فگدك جرح بس ماله تضميد
عايفني يم الموش اجاويد
العنهم گلت ذوله اصحاب   باچر يدفعون الباب
&&&
يا رسول شكثر عدهم صلافه
چان كل همهم تره كرسي الخلافه
من متت گالو بعد سهله المسافه
هاي وادم باطله وماكو مخافه
باجر اعاني بروحتك هاي
تدري برحيلك محد وياي
ضلعي بحقدهم ينصاب   باچر يدفعون الباب
&&&
قبل لا تدنالك بساعه المنيه
جابو القرطاس الك تكتب الوصيه
گلت من بعدي علي حامي الحميه
وسجلت بيدك فدك بأسم الزجيه
تنباگ باجر ادري بيها
اصحابك وتركض عليها
بداري تشتم عطاب     باچر يدفعون الباب
&&&
لا تأمن بيهم وكلهم خيانه
غيبه واحدهم تره تسمع اذانه
يا امانه وهمه خانوها الامانه
استعجلو مات النبي نأخذ مكانه
گالو چذب هاي الرساله
حتى النبي باگو حلاله
ما ينفع وياها اعتاب    باچر يدفعون الباب
&&&
انه ادري بروحتك تبدي بفعلها
گالت اول خطه نگيد بعلها
المهم عدنه بعد يوگع حملها
انوب نرجع لي وره ونكسر ضلعها
تهجم علي من كل الاجناس
تسمعني بس ما تفزع الناس
معروفه كل الاسباب  باچر يدفعون الباب
&&&
من متت رگضو على كرسي الرئاسه
وكلها صارت عالمه وتحچي السياسه
بالحرب واحدهم يضم حتى راسه
تبچي چانت بالچذب اغلبها ناسه
بالحرب كلها تظم السيوف
ما حاربو من كثرة الخوف
ياهو الي مثلك ينهاب  باچر يدفعون الباب
&&&
علي جبار الكعبي

وضع الكوفه اليوم    بيهه شگد هموم
حزنانه بلا راي       والمنبر مثلوم
&&&
اليوم وضع الكوفه كلش   مو وضع ما ينحسد
   ضيعت الصدر گالت       مثله ما ظن ينولد
ضيعيت اتلث كواكب    شخله بحوالي اللحد
اربعه بذي القعده انه      گلبي كلش ينمرد
صارت بين الناس    حسين بلا عباس
ظل يفتر فوگاي    غراب البين يحوم
&&&&
ضيعيت سنين عمري   من رحل عني الصدر
چنت مملوكة بغيابه       جيته سوتني حر
انكسر ضلعي برحيله    وانه بغيابه انعصر
ظلتي شنهي بغيابك     خذني يمك بالگبر
ماكو مثله اسباع     يمشي يهز الگاع
اصبح مثل الماي    هذا الشي مقسوم
&&&&
چنت اشوفنه بجمعته    چن علي وسط الحرب
همه ما رادو يصلي     اذن وصلى غصب
عند ابو مؤمل سهوله    ماكو ابدن شي صعب
باقي اسمك يا صدرنه   باقي لا ما ينشطب
عوچيتك اسرار    تشبه ذو الفقار
چنت دگول وياي  الحي القيوم
&&&&
مثل خيط الشمع عايش   احترگ وانطي الضوه
والله لو تنظرنه هسه        تشوفنه بيا مستوه
انه اتنفس جمعتك        بريتي ما يدخل هوه
خدي من گد البواچي   حيل بدموعي انچوه
عايش بس شلون    بغيابك مدفون
متعوب ابلواي   حزني وياي يدوم
&&&&
منبرك حزنان اشوفه   لونه ذاب بروحتك
بعده منصوب بوگفته  ينتظر بس رجعتك
واحنه منتظرين مثله    ننتظر هم جيتك
ولي عافوك بغيابك   شحصلت من عافتك
اسمك بالدلال       ثابت ما ينشال
صرت بكل اعضاي   خلي الناس تلوم
&&&&
علي جبار الكعبي

