#المنظورات_الفاطمية
#تسلسل_القصيدة_٣
#وجود_الزهراء_عليها_السلام
«شيعتي»

رب البريه ابقدرته صور وجود الزهره
من مصدر الدنيه او زهر بالعالم وتكوينه
* * *
الباري من كون الكون وصار للآيات مشهد
اونشأ للأفلاك زينة نور من بهجة محمد
وانجله عنها الظلام اوصار للأرواح سرمد
والنور طلعة فاطمه يتشعشع ابأرض وسمه
نور أفلاك المظلمه وللشمس والقمر عسجد
رب البريه الفاطمه كون وجود العالم
وابنورها اليزهي جعل للعالمين الزينه
* * *
زينة العالم ونور اليزهر ابأرض وسماها
فاطمه ورب البريه ابنور قدسيه حباها
من ثمر شجرة محمد ورده والكون اجتباها
زهراء بالقدره إزهرت وبآية العصمه اكتفت
وباطن معانيها إظهرت ابسورة الشمس وضحاها
ومن سورة الرحمن اخذ بحرينها وبرزخها
فاطمه وحمـاي الحمه وما بينهم هادينه
* * *
من ينابيع الحياة امياه هالبحرين تجري
الليلو والمرجان منها يظهر اوكوكب الدري
اشلون بحرين او عليهن للنجاة السفن تسري
وسفن النجاة الساريه تحمل الفرقه الناجيه
وابها لمعاني الساميه نوَّر المعبود فكري
وبنور فكري شاهدت يوم الحشر واهواله
اوشفت الشفاعه واشهدت حب فاطمه اينجينه
* * *
ارد اخبرك يالموالي او بالنجاة انعم اعيونك
من تطب للحشر عاري او للحساب ايقدمونك
توگف امهبط الراس اوثگل ذنبك على إمتونك
أمرك الباري ودعه للشافعه وامشفعه
وهيه البتول الشافعه وابفضلها ايشفعونك
وباللوح من خط القلم خدامها سجلنه
واحنه ابخدامة فاطمه ثـوب الشرف چاسينه
* * *
اوساعة التوگف الوادم عالصراط امحيريها
ناس يامسهل عبرها وناس ما يحصل بديها
اهناك تذكرة المرور الناجح ايحصل عليها
يسهل عبـور الگنطره بحروف هاي التذكره
اليزهي ابولاية حيدره اوبالشفاعه امصدقيها
واحنه ابشفاعة فاطمه نمضي ابولاية حيدره
وحيدر على حب فاطمه صك للعبر ينطينه
* * *
تطب للمحشر إبهودج نور والعصمه علامه
يصيح جبرائيل بأمر الباري ويبلغ احكامه
غـُضُّو الأبصار طبت بت محمد للقيامه
ومن توصل البـاب الخلد تلتفت للمحشر تـرد
وتنادي يارب الگصد هليوم تظهر لي كرامه
واحنه بكرامة فاطمه يوم التطب للجنه
وحيدر على حب فاطمه بالكوثر يهنينه
* * *
تگف بموسط المحشر بت رسول الله وحبيبه
تدعي للباري ودعاها منطق الحكمه مجيبه
يگلها يا بضعة محمد تشتچين ابيا مصيبه
بالضلع لو سگط الحمل لوسهم إلإبنحر الطفل
لو بالگضوا بالطف چتل لوسبي الظلت غريبه
تدري اشتقدم فاطمه او طلب للباري
چفين فاروق اللوه وسهم التفرس عينه
* * *
ياإلهي بگطعت الچفين تنجز وعدتي
واعدتني بالشفاعه والشفاعه رادتي
بيدچ المحشر يگلها وباب خزنة رحمتي
تعتق ارگـاب الدعوتچ تمحي الذنوب الشيعتچ
يا بت حبيبي ورادتچ بهالخلگ من رادتي
واحنه الذي ما نختشي من مالك ونيرانه
تشملنه رحمة فاطمه والرحمه من بارينه
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٤
#الزهراء_عليها_السلام
«شيعتي»

خلقة الزهره الزچيه خلعه من رب البريه
مشعل من نـور بالعصمه إينور
والرسول ألله هديه خلقة الزهره الزچيه
* * *
من كمل خلق العوالم بالأحكام السرمديه
لا نجم لا گمر يزهر لا شمس چانت مضيه
والظلام إعله العوالم نشر خيمه عالميه
والملك وجه دعوته للباري يطلب رحمته
منّْ الظلام إو شدّته وشوف ألأسرار الخفيه
أطلب النور التريده إو شوفه بعيون العقيده
مظهر برهـان شمعة إيمان
بالسمه ولأهل الوطيه خلقة الزهره الزچيه
* * *
الباري إبخلق العوالم أحكم إو أعلم إو أبصر
ومن خلق أول كلام النور من معناه جهجر
وخلق من ثاني كلام الروح من معدن الجوهر
والنور بالروح إعصمه إو صوّر محاسن فاطمه
وأزهرت بألأرض إو سمه إو شـوف المصور إشصور
صوّر العـالم إبجوده وفاطمه زهرة وجوده
وإبهالتكوين تجنـي الكونين
ورده من روضة نبينه خلقة الزهره الزچيه
* * *
مسجد المعمور بيت إبسمه الرابع معنويه
بيه قنديل إيتشعشع نوّر الذروه العليه
وإبسماء الدنيه زينة نور قدسية الزچيه
إو سبع ألأفلاك إمنوره والنور أصله إو مصدره
من فاطمه إو من حيدره لطف من رب البريه
واللطف كـوّن الزهره وأزهر العالم إبأسره
حكمه إو دستور إو بيـت المعمور
ظهرت أسراره الخفيه خلقة الزهره الزچيه
* * *
زيِّنَت خلق العوالم فاطمه إبنور ألإطاعه
والفلك يسبح إبنور العصمه وإبعلو إرتفاعه
والكره ألأرضيه تمشي إعله الهده إبمظهر شعاعه
زهـراء من ضيها إبتدر نورين للشمس إو گمر
وزانت مصابيح الدهر وللخلگ عصمه إو مناعه
مظهر الزهره تجله والملك قـدّس محله
إو نـور المذكور موسه إعله الطور
شاهده وأهتده إبضيه خلقة الزهـره الزچيه
* * *
فاطمه إو نشأتها حكمه إبعالم الذر إبإراده
إو فطمت إمن النار روح الثبت بألله إعتقاده
وإبنساء الخلگ سادت وإلبست تاج السياده
إو من بالحياة إتجسمت والحيدر إبحكمه إنهدت
بأُفق السماء إتزوجت والمهر صار إنعقاده
البت رسول ألله ومهرها طوبى يتناثر ثمرها
وإبهالعنوان صـاغ الرحمن
حفظ البدور المضيه خلقة الزهره الزچيه
* * *
ظاهر التزويج حكمه إو باطنه للبشر رحمه
إو رادة الباري العباده يتم بالزهراء نعمه
ومن ثمرها إهدعش كوكب يظهر إبمظهر العصمه
ومنهم العالم تغتنم وإتسير أفلاك الحلم
وإبحـور تتفايض علم من مناهل بحر علمه
للخلگ يسر أمـرها الباري بالزهره إو ثمرها
روح إو ريحان جنـة رضوان
إو بهجة إجنان الزهيه خلقة الزهره الزچيه
* * *
فاطمه بضعة محمد والمحمد ما رعوها
ليل ونهار إبحزنها جابعه لمصاب أبوها
لو گضت شطر العباده من بواچيها إمنعوها
مصيوبه بسهام الحزن مالومه وإتنوح وتحن
مهضومـه ما چانت تظن هيچي ضيعه إيضيعوها
وهي للعـالم حياته وللبشر عروة نجاته
منهل إحسان مصدر غفران
أو آيـة أخلاق البهيه خلقة الزهره الزچيه
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٥
#الزهراء_عليها_السلام_نور_أبلج
«شيعتي»

