيت وجبت ويّاي كل آلامي
وهموم دلالي الحزين الدامي
چا وين جدي يشوف حال ايتامي
وحيدر ابويه يگوم عني يحامي
وامّي الوديعه تشوف جور ايامي
والحسن يحضرني ويِعدّ اسهامي
جفني ساهر * دمعي هامر
وما نشفت الدمعه * بارض الغاضرية
-------------
عقيل الكاظمي / بغداد

❇️ قصائد الاربعين

رئيسية



زاير بهل يوم اجيت * وبطريق الحگ مشيت
جيت يوم الأربعين * اهتف بصوتي الحزين
يا حسين
--------------
زاير بهل يوم اجيت اويه الحشود
وحشّدت وياي عل مبدأ جنود
عزمي واصراري اويقيني والصمود
وحبّي واشعاري ودمعتي والعهود
واعتنيت لكربلاء * ورفعت راية وفاء
وي حشود الزائرين * اهتف بصوتي الحزين
يا حسين
--------------
وصرت اشوف بهل درب كل شي عجيب
اتجسّده العشاگ بدروب الحبيب
شاهَدِت عاشگ أخذ عمره المشيب
وبضعيف الصوت يهتف يا غريب
گاصد بهمّة شباب * يذرف دموع المصاب
هوّه يصرخ يا حسين * واهتف بصوتي الحزين
يا حسين
-------------
وشاهَدِت عاشگ تعنّه بهل مسير
تسنده الزوّار چي لنّه ضرير
گتله يا هل گاصد ودمعك غزير
اشحفّزك تتحمّل الممشه الخطير
وصاح اجيت آنه برجاء * اطلب بجاهه الشفاء
وينبض بگلبي اليقين * و اهتف بصوتي الحزين
يا حسين
--------------
وانت يا من لوّحتلي بدمعتك
تمشي تتوچه على عكّازتك
وگفَتْ حروف الشعر من شافتك
امنين اجيت ويا عقيده الجابتك
وصاح انه لحبّه أسير * وما يهم بُعد المسير
حتى لو أمشي سنين * اهتف بصوتي الحزين
يا حسين
---------------
وانت يا هل گاصد بجمر الفؤاد
امنين جيتك والعزم بدماك زاد
گال آنه الگاصد امن اقصى البلاد
لعد ذخري و رجوتي ليوم المعاد
معتني ودربي بعيد * ونذرِت دم الوريد
رغم كيد الحاقدين * اهتف بصوتي الحزين
يا حسين
----------------
لكل فرد غايه اورجاء ومعتقد
وعالِم الغيب اعلى نيّتهم شهد
وبمثل كل عام حضروا عل وعد
واهتِفَوا لبيك يا نعم السند
كل فرد منهم اجاك * يصيح لبيك وفداك
بعمري وبگطع الوتين * اهتف بصوتي الحزين
يا حسين
----------------
عقيل الكاظمي / كربلاء المقدسة