تره العباس لازم ظهر الحسين
گدام العساكر ظهر الحسين
انكسر بالخيل شفته ظهر الحسين
وداست فوگ ظهره الاعوجيه
&&&&
يعيني دمع مني صدري للحسين
كاروك لرقيه صدر الحسين
انسحن بين الحوافر صدر الحسين
الصدر عالظهر ونطبگن سويه
&&&
تره لختك بعد ما بقت خي ماء
تره لضيج ما ظل بعد خي ماء
زينب نادتك وتريد خي ماء
مو الها تره لسكنه ورقيه
&&&
شغلتك تگضي بس خلها عله حسين
برمح جا ليش بس راسه عله حسين
شفت اخيول تتراكض عله حسين
بحيث اعضامه وصلن يم رقيه
&&&
اجت زينب وصارت ظل عله حسين
ولا تنزاح يا في ظل عله حسين
انكسر بخيول اميه ظلع الحسين
وضلوعه تلمن بيهن رقيه
&&&
بيهن سهم صابه بي سهم فات
بيهم اخذ سهمه بي سهم فات
گلب حسين شفته بي سهم فات
وطلع من ظهره تنضرله رقيه
&&&
بصدر حسين شفته حافر الخيل
وشفت حفره شكبرها حافر الخيل
اجت زينب ادور حافر الخيل
خاف اشلاء ظل بالعوجيه
&&&
عگب اخيام اهلنه بتنه بالسوك
شمر والحبل بيده بتنه بالسوك
ياهو اليرضه تدخل بتنه بالسوك
واحنه مخدرات اهل الحميه
&&&
علي جبار الكعبي

يا اول نفس بيه    يا اخر نفس بيه
حسين     حسين
&&&&
انه اول ما صرت اسمك نطقته
حرز يحسين الاسم بزنودي شلته
ما شفت مثلك فقط بس انته وانته
كلشي ما اعرف فقط حبك عرفته
وحدك عايش بروحي   بلسم انت لجروحي
يمك صافيه النيه
&&&&
انت اول منذبح ينطي شأطلبه
واعله مودي الخيل داست حتى گلبه
اذكر حسين انت ماي شما تشربه
ما اعوفه وابقه احبه وابقه احبه
ماكو حاجه تتاخر   من توصل لابو الاكبر
انت احسبها مگضيه
&&&&
هي ما تتسولف اجروحك چبيره
لملمو بالگوه جسمك بالحصيره
الشيخ من يموت يكسرها العشيره
فوگ ما ذبحك تمشي اختك اسيره
رغم ما راسك  بتنور    كل هاي ويطلع نور
بدون اعمامه خاچيه
&&&&
انت اول منذبح تمشيله ناسه
جاب عمره حسين ميريد الحراسه
حسين ليش بيا ذنب گطعوله راسه
الله يلعن ال اميه بهالسياسه
ليش مسلبه اثيابك     ما يتسولف امصابك
سهم داخل عله الريه
&&&&
بيك شمسويه الخيول العوجيه
تدري بزينب مشت بعدك سبيه
بالخرابه وجابو براسك هديه
شبگته وماتت تره بنتك رقيه
ليش مكسره ضلوعك     ماكو مثله مضوعك
ماتت بنتك ارقيه
&&&&
علي جبار الكعبي

انه الوالده والگلب لهفان
وادور مجلس ابني وين ما چان
* * * *
انه الوالده المذبوح ابنها
ظل من الولد خالي حظنها
من كثر الدمع ابيض جفنها
لحد الان ما بطلت ونها

ابچو عله حسين الظال عريان
****
انه الوالده ابني بلا هدوم
من كثر الطعن ما يگدر يگوم
ظلت فوگ جسمه تدبچ الگوم
واحد منذبح والثاني مسموم

ثلث تيام باقي على التربان
****
انه الوالده والولد مذبوح
ما ادري شكثر حسين مجروح
وينه الي يساعدني على النوح
دم حسين ظل عالگاع مسفوح

ما ضايگ الماي ومات عطشان
****
انه الوالده والضلع مكسور
يكسر گلبي لمن يهل عاشور
جسم وليدي شفته بسيف مطبور
ظل بكل مدينه راس ايدور

ليش اعله رفعو القرآن
****
انه الوالده واحضر مجالس
عينك تشوفك انت وي جالس
اريدك اسود اعله حسين لابس
اريدنكم مثل اجنون عابس

لدخل مجلس حسين هواي ربحان
****
علي جبار الكعبي

قميص النبي يوسف رد واجه بليل
قميص حسين صار بحافر الخيل
يوسف غربه موضوعه حسين مكسره ضلوعه
بالخيل بالخيل
:::::
فعله وفتعلوها اخوته وهو مو يم الخطر
حسين شنوصف احواله جسمه چم طبره نطبر
يوسف وسالم قميصه حسين بي حافر عثر
بقصر يوسف جاب عمره حسين يرمونه بحجر

