ولادة زينب (ع)
٥ جمادي الاخر



حاضر الليله المنتظر
خسران كلمن ماحضر

١

بسم العقيله الطاهره
هاي الوجوه الحاضره
تكتب عهدها بالدمه

يازينب احنه بالحفل
من اجل حتى بالسجل
تكتبنه امچ فاطمه

كل احنه ألها ننتمي
بهذا الحضور الفاطمي
هالليله عرش الله ابتشر

حاضر الليله المنتظر
خسران كلمن ماحضر

٢

فرحت ملائكة السمه
بزينب وهنت فاطمه
هالليله مولوده الشمس

احنه الخدم ما نقتنع
نحضر وللمحفل شلع
زينب وتنطينه درس

بصوت الولاء الحيدري
يسمعني كلمن جعفري
هالليله وانطش الخبر

حاضر الليله المنتظر
خسران كلمن ماحضر

٣

ليلة هنه ليلة مجد
هالليله وانطش الورد
فرحانه كل هاي المله

نحتفل احنه بهل مسه
مولوده بت خير النسه
زينب الحره الفاضله

كل العرش ناده بفرح
والصوت هالليله صدح
جبريل ناده اعله البشر

حاضر الليله المنتظر
خسران كلمن ماحضر
٤

نحصر ابدمعات الوفه
هالليله بنت المصطفه
ميلادها ايشعشع ضوه

هي المعاني الخالده
عالخدم هيه السيده
من عدها نتنفس هوه

زينب ولادتها دمع
ينزل على اخدود الشمع
يرسم معاني اشگد صور

حاضر الليله المنتظر
خسران كلمن ماحضر
٥

بالمحفل انه مطلبي
تقبلني خادم زينبي
واتباها مابين الخدم

تاج وشرف كل خدمتي
اسگيها انه بدمعتي
يازينب واقسم قسم

هاي الخدامه اعظم شرف
وگليبي بالفرح هتف
احضر واحس كلي فخر


حاضر الليله المنتظر
خسران كلمن ماحضر




لاتنسون والدي وابني عباس من الرحمه والغفران
خادمكم رياض الرسل الجابري

ولادة الامام علي (ع)


جوه بالكعبه انولد اشرف ولي
الله من سواها يستاهل علي
١

من سمعها الفاطمه صاحت مدد
ربنه اقسم بالامر وانطه عهد
لازم الكعبه العلي تصبح مهد
راح اسولفلك واسمع مايلي

٢
اسمع الاخبار واعرف غايته
ليش بارينه جعلها اولادته
ابطن كعبه وحور چان بخدمته
حتى تتشرف الكعبه أي بلي
٣

الله مدري اشگد يحبه أي صدگ
المن انروح ونسأله عالعشگ
نسأل اگلوب التحبه من تدگ
تدگ ليش لياسبب ياسائلي

٤

الله من سوه الولاده بكعبته
راد ناس التبصم الهذا الفته
جاب املاك السماء البيعته
بصمت بذاك الزمان الاولي

٥

بعالم الذر احنه بايعنه بشرف
وبالولاده بشرف واحدنه هتف
الله سوه الخاطره كعبه النجف
وصارت الحيدر علينه منزلي
٦

علي نوره شعشع بهذا الفضه
أنگولها وغصبا عاللي مارضه
الله من نوره اخذ للمرتضى
حتى عالوادم يصير ويعتلي

٧

وهاك اسمع مني بس أخر خبر
ابطن فاطم امه سواه واستقر
انولد حيدر نور مو مثل البشر
ايصير شافع حتى الك باجر وألي



لاتنسون والدي وابني عباس من الرحمه والغفران
خادمكم رياض الرسل الجابري

ولادة الامام المهدي (عج)



هاليله ميلادك
يالمهدي واعيادك
نادينه بالمولد يغالي
هالليله من احله الليالي
يالمهدي واعيادك


نورك يهل والعرش لجلك صله
الباري بوجودك راد يكمل عدله
راية محمد تعله بيدك تعله
لمن نندبك كلشي احنه انحصله
يافخر عزتنه
يا امل امتنه
يالعايش بروحي وخيالي
هالليله من احله الليالي
يالمهدي واعيادك



نزرع عمرنه و روح نشتل دربه
وتخضر بكل الضماير كعبه
نتنطر الجيه بليالي الصعبه
ويشهد علينه اشگد دعاء الندبه
نهتف يمهدينه
وبسمك تسمينه
وانصيح يالفرحه تعالي
هالليله من احله الليالي
يالمهدي واعيادك



