ئەی نەسیم و ئەی هەناسەی بەربەیانانم لە کوێی
ئەی هەموو ئاوات و تاسەی ڕۆح و گیانانم لە کوێی

ئەی هەموو دەم هاودەم و هاوڕێ و هەڤاڵ و هاونشین
هێزەکەی هەنگاوی پیاسەی ڕێوبانانم لە کوێی

ئەی چرای ڕووناکیی ئاسمانی ژیانم مانگی من
ئەی زریوەی ئەو کراسەی ئاسمانانم لە کوێی

ئەی کە تەعریفی کەماڵی بۆ ئەویندارانی ژین
ئەی کە پێناسەی لە خاسەی جوان و جوانانم لە کوێی

ئەی ڕەدیف و قافییە و وەزنی شیعر ئەی شاغەزەڵ
ئەی عەزیزم ئەی خولاسەی بەیتی خاڵانم لە کوێی


#خاڵە_قازی

فریشتەی کامەرانیم بووی، کەچی شەیتانی دڵ دەرچووی

بە بارێکی ترا دووبارە شێت نابم، بڕۆ لاچۆ!

#مەدهۆش

ئەو نەهات یا هەر لەبەر چاوی من ئەوڕۆ تەم هەیه؟

#هێدی

بەخت یەک ھیجرەت دوو و غوربەت سیان و دڵ چوار

من یەکم، چوار تەوقی ناحەق بۆچی چۆتە گەردنم؟!

#کوردی

دڵ لەسەر پشکۆی فیراقت وەک سەماوەر هاتە کوڵ

بێرەوە، چایی بەبێ شەکری لێوت چا نییە

#نەدیم

مەعشووقە؛ لە لا، جام؛ بە لەب، مەنزڵی خەڵوەت
چیدی هەیە دنیا! کە تەمەننا لە خودا کەم؟

#ئەدەب

بە دوو زوڵفی کەمەند ئاسا ڕەگی دڵمت لە بێخ هەڵکەند
دەسا ڕەحمێ کە با نەمرم دڵ ئینتیزاری دەرمانە

بە دوو ئەبرۆی هیلال ئاسا کە وەک شمشێری قەتتاعە
بڕیت ڕیشەی دڵی زارم لە ژینی خۆی هەراسانە..


#زاری

ئەگەر بۆ مەنزلی لەیلا بە کووچی عشقەوەدا چووی
خەبەردار بە لە خۆت ئەی دڵ سەرت نەشکێنی دیواری


کەسێ‌ ڕێی کەوتە ئیقلیمی محەبەت گەر هونەرمەندبی
دەبی ڕۆژێ‌ بگا دەستی وەکوو یووسف بە سالاری


#موخلیس

نەخۆشی خۆشترە لای من
لە ساغی و سیححەت ئەی جانا

ئەگەر یەک ھەفتە جارێ بێی
بپرسی چۆنە ئەحواڵت..؟


#ئەحمەد_موختار_جاف

مەستی خەیاڵی ئەوە لەحزە ژمێری شەوە
دوژمنی خوێنیی خەوە دیدەیی بێداری من..



#_نالی

وەرمەگێڕە ڕوویی نازت زامەکەم ئەکولێتەوە
شووشەیی عومرم بە بەردی ھیجر و خەم ئەشکێتەوە
تیری موژگانت بھاوە و بمکوژە ببڕێتەوە
با بزانن من شەھیدی بەژن و باڵاتم وەرە



#ئەخۆل

تا سەر نییە ئەم نازە وەھا دووری مەبینە
ئەو چاوە گەلاوێژە خەڵاتی کە برینە

ئەو زوڵفە کە ئێستاکە دوو توێی عەنبەری چینە
ڕۆژێکی کە دێ تێکەڵی توێی خاکی زەمینە



#ئەحمەد_هەردی

تۆ وەكو ڕزگاركەری منیت لەم دنیایە
هەرچەندە دەمێكی زۆرە بڕوام لەدەست داوە بە ڕزگاربوون.


#كافكا بۆ #مێلینا

ئەی ڕەفیقان بێن بە خەنجەر بمکوژن ئێوە و خودا
تا خەلاسیم بێ لە دەس هیجرانی یاری بێ وەفا


#کوردی

کافریش ڕەحمێ بە یەخسیر و زەلیلی خۆی دەکا
سا وەرە ڕەحمێ بە حاڵم کە ئەگەرچی کافری

گەر بە خەنجەر تیکەتیکەم کەی لەسەر ڕێم دابنێی
دەست لە تۆ ھەڵناگرم ھەر تۆم لە خەڵکی چاتری


#کوردی