أربع حروف ابنور قدسي تجلت
والنور عصمة فاطمه بنت النبي الهادي
* * *
المصطفى صفوة الباري او فاطمه منه اصطفاها
وإنشأ احروف الإسمها اومن سنه العصمه اجتباها
للكتب خلاها زينه چالمصابيح ابسماها
اعقـود جـوهر منها فجر طيـب عنبـر الله صـور
بيها يزهر كل كتاب اللي حواها
كل حرف چالمصباح زينه ابكتابه
اوزينة مصابيح السمه بنت النبـي الهــادي
* * *
الفاء ـ فاق المجد مجده واعتله الذروة العليه
الفاء ـ فاروق المعاني الجوهريه العبقريه
الفاء ـ فاطم من جهنم محب فاطمة الزچيه
الفاء ـ فاضل مجده كـامل فــرج عاجـل للمشـاچل
تاج حامل بالأماره الفاطميه
يحسم أمور الكون سر هالإماره
وسر الإماره الحاسمه بنت النبـي الهــادي
* * *
الطـا ـ طريق الشرف واضح صار لهل الشرف مگصد
الطاـ ـ طهور إمن الشراب وصار للإسلام مورد
الطـا ـ طهربيه الموالي ضامره وبالحق تشاهد
طيه رحمه حرف نعمه رمز حكمه من العصمه
صار سهمه الشرف من بضعة محمد
والشرف لهل الدين عـاصمه او عصمه
اوقنديل عرش العاصمه بنت النبي الهادي
* * *
الميم ـ مهد العفه والعف بي ربت روح الكرامه
الميم ـ ما تنفصم عروه او فاز من بيها التزامه
الميم ـ منها اهدعش چوچب لاحت ابعرش الإمامه
الميم ـ منهل من السلسل عنه اسأل وحي المنزل
لا لتجهل فضله واتصيبك ندامه
والميم من ينبوع نشأة الكوثر
ترويـك منه امن الظمه بنت النبي الهادي
* * *
الهـا ـ هلال اللي تجله وابتده من الزهره نوره
الهـا ـ هوه اعله الناس رحمه او يسر العسره اموره
الهاـ ـ هنا العيش ابوجوده أو للمحب بهجة سروره
الهـا ـ هديـه أحمديه للزچيه وللبريه
معنويه انطبعت ابكل گلب صوره
من الهديه ابنور مرسومه صوره
ابگلب الموالي راسمه بنت النبي الهادي
* * *
اتزينت هاي الحروف ابفاطمه او زينة اسمها
چالقناديل ابضمير المحب يتشعشع رسمها
هذا فضل احروف اسمها وشوف فضل الملتزمها
بالتزامه واعتصامه بالإمامه ابكل مرامه
والكرامه من محمد يغتنمها
وصك النجه من النار يوم القيامه
بيد الموالي اتسلمه بنت النبي الهادي
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٦
#البتول_الطاهرة_عليها_السلام
«هجري»

رب الكون للزهره حباها بيها نوَّر ألأرض إو سماها
وإتنـور الدستور من جوهر محمد
* * *
من دحه ألأرض إو رصدها الباري بأسرار ألأحكام
إو كوّن السبع السماوات إبسته إمن الأيام
لاچن العالم مظلمه والملك تشچي الظلام
ورب ألأنوار إبرحمته عالخلگ تمت نعمته
وأنشأ النور إبحكمته من ثمر سيد ألأنام
يالتنشد إعله النور إو تريده نوّر عينك إبنور العقيده
إتشاهد مصنع النور من جوهر محمد
* * *
إو كون الباري كلام إو بالإراده إتكلمه
وأنشأ إبثاني كلامه روح رفّت بالسمه
إو مزج ذيچ الروح بنواره إو صارت فاطمه
والكـون بالزهره زهر وإتنـورت شمس إو گمر
وأزهت مصابيح الدهر إبنور ذات العالمه
ومن برج الرساله وألإمامه بزغت فاطمه إبجوّ الكرامه
وأضحه العـالم إينور من جوهر محمد
* * *
ومن عقد جوهر القدره إنصاغ للزهره وجود
ومن صدف سورة الكوثر درَّه ظهرت بالوجود
إو فرض عالوادم ولاها الفارض الذاته السجود
وإللي يواليها إغتنم جنّه إو من إجهنم سلم
إو باللوح من خط القلم كتب للزهره عهود
إو صارت فاطمه إبسر ألإطاعه هيه الشافعه إبيوم الشفاعه
إوذنب المحب مغفور من جوهر محمد
* * *
بالعرش بضعة محمد تشع بنوار أربعه
إبراسها تاج النبوه مثل شمس الطالعه
إبجيدها طوگ ألإمامه وإبسناها ساطعه
عالي ضحاها إو مرتفع زينه إبسماوات السبع
وقرطانها إتنور إو تشع إبنور الشهاده لامعه
مشعل عصمة الزهـره تجله إو موسى إعله الجبل قدّس محله
إو نور البده إعله الطور من جوهر محمد
* * *
وكل نبي جاعل الباري إمن الولد ذريّته
إبعلمه وإبغامض أسراره إو بالإراده إوحكمته
إختار للمختار عتره من الزهره بضعته
من حيدره صار الثمر والنور واحد بالخبر
إو دون العرش گطع الثمر إو طوبا الثمرها نشرته
إو شجرة طوبـا للزهره إو مهرها عالإسلام من نشرت ثمرها
در الشرف منثور من جوهـر محمد
* * *
إبسورة الرحمن بحرين إو ساحلهن أمان
إبينهن تذكر ألآيه (برزخٌ) لا يبغيان
فاطمه إو حيدر البحرين إبتأويل البيان
والبرزخ إبنص الوحـي يظهر إبتأويله النبي
وتكفل الزهره إو علي إو ربو بحجور ألإحسان
أو عشر إبـدور والمهدي ذخرها بي يتدبر العالم أمرها
والغايب المذخور من جوهر محمد
* * *
إبآية العصمه الزچيه إتطهرت من الدنس
واليحبها إبنور عصمه من معانيها إقتبس
إو نزلت إبشان اليضدها آيه وإبسورة عبس
وإللي يواليها نجح بالآخره إو دنيه ربح
ويوم التكافي لو صبح تاج إبشفاعتها لبس
تاج إمن الشفاعه إيلبسونه إو بعقود الولايـه إيرضعونه
وبي يستخدم الحور من جوهر محمد
* * *
يالمحب إعرف فضيلة نفسك إبنت النبي
إتمسك إبعروة الوثقه إو عروة الوثقه علي
واليريد إشهود خله يقره آيات الوحي
إو عقد الـولاء إيجدده إو درب النجاة إيشاهده
ويتمسك إبنور الهده والسعد لليهتدي
وللي يهتدي إبنور السعاده إو يتوثق إبألله إعتقـاده
إو بالدارين منصور من جوهر محمد
* * *
إو لو ردت يا صاح تحرز لعد آخرتك حرز
إغرز إبگلبك ألإيمان أو حب حيدر غرز
إمن الخطر نور الولايه إبجبهتك خلي حرز
ألله إو رسوله إيساعدك إو حب الولايه إيأيدك
أو كـاتب الرحمه إيقيدك إبخط علي إو ما تنفرز
واليتقيد إبدفتـر أميره بالدارين يتحسن مصيره
وإشما عمل مشكور من جوهر محمد
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٧
#فاطمة_بضعة_مني
«هجري»