هاليله نورك من عرش بارينه
هل بفرح والدنيه هلت بينه
نادينه كلنه بالفرح نادينه
ليلة وفاء الليله يامهدينه
خل نسهر الليله
والعمر نهديله
والعوض ندري العوض تالي
هالليله من احله الليالي
يالمهدي واعيادك



ليلة نصف شعبان تدري شبيها
هنياله هنياله الذي يحييها
زور الحسين بگلبك واهديها
وخص الزياره ولازم اتسميها
سميها من تبدي
واهديها للمهدي
والفرحه خليها تلالي
هالليله من احله الليالي
يالمهدي واعيادك





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

ولادة المهدي عج


ماي العين ابو صالح ماي العين
ماي العين ابو صالح ماي العين


١

صوتي ردد بسمك
بيه عايش رسمك
الليله ميلادك واشوفك ياحلم روحي طريق

تبقه عايش بيه
مصدر الحنيه
انته منطيني محطه بدربي محتاجك صديق

حسيتك من جيتك ولگيتك ضوه
ياشوگي ومعشوگي شميتك هوه
ياروحي ولجروحي مر بيهن دوه

الرباط
مر بيه اتوسل بيك يامهدينه

٢

ياعطر شميتك
بالحفل ناديتك
جيت محتاجك حبيبي وانثر اورودي عليك

ياحلم عافيتي
تدري شنهي أمنيتي
بس اشوفك ياهوايه وارضه اموت ابين اديك

ناديتك باعماقي واشواقي العمر
ولگيتك أيامي واحلامي التمر
ميلادك حسيته وحبيته اشكثر

الرباط
يالمهدي وبالميلاد روحي اهديها
٣

يا فرح ميلادك
احضر بأعيادك
وارسم احلامي مسافه بلكي اتقرب ألك

بالوجوه امتاني
بموقفي وأيماني
اشگد فرق يالمهدي تدري عبد ويتاني ملك

ومتاني بحساسي وبناسي شفت
ياصوره بالمحفل اسأل والتفت
انتظرك ماأعبر بس اشعر متت

الرباط
مد أيدك يامولاي يابو الغيره

٤

سولفت عالفطره
شخصك وانتظره
گالو بشعبان تحضر واني انتظرك تمر

انتظار الفرگه
يابو صالح شهگه
من اشوفك ياحبيبي حتى انطيك العمر

انتظرك والملگه مو شهگه ودمع
عالگلك احلامي گدامي شمع
بالمحفل واتمنه صوتي ينسمع

الرباط
صوت العاشگ مفضوح من دگاته
٥

هذا حال العاشگ
لو حضر وامفارگ
يحضر بلهفه الحبيبه شايل وحامل گلب

واني جيتك هايم
الك جيت وخادم
حتى اقرالك حبيبي بعيدك واطوي الدرب

اتعنيتك وانتظرك شايلك عشگ
وگليبي بالمحفل يالمهدي يدگ
نبضاته وآهاته من ايدگ صدگ

الرباط
گلبي ايدگ بسمك دوم يامولانه




لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

قصيده بحق ولادة المهدي (عج)



فرحانه كلها الدنيه فرحانه
بمولد المهدي الدنيه فرحانه

١

بالفرحه كلها الشيعه ملتمه
هالليله مولد اخر العصمه
بالسمه يضوي الگمر والنجمه
وانهني نرجس بالفرح أمه

والي يحبنه يفرح ويانه
بمولد المهدي الدنيه فرحانه
٢

هالليله شعت بالسمه انواره
عالدنيه كلها وشاعت اخباره
كلش زغيره الدنيه دواره
متغطي نوره وتحجب اسراره

كلمن يدورنه ويجي اهنانه
بمولد المهدي الدنيه فرحانه
٣

للمهدي نبعث كل امانينه
بالمولد ونهتف يوالينه
بهذا الحفل كلنه تعنينه
خدامك وجينه يمهدينه

شخصك الغالي هوه خلانه
بمولد المهدي الدنيه فرحانه
٤

تقبل دعانه بلهفه وبغايه
لمن اجينه والك عنايه
يا آيه انته ويا ابن آيه
للحفل جينه ونحمل الرايه

بالمحفل انصفگ ويلگانه
بمولد المهدي الدنيه فرحانه
٥

بمولدك كل الدنيه معموره
ومنصوره كل الشيعه منصوره
اخر دعانه ايتمم بنورك
للباري ندعي ايعجل اظهورك

