الخدمة الحسينية

حسين العشكته وما لحظة عفته يا جرح
متعيني امامي على الغبره دامي ومنذبح
ياهو اليشبهك وين الكه مثلك ما يصح
ياهو اللي مثلك منطي نحره وصدره
ياهو الخيول امغمضه فوگه اتعبره
يحسين جرحك بيه هذا اشكبره
بالي يرسملي راسك عالرمح
لوني يتغير بطاري الذبح
مولاي يا مولاي
****************************
دليني دربك خليني احبك سيدي
من النهاية ارجع للبداية وابتدي
يا سر غرامي وعشگي وهيامي وقائدي
يا قائد بلا تاج سلبوه تاجك
ايدي على الشباج صحت احتاجك
يالوزوعهه على الصحاري اوداجك
ياللي سر الوجود بخدمتك
ندعي بلكت نموت بمجلسك
مولاي يا مولاي
**************************
يا ابو الترافة ولا كلبي عافة ولا هوه
لينه انت رحمه ومن الله نعمة ويا دوه
كلبي ندهلي ويمضحي لاجلي بنينوى
كلبي ندهلي ايكلي واحيي الخدمة
عالضحه لاجلك نحره صدره وجسمه
هذا عزيز الزهره واشكبر اسمه
ابحلمي وابيقضتي انه اتخيلك
گلبي كل لحظة كام ايحن الك
مولاي يا مولاي
************************
يمعلي شاني امصعد مجاني ابخدمتك
يا ابو المحنه ونحسبهه جنه ازيارتك
گلبي يهيم ابذلة يتيم ابمجلسك
خدمة حسين اتلوحه مو ياهو الجان
من تمشي كون امفرفح انت ولهفان
ابمجلسه الزهره ادورلهه اعلمجان
تحضر تبجي عليك بدم تصب
تنظر كلمن عزائك بي يطب
مولاي يا مولاي
*****************************
شنرد جميلك. حرگة بدليلك وتنحبس
لو ركضة البر والطلعن بحر الشمس
الدوس اعلضلعك لو گطع اصبعك والرفس
ما نوفي صوت اعضامك المتكسره
ولا ذبلت اشفافك عطش متفطرة
ابزودك عرفنه اشلون عشگ الفطرة
عشگك خلص عمرنه وما خلص
عشگك كل ماله يغله وما رخص
مولاي يا مولاي
*****************************
الخادم احمد داود

ليلة العاشر وقتل الحسين ع

حسين الله ولحد ذابحينه
لبيبان الخيم واصل ونينه
يعدل روحة كوة
يدورله على تجوه
گطع نِفسه الحسين وما يجينه
****************************
رد مهر الحسين اكثر بالصهيل لاجن مهره خالي
حاجيته وندهته وحلفيته. لا كال وحجالي
شال اسياط متني الشال الحسين. ما جان على بالي

فوك التل صحت يا خيل عوفيه
اسحكيني بمجانه احسيني خليه
الجدم مالج ثكيلة
حسين انهدم حيلة
ما بي حيل يحجي اسمع ونينه
گطع نفسه الحسين وما يجينه
*************************
حافر ياخذه وحافر سحك بيه. وحافر ضل يرده
وحافر حاضنه وشابع شبك بي. وما يقبل يهده
رمح يفتح جرح يا حيف بحسين وسهم يرجع يسده

نخيت اعداي كلت شوية ارحموه
سمعني وصاح يالله بسرعة اذبحوه
ما راعو حرمته
ولا جن يمه اخيته
جراه من لحيته وكض ادينه
گطع نفسه الحسين وما يجينه
****************************
لا اني الضيعيتك حتى الاكيك. لا اني التيهيتك
اسمع بس ونينك ما اندل وين تسمع صوتي ريتك
اگرب اعليك تبعد ليش يحسين زينب خوية اجيتك