زينة وجود الكون بضعة محمد
سادت العالم بالشرف من شرف باريها
* * *
من دحا الأرض اورصدها الباري بأسرار الاحكام
اوكون السبع السماوات ابسته امن الأيام
لاچن العالم مظلمه والملك تشچي الظلام
شاءت الباري رادته من طي معادن حكمته
للخلگ تظهر آيته او عالكون ينشر رحمته
من رحمته او معنـاه كوَّن الزهره
وأزهرت والعالم غده يزهي اويشع بيها
* * *
اوكون الباري كلام اوبالإراده ايكلمه
وانشأ ابثاني كلامه روح رفت بالسمه
او مزج ذيچ الروح بأنواره او صارت فاطمه
جلت الباري قدرته للكون حسن صورته
بـدل ظلامه ابزهرته اوصاغ المحمد
بضعته
من جوهـر الإحسان فاطمه انصاغت
نعم الهدايه فاطمه وللهادي هاديها
* * *
اومن عقد جوهر القدرة انصاغ للزهره وجود
اومن صدف سورة الكوثر دره ظهرت بالوجود
اوفرض عالوادم ولاها الفارض الذاته السجود
واللي يواليها نجح ابحبها اهتـده اوصدره انشرح
تاجر أوبالتجره ربح برضوان معبوده فلح
حب فاطمـه الإيمان واليغضي عنه
لويعبد ابكل الدهر خسران تاليها
* * *
بالعرش بضعة محمد تشع بانوار اربعه
ابراسها تاج النبوه مثل شمس الطالعه
ابجيدها طوگ الإمامه وابسناها ساطعه
ابقرطانها انوار ازهرت إمن الحسن وحسين اظهرت
ارض اوسمه بيهن زهت أنوار قدرة اتبادرت
نـور الحسن وحسين للعرش زينه
رب البريه ابحكمته اوقدرته امخليها
* * *
كل نبي جاعل الباري من الولد ذريته
ابعلمه وابغامض اسراره او بالإراده اوحكمته
اختار للمختار عتره من الزهره بضعته
والعتره من عالـي الحكم أظهرت بالعالم علم
اوسادت على كل الأمم اوفاز الذي بيها اعتصم
او أمة محمد صـار عزها او شرفها
ابعترة الهادي او هالشرف عالناس يكفيها
* * *
ابسورة الرحمن ( بحرين) او ساحلهن أمان
ابينهن تذكر الآيه برزخٌ لا يبغيان
اوفاطمه اوحيدر البحرين ابتأويل البيان
اومن طي معانيها ظهر ليلو الحسن شمس الدهر
اومرجان الحسين اوزهر نوره اوعلى الكون انتشر
والبرزخ التأويل يعني محمد
بحرين رحمه او للذنب يمحيه جاريها
* * *
ابآية العصمه الزچيه اتطهرت من الدنس
واليحبها ابنور عصمه اومن معانيها اقتبس
اونزلت ابشأن اليضدها آيه وابسورة ( عبس)
طالع الآيه واعترف ابحب فاطمـه او لا تختلف
اولو شفت معناها كلف التأويل ينبيك الوصف
واعداك بالتـأويل معناها واضح
ابسورة ( عبس ) بآخر سطر مذكوره تلگيها
* * *
يالمحب اعرف فضيلة نفسك ابنت النبي
اتمسك ابعروة الوثقى او عروة الوثقى علي
واليريد اشهود خله يقره آيات الوحي
آيات حكمه نازله تبدي الشهاده الكامله
اومعنى الشهاده إمـأوِّله تصديق حب عقد الوله
ثلث ميه اوثلاثين آيـه او أكثر
نزلت ابحق المرتضى غير المضيعيها
* * *
لو ردت يا صاح تحرز لعد آخرتك حرز
إغرز ابگلبك الإيمان اوحب حيدر غرز
من الخطر نور الولايه ابجبهتك خليه حرز
والنـور يهديك الرشد اوبرشدك اتنـول المجد
واينول حظك كل گصد اوبالشرف والعز تنفرد
من كل خطـر محفوظ بالله اورسوله
اوحيدر يحضرك بالشدد علتك يداويها
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٨
#فاطمة_بنت_رسول_الله_صلى_الله_عليه_وآله
«ميمر مذيل»

جتك البضعه امكدّره أو مظلومه يارحمة الله
* * *
بضعتك ياسيد الرسل من بعداك ظلت حزينه
ينحب گلبها اوينتب من فرگاك معلن ونينه
لاچن أخبرك شعملوا بيها اعداك وأهـل الضغينه
ظهروا الچانت بالگلب مضمومه يارحمة الله
* * *
اللهُ أكبر يوم هجموا عالدار من عگپ عينك
والباب من رادوا يوجوها ابنار روعو بنينك
رادتهم ايسحبون حماي الجار صارم يمينك
ليث العرب فارس اگروم الحومه يارحمة الله
* * *
من درو بالبضعه إلبدت خلف الباب جسروا عليها
من بضعتك تعلم البسمار اشصاب صوب ثديها
من العصر محسنها سگط بالأعتاب وراح امن اديها
ذلت الچانت بالخدر محشومه يا رحمة الله
* * *
اتمنيت حاضر يارسول الله اتشوف حال الزچيه
من سبحوا من الدار حيدر مچتوف راعي حميه
واتشوف لون أم الحسين المخطوف من هالرزيه
او بيدك تشد اضلوعها المهشومه يارحمة الله
* * *
ساگط حملها والنوايب تسعر نار ابگلبها
طلعت ابهالحاله تدورحيدر وتناجي ربها
ابطرف الـرده لاچن غدت تتعثر تايه دربها
لمن تگع تصعب عليها الگومه يا رحمة الله
* * *
والرد عليها رادته ايرجعها مغضب نحرها
من عيت ابسوطه الرجس لوعها ثنه اوسطرها
من لطم وجناها جره مدمعها اوعندك خبرها
هانوا البضعه الماجده المكرومه يا رحمة الله
* * *
للمسجد اتعنت الزهره ابهمه ولها إو حزينه
شاهدت بين الگوم عود اليمه وامچتفينه
اوشبله الحسن مفجوع واجف يمه معلن ونينه
اودمعة حسين العالوجن مسجومه يارحمة الله
* * *

خلو ابن عمي نادت ابدمع ايجود عالوجـن من دم
ساعه اوشلت راسي اودعيت المعبود وبحالي يعلم
والمسجد اتزلزل من ارياح السود راد ايتلايم
او ماجت أركانه الثابته المحكومه يا رحمة الله
* * *
حاير شوصف لك يسيد الأكوان حال الوديعه
حتى البچه منعوها عنه العدوان واهل الخديعه
ابوادي البقيع اسكنت بيت الاحزان تبچـي الشفيعه
عگبك او عاشت بالوصف مالومه يا رحمة الله
* * *
من دنت ساعتها اولفاها المحتوم عند المنيه
او لمن على المغسل طرحها الجيدوم حـامي الحميه
وابناظره من لاح ضلع المهشوم والله اشرزيه
اوشاهد امتون البالضرب موسومه يارحمة الله
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_٩
#الزهراء_المرضيه_عليها_السلام
«ميمر مذيل»

مرضيه مرضيه راضيه إو مرضيه
عند ألله بـت سيد البشر راضيه إو مرضيه
* * *
من نشأ خلق العالم إو دستوره إبآية الرحمه
إو كوكب الدري المنذكر بالسوره صـاغته الحكمه
إو صوّر الباري البت محمد صوره سابقه إبعلمه
زهريــه زهريــه صورتها زهـريه
إو زانت مصابيح الدهـر راضيه إو مرضيه
* * *
صانع الباري من بهاء المصنع للزهره عينه
قنديل وإبساق العرش يتشعشع للعرش زينـه
إو بيها الملك يتشرف إو يتشفع لأمة نبينه
روحيه روحيه نشأتهـا روحيه
من شجرة الهـادي ثمر راضيه إو مرضيه
* * *
وصّف الباري فاطمه إو زينتها من عالم الذر
إو زيّن سماء العالم إبزهرتها والعالم أزهر
وضّح معانيها إو شرف عصمتها إبسورة الكوثر
ذريه ذريه للهادي ذريه
من فاطمه إبنص الخبر راضيه إو مرضيه
* * *
تاج الرساله إبراسها إو نور التاج للعصمه مشعل
وإبجيدها طوگ ألإمامه الوهّاج نوره إيتبهلل
قرطانها سبطين راعي المعراج للشرف منهل
أرضيه أرضيه بالكره ألأرضيه
جوهـر معانيها إنتشر راضيه إو مرضيه
* * *
زهراء إسمها وأزهرت بألأكوان من مبتداها
بدر الديانه إو شمس برج ألإيمان عالي ضحاها
الباري إبغضبها يغضب إو بألإحسان يرضه الرضـاها
قدسيه قدسيه زهرتـها قدسيه
وإتقدس إبّر إو بحـر راضيه إو مرضيه
* * *
جل القدير الخالق إبخلقتها إشجامع معاني
سورة النور إتجلت إبطلعتها إو سبع المثانـي
إبآية العصمه النازله إبعصمتها إستشهد بياني
رسميه رسميه حرمتهـا رسميه
مرسوم للبـاري صدر راضيه إو مرضيه
* * *
خط القلم باللوح من المصدر والباري قرر
حب فاطمه يشفع إبيوم المحشر وإحنـه إنتباشر
وإعله الصراط إبحبها ما نتحير ينطينه حيدر
عبريه عبريه للجنـه عبريه
والجنه للزهره مهر راضيه إو مرضيه
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_١٠
#الزهراء_البتول_عليها_السلام
«مجرشه مذيله»