سهله السجن ما متعذب هواي
ظل يسحگ حسين الراح والجاي
كسرة ضلعه مسموعه حسين مكسره ضلوعه
:::::
دم قميصك مو حقيقي هذا مو دمك نعم
حسين من السحگ تدري دمه واصل للخيم
التقى يوسف بأهله شافهم حيل ابتسم
حسين مطشره عياله وگلبه نصين انجسم

موجودين اهلك كلشي ما صار
حسين عياله كلهم صفو طشار
چانت كلها مجموعه حسين مكسره ضلوعه
:::::
انسجن چم سنه يوسف تالي من سجنه طلع
حسين داست خيل صدره وراسه برماح نرفع
حسين مسبيه عياله يوسف بأهله نجمع
النبي ما متعذب اصلا خنصر حسين انگطع

طلع من السجن رد يحكم شعوب
حسين انذبح حتى الثوب مسلوب
تلگه بصدره چم لوعه حسين مكسره ضلوعه
:::::
قحط مر بهله يوسف هيچ مر بأل النبي
حسين محترگه خيامه عياله كلهم بالسبي
بسوگ ما دخلن خواته وما نظربن عالعبي
بسوگ تمشي الحره زينب وبقه يباوع اجنبي

يوسف اخته ما دخلت دواوين
بنص الزلم وگفت اخت الحسين
نظرها ونزلت دموعه حسين مكسره ضلوعه
:::::
التقى يوسف بخواته شافهم طاب الجرح
حسين ما طابن جروحه وراسه مرفوع برمح
عاش يوسف كل حياته وعمره ما شاف الذبح
عالرمح راس الحقيقه ويفتر لحد الصبح

سالم جسم يوسف حتى الاضلوع
حسين بدون خنصر رأسه مرفوع
جرح يترسله موسوعة حسين مكسره ضلوعه
:::::
علي جبار الكعبي

عندك علم لمن اسرونه
بسوگ الذهب عمدآ دخلونه
دخلت السوگ وانه بلا تراچي
:::::
هديتك ما بقت انباگت بساع
والباگاها شفته بسوگ بياع
گتله اخر هديه من الحسين
جرها وجرته ذبتني عالگاع

جرهن گتله وين تريد ما وين
گلي بدمچ اشلع گلب الحسين

ترست الگاع دمي هواي يجري
ردت وياك كون انگطع نحري
انه وعمتي زينب هم سبونه
:::::
سمعت اطفالهم تحچي المصيبه
تراچي هاي ما عدها الغريبه
قبلهم لابسه انه الذهب بسنين
وكت خله العرب تحجي عجيبه

علينه تعاملو اهل الرذيله
اذا ينطو سعر گلهم قليله

دخلنه السوگ واحنه برعب وبخوف
خلو عيونكم تشبع بعد شوف
بالديوان تعلم وگفونه
:::::
خليها التراجي تروح فدوات
عندي المهم كون حسين ما مات
الذهب شيفيد اذا ما انت موجود
گضيت الدرب كله اعليك حسرات

صرت بغيابك انه بضعف الاسهام
رقيه اعليك ظلت جلد وعظام

بويه السوط يوجع بيه مطبوع
بحيث الضربه تدري تكسر الاضلوع
بحبل يا بويه تعرف چتفونه
:::::
قبل بس بالخيم ما نعرف السوگ
انواع الحچي تسمعنه الحلوگ
طحت وتغيرات اوضاع الخيام
ما ظل كلشي لمن رحت مبيوگ


لمن طحت هجمت خيل وزلام
شي تسلب وشي تحرگ بالخيام

الخيل السحگتك هجمت علينه
طحت وحبال مشدوده بأدينه
هزل نوگ بيهن صعدونه
:::::
اخر نفس ضميته لحضرتك
متت ما طولت لمن شبگتك
ما ارتاح اذا ما شوفك هواي
عالباري وعليك تعيش بنتك

من تروح عطرك بيه مضموم
من اشتاگلك اشتم بالهدوم

تعال وشوف حالي شلون يا حال
چفوفي تگطعت من كثر الاحبال
بعدنه نصيح وينك يا ابونه
:::::
علي جبار الكعبي