قائدنه هوه وحامل الوانه
بمولد المهدي الدنيه فرحانه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

هوسات لولادة الامام المهدي (عج)


١

حرت بخمصطعش شعبان شقدم انه وشأهدي
غير الروح يامولاي تدري كلشي ماعندي
الك روحي اقدمها هديه انه يالمهدي
(اهديها الليله بميلادك)

٢

الماوالاك بالميلاد ضل طول العمر خسران
ليلة قدر عدنه اليوم تشبه ليله بالقران
بأواخر ذيچه من رمضان هاي اخمصطعش شعبان
(هنياله اليحييها الليله)

٣

عهد كاتب اله وما اخلف بعهدي
من عالم النشأه امثبته الوعدي
اتشرف اصير بدولة المهدي
(ابصمله الليله بميلاده)

٤

بنصف شعبان نرجس تنتظر مولود
وهاي الليله تعرف ليله الموعود
مثل هذا الحدث بالكون ماموجود
(والمهدي ايهل هاي الليله)



لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

ولادة علي الاكبر (ع)


انولد هاليوم شبيه النبي الهادي
علي الاكبر ارفعوها الايادي
انولد هاليوم
انولد هاليوم
انولد هاليوم شبيه النبي الهادي
1

انولد چنه لؤلؤه والنور ازهر
والگمر يمه نزل شافه وتعطر
بالجمال وبالعذوبه نهر كوثر
العلي الاكبر يشبها بس علي الاكبر

نهر مليان جمال ورقه وحساس
من تشوفه عبالك عمه عباس

انولد هاليوم
انولد هاليوم
انولد هاليوم شبيه النبي الهادي

2

نهر اصفه من العسل رقت جماله
من بزغ نوره بأمر رب الجلاله
ارد اوصل يا بشر هاي الرساله
من محمد علي الاكبر كل خصاله

يحچي والصوت محمد من تسمعه
الله منطيه على الشبان رفعه

انولد هاليوم
انولد هاليوم
انولد هاليوم شبيه النبي الهادي
3

كرمه الباري ونطا لحسين آيه
وبجبينه يضوي مصباح الهدايه
لأن هيبه من الزغر بالأمر غايه
اگماط ميكفي علي ايگمطوه برايه

امن الزغر چان شديد العزه والباس
علي الاكبر ابد مايشبه الناس

انولد هاليوم
انولد هاليوم
انولد هاليوم شبيه النبي الهادي
4

احتفلت الاملاك وبعالي سماها
الزينه والافراح غطاها وكساها
تهتف الاملاك ويردد وراها
صوت من السمه اليوم انولد طه

ردد الصوت محمد يترس العين
علي الاكبر هديه انطا للحسين

انولد هاليوم
انولد هاليوم
انولد هاليوم شبيه النبي الهادي
5

اختم الليله فرحتي وبدعائي
لأهل كل بيت النبي دايم ولائي
شما يمر بيه الزمن يبقه انتمائي
حيدري وفاطمي وكربلائي

ابصم اليوم الك يحسين عهدي
وعلى التوقيع يظل شاهد المهدي

انولد هاليوم
انولد هاليوم
انولد هاليوم شبيه النبي الهادي




لا تنسون والدي ووالدتي وأبني عباس من الرحمه والغفران
خادمكم رياض الرسل الجابري

ولادة الامام المهدي (عج)
١٥ شعبان



انته يامحبوبي محبوبي محبوبي
شمعه تضوي ادروبي بدروبي بدروبي
المهدي شوگي الغالي
سلوتي وآمالي
انته يامحبوبي محبوبي محبوبي
١

يادنيه بالولاده انشوفه
يادنيه كعبه واحنه انطوفه
يادنيه بروحنه الملهوفه
يادنيه المهدي لا منعوفه

والعشگ رباني رباني رباني
منذهل خلاني خلاني خلاني

اول انته وتالي
سلوتي وآمالي
انته يامحبوبي محبوبي محبوبي
٢

ياروحي حبك السواني
ياروحي واصبحت عنواني
ياروحي گمر شفتك أني
ياروحي وعايش بوجداني

عالوعد تانيتك تانيتك تانيتك
عاشگ وحبيتك حبيتك حبيتك

ساكن بدلالي
سلوتي وآمالي
انته يامحبوبي محبوبي محبوبي
٣

يامهدي عشت بين عيوني
يامهدي الوادم ايشوفوني
يامهدي حگهم ايلوموني
يامهدي خادم ايسموني