عبرت اعليك لاجن ما عرفتك
راح الشوف خوية اعذرهه اخيتك
ارسومك موش هيه
هالتاهت عليه
ادور بالصحاري حسين وينه
گطع نفسه الحسين وما يجينه
*****************************
حار الرمل خليني اكعد احذاك عد رجليك افيي
اعدل نومتك لو ضل الم بيك حرت شرد انه اسوي
عليج حسين كومي بسرعة يا خيل تره المطروح اخيي

عمت عيني عليه ما ضال بي حيل
نسمة تجرحة مو مالت سحك خيل
تسحكه وصاح جدي
ما ضل حيل عندي
على طول الكاع دمه امفيضينه
كطع نفسه الحسين وما يجينه
**************************
خذاني الليل خليني ارجع بساع لباجر حيلي اضمه
من فوك الهزل باجر تره انطيح وعلينا اتصير لمة
لا لحكت اودع جسم الحسين لا لحكت اشمة

وين الما احسبه يطيح بالراس
الموت اليوم مات بموت عباس
انفكد غالي على غالي
منين الموت اجالي
بينه الصار ابد ما حاسبينه
گطع نفسه الحسين وما يجينه
****************************
الخادم احمد داود

مشتاگة حميدة لمسلم اهواية
ضلت تنعه ابوهه وسوت اقراية
***********************
سوت تعزية اتوسطت مجلسهه
تون بهداي عن لا ينسمع حسهه
خل عدنان تفزع مات فارسهه
ازلام تفور غيض وموت شراية
**************************
اعاين على دروبك والدرب خالي
حسافة اتروح يلما رحت من بالي
خل وحده تجيني اتكوم تنعالي
بعد مجلس حميده يريد ملاية
**************************
ضلت تنعه ابوهه بحزن وبونه
عليك النوح والدگ راح ازيدنه
مشتاكة لابوي اليوم اريدنه
يرد لو اروح درب الكوفة عناية
****************************
سمعنهه العلاوي اتجمعن عدهه
الله ايعين كلمن مات والدهه
تعبت من بجيهه ومن لطم خدهه
ايبجي النوگ ونهه و سوت اسواية
******************************
مجلس تعزية البي تنحب وتنعه
حميده بثكل ونهه ايهدم السبعة
تصيح بصوت حمل اجفاك شيجرعة
تراني بنار هجرانك امجواية
*****************************
مشتاگة لابوهه وتحن لايامه
بعدهي ازغيره طكهه الوكت عالهامه
الليل اخلاف مسلم يصعب اتنامه
يگمرة واضلمت بجفاك الولاية
***********************
الخادم احمد داود

مشونه بدرب يحسين ناكة وتعثر بناكة
يهل الشيمة ما ترضون وي الزلم نتلاكة
*********************************
مشونه بدرب يحسين نوك امهزلة جابوهه
شما طاحن سوية انطيح والنسوان طكوهه
زينب طرت الديوان يهل الشيمه ترضوهه
لكعدتنه العصر يحسين تدري شكثر مشتاكة
*********************************
جابوهه الهزيلة وصاح زينب ما تصح شرده
اختك والعليل حسين محتارين بالصعده
كتله امشينه للعباس يم المشرعة انكعده
واذكرنه بسوالفنة من نكعد المشراكة
*********************************
الما صارت كبل يحسين بدروب اليسر صارت
زينب بالثلث مرات من فوك الهزل طاحت
وين انطي الوجه لا وين خيل وي الزلم دارت
اسياط وخيل والنيران هدت علي سباگة
**************************************
كتله اتريض بممشاك يالحادي المشي بهيده
بلكت ينتهض عباس عنه المشرعة ابعيده
ما يترك ضعن زينب و يحديهه الهزل بيده
ما متعوده اعوفنه اخوي ويلجم افراكة
***********************************
الما سحكت العتبة بيوم هسه عالجمر سحكت
من سوط الشمر خوية اهدومي على الجلد لزكت
شردت من لهيب النار راحت للنهر ندهت
كالتله يبو فاضل افراكك نار حراكة
****************************
الخادم احمد داود