انه اول يتيمه المات والدها
قبل بس هو عدها وكلشي ما عدها
راح وعاف ذكره بدموعها بخدها
:::::
انت اول جرح ما ريده ايطيب واريدك تبقه بيه
قبل توصي حيدر وين متروح عينك عالزجيه
طول والدي ما جاني للبيت هاي اول مسيه
بس الفاگد يحس بيها يا ناس تخنگه المغربيه

البيت مثل المگبره بلا والد
تشوفه جنه البيت اذا بي گاعد
الابو مثل النفس نازل صاعد

هو البيت گلي شيسوه من دونك
قبل چانت حلاته بنظرت عيونك
بنتك فاطمه هاليله وحدها
&&&
طلعت روحي لمن نعشك انشال وما ظل بيه كلشي
حرت ياهو الي مات وياهو شالو نعشك مدري نعشي
من گد البواچي اعليك بالليل بيدي طاح رمشي
قبل لمن اشوفك بيه كل حيل وهسه شلون امشي

كلمن يبچي گالو حيل يرتاح
گلت خل ابچي بلكي يرجع الراح
انطبع چفي بظهري بكض الاصفاح

ما بطل ونيني وراحتي بوني
لحد ما يعمن انه ثنينهن ذني
يبويه وهاي روحي هم وصل حدها
&&&
بنالي بيت حيدر بيت الاحزان خليته لحنيني
من گد الدمع والاه والنوح اختنگ انه بونيني
علي سير واشوفك حتى لو طيف واعتبرك تجيني
چانت حلوه ايام انه وياك وراحت كل سنيني

باچر غير حال يصير وياي
باچر راح اغصن حتی بالماي
الزلم يمك شويه ويمي هواي

يمك بس علي دموعه حقيقيه
وفرحانه السقيفة ميه بالميه
تتعده السقيفه باچر بحدها
&&&
شالو نعشك وهيج انه ظليت جسد فوگ الحصيره
شكبرها الدنيا لمن انت وياي رحت صارت صغيره
تره بالشيخ تكشخ نعرف بهاي تنهاب العشيره
طاحت خيمتي وراح الابو بساع وبعد ما عندي غيره

قبل اشكيلك من اهموم دنياي
بغيابك تنسطر يا بويه عيناي
باجر ابقه وحدي ومحد وياي

باجر تنهطم بغيابك الزهره
ضلع ينكسر باجر من اثر عصره
تعال نظرها هسه هموها بگدها
&&&
باچر يندفع بابي وانديك وتجي سطره اعله خدي
يطيح وليدي مني بدفعة الباب بحقدهم تگضي ولدي
خل ينكسر ضلعي ويحترك بيت المهم بس خدري عندي
بويه اهل السقيفه اليوم وياك باچر کلها ضدي

علي شال الجنازه بظهر مكسور
علي حزنان بس الغير مسرور
منا خططو لايام عاشور

باجر بويه تعرف يحترگ داري
نظر بيتي احترگ بس ما فزع جاري
معروف السقيفة وباي مقصدها
&&&
علي جبار الكعبي

رديت ودمعتي بطولي تجري
فاطم هذا گبرچ مدري گبري
انه الكاسر ظهور انكسر ظهري
:::::
انه اول شخص دافن روحه بيده
وينتظر من ميت اخابره الجديده
اعله حيدر هجمو الچانو عببده
يمي چانت فاطمه وصارت بعيده

رديت بس شلون رديت
دلتني وادم ما ندليت
وحشه بدونچ فاطمه البيت

خلصت عمري بنص الگبور
بس ارش ماي واشعل بخور
مكسور فاطم ظهري مكسور

متغير علي يا فاطمه هواي
بعدچ گمت اغصن حتى بالماي
بعدچ ما اريدن حتى عمري
:::
چنت اگول نموت يا فاطم سويه
بساعه وحده گلت تلفانه المنيه
ما ابالي تعوفني وحدي الزجيه
فقط جلد وعظم ظل حامي الحميه

مهموم جبت العمر مهموم
يگعد علي ما يگدر يگوم
طير وبقه يم گبرچ ايحوم

اول شخص وبروحه دفان
يم گبرچ وجاي اقره قران
ذبلان مثل الورده ذبلان

تره بس جسد ظال بدون انفاس
معقوله انت حيدر گالت الناس
النفس مخنوگ يا فاطم بصدري
::::
حيل ما بيه وبقه يسندني سلمان
انه اول شخص يمشي بروحه دفان
حامي جاري ولكن بنص داري نيران
بكل حرب فايز ولكن هسه خسران