بضعة نور هادينه للعصمه عينه
اورب البريه قرر فاطمه ابذمة حيدر
من آيات تكوينه للعصمه عينه
* * *
هاك اخذ من نص الوحي إسم البتول الزهره
واختبر عنها
نعم الهديه للنبي هاديها رب القدره
والنص علنها
اوخل العوالم تهتدي بنوارها اوبالزهره
للتبتدر منها
بالقـرآن تكوينه للزهره صوره
ظـاهر إسمها الزهره او باطن إسمها الكوثر
اوحيدر بيه يسجينه اوللعصمه عينه

* * *
اوآية العصمه النازله ابطي الكتاب اقراها
من تستلمها
درة صفات الفاضله عد فاطمه تلگاها
واعـرف فضلها
بنوار عصمه امهلهله ابساگ العرش معناها
الباري جعلها
من تكوين هالعالم والعالم اظلم
رب البريه صور فاطمه اوبيها اتنور
كل تكوين بارينه اوللعصمه عينه
* * *
من سنا الباري اتصورت فاطمه او من نشأتها
روح الامامه
بيها الأفلاك اتنورت واسفر دجى ظلمتها
ابنور الكرامه
واهدعش چوچب أثمرت للعالم اوزهرتها
اليوم القيامه
اوهذا النور ما يأفل للحكمه مشعل
يتشعشع اويتبادر بيه البشر يتنور
اوللإصلاح يهدينه اوللعصمه عينه
* * *
سبحان رب اللي جعل بسراره المخفيه
قسمة محمد
عن فاطمه اوخيـر العمل للمصطفى ذريه
اوبيهم تأيد
بيهم رسول الله ابتهل واتجلت القدسيه
والحق تشاهد
اوبالقرآن هالآيه صك للولايه
والبالولايه اتمسك للجنه حصل مسلك
واحنه إلبيه طبينه اوللعصمه عينه
* * *
يوم المعاد امقدره بت النبي اوقدرتها
عنـوان أبوها
ابنور الشفاعه امنوره اوتتشفع الشيعتها
وايشفعوها
اوتحرم النار المسعره بالزهره وابزهرتها
عاليحبوها
والمعبود يرعـاها اويسمع دعاها
من رحمته ينطيـها واحنه الذي انواليها
من هالجـود ينطينه اوالعصمه عينه
* * *
لوتدري بالزهر ه اشصدر يالفايز ابنعمتها
يندهش نوعك
من عگب أبوها امن الدهـر چم نايبه الصابتها
اورخص ادموعك
واشسگط منها اوشنكسر بالباب وابعصرتها كسرة اضلوعك
والبسمار اوآثـاره وچرت ناره
ما تنطفي اولا تبـرد بگلوبنه تتواگد
إلا ابسيف مهدينه اوللعصمه عينه
* * *


الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_١١
#فاطمة_إمن_المختار
«عجز هجري + حسيناوي»

فاطمه إمن المختار آيه مشهوده
والنجوم إلّي هوت من سماها إعله الدار
آيه مشهوده
* * *
صانع ألأكبر صنع صـور للأكوان
وأنشأ الزينه
نـور من خمسه سطع من سنه ألإحسان
زاد تكوينه
فاطمه إبهالمجتمع روح للوجدان
للوحي عينه
وإبثمر هالتكوين إنعرف معبوده
وإحنه بيهم نهتدي وإبولاهم نقتدي
وبيهم العالم صار آيه مشهوده
* * *
من محاسن فاطمه زهر بألآفاق
نور عصمتها
نوّر ألأرض وسمه إو تمت ألأخلاق
من كرامتها
عالشرف والغـانمه عقدت الميثاق
روح شيعتها
وإبولاها ألإيمان يزهر إوجوده
والعقيده الصادقه إبفاطمه متوثقه
ونورها إيطفي النار آيه مشهوده
* * *
كـوّن الشمس إو گمر وزاهرات إنجوم
للخلگ زُهره
الملك والجـن والبشر صاغها إبمرسوم
صادرت أمره
أنشـأ البر والبحر إو نشر بيها إعلوم
عصمة الزهره
وإبمحبتها إيفيض عالخلگ جوده
والبحور الجـاريه فلك بيهن ساريه
وألأفلاك التندار آيه مشهوده
* * *
لأُمته گام إبعلم يخطب المرسول
يعلن ألأعلم
للوحـي خطط رسم لايظل مجهول
وألأمر مدهم
إبدار من يهوه النجم بألأمر مسؤول
عگبي وألأقدم
موقف الحگ مشهود والوحي إشهوده
والنجم لمّن هوت إبدار أبو حسين وضوت
إبفاطمه يسطع نـور آيه مشهوده
* * *
إبشر إبشر يالتود ملجأ اليحميك
إبظل رعايتها
من فضيلتها إستمـد غانم ويغنيك
عن فضيلتها
إو بالحشر بأللـه إعتقد سرّ إلينجّيك
سر شفاعتها
عالصراط إيجزّيك حبك وزودك
إخذ بإسم النجدتك صك شفاعه العبرتك
إو من يمين الكـرار آيه مشهوده
* * *
موقـف إبيوم الحشر تصعب ومتهون
شدّة أهواله
لا بنين إو لا ذخر ينفع المديون
يحسن إبجاله
إبفاطمه إيهـون ألأمر والمحب مضمون
إو تنجح أعماله
وإحنه بالزهره إنفـوز نجزي إحدوده
إو دارنـه دار الخلد نطب بيها لا نعد
الجنه بيها أحرار آيه مشهوده
* * *

الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_١٢
#نعي_عن_لسان_الزهراء_عليها_السلام
«نصاري»

عگب عينك يبويه تعلم إشصار
بيّه وإشجره إبحالة الكرار
عله إفراگك مسهره إبليل وإنهار
إو عيني إتفجرت والدهر فجار
إو نار الباب وجّت بالگلب نار
إبكسر ضلعي إو صدري إنصاب بسمار
إو محسن سگط مني إبعتبت الدار
يبو إبراهيم ما تخفاك ألأخبار
إو مچتوف إبوصيتك حامي الجار
طلع مچتوف وإتحف بيه ألأخطار
إطلعت خلفه إو شفته الدهر جار
بمتوني رسم للصوت آثار
* * *


