يا ليل...*

حيل اسحن بروحي سحن
ماگولن احاه وأون
ياليل صدگ مااطخلك راس واشكيلك حزن
فحطن نجومك والگمر
بعيونك السوده اندفن

وانه اعله نغمات الربابه لطيف محبوبي ادگ
ودلالي فاحن هيل والهاون يرن واصبع يطگ

لأهل العشگ .... ياليل
وك لأهل العشگ

صرنه الشموع لونة الولهان
نضوي ونحترگ
وانته تجر بذيالك وتتچبچب
وكلسه اتعثر .. غاد اشتمر ... ياليل
وك لم هدمك وغاد اشتمر

خلينه بسوالفنه نشر عالخلگ ضيم السمر
ما ينگدر
ماينعبر
ياليل وسعه اطراف حبنه ولا لجاريه تطر
چيم حزن ... چيم قهر
مطبگنه عامر ما انكسر

ايدك إلك.. تعجز وحگ عيناك
وتمل السهر
واحنه نظل نردح ردح
ونشع سواليف وشعر
اشمحلاك لو كيفك صحه وسيرت
بنجوم وگمر
وشمثگلك يا ليل لو چلچلت بغيوم وقهر

هم صدگت جفن المحب يغفه ويجن
هم صدگت طير الگطه يهودر ويطبگله جفن

حيل اسحن بروحي سحن
ما اگولن احاه وأون

زامل سعيد فتاح

هذا الموت جسرر للانهاية عليه
كلنا انفووت




12/5
ذكرئ رحيل الشاعر
عريان السيد خلف

چذاب...*

چذاب
دولبني الوكت بمحبتك
چذاب
روحي تمرمرت من عشرتك
چذاب
امش عن سچتي
گطان گلبي برفسته وشگ شبچتك
اوفيلك وتغدرني غفله ولا دريت بنيتك
واحسبتك ترد الوفه وتجازي ايد الربتك

وتريد ارد لا ما ارد
لو صرت بس انته الدوه ولا ارد الك
وانسه المضه
ولا انسه ذاك توسلي وشگات روحي الناگضه
خليتني عظم وجلد وعضاي كلها مرضرضه
مد وجزر كل عشرتك عشره بزعل يوم برضه

واشلون ارد مگرود
موش آنه اليطخ لضحكتك مثل العبد
آنه ادري بجفاك الگلب
ورده
وتموت
وتنمرد

وادري الشته وليله الطويل بوحشته يمرد الچبد
لاچني عيب ارجع بعد
چم زله واغفرها بحناني ولا كسرت بخاطرك
چم سايه منك بينت ما گتلك مگصر ولك
واسنين خمسه بعشرتك مثل الطفل ومدللك
ما حصلت غير السهر
غير المناشغ والقهر
چذاب يل داغاتك ولا تنطفي مد العمر
يل بدلت قداح حبي الغالب بشوچة صبر
خلينه بس نحرگ تتن ونسَمّع الوادم شعر

زامل سعيد فتاح

اي وحگك وانت اعز من اليمين
ولو حلفت بغير ماگتلك جذوب

انت انت وماعلي بالعالمين
الشرگت والغربت بينا الدروب

الحنين...*

يا دار اهلنه ولا حلت غيرچ دار
ولا مر على الخاطر نديم وسمّار
دوار ،، يا دار الوكت ،، مر ودار
ولن العمر ويه شاطي الحمّار
لا گيش بجزره وشلهه سباحه
والشط حدّار
يافي لعبنه ويا شناشيل الطرف
واحنه ازغار
يا فرحة دخول السنه ودار الحبايب تنزار
رد بيه يا ذاك العمر رد مشوار
يا دار اهلنه ولا حلت غيرچ دار

يا دار بس بينه الوكت مال وعال
وصرنه على لسان الخلگ
چلمة شماته وتنگال
اتلمس ذنوبي ذهب مامش دغش فد مثقال
واتنوع عيوبي نبع صافي وعتابه وموال
يا دار لولحني الوكت رمية غشيم ابمحچال
ولني بطرف غيمه ولا مصعاد بيها ومنزال
لا شرجي ويذبني المطر حالوبه من حال لحال
ولا شملت.. واتفسرت..؟
حتى المطر عام وحال
يا دار الحچي البلگلب ما ينحچي وحچيه اكبار
يا دار اهلنه ولا حلت غيرچ دار