خسران راحت شمعة الدار
ظلت تنوح صغار وكبار
ما عندي زينه اليوم الاخبار

اخباري بس النوح ودموع
فاطم وصوت الليل مسموع
من كل كتر شوفيني موجوع

بعد ما بيه حيل بهاي تدرين
يم حسين ردي وشوفي الحسين
اريدچ هسه يمي وكون احضري
:::::
چنت من انظرلچ اتخيل عباده
لمن رحتي راحت وياچ السعاده
هاي انتي لو علي فوگ الوساده
اليوم كل الكون الچ اعلن حداده

ظلت ابنيتچ زينب تنوح
صوت العقيله هواي مبحوح
بس جسد باقي وماكو الروح

ظل الحسن وحسين ايتام
محد ومنهم يگدر اينام
حيدر علي ومدنگ الهام

تعاي وشوفي حيدر گوه يمشي
فاطم صار ابيض حتى رمشي
نار الهجر بيه هواي تسري
:::::
انه ابو تراب واخذ عافيتي التراب
كسر ظهري الباب وانه القالع الباب
ياهو مثلي وبيده دافن اغله الاحباب
الگبل چانو يمي لكن هسه غياب

احترگ مثل الشمع بالليل
حيل وبعد ما بيه اي حيل
ما نشف دمعي وباقي ايسيل

ظليت بعدچ اشتهي الموت
ما اگدر احمل حتى تابوت

بعدچ ما اريد العمر هيهات
ما اگدر اعوفچ انه ساعات
ما تصبر الروح وگلت اصبري
:::::
علي جبار الكعبي

كلمة يمه تبقه اغله كلمه
الله يصبره كلمن فارگ امه
الماتت امه ميت حتى حلمه
:::::
گلب امك ابد ما تلگه منه
ابد ما بي دغش ينگط محنه
تره بكل بيت الله مخلي جنه
مقبول الدعاء من تدعي النه

علاج لكل مرض شوفتها يا ناس
مثل المرقد امي هواي تنباس
اشكر الله لازم امي نعمه
::::
كلمة يمه تبقه اجمل عباره
امي عاصمه ومثل الحضاره
اليخسر امه هاي اكبر خساره
اليشم شيلة امه تطفه ناره

تدرسي بدرس يمه استمع زين
بالك يوم تترك خدمة حسين
حسين وخدمته سوتني زلمه
:::::
بيت بدون ام ما يسوه فلسين
صبح ومسه كون تشوفها العين
ابد ما تلگه مثل امك بعد وين
تحب امي البواچي بس عله حسين

اذا مشكله عندك دون تفسير
يم امك تعال وانت متحير
الولد من امه يأخذ كون علمه
::::
الميته امه يون خلو معذور
يخلص ايامه كلها بنص الگبور
شحلات امك اذا صبتلك افطور
تحب حسين امي وتحب عاشور

كون الموت يتعاتب واحاچيه
خلي امي اگله وروحي انطيه
الحياة بدون امي تصير ضلمه
::::
بيت بدون ام مگبره ينشاف
الله يساعده الشال امه بچتاف
امان الام اذا يمها الولد خاف
تفرح باليجي لو بيتها انضاف

تشوف امك ابيتك حيل ترتاح
مميز عطر امك يظل فواح
امك عافيه وتنطيك همه
:::::
علي جبار الكعبي

گبل بس انت عندي وكلشي ما عندي
احبك تدري اكثر حتى من ولدي
يا حسين
:::::
انه ام البنين وبالي مو يمهم
انه امك مثل ما انه هم امهم
سالم انت خل يرحون الك كلهم
غيرك تدري بيهم كلشي ما عدهم
من تراب جدمك طينت خدي
:::::
انه اول مره تختلف عن النسوان
زلم عزبت انه بساحة الميدان
طلعو مثل حيدر ولدي هم شجعان
ما نشرب الماي حسين اذا عطشان
دونك انذبح هيچ انه كل ودي
::::
حگي اتباهه وانه افتخر بين الناس
ياهي مثلي طلگت جابت العباس
ادرس بالولد حسين تاج الرأس
تنقاس الارض وحسين ما ينقاس
گدام الاخو انه التزم حدي
:::::
قبل عباس ابني من الوليله
گماطه يگطعه ما اعرف شسويله
شبيه ابني حرت يا ربي اشكيله
يرتاح الگمر من بسمك احچيله
يم حسين يا روحي بعد ردي
:::::
هي الدنيا يبني شتسوه من دونك
نحيه نموت احنه بنظرة عيونك
امير حسين گتلهم يسمونك
دنگو رؤوسكم لمن يحاچونك
تره فراگك جرح بعده الجرح يدي
:::::
علي جبار الكعبي