خادمك عنواني عنواني عنواني
اسمك السواني سواني سواني

أبد لا مابالي
سلوتي وآمالي
انته يامحبوبي محبوبي محبوبي
٤

خليني شلت سحر عيونك
خليني ارتجي وممنونك
خليني من أگول شلونك
خليني عاشگ ومجنونك

ذايب بحنيتك حنيتك حنيتك
بالحلم لاگيتك لاگيتك لاگيتك

صحت ياعذالي
سلوتي وآمالي
انته يامحبوبي محبوبي محبوبي
٥

بالمحفل جبت عمري ويايه
بالمحفل وابصمت بدمايه
بالمحفل بس رضاك الغايه
بالمحفل آيه حبك آيه

ياحلم بعيوني بعيوني بعيوني
احتفل خلوني خلوني خلوني

المهدي عاش أبالي
سلوتي وآمالي
انته يامحبوبي محبوبي محبوبي





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

ولادة السيده رقيه (ع)



مولاتي مولاتي يارقيه

١
امن العرش نزلت رقيه
هلت بهاي المسيه
آيه قدسيه نطاها
من السمه رب البريه
مولاتي
نزلت وطاح النده
مولاتي
امن الجنان امورده
مولاتي
هذا صوت انردده


الرباط
حسدوها لمن شافوها
حسدوها
٢

من ابوها ايصد عليها
ويلزم الترفه اديها
من يدقق زين يلگه
كل جمال الكون بيها

يادنيه
واليدقق بالنظر
يادنيه
يلگه بيها اشگد صور
يادنيه
چنها نسخه من الگمر


الرباط
لفوها بگماط الجنه
لفوها
٣
من رقيه اتشع نسايم
مو طفل بالمهد نايم
ينظر ايعاين ابوها
بالمهد چن گمر هاشم

ياروحي
نور ويشع بالمهد
ياروحي
الچ وقعنا العهد
ياروحي
بالحفل صحنه مدد


الرباط
حضرينه باچر بالمحشر
حضرينه
٤
اليسمع وذاته سليمه
يفرح الهاي الكريمه
محفل الليله الرقيه
الها بالمولد نقيمه

شاهدنا
مولدچ فوگ النجم
شاهدنا
آيه آيه ينرسم
شاهدنا
چنه مو مولد حلم


الرباط
هالليله والدنيه امعيده
هالليله
٥
يارقيه واحله ورده
انتي ياكنز الموده
من يسألونه نجاوب
بس رقيه عدنه وحده

بس هيه
عايشه بوسط الگلب
بس هيه
حبها حبها اشگد عذب
بس هيه
بيها يمحون الذنب


الرباط
بس بيها يمحون اذنوبي
بس بيها

٦
سحر انتي وعشتي بينه
عالخدم صرتي حنينه
احنه نتمنه رقيه
نصعد وياچ السفينه

عبرينا
ياملاذ الهل خدم
عبرينا
اليمشي وياكم سلم
عبرينا
انحلفچ براعي العلم


الرباط
نجينه يالبختچ آيه
نجينه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

ولادة الحبيبه رقيه (ع)




بالفرح كلنه سويه
نفرح بمولد رقيه
ننسه لهموم
واحنه هاليوم
نفرح بمولد رقيه
١
نرسم احلام الطفوله بدمعت العين
والها من نفرح الليله نبتدي امنين
نادت الاملاك نزلت والفرح وين
ربنه من نزلها آيه انطاها لحسين

ربنه في عالم زمانه
خص رقيه بهل مكانه
نهجر النوم
واحنه هاليوم
نفرح بمولد رقيه
٢

الليله حي الله سحرها
والعرش صاح
كلمن ايحبها الرقيه يعلن افراح
نزل جبريل بعظمته وناشر اجناح
يفرح بيوم الحبيبه والحزن راح

ناشر اجناحه علينه
والفرح غطه المدينه
بقدر مقسوم
واحنه هاليوم
نفرح بمولد رقيه
٣
يفرح الليله الموالي لازم بهاي
ابد مو طفله رقيه والحچي اهواي
يلا يالتسمعني گوم وامشي وياي
بالحفل خلي نوزع الها بس ماي

باچر ايمنعو عليها
وبحبل مچتوفه اديها
هذا معلوم
واحنه هاليوم
نفرح بمولد رقيه
٤

الليله عرش الباري يفرح رغم الاحزان
محتفل عالدنيه كلها الليله فرحان
والسمه الخاطر رقيه صارت الوان
من جنان الخلد جابو الها تيجان