زامل سعيد فتاح

نجوى...*

ممحله الروح ما شافت ربيع
ولا ندى جسها
إو ورود الهوى يسمر لهيب اجفاك يبسها
واهيسها حدر ضلعي دبي تدبي
سعير النار اهيسها
واحشمنك تطفيها
واحزمنك بالف شهكه والف حسره

واشوف الماي عندك فاض
وتشح إعليّه بالگطره
على شاطيچ يا شطره
تركت احلامي الخضره

ترف ومن الهوى مشاحيف
اجتك زافها الجاري
دفعها الشوگ بمجاذيف الگمر
حاديها ويباري
ولك وشموعي سباحات
ومورثات من ناري

ولك وصواني الحنه
طيور الگطه يعجننّه
والملّبس على الصوبين
سعف النخل طشنّه
وترد مشايتي منك بطرگ الآه والونّه
ترف چم هرش بالدلال هذا الخبر عتنّه
واظل مخنوگ بالعبره

واشوف الماي عندك فاض
وتشح إعليه بالگطره
على شاطيچ يا شطره
تركت احلامي الخضره

زامل سعيد فتاح

يا غريب الدار...*


ياغريب الدار من دار الاهــــــــل
هاك بوسة شوگ معتز بيهــــــــا
من نواعير الغفت حدر النخــــل
من ثنايا الهور مــن برديهـــــــــا
هاك بوسه لعينك الحلوه كحـــل
شوف بيها احبابك وناغيهــــــــا
هاك وادري الغربه ابد ما تنحمل
مُـره صعبـه بحيلك تلاويهـــــــا
هاك وادري بدمعتك ترفه وتهـل
وادري بيك بمستحه تلاويهــــــا
اشما ثگل غيم الوكت باچر يطل
فـجـر جيتك وآنـه المتانيهـــــــا

زامل سعيد فتاح

هلي و شرعني هواكم باب للخطوة الغريبة و خايرتني عيونكم ذل لو چتل
وانه و الموت التحمنه بمايكم ساگ و حجل
الروح شاخص و العمر برگة گمر و الموت ظل
وويّه كل لمظة زمر گلبي رصاصة
وويّه كل لهبه اصرخ بدمي اشتعل
الدنيا من يشح ضواها الدم بكل حيله يهل

وليداتنه🤍💝🖤🤎

الخلخال...*

باطراف الحي بالگمريه
خلخاله يلج وي كل نجمه
والناعور تباهي بميّه
يغني وجرف الشاطي يلثمه
والصفصاف منعثر زلفه
مال ويه النسمات الترفه
مر واتعده
وتاهت روحي
وخلخاله ايلج وي كل نجمه
مر واتعده
وطارف من عگلي وياه گوطر
دگ بيّه الشوگ
ولا غمضن جفني وهودر
يتراوالي
ويجفل گلبي
وحضناتي ترد
مهضومه وچذابي خياله
ولا ذاري وسد
مر واتعده
وتاهت روحي
وخلخاله ايلج وي كل نجمه
مر واتعده
وتاهت روحي
ودوهن بالي
ما يتراوه
ولا مشيوف
شسّوه بحالي
خلخاله بگلبي دگاته
وگطع انفاسي تعد خطواته
مر واتعده
وخلخاله ايلج وي كل نجمه

زامل سعيد فتاح

يشبچ رموشه أعلى طرواك الجفن

ارد اسألك وبحسن نية محلفك، بالله ترد!
ربك بيوم الصورك، چم يوم طينك نگّعه بماي الورد؟

لميعة عمارة

افه ياكاعنه الوكحه
حلاة الليل واهل الليل
والنار
بمرابعها




مظفر النواب

شـوگي آلك
شـوگ آلحنين
آلعآيش بصـدرك رمـح


عزيز آلسـمـآوي