وي ذباحك امشي و صعدتي اشلون
يأهل ام عون الحگو راحت ام عون
ذباح الحسين الحادي بينه
الصعده اشلون ومجتفين ادينه
******************************
حضرو نوگ الهزيله وحان يحسين الرحيل
لكربلة جيت بكفيل وراح اروح بلا كفيل
تريد حيل النوگ وانه امعلعله وما ضلي حيل
والهضمني الحز وريدك ناوي بأضعونك يشيل
صاح يالله بساع زينب حملّي
حتى ما لحكت اوادعهم هلي
على ضهر الناگة اودع من مشينه
ذباح الحسين الحادي بينه
******************************
واسمع بصوتك ندهلي بهيده يختي اتعطلن
ابنيتي ضلت يم ابوهه وما مشت وي المشن
اتريض بمشيك يحادي النوگ خلي اينوخن
فشلة من حسين اروح وبنته ماهي وي الضعن
بعدهم وحدي بس اصفگ بدية
ادور بالضعن ضاعت رقية
خذتهه النومه يمك من جزينه
ذباح الحسين الحادي بينه
******************************
تعبتني النوك خوية منها كلساع انه اطيح
والله دنية شلون دارت بت علي ما تستريح
عاليسبني حسين اصيح وعاليطگ عباس اصيح
گبل جان اسمي انه زينب هسه صار اخت الذبيح
بتالي العمر صار اسمي السبية
ويصيح هنانه جيبو الخارجية
بخجلنه الوادم اتلمت علينه
ذباح الحسين الحادي بينه
******************************
خوية عظم الناگة يوجع طوّل الحادي الطريج
بعيني شفته الماله والي بديره لا خل لا صديج
من عگب رفگت جفيلي الذابحة لضعنك رفيج
ماكو مهلة نجر نفسنه و لاكو مهلة ابلعلي ريج
فشل عمة السادة بحبل تنگاد
وحگك ثوبي من حر الشمس باد
كلت يالحادي رجعنه المدينه
ذباح الحسين الحادي بينه
******************************
وجوه موش وجوه اهلنه ولا گلب بيهم يرف
حسين دار الوكت بينه وزينب ادور عرف
من المصايب يا اخو زينب زينبك ما تنعرف
مو نفس ذيج العفتهه بيهه كل شي مختلف
اجيت بلون هسه انگلب لوني
عشت ما بين حسراتي وضنوني
واشوفي اكبالي حلمي الذابحينه
ذباح الحسين الحادي بينه
******************************
وانتهت قصة عشگنه وحان يحسين المسير
تمطر اعليه النوايب وآنه اكولن فدوة خير
حيرت الما ضلهه والي ليا كتر بعدك تدير
حگهه المذبحين اهلهه تبجي و اتون وتحير
نگع ردني بكثر ما باجية اعليك
يلمضيعتك بيا ديرة الاگيك
ًبدون اشراعهه اتضيع السفينه
ذباح الحسين الحادي بينه
******************************
الخادم احمد داود

ضعن طر المدينه وبس نساوين
ضعن شو جنه يشبه ضعن الحسين
الفرق بيناتهم نوگ
عباية وجدم محروگ
رايح وين كتله وجيتك امنين
***************************
اسكت اونيني ضليت بونيني
اكولن يوم يومين ويجيني
بجفاكم وشلتهه ادموع عيني
لا موت اليجي ولا ماخذيني

يروحي اختاري واحد من الاثنين
يجيج الموت لو ترحين لحسين
يروحي وموتج احسن
بجفاهم عايشة المن
الفگد مثلج فلا يرتاح بونين
رايح وين كتله وجيتك امنين
***************************
ضعن بي ريحة اهلي الما خذوني
اصدك اعيوني لو اجذب ضنوني
صدك تطلع يلٰاهي وهمه اجوني
نشدت الضعن بس ما جاوبوني

ولا وجه العرفته بهاي الضعون
اكلهم ضعن ابوي؟ وهمه يبجون
ولا ردو نشدتي
ولا راعو دمعتي
غفلة وتعمه خاف من البجي العين
رايح وين كتله وجيتك امنين
*****************************
بعد ما طالت الصفنه وحسرتي
انشدت حرمة وترس خدي بدمعتي
جبتلج ماي جا شو ما شربتي؟
عليج حسين كليلي انتي عمتي؟