❇️ قصائد الاربعين

رئيسية


دم نحرك * عل حگ ايدلّينه
وبصبرك * يحسين اتربّينه
عشنه ابدربك أحرار * نرفع راية ثوار
الله أكبر
----------------
من يوم ارتفع راسك على العسال
وجسمك يا حسين اتوسّد اعلى ارمال
لهذا اليوم وبدمنه الحزن لازال
مع حروف العشگ تتوارثه الأجيال
عشاگك * يحسين وتدرينه
للمحشر * حزنك عايش بينه
وباسمك يبن الكرار * نرفع راية ثوار
الله أكبر
------------------
جمر حزنك كُريّات الدم الحمره
وحبك بالكُرات البيض حط سحره
بهالچلمات عن حبك صغت فكره
ابمشاعرنه تبِث العِبره والعَبره
وبدمنه * الأحزان تغذّينه
وذكر اسمك * عل محنه ايكَوينه
وشما طحنه بأخطار * نرفع راية ثوار
الله أكبر
------------------
على مرّ الزمن ومعاگب الأيام
واحنه نشوف أحزان وغصص وآلام
علينه جرّبوا كل صوره للإجرام
اوجريمتنه الغرام اليرعب الظلام
وعل مذبح * حبك لو يدعينه
نتقدّم * وبإسمك لبّينه
اتعلّمنه امن الأنصار * نرفع راية ثوار
الله أكبر
----------------
مبادئهم خذوهه امن ابن مرجانه
ومبادئنه غرامك بيهه غذّانه
عقيدتهم يزيد ودين طغيانه
وعقيدتنه الإبه وهذا انت عنوانه
كل ظنهم * نتعب لو قاسينه
ونتأثّر * والهمّ ينسّينه
ولو نتخيّر نختار * نرفع راية ثوار
الله أكبر
------------------
هيّمنه العشگ والحزن هيّمنه
وصرنه انعيش عالم غير عالمنه
تحت ظل الصواريخ انهدر دمنه
انثكلنه بالعزيز وبيه تيتّمنه
ونتواثب * عل مبدأ ظلّينه
ميهمنه * اويخسه اللي يعادينه
وبوجه الإستكبار * نرفع راية ثوار
الله أكبر
----------------
هاي الخاتمه وصوت الوفه ايناديك
أموال وبنين وكل نفس تفديك
وإذا حُبنه ومَشينه ايغيض اليعاديك
يفجّرنه وتجيك ارواحنه تلبّيك
نتوذّر * وبحبّك تحيينه
وبالغالي * اتقـدّمنه وضحّينه
ونرخص ليك الأعمار * ونرفع راية ثوار
الله أكبر
----------------
عقيل الكاظمي / بغداد

🏺❇️ قصائد الاربعين


رئيسية


يا جرح ثائر * دربك الطاهر * عشگناه
جينه مشايه * اكتبنه عالراية * حسيناه
...........
بكل عزيمتنه والجروح الأليمه
جينه مشايه يبو چفوف الكريمه
خطوه خطوه بينه تقوه هل عزيمه
ومثل مُهرك صحنه يا دنيا الظليمه
بحزنك وحبك * سيدي لدربك * مشيناه
والدمع ينزف * والگلب يهتف * حسيناه
.............
سيّدي بكل خطوه نبضه تصيح بسمك
وكل جوارحنه الك تسعي وتخدمك
بعين ما شفناك بس الحب يرسمك
عشگ طاهر والوفه يوصّلنه يمك
شخصك السامي * بنحرك الدامي * عرفناه
انت عالَمنه * واسمك بدمنه * حُسيناه
..............
شخصك السامي انولد ساعة مماتك
مثل حيدر تعبد الله بتضحياتك
كل صلاة الكون متعادل صلاتك
وأعظم من الصوم عالمبدأ ثباتك
يالبعت عمرك * وقدّمت نحرك * إلى الله
والله دلانه * إنت عنوانه * حُسيناه
...............
انت للرحمن عنوانه وسبيله
وانت للمعبود مصداق الوسيله
انت كوثر جنة الله وسلسبيله
ابكُبُر قدرك صارت جروحك جليله
واحنه انصارك * وهذا تيارك * تِبعناه
لنهجك نتابع * وبالدمه نبايع * حسيناه
.............
هاي  كل خطوة  الك تجديد بيعه
بهل شعيره نريد احياء الشريعه
خلهه تسمعنه السمه گبل الوسيعه
نبيع كل شي وحبك ابدًا ما نبيعه
عفنه دنيانه * وبسمك لوانه * رفعناه
انت رايتنه * وتبقه صرختنه * حسيناه
................
بكل  محطه ننصب لحزنك منابر
بيهه ننعه مصابك ونحيي الشعائر
يالطريقك عشگ أول ماله آخر
ما يهمنه الموت لجلك والمخاطر
الموت يطربنه * وخصمك بحبنه * ذبحناه
والزمن يقسه * واحنه ما ننسه * حُسيناه
...............
عقيل الكاظمي // المسيب / طريق كربلاء

