قصيدة لاستشهاد الزهراء. ع


دموعي بالخد سولفن
الماله ام ماله وطن

حياتي. غلاتي. امي الحنينه

......

شتاني. وزماني. من العيون. اخذهه العافيه
يروحي. حلم صار. تسمعين. سوالف دافيه

تتعنه ياموت شعجب. بس عالذي حبيتهم
المن اعطش الكاهم نده. ترد روحي لو حاچتيهم

يازينب يصيح الزمن
الماله ام ماله وطن

حياتي. غلاتي. امي الحنينه

.....

هضيمه. من اصيحن. ييمه. وغرفتج خاليه
الحبيبه. حرامات. بلا صوت. تظل الغاليه

كلب امي ماظن بالبشر. يحصل مثل حنيته
والعنده ام خل يندعي. شمعه تظل ابيته

صحت انه من شفت الچفن
الماله ام ماله وطن

حياتي. غلاتي. امي الحنينه

......

أنه امي. حنينه. شيعوضه. حنان الوالده
وحشتي. وغربتي. اذا ما. اشوفچ كاعده

يالحصتچ بس التعب. يمه واليه الراحه
طير آنه بغيابچ صرت. ونكسر منه جناحه

كلبي ويروحي اتعاتبن
الماله ام ماله وطن

حياتي. غلاتي. امي الحنينه

.....

زغيره. ويتيمه. والدموع. دموع الخايفه
ضلعهه. سمعته. عله الباب. حچالي السالفه

الباب اندفع وام الحسن. فوك الوجه من طاحت
ومن احضنتهه من الالم. احاه زينب صاحت

وضلوعهه هنه الحچن
الماله ام ماله وطن

حياتي. غلاتي. امي الحنينه

......

ابونه. بعذابه. يباوع. زهرته الطايحه
سمعته. بونينه. قراهه. اعله روحه الفاتحه

لمن گرب منهه الاجل. امي وابوي اثنينهم
توادعو حد كطع النفس. واحنه كعدنه ابينهم

وعيونه صاحن من جرن
الماله ام ماله وطن

حياتي. غلاتي. امي الحنينه

........

نسألكم الدعاء
حسين صادق العقابي

قصيدة لشهادة الزهراء ع

شلون تخلّص دنياي
وعمرج ماطال هواي
راح اعطش يم البيت
لعيونج مو للماي

يعافيتي وضوه تبده حرامات اعله بابي

…….

يابعد عافيتي الكضت. وبعد اليرف جوه الضلع
يل جنتي بعيوني ضوه. راح الضوه وظل الدمع

ظليت بكلب متعوب. بس الحسره تبرالي
مو ذاك علي العفتيه. يكسر خاطرج حالي
داحي الباب اصد للباب. كاسر كلبي وعيالي

شلون بكلبي اليشتاك
الما يحمل ساعه فراك
تلچمني دموع الليل
ودمع الفاكد حراك

اون وحدي ولا الكه اليواسيني بمصابي
يعافيتي وضوه تبده حرامات اعله بابي

…….

كلبي صبح بيت الحزن. چن بيت حزنچ عالنبي
بس الله يدري شكد احن. وهمومي چن ضعن بسبي

ماصدكت عيني الصار. يوم البابي دفعوهه
هضميه أسكت اعله الصار. والمثلچ يضربوهه
انه اول شهيد انطيت. ضلوعچ لمن عصروهه

ظليت بأصعب حال
يمشي كبالي الچتال
عايش بعدج مهموم
ماعشت براحة بال

غدر بيه الزمن قاسي واخذ زهرة شبابي
يعافيتي وضوه تبده حرامات اعله بابي

……..

صحت اعله اولادي بدمع. ودعوهه امكم فاطمه
وناحت وياهم من بچو. يالزهره املاك السمه

بيت بلايه ام يصير. خنكة مكبره بمغرب
ظلولي يتامه زغار. وبليل الفراك اعتب
ياريت العمر لاطال. بساعات الاجل احسب

احسب ظليت جروح
اني وكلبي المذبوح
يم كبرج رايح جاي
ومايكضي هواي النوح

يسالفتي يأم زينب صبح دمعي خضابي
يعافيتي وضوه تبده حرامات اعله بابي

……..

كون ابني خيمه اعله الكبر. ومافاركج يم الحسن
وكلما تحن زينب الچ. تلكاج يالزهره وطن

هيهات وبعد هيهات. يم حسين نتلاگه
احنه هواي مشتاكين. وانتي هوايه مشتاكه
مال الدهر بينه شلون. ميلة هودج بناگه

الله الشاهد عالصار
حركو كلب المختار
يجازيهم يازهراء
من حركو باب الدار

سلام الله على ضلعج. الفتح بال لعذابي
يعافيتي وضوه تبده حرامات اعله بابي

…….