ربنه گله انزل انته
نزل جبريل بعظمته
نزل معزوم
واحنه هاليوم
نفرح بمولد رقيه
٥

نعلن الليله بحفلنه ونبصم اهنا
نبقه نهواها ونحبها احنه والله
هيه معشوگتنه تبقه وحبها خلا
بالگلب بارينه ثابت مانسينا

يارقيه الكلها غيره
طفله بس چنها اميره

واحنه هاليوم
نفرح بمولد رقيه




لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

للسيده رقيه في ولادتها ابوذيتين + مقطوعه



روح الخدم بس ألها مدينه
وچفوف العوز بالمحفل مدينه
الليله تنولد بشرف مدينه
رقيه ونورها ايشع عالبريه
٤

على حوض الفرح كلنه وردنه
نبوس اعتاب كل محفل وردنه
نشيل بحب رقيه احنه وردنه
لبو السجاد وانقدمه هديه


مقطوعه لولادة رقيه



على اجفوف الفرح تنولد هاليوم
لحسين بشرف اعظم هديه
جابوها ونظرها الوالد وصاح
شكرا يا آلهي عل عطيه
دقق بالنظر والنور غطاه
وسرح فكره وتخيلها سبيه
ورجع دقق حسين وسرح محتار
وگام يشوف بيها الغاضريه
اختلط بالفرح دمعه وهاجت الروح
تأملها بشكلها الفاطميه
ورجع دقق وعاين بالتفاصيل
رقيه والملامح زينبيه
غمض عينه أبوها وعاش لحظات
فرح مدري حزن هاي المسيه
تخيلها أميره وباگو التاج
وعليها الناس صاحو خارجيه
الولاده مو فرح دمعات بالعين
ومجبورين نحييها سويه
نوصيها رقيه بجاه عباس
وماتحتاج من عدنه وصيه
تعرفنه خدمها ونحضر اليوم
ماتبخل وتنطينه رقيه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

مربع ولادة رقيه



والخاطر رقيه للحفل جينه

١
والخاطر رقيه انادي ياهل ناس
بالميلاد اجينه برقه وبأحساس
خاف انصيح احنه ويزعل العباس
على اطراف الاصابع من تعنينه
والخاطر رقيه للحفل جينه

٢
على اطراف الاصابع نمشي نتهده
خاف انصيح احنه وتزعل الورده
بالميلاد كل باب العتب سده
نفرح للحبيبه كلنه خلينه
والخاطر رقيه للحفل جينه
٣
اجيناها بحفلها والفرح يزداد
هالليله ورقيه شمعت الميلاد
من عين العواذل احنه والحساد
بخور انطش نخاف الحسد ياذينه
والخاطر رقيه للحفل جينه

٤
اجينه للحفل وبهاي لمتنه
خادم حضن خادم ياسعادتنه
بالميلاد صحنه وهيه سمعتنه
اجيناها سوه والشوگ يحدينه
والخاطر رقيه للحفل جينه

٥
بيوم اصبوطعش شعبان عنايه
للمحفل نجي رايه بأثر رايه
تدرينه رقيه خدم وفايه
من ابعيد نحضر تنظر اعلينه
والخاطر رقيه للحفل جينه

٦
ننطيها عهد نحضر نجي كل عام
بميلاد الحبيبه وشايلين اعلام
نسمع صوت يهتف هله بهل خدام
خدم ألها خدم بالذر تسمينه
والخاطر رقيه للحفل جينه



لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

قصيده لولادة الامام الحسن (ع)




صلوات صلوات هالليله تفرح فاطمه
١

ارد انه اهني الليله كل ساداتي
بيوم الولاده وارد اطش ضحكاتي
بأول أمام وهالفرح من ذاتي
هالليله تفرح للحسن مولاتي

تحيات تحيات نرسلها لعنان السمه
صلوات صلوات هالليله تفرح فاطمه
٢

لمن نزل جبريل جاب البشره
اول خبر شع بسماء العتره
نور الحسن صاغه آله القدره
وانطاه هديه الحيدره والزهره

سماوات سماوات مبتهجه تزهي وحالمه
صلوات صلوات هالليله تفرح فاطمه
٣

شجرة علي اول غصن بغصانه
منها طلع نور الحسن بسمانه
والزهره صوت الي يحب نادانه
لجل الحسن يفرح الليله ويانه