الشاعر المرحوم كاظم المنظور الكربلائي

#المنظورات_الفاطمية
#تسلسل_القصيدة_١٣
#ألأبوذيه_في_رثاء_الزهراء_عليها_السلام


عگب عزنه علينه الدهر ينصاب
فجعنه وخله دمع العين ينصاب
أنه بت من ومني الضلع ينصاب
أو حمايه إمگيد إبحبل الوصيه
* * *
ثجيل الهم عله دهري يفضه
تراكم والصبر عني يفضه
سگط محسن دلحگيلي يفضه
يتمني الدهر وإنگطع بيّه
* * *
نشر حزنك عله راسي علامه
يبويه إو دم تهل عيني علامه
إبوجهي ظلت السطره علامه
أجيك إو شوف شنهو الصار بيه
* * *
عله عيني يمر النوم بسمار
شهد ما شفت من دنياي بسمار
عليله والضلع مصيوب بسمار
أنازع وأجرع إبچاس المنيه
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_١
#مصباح_الحسن
«شيعتي»

بالكون شع نور مصباح الحسن
وهالنور يتمثل بوجـدان نور الإمامه
* * *
طاح ابن عمران مغشى اعليه من نور التجله
والجبل منه تدكدك لاچن تقدس محله
أنزل المعبود آيه وبيها للغافل تگله
دونك النور اتصوره وانظر ابعين الباصره
لوردت تعرف مصدره
طالع التنزيل تنبيك السنن
شتگول لوگلك القـرآن نور الإمامه
* * *
من سطع نور ابو محمد مثل انوار الجلاله
والتبصر بيه گلبه ابتهل بنوار ابتهاله
يالعماك الحسد عنه اوتهت بفجوج الضلاله
ما تعــدل وما تهتدي عالبيت واهله تعتدي
وبالجحد آدم مقتدي
عن ضـوه النبراس تعميك الفتن
من گبل منك عمه الشيطان نور الإمامه
* * *
هنا يمن لـ ألله ورسوله محفظت حق الأمانه
وغرّك الملك العقيم وكحلت جفن الخيانه
وساومت بالدنيا دينك هاك أخذ معنى الديانه
معنى الديانه تنتهي ببيوت مصداق النبي
والرضع ببهام النبي
دسمع يمغرور دستور الحسن
للدين واهل الديـن عنوان نور الإمامه
* * *
وبعد ابينلك معاني البالمچارم شاع وصفه
وانت لو جنبت غيضك والحسد للحق تعرفه
بالحسن مَـنْ عالبريه الباري من رأفته ولطفه
باللوح من خط القلم بنوار ابو محمد رسم
للخلگ توفير النعم
يالتنشد إشلـون هالكون انسكن
تمهيد هذا الكون برهـان نور الإمامه
* * *
وانت يافاضل الطينه لوردت تمتحن نفسك
الك بهل البيت أسوه والطريق الجنه مسلك
اخذ جوهرة الولايه والمحك مرآت عقلك
لـو حصلت هالجوهـره يسهل عبور الگنطره
لتظل تدير الفاكره
فـج گلبك وشوف إحروف اتسجلن
تسجيل حكمه بقلم إيمان نور الإمامه
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٢
#ألإمام_الحسن_عليه_السلام
«شيعتي»

جوهر وجـود الدين يالحسن نورك
يمشيد الإسلام يمثبت أساسه
* * *
كون المعبود ذاتك سيدي من عالم الذر
امصور ابمطبعة قدره رسمك اوباللوح يزهر
نوره من كوكب الدري أو كوكب الدري حيدر
صورة الباري ابقدرته واقتضت رادت حكمته
بزين الكون ابزينته اوكوكب الدري اوآيته
ابنص الخبر مذكور كوكب الدري
نور الأمير أومن سنا الباري اقتباسه
* * *
فجرت عين المكارم ماي بيه انعجن طينك
وابقلم من نور شطر الحلم مكتوب ابجبينك
ما ملك من الله غيرك مثل ما ملكت يمينك
سبع الأفلاك ابراحتك اندارت ابحكمة رادتك
اوصدق الباري حجتك اونور الكون ابزهرتك
وانطـاك بالفردوس نص السياده
اوتوجك بالجنه ابشرف تاج الرياسه
* * *
ياكريم البيت ذچرك بيه قوة جاذبيه
ابكل محل من يبدي فضلك شمس چنه اويشع ضيه
بالطبع قسمين بيك اتصير آراء البريه
فرقـه التلبي دعوتك اوتهتدي ابنور
اولايتك
اوفرقه تجنب طاعتك والحسد صاب الجحدتك
ينشرح بالإيمـان صدرإليودَّك
واللي يجحدك بالحسد ضاگت انفاسه
* * *
ابنور معناك اليودك سيدي يبتهج گلبه
والخصيم ابگوس فضلك بالچبد ينصاب حربه
والحسد لو نزل مايه عمه اعيونه اوتاه دربه
والحسد يعمي البـاصره وامن الضغاين مصدره
والمحب نور ناظره ابنورك يبن سيد الوره
واللي جحد معنـاك أسود نصيبه
وجدان حظه كوره اوبالجدم داسه
* * *
جاحدك مسحوگ حظه اومنگطع منك نصيبه
والذي ايحبك يّحبه الباري وايحبه حبيبه
هاي عِلـّه امن المراضع والفتى ايسوگه حليبه
لوصافي دره اومرضعه ابحب الولايه يرضعه
والدنس طبعه بطبعه اونص الولايه ايضيعه
واللي يحبك زود فخره الحليبه
واللي يضدك منعجن دره ابدناسه
* * *
يبو محمد من الباري (تسعه ) مختصه ابوجودك
العلم والحلم شانك والكرم والجود جودك
سيفك اورمحك اودرعك والفراسه ورث عودك
تسع المعاني اتجمعت ابمعناة ذاتك وانتهت
حلت بموضعها اوحلت اوروح السياسه أظهرت
اوروح السياسه ابنـور علمك تجلت
ابمدرسة جدك دارس افنون السياسه
* * *
لاچن الشيطان بث الفتنه بالناس اوغواها
قوة الباطل نصرها او عن طريق الحق عماها
وابهذاك اليوم كلمن تفحص ابذاته تراها
مرتديه بثياب الرده اومتجنب ادروب الهده
اومنهج الباطل مگصده واللي يصدله ايشاهده
معنى البشر معنـاه لاچن بهيمه
إمفتح اعيونه وأعمه گلبه امن القياسه
* * *
لاچن ابهاليوم أمة جدك اتجد بالهدايه
امنوره اوجعلت ولاكم من عذب الله وقابه
وابگلب كل ذات منهم منطبع حب الولايه
والرسم بالعصمه زهر اومتنوره ابنور البصر
اوبرهان اليحبكم ظهر نوره اويشع مثل الگمر
اومتوشح ابإيمـان حب الولايه
اوحاذق ابعصره ابنوركم نير حواسه
* * *
سيدي والجهل حقك دلته ذاته الرديه
گطع ابسمه دليلك اوگبل ماتدنه المنيه
صحت لحسين اوجعلته امگيد ابحبل الوصيه
اوظل عليك حسين تهمل اعيونه
النعشك ايشوفه ابنبل يرمونه
اوعن حرم جده العده يمنعونه
اوگامت اشبول الهواشم تصد لحسين ابحماسه
* * *
بالنبل يرمون نعشك وانته مفصل من الزهره
وابو السجاد ابوصيتك منچتف مدرع ابصبره
لاچن العباس گلبه انگطع منه اوضاگ صدره
غده ابروحه ايجود وابضميره النار
من النعش لحسين ناظره يندار
رايـد الرخصه اوقابض البتار
لون للعباس رخصه ما ترد الگوم باسه
* * *
حسين من شاهد عضيده ضاگت الدنيا ابعينه
صاح ريض ماهو يومك هذا ياحامي الظعينه
ياهو يومي أونعش أخويه بالسهام امرشحينه
ابكربلا يومك ياضوه اعيوني
اتضحي بچفوفك تنذبح دوني
يا هـوه عزمي اوساعدي وعوني
اوللحرم تتوزم الها بالسقايه اوبالحراسه
* * *
گرة اعيونك عضيدك من وگف دون الشريعه
ايريد منها الماي يروي گلب الحسين اورضيعه
اشما تهم عالشرب روحه والأمرها ما يطبعه
يا نفس للماي چى تقبلينه