تكلهه اشلون اضوكن واشرب الماي
واذكره حسين صاح مفطرة اشفاي
من التل للمخيم
تطشر حيلي والتم
مشي السبعين عام من الصواوين
رايح وين كتله وجيتك امنين
*****************************
جا وين الاسباع المشت بيجن.
على اصابعجن تدوسن لو مشيتن
منين النار اجت حرگت عبيجن
اجيتن بيمن وشنهي الخذيتن

وحدتجن تجر النفس گوة
عمت عين الوكت بيجن شسوه
خوات حسين تنضام
سبايا بنوك للشام
وانه اتطكع وصل كلبي عله الحنين
رايح وين گتلة وجيتك امنين
***********************
متغيره الملامح والتفاصيل
يلمضيعات نجمه بعتمة الليل
الوراه تركض الخيل يسابگ الخيل
اضن بيجن عثرتن بالمجاتيل

الوراه تركض زلم ينشده باله
يموت احسن ولا يفگد دلاله
الخّلص عمره بالخير
شلون بمجلس ايحير
صعب عالماله والي بوليَت البين
رايح وين گتلة وجيتك امنين
**************************
الخادم احمد داود

چم ليلة مرت وانتي ما مرتاحة
صعبة الينام ويوجعنّه اصفاحة
اتجرّين نِفسج گوة
البسمار بيج شسوه
صعبة الينام ويوجعنّة اصفاحة
****************************
چم ليلة مرت چم يوم والنوم ما ضايگته
چنچ نويتي اعله ارحيل بعينچ اموادع شفته
بحيله علي ايهد اجبال عگبچ لزم خاصرته
صاح اعله زينب بهداي ضل يحجي وي ابنيته

کاللهه کومي اتحضّري وشدي احزام
الماتت ورة امهه من البجي ما تلّام
صعبة اليفارگ خِلة
من يموت عگبه احسله
ولا يغفه ليلة ولا يچن بِجراحة
صعبة الينام ويوجعنّة اصفاحة
***************************
كلما علي يضوگ الماي ما يروه يابس ريجة
المن يروح المتعوب ويسولف المن ضيجة
والخلص اسنينه النوح عشرت عمر وارفيجة
من اتنشدة وين الغياب تلهب بگلبة احريجة

المثل ام حسن يفكد فلا يهده بيوم
يسند على الحايط علي من ايگوم
يا حيل صاح من ايگوم
واعله ام حسن ضل ايحوم
حيرة الطير وكاسرين اجناحة
صعبة الينام ويوجعنّة اصفاحة
***************************
تتگلب امي من اتنام بجر النفس مختنگة
يا بوية انه اسمعها اتصيح لمن هواها اتشهگة
شمسوية من شب الدار واعليهه باب ايطبگة
واحد يطك بيهه بسوط وبسطرة ثاني ايلحگة

وثالث لمحته اعليهه من شب الدار
ورابع فرح من شاف جرح البسمار
اتگوم امي اشوفن واطيح
رادت علي بصوت اتصيح
شافت علي امكثر الدمع وانياحة
صعبة الينام ويوجعنّه اصفاحة
**********************************
يأم حسن شو رحتي بساع طبع اليحب صعب يروح
يأم حسن ضلي شجم يوم ما ضلت بزينب روح
من اجروح تطلع جندوب وانوب تدخل بأجروح
شافت ضلعهه المكسور وبصفهه محسن مطروح

شافت الهجمو واليدفعون الباب
جندوب زينب راح تفگد غياب
چم گلب يرادلهه
زينب تموت احسلهه
ولا عمر يگضي ولا تشوف الراحة
صعبة الينام ويوجعنّه اصفاحة
*********************************
مكسور ابوي ومتعوب سافرت عنه ام بيته
من راح يدفنه بليل حاجيته انه و وصيته
لا يلجم اجروح البيه جسم امي لو خليته
بالگبر واندل اصواب بيدي انه من شديته