علامات علامات وسط الگلوب الهايمه
صلوات صلوات هالليله تفرح فاطمه
٤
من نور جده النبي ونوره اختاره
رب العله وطش عالمله انواره
اهل الكرم من شافته محتاره
مو جاره شابع شبع سابع جاره

كرامات كرامات چفه تبوس اتسالمه
صلوات صلوات هالليله تفرح فاطمه
٥

أجمل هديه الحسن هل اعلينه
والليله كلنه نحتفل خلينه
نرفع ادينه وندعي يابارينه
بجاه الحسن عجل فرج مهدينه

والافراح والافراح ندعيها ربي دايمه
صلوات صلوات هالليله تفرح فاطمه



لاتنسون والدي ووالدتي وأبني عباس من الرحمه والمغفره
خادمكم رياض الرسل الجابري

ولادة السبط الحسن بن الامام علي عليهم السلام



نفرحلك نفرحلك يا أمامي
١

للحسن نعلن اجينه
بالولاده ولهفه بينه
مو بصابعنه احنه نبصم
نبصم وبثنين أدينه

هالليله
نبصم بهذا العهد
هالليله
مانعوفه للأبد
هالليله
يالحسن صحنه مدد

الرباط
خدامه نبصمله الليله
خدامه
٢

للحسن جينه سويه
شوگ بيك وشوگ بيه
بالحفل نعلن ولانه
بسم حيدر والزجيه

بالفرحه
نحتفل جينه سوه
بالفرحه
طير ياخذنه بهوه
بالفرحه
نشتعل مثل الضوه

الرباط
بالفرحه نحضر هالليله
بالفرحه
٣

جينه نبصمله ونعاهد
عالعهد بارينه شاهد
بالحفل نحضر سويه
خادم وجايبله خادم

بالمحفل
نحضر ونقسم قسم
بالمحفل
للحسن نبقه خدم
بالمحفل
يرف بيدينه علم

الرباط
شوفوها والدنيه امعيده شوفوها
٤

كل سنه بهذا عددنه
انعاهد وثابت عهدنه
حتى لو متنه احنه باجر
للحفل تحضر ولدنه

منعوفه
محفل الحب والشجن
منعوفه
نشعر المحفل وطن
منعوفه
عهد ننطي يالحسن

الرباط
خدامك وانته الوالي خدام
٥

نرسل الليله التهاني
اشهد اشهد يازماني
للحسن بالمحفل أحنه
نختم بهاي الأماني

نتمنه
كون مقبول العهد
نتمنه
ينشمل هذا العدد
نتمنه
يالحسن ننطي بعد

الرباط
هالليله يرضه بمحفلنه هالليله




لاتنسون والدي ووالدتي وأبني عباس من الرحمه والمغفره
خادمكم رياض الرسل الجابري

صوت الحق ماغـاب علي ينـادي
طــايـح بالمـحــراب اخو الهـادي
علي بطبره ختم عمره


علي بسوح الوغه مجرب علي الماتخطي ضرباته
عـلـي الايمان مــن يمشي علي الـقــرآن وآيــاتـــه
الانس والجان منه تخاف تهابه وتخشي صولاتــه
رغـم كل هـذا بس يضعـف علي وتخـونه دمعـاتــه
عالايتام الايد يمد رايــــد
والايتام تريد حضن والـد
بألف حسره ختم عمره


علي اليعـرف طريق الحق علي ونحتار شنوصفه
الباري وبس رسول الله يعـرفه ومحـد أيعــرفــــه
نفس نور النبي الهادي علي ومعــروف بالكـلـفـه
المعارك كلها تشهـدله القلع بــاب الكـفـــر چـفــه
وبسوح الميدان علي مجرب
محــــد للايـمان گدر يگرب
بحكم أمره ختم عمره


انعـطافه الخلت التاريخ بعــد فگــد النبي المختار
تعـلـي اشـبـاه بعـض الناس وهمه ارذل الاشـرار
الخـلافه گـوه اخـذوهـا من حـيـدر عـلـي الكــرار
وعلي صابــر عـلى الامه وحـتـى الامه ماتنهــار
وبگـلـبـه المالوم علي صابر
يعرف بي ميدوم حكم جايـر
بألم عبره ختم عمره



التزم بـــوصية الهـادي عـلـي وماخـالـف بـأمــره
الخلافه اخذوها من عنده وتجرعها الغصص مره
وعزيزة روحه ضربوها الوديعه الطاهره الزهـره
رغـم كل هــــذا يتصبـر علي ومثل الجـبـل صبـره
تعــزف هــالالام على جروحه
من اجل الاسلام نـــذر روحه
بدمع فقره ختم عمره