اوبالخيم معطوش ظامر اسكينه
اوچم طفل عالماي شابحه عينه
اوچم رضيع العطش جمره أثر ابچبده انحماسه
* * *
حمل جوده اوسدر ظامي للحرم بالماي مهنم
اوحال مادونه المگدر صاحب اودون المخيم
لن يصيب السهم عينه والسهم مسجيه بالسم
اوگطعوا اچفوفه اوطاحت الرايه
صوّبو جوده اوفيـّضو مايه
سگط عالغبره اوتاهت الثايه
اومن لفاه حسين شافه بالعمد منفضخ راسه
* * *
حسين ملسوع النوايب يندب اوعالنهر حايم
يعباس اعداي نامت واسهرت عين الفواطم
وابطن حوت ابحر من دم غبت يابدر الهواشم
راية الإسلام لا تيتمها
من عگب عيناك منهو اليزمها
اومهجتـي للسيف لا تسلمها
وانگطع رجواي منك وانچسه گلبي ابأياسه
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٣
#أثر_السم_القاتل
«شيعتي»

يحسين يبن أمي الدهر ما أنصف اوياي
گطـّرلي الماي
مسموم گلبي والنوايب وجرت ناره
* * *
هلّه هلّه اشلون حَنـّه صارت ابيوم الموادع
انفجع گلب الدين وأهله اوعالم العلوي تروع
جروح أهل بيت الرساله فاضت اوفجّر المدمع
والحسن صـاح امن الدهر يحسين ما تدري اشسدر
گلبي تفسر وانفطر هاك اخذ چبدي تگطع
دگعد يماي العين واتسلم وصاياي
گطرلي الماي
أول وصيه اتحافظ الإسلام واسراره
* * *
مضه اصواب الدهر بيـّه امودع الله ياعضيدي
جمرة السم احرگتني وصارت الروح ابوريدي
غمض ابيمناك عيني واسبل اعله الموت ايدي
واتدارك اعليه الأمر والسم شعل گلبي ابجمر
والصبر يحسين للصبر ما لُـوه اعله الهضم جيدي
واصبر يبعد الروح واتجلد ابفرگاي
گطر لي الماي
واليجرع ابمر الصبر تتخلد آثاره
* * *
خل اودعنك وشمك ياثمر گلبي اوخليلي
جسمي يتگلب او عيني مسهره اوما نمت ليلي
من أثر جمرة السم الشعلت النار ابدليلي
وياك الموادع حله وجاسم ذخرته الكربله
يحسين اريد اتدلِـله وانهدم لفراگه حيلي
يحسين لفراگ الشباب اتمرد احشاي
گطرلي الماي
خليلي گلبي المنمرد واتسلم آثاره
* * *
ابحالت الإحضار چان الحسن ويخاطب عمامه
ياهلي ابصدر أبو اليمه ودعت نور الإمامه
وخلفت بيكم يهلنه شمعة القاسم علامه
بيكم يمثل شوفتي ويرد عليكم وحشتي
إدنت يهاشم ساعتي والاجل صابت إسهامه
يحسين بسهام الأجل متگطع اچلاي
گطرلي الماي
سهم الأجل غير الأجل متصير إله چاره
* * *
ياحسين اجرعت سم اعداي چم نوب ابحياتي
بالصبر برّدت گلبي والحلم ادرك نجاتي
مو مثل هاللسم حمسني اوصابني ابحربة مماتي
دونك چبدتي اتگطعت بالطشت والساعه دنت
يحسين يبن أمي انتهت او روحي تتنطر وفاتي
يحسين داء السم چتلني اويصعب ادواي
گطرلي الماي
وانشد وصل گلبي على السم واسمع اخباره
* * *
اجرعت من مر النوايب چاس ياوالد اليمه
شوف لوني انخطف منه وشوف جسمي يبس دمه
هلّه هلّه اشعمل بيـّه الچاس واشگطع ابسمه
گطع دليلي اومرده والطشت يمك شاهده
والگلبك اللـه ايساعده من يشوف الطشت يمه
يحسين وادري للفواطم ما بگه راي
گطرلي الماي
يومي فجعها اوما تِحَمل الدهر واخطاره
* * *
گوم حضرلي زهابي واحتسب بالله عونك
ليش محنيه اضلوعك ليش تهملي عيونك ؟
لو ردت يم گبر جدي دفنتي ما يخلونك
يرمونك ابزان اونبل بيه المرامي تتصل
لتخلي من هاشم نفل يشهر البتاردونك
يحسين لا تطلب ابثاري اوتطلب إدماي
گطرلي الماي
وما ريد من جسم إلچتلني إدموم تتچاره
* * *
ايعالج ابروحه وينادي وين راعي العلم وينه
خل ينابيني ابونينه ويبخ گلبي ابدمع عينه
زينب امودعة حيدر وارد اسلمها ابيمينه
مفجوع ابو فاضـل حضر متخوصر اومحني الظهر
للطشت من دار النظر وجرت جمرة حنينه
عباس اوصيك ابخواتك عگب عيناي
گطرلي الماي
وبالطف اريد الخدر زينب تضرب استاره
* * *
حالتي حالت امفارج والفراگ ايعزعليه
منگطع لحسين گلبي وخايف من الغاضريه
وادري ياعباس تحفظ خوتي وحگ الوصيه
لتعز على حسين العمر يالمنذخر للطف ذخر
ترضيني وآنه بالگبر بالوفه للفاطميه
ودعتك الله وجدمت مني مناياي
گطرلي الماي
والدين لمصابي انهدم وانتم العماره
* * *


الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٤
#لهيب_الوداع
«شيعتي»

ودعتك الله ياعزيز الزهره يحسين
يا شمعة العين
من جمرة السم يلتهب يحسين دلالي
* * *
جمر نيران الوداع ابگلب الحسين ايتواگد
وگطع اگلوب الهواشم سم البگلب أبو محمد
ينهض ايوادع عمامه ويرد عالقبله ايتمدد
وايصيح دلالي اشتعل يحسين وافاني الأجل
شوف الدهر بينه اشعمل گلبي اوگلبك تمرد
يبن امي وابگلبي تره انطبگت النـارين
يا شمعة العين
جمرة دليلي وجمرتك تتواگد اگبالي
* * *
هلّه هلّه اشلون صيحه صاح ابو محمد عضيده
ايلوج من شدة اصوابه اوشفرة السم التچيده
فرفرت روحه العزيزه واشبگ اعله حسين إيده
كبّر صريــخ العائله أولحسين ظل يتمثله
واتجسمتله كربله اوشم الحسين ابوريده
وينادي يبن امي دليلي انصاب نصين ياشمعة العين
سم البگلبي اوسهم البگلبك تراوالي
* * *
مثل گلب الحسن نار السم دوت بالفاطميه
من تشوف اعله ابو محمد مجبله اسهام المنيه
اوفجع گلب حسين لمَّن گال إخذ مني الوصيه
طوگ الإمامه ابرگبتك والدين صـار ابذمتك
ضحي له ولدك واخوتك من تطب للغاضريه
يبن امي وابحزة وريـدك نصرة الدين
يا شمعة العين
والدين وجدانه وحياته ابدمك الغالي
* * *
گلب الحسين وعضيده يلهب ابنار الموادع
اندهشو ابنايبه الأعظم من مصيبتهم وافجع
أگبلت زينب تنادي يخوتي اوفجّر المدمع
عاالحسن مفجوعه هوت يحسين يبن امي اصرخت
بالطشت لمّن شاهدت چبد أبو محمد امگطع
صـاح الحسن يختي يزينب لاتجزعين
يا شمعة العين
بعدچ عزيزه وبعد ما صرتي بلا والي
* * *
بالطشت چان ابو محمد وصل متگطع دليله
ومن سمع صرخة اعياله او ونـّت القاسم ثجيله
مد يمينه ولزم جاسم سلمه بيد العقيله
ربي لخوچ وغربته اوللدين اعلگلي شمعته
جاسم ايريد ابهمته ثگل يوم الطف يشيله
عريس واتزفـه الشهاده اعله الميادين
يا شمعة العين
اولو حنته ادموم الشهاده ريحت بالي
* * *
اشلون صرخه اصرخت زينب نايبة فگدك عمتني
رحت يبن امي امن اديه ومثل جاسم يتمتني
ودعت عندي عزيزك وآنه عد من ودعتني
امرچ حسين ايودعه عند البنين الأربعه
وصـاح اليخوض المشرعه آنه أزِّم جودي اعله متني
وارويچ من دم رگبتي يوم التعطشين
يا شمعة العين
اوگطعة اچفوفي والعمود ايصير چتالي
* * *
خلف ابگلب الهواشم فگد ابو محمد الريبه
وابصحيفة امن النوايب دونو شرح المصيبه
وسجل حسين الشهاده وسجلت زينب غريبه
واندهشت ابحـال الحسن والفاطميات اصرخن
والنايبات الفارگن بين محبوب وحبيبه
والحسن صاح اوداعة الله يالميامين
يا شمعة العين
هذي وصيتي اوخلص گلبي او دنت آجالي
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٥
#ألإمام_الحسن_ع_ضحية_الغدر_والمؤامرات
«شيعتي»