معقوله النهر باقي بمكانه
وهو العطشاك وعطشانه
چان اباله لو ما نشرب نموت
احنه نعيش محد موتانه
:::::
خل يسمع كلامي ويفتهم زين
هو يموت بس يعيش الحسين
اصلا چان يابس ماي ما بي
گصة ابو فاضل ترستك دين

خل يسمع واريدن انه اگله  
شني هوه واجاله الگمر كله
صوتي  واضح وخل يسمع الصوت
لو بي خير جا حول وجانه
:::::
اجاك البطل طوله بعطش ملفوف
شمالك من وصلك كاتلك خوف
چنت مطروح كلها تعرفك الناس
نعملله اعله الگمر سواك معروف

ما نعطش وهاي انت استمع هاي
تره لعنده الگمر شيسوي بالماي
هو هواي وانت شويه منعوت
منو انت وتوصل مستوانه
:::::
منشربك وتبقه تعيش بوهام
تبقه انت ورانه واحنه گدام
گطعنه الزاد حتى الماي وياه
جبنه عمارنه للباري صيام

اجاك الگمر تعرف وين وداك
طولك هذا كله بجربه خلاك
بالعباس انت شكثر مبخوت
اجاك الگمر لكن ما اجانه
:::::
ما معروف انت وتعلم الناس
مايك هذا كله ماي عباس
لو عندك شرف تتعنه الخيام
بس ما عندك اصلا ذرة احساس

تعرف ياهو اجاك القائد العام
جابك سحل يمنه لباب الخيام
مثل الجثه تنحط وسط تابوت
چتفنه العطش ما چتفانه
:::::
ما نعطش وعند الكافل اعيون
ابو فاضل ويگدر يسقي الكون
نهر وگلبها بله اقراها شتصير
رهن يعني انت كلك صرت مرهون

صرت وياهم واصبحت مذلول
منهابك واحنه اولاد الفحول
اظل عطشانه والعباس ما موت
الدهر يتغير وعشت بزمانه
:::::
علي جبار الكعبي

بيك مسجون السجن    وانت باقي بلا دفن  
موسى ابن جعفر غريب  گاضي عمرك بالحزن
&&&&&&
شفت سجنك صار مظلم    وانته نورك بي يشع
صرت مثل الخيط انته     وتحترك وسط الشمع
نعم بس حيطان يمك    لچن صوتك ينسمع
وحدك ومچتوف انته    منك يخاف الجمع
لسجنك وميطب ضوه   مختنك رايد هوه
يمته تشرق يالمغيب   باقي انت بلا دفن
&&&&&&
الدلو للبير ينزل          يأخذ الماي ويرد
مستوى العاگول يبقى   لا تعده اويه الورد
عبد للباري بحياتك     ما صرت الهم عبد
وانته يا موسى ابن جعفر    صعبه ويضمك لحد
گمر انته بكل ظلام    يا امام ابن الامام
تدعي بأمن يجيب     گلبك ولهلك يحن
&&&&
صح يمولاي بحياتك    بالسجن گاضي العمر
ما تسلهم عينك ابدن    نوم بيهن ما يمر
انه ما شفت بحياتي    قبل مسجون العطر
شلون ترهم هاي گلي    جبل صاير بالگبر
سبحه بيده السلسله     باقي يقره البسمله
انت سويت العجيب    جسمه باجر ينسحن
&&&&
تگدر تقلعه بيمينك      باب سجنك تگدره
ينقلع من وحده هوه   غير جدك حيدره
سهل هذا الباب كلش  مثل قلعة خيبره
تگدر تسوي عليهم   اليوم يوم الاخره
سهل هذا ومو محال     تدعي واطيح الجبال
ظال جسمك هم سليب    يله عالكاظم نون
&&&&
تسجد الحياط يمك    ترگع وتقنت قنوت
مات هارون وجيوشه   وانت عايش ما تموت
    ينسمع اذان صوتك    كلها يمك بس سكوت
كلشي يسجد يمك انته   الطير لو رايد يفوت
هواي متغيير اشوف     بيك شي من الطفوف
الحبيب بلا حبيب     يمه لا عم لا ابن
&&&&
علي جبار الكعبي