بعـد رحلة عـمـر زاخـر بنضالـه مــن اجـل نـاسه
اشتـقـيـسه الحـيـدر الكـرار يتعـب الـدنيه مقياسه
اذا هـو بشـر وتشوف المـلائـك تمـشي حــراسـه
لڇـن رب العـلـه رايــد يشاهــد جــرح الـبـراسـه
ينزف من ضربوه عـلي وحــده
غـير الله ايعـرفوه علي اشعـنده
بجرح صبره ختم عمره






لاتنسون والدي ووالدتي وابني عباس من الرحمه والمغفرة
خادمكم رياض الرسل الجابري

شوط كربلائي بحق الامام علي (ع)




زينب بالدمع والنوح گعدت يمه تتحسر
تعاين مره للعباس ومره اتعاين الحيدر

١

حيدر يمها ويعاين گوه يلفظ انفاسه
عرفت راح ابوها اليوم يودع دنيته وناسه
تعاين طبرته شافت چبيره الطبره البراسه
لبوها حارت بأمره
چبيره شافت الطبره
اختنگت زينب بعبره
المنظر قاسي ياهالناس شلون اتحملت المنظر

٢

زينب گربت يمه تشمه گامت بصدره
يبويه اتگله احچي وياي اموتن خاف بالحسره
امشي اعليك اعز الناس الحبيبه فاطمه الزهره
صد يابويه حاچيني
وارحم كل دمع عيني
بعذابي لا  تخليني
وحيدر گوه شال الراس ولون الوجه صار اصفر

٣

برفيع الصوت حاچاها يگلها يابعد روحي
الكلام وياچ يابويه يزينب بلسم جروحي
وگام يعاين العباس ويگلها كل سبب نوحي
راح الوحدچ اتضلين
وكلشي بعمرچ اتشوفين
اوصيچ واسمعي زين
المصايب من تشوفيها صيري للصبر مصدر

٤

صد حيدر لعد عباس وگام الروحه يسألها
اي عباس بس عباس لعد زينب كفو الها
واهنا كلم العباس وگله انته كافلها
رد عباس خادمها
وشحده اليكلمها
كون الزهره ترضه امها
اصيرن خادم الزينب وتجازي الزهره بالمحشر

٥

زينب بعد ماعرفت اشوصه بيها واليها
گامت تنظر العباس وخلت ايده بيديها
كفو منك بماي العين واختك ماتخليها
وزينب تنظر ابدمعه
لبوها وگامت اتودعه
ياعباس ارد انعه
زينب تنعه والعباس يمها يبچي واتصور

٦

وهنا ودعت زينب ابوها بدمعه سچابه
والعباس يمها ينوح ويبچي بنار لهابه
حيدر غمض عيونه بأخر لحظة امصابه
وزينب صاحت بأحساس
بحضني جيب خلي الراس
وخلي انشمه ياعباس
هذا اخر وداع النه بعد للضيم نتحضر





لاتنسون والدي وأبني عباس من الرحمه والغفران
خادمكم رياض الرسل الجابري

قصيده علي (ع)



تون وتنوح بكلب مجروح
زينب يم علي بحسره

زينب تنظر بدمعات لبوها وتنحب بعبره
تعاين جرح البراسه وتشمه اشويه من صدره
تخاف اتلچمه والمجروح تلچمه حتى بالنظره
لحظات الموادع موت چنها اتودع الزهره
گلبها ايلوب تنون وتذوب
بدمعها زينب تنظره


بين الحيره والحيره تعاين مختلف وضعه
تسكت تشب بيها النار تحچي لازم بدمعه
ضلت تبچي وتسولف وسوت مجلس وتنعـه
وابوها منطرح ويلوب رادت يحچي وتسمعه
حچه الكرار بدمع مدرار
وحضنها الزينب بعبره

گام اتعاين الراسه ينزف والوجه اصفر
تسأل والدي معــقـول انته هذا ياحيدر
الشال بچفه ذاك الباب ويشهدله حصن خيبر
معقوله وعجيبه شلون تريد تگوم ماتگدر
تون سكته علي انته
الضحه الناسه كل عمره

نايم حيدر بـياحـال ينزف والجرح دامي
بده يحچي برفيع الصوت يزينب خلصت ايامي
يبويه العيد ماشوفه وبعد ماكمل اصيامي
لتعوفيني يازينب اگعدي وصيري گدامي
انخفض صوته گرب موته
وگام ايوصي بالفقره