❇️ قصائد #الاربعين

#زوار_الحسين_أنصار_آخر_الزمان


#وزن #فائزي

مسلوب خدر العايله   واليهه مطروح
وين اليعين ام الحزن  عل دمع والنوح
---------------
چانت عزيزه امحجّبه     بزود الميامين
وامست عگبهم حايره     بفاجعه وتمحين
يا شيعه لو سائل سأل     عن حال الحسين
ظل جسمه دامي اعلى الثره    وعطشان مذبوح
---------------
واليهه ظل اعلى الترب    جثه بلا راس
ولمّن تروح اميسّره        ما بين الارجاس
لا تنشدوهه يا خلگ       چا وين عبـاس
ينصـاب من عدهه الگلب  تتلاهب الروح
--------------
عباس مرمي اعلى النهر   بالعلم ملفوف
چفوفه گطيعه اعلى الشريعه وفاجد الشوف
من بعد ليث الگنطره       البل زود معروف
زينب يسيره اعلى الهزل  ويّه العده اتروح
-------------
للشام من طف كربله    تمشي يسيره
والـشمر حاديهه  بدل   صاحب الغيره
زينب ضعنهه اويه العده   طوّح مسيره
تمشي ابيسرهه وللنهر   ناظرهه مشبوح
-------------
تعلم لون ردّ الضعن     يوم اربعينه
ما تلگه عل شاطي جسد   حامـي الضعينه
گلب العقيله اعلى المحن    منهو اليعينه
لو ضمّدت منّه جرح      تتنازف جروح
-------------
يا شيعه عشرين بصفر    كل ما يمر عام
تمشي مواكبنه بحزن      وترف الاعلام
واجب نعين اعلى الهضم  زينب والايتام
نواسيهم بدمنه اليصب     من جفن مجروح

--------------
نمشي مثل ممشه ضعنهه   بليل ونهار
ونحمل مثل لوعة يسرهه  هموم واخطار
ومثل اليتامه ننتحب     ونهل الاعبار
ونبچي على مصاب البگه   من علّته ينوح
-------------
بين الاعادي بلا سند    زينب وحدهه
ويوم الملاگه بكربله     انتو سندهه
جروح الذي ملهه ضمد  بيكم ضمدهه
لو شاهدت منكم عليهه   الدمـع مسفوح
-------------
صب الدهر جوره اعلى زينب ما رحمهه
وانتو الذي بهذا الجمِع   تجلون همهه
والله بل دمعه التهل   نشفي ألمهه
ونجري مدامعنه دمه     مِن ينشف الموح
--------------
#عقيل_الكاظمي

❇️ نواعي الاربعين



من بعد سفرتنه الطويله
جيتك يخويه اعلى الهزيله
وگلبي عليك انهدم حيله
آنه اختك الحره العقيله
اصبحت مهمومه ونحيله
اوّنتي على فراگك ثجيله
جيت بضعن فاجد كفيله
والدمع ما بطّل مسيله
من يوم عنك شد رحيله
.........
گلبي اشيسولف عن عذابه
وشلون يشرحلك مصابه
خويه انسبينه بوسط غابه
وعگبك تولتنه الذيابه
ومن بعد عزنه بالخرابه
........
آ يا مصاب الغاضريه
راواني اخوتي اعلى الوطية
وللشام وداني سبيه
ومشيت اسيره بگيد اميه
والاشد والاصعب عليه
ماتت على راسك رقيه
يا سور عزي الغاب فيه
بعدك تمنيت المنيه
.........

انه الما ينوصف بيه تره لماي
وصار اعلى الدهر عتبي تره لماي
احلف عيوني لو حنت تره لماي
كون بشوفته تشوف المنيه
.............
كسيره والدمع للعين جبريل
نزيفه وللكسر هيهات جبريل
زينب هاي والهه ينوح جبريل
لارض الشام من راحت سبيه
..............
عقيل الكاظمي