“ ‏ما نسيتك من دعاي وحرّ مالي
‏في صيام وفي فطور وفي تهجّد “

‏دخيل العيد وأفراح القلوب وشوفه الغالين
‏ على كثر إزدحام البال خليني على بالك ..

‏صدر فيك القرار الي ما نرضا به ولا نبغيه
‏وحذفت عقالي بحضن الكرامه لجلك وعيّت

‏ودفنتك في مكانٍ ما اذكر انيّ قد ذكرتك فيه
‏وبكيتك وانت حي ، وكنّي ابكي لي على ميّت

‏ماقمت ادوّر على اسباب الجفا لاني
‏ماعرف اسوي ، السواه اللي تسويها
‏َ
‏اصد عن بعض الاشياء شيمة منيّ
‏واخليّ الحاجه اللي خاطري ..فيها

لو يسبقوني بالمعايد والسلام
ما يسبقوني بالضمير وبالحضور

يعايدونك بالرسايل والكلام
وأعايدك من قلب وإحساس وشعور

أنت البدايه والنهايه والختام
خذني من أول نظره ليوم النشور

عيدك مبارك كل عيد وكل عام
وعيدي بدونك من دبورٍ في دبور

‏أحنك وانا مابين ربعي وربعك عرق
‏أنا واحدٍ قالوا له اختار واختارك❤️. .

‏صباح الخير اما بعد :
‏خذانا هوى اللي يوخذ المسك من دمه
‏ " بعد ما نوينا نعتق الصيد بأنواعه "

ذكرتك يا حبيبٍ كل ما حلّت علّي ذكراك
نزل دمعي على خدٍ تعاصف به لواهيبه

سريت بليلةٍ حالت غيومه عن ضيا قمراك
على دربٍ ليا من ضقت رجلي دوم تسري به

أشوفك واقف بعيني ولا لي قدرة بلقياك
مثل طيفٍ ليا من مرني بالحلم أهلي به

طواري الليل ماعدت على قلبٍ فقد لاماك
ترفق بالذي حبك ولا تسمح بتعذيبه

“العيد كلمة ———رؤية المحبوب هي المعنى"

يقول :
" ضميتها يوم اللقى ضم ملهوف
لين انطبع في خدها زرار ثوبي "

هالشعور اللي جهلني ما جهلته
‏مر مثل العيد من دون العيادي

‏ما تبعت الا سرابك يوم خلته
‏كنت اشوفه غيث وهبوبه برادي

‏يا طموحً لو عطاني الله و طلته
‏ما استفز الحلم في ليله مرادي

‏يا عسى فيك الرضى عاللي زعلته
‏يا عسى ما تكون لي كبوة جوادي

‏لو رقمك كل ما اشتاق اتصلته
‏احفظت رقمك يديني لا إرادي

‏ و لو مكانك كل ما اولهْ وصلته
‏ ماغديت بوادي و زولك بوادي

‏منزلك بالصدر من ساعه نزلته
‏أستقرت ذكرياتك في فؤادي

‏يوم وجهك في ذرا الدعوة شملته
‏اقتنعت أنك بقلبي ما انت عادي

‏و حتى أسمي كان عادي لين قلته
‏صار مثل العود في نغمه عبادي .

انا أكبر من الطيحه انا اكرم عن التبرير
وانا الشايّف العارف ولو كنت متغاضي .

‏اللي غيابه برى حالي ودمرني
‏وشلون يقسى وانا ادري ماهو بقاسي

‏اذهلني بـ غيبته قفى .. وحيرني
‏تكفون تكفون ... ياربعي وياناسي

‏على الحياه بـ غيابه وش يصبرني ؟
‏استغفرالله .... من نفسي و وسواسي

‏كسر مجاديفي بـ صده وكسرني
‏والهم طاولني وشيب شعر راسي

‏قمت اسهر الليل .. مدري الليل يسهرني
‏" الحاصل " انه حرمني لذة انعاسي

‏بنساه عله عقب ما انساه .. يذكرني
‏واليا نساني بسيطه دامني ناسي

‏ماهو بـ ودي ولكن بعده اجبرني
‏وسياسته لـ الهوى تبغي لها سياسي

‏وانا على خبره اللي كان خابرني
‏مثل الجبل لو يدور به الزمن راسي

"يارقبة غزيّلٍ غِرّ ياحَقْو الفهَد
فيك من صبحك بياضٍ ومن ليلك سواد

ياغضيض الطَّرف ابو حرفْ ياغضّ النهِد
يا جمالٍ ما ذكر في البلاد وفي العباد

من يشوفك عن حسن غيركم صدّ وزهد
وكل من مرّك تمرّه ذعاذيع البراد

لو لمح زينك رضيعٍ تكلّم في المهد
ويتحرّك لو يشوفك حصا الارض الجماد

ولو يشوفك فرخ طيرٍ بلا ريش استهدّ
يا جمالٍ ينقلب منه حرف السين صاد".

"عشت في فرقاك عِيْش الشِّريد المضطهد
لين صار الهم مني على راس الشَّداد

آه من قصر الأيادي ومن قلّ الجهَد
وآه من كذب الأماني ومن بعد المراد

بين من يرعى نياقه ومن يرعى القهَد
قمت اقصّ جْريرتك من بلاد اليا بلاد

يا كثر ما سقت عشواي واشتلت الوهَد
من وراك وقدت خيلٍ تِقْاد بلا قِيْاد".

"وش ينوبك من عيونٍ تعرمشها السهَد
وش ينوبك لا تطاير من العين الرَّقاد

ومن عنا راعي فؤادٍ تعذَب وانلهَد
امسي فْوادي معي واصبح بليّا فؤاد

في شتا ليلٍ خلا برْد وامطار ورهَد
زدتني فوق الغبينه غبن والهم زاد

كان ما ربُّوك ربعك على حفظ العهَد
ابذل الوصل صْدِقه تنفعك يوم المعاد

يا قراح الماء البويرد ويا طعم الشَّهد
لا متى وعروق قلبي عليكم في حداد".

-ناصر الفراعنه.

‏” شلتك بصدري يوم ضاقت لياليك
‏و أشعلت لك نار كوتها ضلوعي

‏أخطيت في حقي ولازلت أناديك
‏ عندي أمل بكره تحن لرجوعي

‏ أنا الأمان اللي قتلته بـ أياديك
‏ و أنا ضياك شلون تطفي شموعي

‏ بالأمس توعدني وعد ما أخليك
‏واليوم أحارب بالمفارق دموعي “