يابويه اجانه العيد بدموع وحزن والآم
والايام بعدك موت بويه اشتنفـع الايام
جبنه العمر كله احزان وانخلص العمر صيام
شلون انعيد بياحال اول عيد واحنه ايتام
اجانه العيد وانته بعيد
مشيت وجرحك اشكبره

يابويه العمر بعدك من تمشي نخلصه بنوح
عشت مظلوم ياحيدر متت وگلبك انته جروح
شيفيد العمر بعدك واسيوف المنيه اتلوح
بعدك كلنه يابويه من تروح كون انروح
نودعه اليوم علي المظلوم
ونحمد ربنه وانشكره





لاتنسون والدي وابني عباس من الرحمه والغفران
خادمكم رياض الرسل الجابري

ميمر الامام علي (ع) والقفله هوسه عگيلي


١
هالليله بدموع المصيبه انودعه
قرآن حيدر بالأذان انسمعه
هسه العرش يبچي المصابه وينعه
واملاكه اتنوح وحزنانه
٢

جرح المصيبه بالضماير يسعر
من طاح ينزف دامي قالع خيبر
ايطيح الوجود بطيحتك ياحيدر
من طاح السيف اعله الهامه

٣

متنام هالليله جميع ايتامه
وحيدر ابوهم منضرب بالهامه
بليل الجرح كلمن يشيل القامه
والهامه الليله يطبروها
٤

نطبر الهامه الحيدر وفدوه الراس
تسمعني خلها الليله كل هاي الناس
خدامه نبقه ونحلف احنه بعباس
وانعاهد حيدر هالليله

٥

انعاهدك حيدر والعهد عالفطره
بكل عام نحي احنه هاي الذكره
بيك احنه متمسكين يابو الفقره
واحسبنه ايتامك ياحيدر


لاتنسون والدي ووالدتي وأبني عباس من الرحمه والمغفره
خادمكم رياض الرسل الجابري

زينب تنعه الامام علي (ع)


تبچي زينب الليله لبوها والگلب مجروح
واملاك السمه وياها تبچي وتنتحب وتنوح
وحيدر منطبر راسه يمها امدد ومطروح
يشاهد باخر الانفاس گدامه المنيه اتلوح
و دموعه التنزل هماله
وحيدر ينظر صوب عياله

زينب تمسح دموعه وتشمه وحيدر يشمها
وهذا المنظر الزينب يأذيها ويألمها
ابوها بأخر انفاسه شبگها الزينب وضمها
واشتم بيها من شمها ريحت فاطمه امها
وتشمه وتنحب مفجوعه
والحيدر تمسحله ادموعه

ودع حيدر عياله بأخر لحظه من عمره
واخذ الآمه وهمومه وياه كلهن الگبره
وزينب نادت بلوعه يبويه ونادت بحسره
انته وجدي عفتوني و امي فاطمه الزهره
محد ظل يمها ايحاميها
عدمن يابويه امخليها

وسلم للقدر حيدر وزينب يمه تبچي ادموم
وعرفت بعد مايرجع نادت وبگلب مهموم
عليك الحزن يابويه مايبطل يظل للدوم
يتيمه عني كلها تگول صارت بت علي الظلوم
من عندك بنتك محرومه
وراح ايسموني المظلومه


لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

موشح للبقيع


بالبقيع اگبور ينظر ليها
المهدي لو باچر ظهر يبنيها
١

ماتضل امهدمه اگبور الآبات
المهدي يبنيها بسبأ والذاريات
والمآذن بيها تعله الصلوات
ويرجع الحق اول وتاليها
٢

لو ظهر مهدينه يبنيها الگبور
للأئمه الطاهره ويرجع النور
يضوي من اجديد والدنيه تدور
الرايه من ينشرها وايعليها
٣
اربع اگبور بحقد متهدمه
لاصحن لا گبه والمدمع دمه
اليوم نشكي الفاجعه الرب السمه
وبالمصاب الفاطمه انعزيها
٤

لأن فايض بالكرم گبر الحسن
بالبقيع امهدم وجان الثمن
علي السجاد انهدم وبلا صحن
احجاره بس فوگ الثره امخليها
٥

وكبر للباقر امهدم للأسف
وهمه سادات المله وأهل الشرف
لجل حب الصادق الشيعي هتف
المهدي من ياخذها ماينطيها







لاتنسون والدي ووالدتي وابني عباس من الرحمه والمغفره
خادمكم رياض الرسل الجابري