بهداي گتله وبالگبر مددهه
لا يلجم اتراب اليهيله بخدهه
اتراب الگبر يلجمهه
يختلط خاف بدمهه
اتراب الگبر يلجم جرح لو لاحة
صعبة الينام ويوجعنّه اصفاحة
*******************************
خلص دفنهه بنص ليل رد ويجر بأجدامه
اتلگيته لاجن ما شاف ما وچد الجدامه
ازغيره وبعدني اعله الضيم والحزن موش اولامه
خلاني دهري اشبع نوح واعليه شد احزامه

من زغري عاشرت الحزن والونه
من كثر ضيمي الجدم ما اشيلنه
خافني اموت بمبجاي
محد يون حيل اوياي
يظلم البيت شما بعد مصباحة
صعبة الينام ويوجعنّه اصفاحة
******************************
الخادم احمد داود

من خلص دفنهه ورجع والدهه
اعله امهه الليلة زينب تبجي وحدّهه
***************************
الليلة ام عون تبجي وما سكت ونهه
مشت عنهه الحنينة وسافرت عنهه
اعله الدگ واللطم ياهو اليعاونهه
بنعاوي اعله ام حسن ياهو اليساعدهه
***************************
اشوفن ضاگ نفسج واضعفت قوتج
لا تمشين عن اعيالج امروتج
كلشي امحسبة بس ما حسبت موتج
مشيتج يمه كلش موش موعدهه
****************************
البي حرگة اعله زينب لا يخليهه
الليلة ام عون خلص كل دمع بيهه
دمعه اتجيبهه ودمعه التوديهه
بكثر ما بجت طابع اثر من خدهه
***************************
ترس خدهه الدمع والنوح والحسرة
شحال ام عون باجر من يحل فجره
ايصبرهه الحسين وترجع اتصبره
مصايب والجروح اتجمعت ضدهه
***************************
صار الفجر لاجن ما غفت ساعة
ينام اشلون كلمن عايش اوجاعه
الوكت ما نصف وي زينب ولا راعه
الحزن يفتح اجروح ويرجع ايسدهه
****************************
مشت بس ما مشت من بالي ذكراهه
اريدن للگبر كون امشي وياهه
تلوج ام الحسن عالباب خلاهه
محد حضر يمهه وياهه يسندهه
****************************
الخادم احمد داود

لاستشهاد مولاي موسى بن جعفر ع

صوت الناعي صاح على الجسر ينعة
خل تحضر الشيعة الكاظم اتشيعة
&&&&&&&&&&&&&&&&&&&&&&
غريب ولا اهل حضرو بفاتحته
وين ازلام هاشم ليش عايفته
اجفوف الغرب ليش النعش شايلته
مو عادتهه هاشم ثارهه اتضيعة
&&&&&&&&&&&&&&&&&&&&&&
بحياطين اربعة من ينازع بروحه
يوم وبعد يوم ايكثرن اجروحة
بباب السجن ضلت عينه مشبوحة
يون بهداي لاجن محد ايسمعه
&&&&&&&&&&&&&&&&&&&&&&
مصيبة الما له اهل وشكبر المصيبة
بصوت الباب ضنه ايودي وايجيبه
بعذاب الغربة عايش فوگ تعذيبه
عليه ضاكت انفاسه وضاگت الوسعة
&&&&&&&&&&&&&&&&&&&&&&
ضل وحده ابو محمد محد ايعينه
عين الكوفة تربي وعين المدينة
بالغربة توارد وي ابو اسكينه
الوحيد الماله والي ايدور الفزعة
&&&&&&&&&&&&&&&&&&&&&&
بجتف واحد فلا تنشال الجنازة
المثل موسى ابن جعفر هيج يتجازة؟
لخوانه ابو محمد عازته عازة
فشل تنتخي السادة وما تجي امفرعه
&&&&&&&&&&&&&&&&&&&&&&
ابنيتك هذا وابنك گوم يردونك
من شافو من السم منگلب لونك
حين المتت ياهو الغمض عيونك
لمن هل فجرهه وصارت الجمعة
&&&&&&&&&&&&&&&&&&&&&&
الخادم احمد داود