مسموم الگلب دهري چتلني
هاك اخذ الصبر يحسين مني
واصبر عاليوافيك من دهـر الجفانه
* * *
جمر نيران الوداع ابگلب الحسين ايتواگد
اوگطع اگلوب الهواشم سم البگلب ابومحمد
ينهض ايوادع عمامه اويرد عالقبله ايتمدد
وايصيح دلالي اشتعل يحسين وافاني الأجل
شوف الدهر بينه اشعمل گلبي اوگلبك تمرد
يبن امي الگلب بالسم تگـطع
مايحمل بعد جمر الموادع
دسمعني ارد اوصيك من دهر الجفانه
* * *
هالله هالله اشلون صيحه صاح ابومحمد عضيده
ايلوج من شدة اصوابه او شفرة السم التچيده
فرفرت روحه العزيزه واشبگ اعله حسين ايده
كبّر صريخ العايله اولحسين ظل يتمثله
واتجسمتله كربلا شم الحسين ابوريده
يبن امي وتره ابشمة وريدك
سهمك صابني اوسهمي يچيدك
والسهمين تـرميك من دهر الجفانه
* * *
مثل گلب الحسن نارالسم دوت بالفاطميه
من تشوف اعلى ابو محمد مجبله اسهام المنيه
اوفجع گلب حسين لمن گال اخذ مني الوصيه
طوگ الامامه ابرگبتك والدين صار ابذمتك
ضحيله ولدك واخوتك من تطب للغاضريه
اوضحي الدينك ابدمك الغـالي
خل يرتاح من جور الليالي
هذا اليصدر اعليك من دهر الجفانه
* * *
گلب الحسين اوعضيده يلهب ابنار الموادع
اندهشوا ابنايبه الأعظم من مصيبتهم اوافجع
اگلبت زينب تنادي يخوتي اوفجرت المدمع
عالحسن مفجوعه هوت يحسين يبن امي اصرخت
بالطشت لمن شاهدت چبد ابو محمد امگطع
اوصاحت يبو محمد يتمتنه
اوعند احسين اشوفك ودعتنه
چن ما ظـل أمل بيك من دهر الجفانه
* * *
بالطشت چان ابو محمد وصل متگطع دليله
من سمع صرخة اعياله اوونـّت القاسم ثجيله
مد يمينه اولزم جاسم سلمه بيد العقيله
ربي لخوچ او غربته إوللدين اعلگي شمعته
جاسم اريد ابهمته ثگل يوم الطف يشيله
صاحت ما اظن يگصر جهاده
من يتحنه بدموم الشهاده
وابعرسه نهنيك من دهر الجفانه
* * *
اشلون صرخه اصرخت زينب نايبة فگدك عمتني
رحت يبن امي امن اديه اومثل جاسم يتمتني
ودعت عندي عزيزك وآنه عدمن ودعتني
امرچ حسين ايودعه عند البنين الأربعه
اوصاح اليخوض المشرعه آنه أزم جودي اعله متني
عد عيناچ اضحيلچ ابشوفي
يازينب واضحيلچ اچفوفي
گول وفعل أدريـك من دهر الجفانه
* * *
خلف ابگلب الهواشم فگد ابومحمد الريبه
وابصحيفه امن النوايب دونو شرح المصيبه
اوسجل حسين الشهاده اوسجلت زينب غريبه
واندهشو ابحال الحسن والفاطميات اصرخن
والنايبات الفارگن بين محبوب وحبيبه
صاح امودعين الله يهلنه
خان الدهر واتشتت شملنه
خويه اوخايف اعليك من دهر الجفانه
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٦
#الحسن_السبط_كريم_أهل_البيت_ع
«شيعتي»

يبو محمد ياكريم البيت يمشيد أساسه
بالعرش مطبوع رسمك تاج نور الله اعلى راسه
* * *
كون المعبود ذاتك يالحسن من عالم الذر
امصور ابمطبعة قدره رسمك او باللوح أزهر
نوره من كوكب الدري اوكوكب الدري حيدر
اوبالحبر كوكب الدري نور رباني اقتباسه
* * *
فجرت عين المچارم ماي بيه إنعجن طينك
والعلم من نور شطر الحكم مكتوب بجبينك
ما ملك من الله غيرك مثل ما ملكت يمينك
إنطاك بالجنه السياده او بالأرض تاج الرياسه
* * *
يا كريم البيت ذچرك بيه قوة جاذبيه
أبكل محل من يبدي فضلك شمس چنه اويشع ضيه
بالطبع قسمين بيك أتصير آراء البريه
كل محب ينشرح صدره اوكل عدو اتضيّگ انفاسه
* * *
أبنور معناك اليودّك يالحسن يبتهج گلبه
والخصيم ابگوس فضلك بالچبد ينصاب حربه
والحسد من نزل مايه عمه اعيونه اوتاه دربه
والجحد معناك ظالم ضامره اوبالجدم داسه
* * *
جاحدك محروم حظه اومنگطع منك نصيبه
والذي ايحبك يحبه الباري وايحبه حبيبه
هاي علـّة امن المراضع والفتى ايسوگه حليبه
واليحبك دره صافي واليضدك بي دناسه
* * *
يبو محمد من الباري تسعه مختصه ابو جودك
العلم والحلم شانك والكرم والجود زودك
سيفك اورمحك اودرعك والفراسه ورث عودك
ابمدرسة جدك محمد دارس افنون السياسه
* * *
هاي وحده أمن السياسه محتسب ظليت صاير
أمحافظ اعله الدين واهله اومن سفاك الدم تحاذر
بايعت للميتبايع من شفت قلة الناصر
أنتو أبده ابهالأماره وانت أقوى بالفراسه
* * *
لاچن الشيطان بث الفتنه بالناس اوغواها
قَـَوه بالباطل نظرها اومن طريق الحگ عماها
وابهذاك اليوم كلمن تفحص أبذاته تراها
بشر وامفتح اعيونه وأعمه گلبه امن القياسه
* * *
لاچن أبهاليوم أمة جدك أتجد بالهدايه
امنوره اوجعلت ولاكم من عذاب الله وقايه
وابگلب كل ذات منهم منطبع رسم الولايه
اوكل فرد حاذق ابعصره ابنوركم نير حواسه
* * *

سيدي والجهل حگك دلّته ذاته الرديه
گطّع ابسمّه دليلك اوگبل ما تدنه المنيه
صحت لحسين اوجعلته امگيد ابحبل الوصيه
اوظــل عليك حسين تهمل اعيونك
النعشك ايشوفوه ابنيل يومونه
اوعن حرم جده العده ايمنعونه
اوگامت اشبول الهواشم تصد لحسين ابحماسه
* * *
بالنبل يرمون نعشك وانت مفصل من الزهره
وابو السجاد ابوصيتك منچتف مدرع ابصبره
لاچن العباس گلبه اتگطع منه اوضاگ صدره