جرحك بينه   ما ناسينه    ويأذينه  يا كرار
احنه ايتامك   كلنه ابابك   اه يمصابك  يا كرار
&&&&
ميته بأحلامي   من شفتك دامي   ريت انه بهامي
سيف العدوان
ارجع تنايتك    فارغ ظل بيتك   بدمعي تعنيتك  
متروسه احزان
اول شخص نص الفرض ما كمل صيامه
عالباب ظلت تنتظر ومتانيه ايتامه
شيعدلها لو طاحت بعد ونكسرت الجامه
&&&&
چنت الخيمه   هسه بهيمه  يا ابو الشيمه  صرنه ايتام
وينك ارجع  زاد المدمع   حيدر اسمع  ماكو اخيام
زينب ودموعي   حيدر موضوعي   محنيه ضلوعي
شفتك مجروح
ظل بيتي بدونك    يا بويه شلونك  وشلون الروح
بيت من دون الابو مگبره ومهجوره
البنت اذا راح الابو ما ظنها مسروره
خليها تصب الدمع يا ناس معذوره
&&&&
افتح عينك   انه حسينك  اصرخ وينك  بلكي تعود
يا دمعاتك  يا حسراتك   بس نضراتك  بيها وعود
الليله اوداعك  افتحلي ذراعك من دون شراعك
وانت السفان
شيعتك اني   اني وخواني  وبعيني احزاني
  داحي البيبان
مثلك علي ماكو ابد يتكرر ويانه
لمن رحت انه اعرفت الدنيا خلصانه
بالبيت ابد ما نستمع هالمره اذانه
&&&&
زينب تنطر  بيمن تجبر  بس ما تفطر  حيدر وين
بيتچ خالي غاب هلالي   راح الغالي گلها حسين
گلوله بزينب ظلت بس تنحب بيتي ما ينطب وشلون تنام
ضيعت سنيني  دمعاتي بعيني  دهري مبچيني باجر الام
يا بويه باجر كربله تمشيني مسبيه
احبال وسياط وشمر مچتوفه  ايديه
تروح من ايدي بعد سكنيه ورقيه
&&&&
علي جبار الكعبي

طبرو راس الاسلام      فجعو كل الايتام
كل ساعه تمر بعام    يمج زينب
&&&&
ندري احنه بي عالي الجبل     محد گدر ويلوحه
واليوم اشوفنه الجبل       كثرت براسه اجروحه
ظليت اظمن عبرتي            بس بالدمع مفضوحه
عدله انه زينب امشي صح   بس انه احس مذبوحه
حيلچ شدي يم عون    حيدر عودچ مدفون
شالو بجنازه الكون   ظلت تنحب
&&&&
البيت اذا ما بي ابو         مثل المگابر طبته
خيمه وتحس طاح العمد    بسهله صارت جرته
بيتك يصير بلا طعم        ماتت بعد سالفته
معقوله ما يدري علي       منتظره زينب بنته
بيتك يصبح تابوت     وياه تتمنه تموت
مثلك حيدر منعوت     راسه تصوب
&&&&
محضره الفطور الجيتك   نگعد سوه اعله السفره
سالم اريدنك تجي    بس لا تجيني بطبره
حسيت انه بروحتك   خنگتني بويه العبره
ما احتمل جرحك علي    ما طاب جرح الزهره
احمل جرحك جرحين     جرحك جرح ام حسين
غيرني هواي البين       نار وتلهب
&&&&
بيتك تخيله بلا علي    شيصير من تدخله
البيت يصبحلك گبر     تبين عليه الخله
الموت تانيته بعجل   جا ليش بس يندله
خليت عله بروحتك   جيتك وتشفي العله
ما احمل بويه هواي    غصيت بشربة ماي
من ما حسيتك جاي    كلش اتعب
&&&&
گالو عزيزه البنت اذا    موجود اذن والدها
تحس بالامان وبالفرح   وحده الابو يدللها
لو راح ابوها وما رجع    ضيعت كلشي العدها
ايام ذيج الي مضت     راحت بعد شيردها
  لو تگعد يمه تشوف  ميمر بيك ابدن خوف     
وبجاله شگد معروف     وانته مرتب
&&&&
علي جبار الكعبي