غده ابروحه ايجود وابضميره النار
امن النعش لحسين ناظره يندار
رايد الرخصه اوقابض البتار
لون للعباس رخصه ما ترِّد الگوم باسه
* * *
حسين من شاهد عضيده ضاگت الدنيا ابعينه
صاح ريض ماهو يومك هذا يا حامي الضعينه
ياهو يومي اونعش اخويه بالسهام امرشحينه
ابكربلا يومك ياضوه اعيوني
تضحي بچفوفك تنذبح دوني
ياقوّة عزمي اوساعدي اوعوني
اوللحرم تتوزم الها بالسقايه اوبالحراسه
* * *
گرت اعيونك عضيدك من وگف دون الشريعه
ايريد منها الماي يروي گلب الحسين اورضيعه
اشما تِهِم عالشرب روحه والأمرها ما يطيعه
يا نفس للماي چى تقبلينه
اوبالخيم معطوش ضامر اسكينه
اوچم طفل عالماي شابحه عينه
اوچم رضيع العطش جمره اثر ابچبده انحماسه
* * *
حمل جوده اوسدر ضامي للحرم بالماي مهتم
اوحال مادون المگدر حاجب اودون الأمخيم
لن يصيب السهم عينه والسهم مسجيه بالسم
اوگطعوا اچفوفه اوطاحت الرايه
صوبوا جوده اوفيضوا مايه
سقط عالغبره اوتاهت الثايه
اومن لفاه حسين شافه بالعمد منفضخ راسه
* * *
حسين مصيوب ابمصايب يندب وعالجسم حايم
يعباس اعداي نامت واسهرت عين الفواطم
ابَّطن حوت ابّبحر من دم غبت يا بدر الهواشم
راية الإسلام لا تيتمها
من عگب عيناك منهو اليزمّها
اومهجتي للسيف لا تسلمها
وانگطع رجواي منك وانچسه گلبي ابأياسه
* * *

الشاعر المرحوم كاظم المنظور الكربلائي

#المنظورات_الحسنية
#تسلسل_القصيدة_٧
#الحسن_السبط
«هجري»

من معدن ألأسرار يالحسن نورك
شمس إو گمر متصوره وهالشرف يكفينه
* * *
إتكون الكون بإراده إصدرت من باري النسم
من صفاته إصطفه الخمسه إو نور من نوره قسم
بنه ألأرض إو سمه إبنوره المصطفه سيد ألأمم
نوره بـاهر ضيه زاهر مجده ظاهر بالمفاخر فاز من بيه إعتصم
رب العـرش واللوح أنشأ الكرسي
من نور عودك حيدره وهالشرف يكفينه
* * *
والشمس والگمر صيّر نورك إو لوح إو قلم
ومن بطن نور الحسين المنطوي سره إبحكم
أنشأ الولدان والحور إو جنات النعم
هـاي نعمه طيها رحمه من العصمه أظهرت حكمه كل محب بيها إغتنم
سر وظهر بالكون برهان ألأكبر
سر الزچيه الطاهره وهالشرف يكفينه
* * *
إبهاي ألأسرار البليغه صورة الكون أكملت
مظلمه وللباري ألأملاك من الظلمه إشتكت
إتصورت قنديل دري فاطمه إو بيها إزهرت
هالهديه العبقريه الجوهـريه الكوثريه للنبي الهادي إنهدت
أزهر وجود الكون وأُمكم الزهره
بأنوار قدره زاهره وهالشرف يكفينه
* * *
مثّل الباري عباده بآيته إو معنه ألأمثال
حبكم أصحاب اليمين إو ضدكم أصحاب الشمال
ياخذ إكتابه إبشماله الضدكم إبيوم ألأهوال
هذا تالي إلما يوالي والموالي ما يبالي ناجح إبكل ألأعمال
واليزهر إبمعنـاه نور الولايه
بيمينه ياخذ دفتره وهالشرف يكفبنه
* * *
والگناطر سبعه منصوبه إبصراط المستقيم
إلمن (علي ) ياخذ إجازه يدخل الجنة النعيم
إبلمحه عالسبعة گناطر يعبر إبگلبٍ سليم
وبيمينه صك علينه المـاله عينه نور عينه من نبأ (عمه) العظيم
اليحمل إجازه إمزوره ميعبرونه
ينلزم بأول گنطره وهالشرف يكفينه
* * *
قدّس القرآن سركم وأنتم أسرار القدس
وإلجحدكم بالقيامه وجهه مسّود إو عبس
والتقدس سره بيكم مسفر إيشع چالشمس
بضي سناكم وإبضياكم إبفي لواكـم وإبولاكم نور وجهه مقتبس
إبنور الولايه إتنور إوجوه التحبكم
إبيوم الحشر مستبشره وهالشرف يكفينه
* * *
ضاحكه إو مستبشره إبخير إو نعمه دايمه
والذي إبدنياه گلبه عن ولايتكم عمه
ينحشر وي الوجوه البلعذاب إموسمه
الماله مبدأ ماله ملجأ آلآيـه تنبأ عن التخطأ تنسجن بالحاطمه
والتجعل إبكل حال مبدأك منهج
من المعاصي إمطهّره وهالشرف يكفينه
* * *
يالحسن بيكم الباري إيعاقب إو يبري الذمم
وإنتو للوادم وسيله والتعارضكم بهم
لون ما گوس المطامع ما نفذ بيكم سهم
بيك يا مظلوم ماضي إصوابه
إو فجع گلب حسين يومك إمصابه
گلبك المسموم ناره لهابه
خلف إبگلب اليودك يالحسن نار ألأحزان إموجره
* * *
يالحسن سم الشربته مرد من عدنه الچبود
ريت دونك ينعدم چان من الكون الوجود
ساعد ألله حسين لمن شافك إبروحك تجود
بالطشت من شـاف چبدك المگطوع
إمودع ألله صاح من گلب مفجوع
والحرم بالدار لايجه وإتلوع
تبچي وتناديـك زينب يالحسن سمك الچبدي إفطره
* * *
عن لسان الحال أنشدك يالحسن وأجري الدمع
بين إديك الطشت چان إو بيه چبدك منگطع
ليش عن زينب خفيته إتخاف زينب تنفجع
وين عن زينب چنت يا مسموم
عگب عين حسين من ولوها الگوم
إتصيح يابن أمي حسين يا مظلوم
ريتك إتشوف العزيزه يالحسن وإشلون حيره إمحيره
* * *
چني أنظر حال زينب واجفه إعله التل تصيح
وين أبو السجاد طايح وين أبو فاضل طريح
وللغري إتصيح إو تنادي يا علي ِشگ الضريح
ما لعد زينب ظل بعد والي
إو نزلت إمن التل والدمع هالي
إتنادي يا روحي إو ريع دلاّلي
إتحـوم تدريها إشتدور يالحسن جسم الحسين إتدوره
* * *
اتحوم زينب بالمعاره دون الأجساد اوتلوع
جسم لاح إلها بلا راس او مسحون الضلوع
امن الدمه غسلت وريده لا چن ابفيض الدموع
شبگته اونادت هذا اخويه حسين
ضامي وايذبحوك جايز ابيان دين
جسمك ابها الحال خويه راسك وين
ريتك اتعايـن الزينب يالحسن بدموم اخوها امعفره
* * *
شاهدت طشتين زينب واهملت دمعة العين
اشلون طشتين العليهن ما بطل منها الحنين
طشت بي چبدك امگطع وبطشت راس الحسين
شافته امن السوط يبسن اشفافه
اوعالعليل اتخاف من السيافه
والعليل ايلوج ضاهده اچتافه
هالله هالله اشلون وگفه يالحسن وگفت الحره اميسره
* * *

الشاعر الشيخ كاظم المنظور الكربلائي