لازم تمر ساعة فرج. وينذبح هالليل بصبح
وتخلص معاناة الزمن. ويوكف نزف دم الجرح

ينطيج الله ماتردين. ومن ذريتچ القائم
منّ دموعج الطاحن. كل دمعه خلق خادم
وتتلاكه الوجوه هناك. للمظلوم والظالم

باچر مابعد الموت
للحق يتعالى الصوت
والشاهد رب الكون
ويتحاسب كل طاغوت

يقصة ضيمي مكتوبه بالدموع بكتابي
يعافيتي وضوه تبده حرامات اعله بابي

……..

نسألكم الدعاء
حسين صادق العقابي

قصيدة لشهادة الزهراء ع

ودعتها. وكون اموت وياها
شيعتها. ولحظه ماانساها
يازماني. شكد اعاني. ولحظه ماانساها

……

خلّص معاناة العمر. يبدي بصبر يكضي بصبر. مو كافي ضيمك ياوكت. اكضي العمر غريب

اصحه بألم واغفه بألم. بالگلب كل ذكره سهم. ودعت اخو كلبي امس. والچان الي حبيب

الهون مصابي وحسرتي. بالزهره هانت غربتي. مشية ابوهه وهيبته. رغم الهجر قريب

عوضتني. بالمحنه هوايه
دللتني. ولاشكت بحچايه

بكل مصيبه. هالحبيبه. لحظه ما انساها

…….

الله بيتي شكد حلو. والزهره تارسته دفو. عالحلوه والمره شكثر. عشنه العمر. حنان

عين النبي بس غمضت. هالوادم لداري اجت. والدار چان الهم كبل. طول الزمن امان

لباب النبي جابو حطب. وبلا ذنب وبلا سبب. دفعو الباب وفاطمه. تمر باصعب امتحان

عيني صدت. شلون من اذوها
واني اسمع. وإن من كالوهه

والجريمه. عاليتيمه. والله ما انساها

……….

صوت الضلوع تكسرن. واسمع تون ام الحسن. وبسمار نايم بالضلع. ظلت بلا كلام

اه بكثر نزف الدمه. عالوجه طاحت فاطمه. ومحسنها مات من العصر. يا هالخلگ حرام

اطفالي ركضو بالدمع. ودموعهم مثل الشمع. وزينب الكسرت خاطري. يادنية الظلام

يا هظيمه. زينب بيا حيره
بلايه امهه. تصير ظلمه الديره

اي يدهري. يكضي عمري. ولحظه ما انساها

……

ام بيتي حيل تغيرَت. وعافيتي وياهه انتهت. والنفَس يلچم بالضلع. وظل بالگلب سؤال

بياذنب ام ثمنطعش. تنشال هالرحمه بنعش. واذكرهه من صاحت هظم. ياوالدي تعال

من غمضت مات الضوه. والدنيا خنگه بلا هوه. ايتام عافتلي ومشت. يرد الشمل محال

ودعتني . وشيعوني وياها
فاركتني. والترب غطاها

اشكي حالي. والجرالي. لحظه ما انساها

……..

كبّرني الفراك شكثر. كون ابني خيمه اعله الكبر. بدموعي وبماي الورد. يتبلل التراب

يامايله الدنيا بعلي. من راحت ام بيتي وهلي. كلشي بعدها بلا طعم. من ابتده الغياب

وصيتها ادعيلي العجل. يلفيني هاليوم الاجل. عايش انه بروحي الوجع. ولاينفع العتاب

امنياتي. كون بس نتلاگه
وتبگه روحي. لم حسن مشتاگه

دمعي جاري. بنكساري. لحظه ما انساها

……..

نسألكم الدعاء
حسين صادق العقابي

قصيدة لولادة الزهراء ع


رفرف كلبنا وعلى جناحه بشوك ودينه
بمولد الزهره الطاهره اجمل تهانينا
عالخير ومبارك. بالفرحه نتشارك
...................

راضيه ومرضيه وشفيعه الزهره. هيه الضوه
بساق العرش نور وتشع جن كمره. هيه الضوه

يم شاطي خدمتها رست احلامي هالليله
اليحضر المولد فاطمه فاطمه تدعيله
بشريانه الابهر كلبي متحزم وشد حيله
كل نبضه بيها ام الحسن صارت تراتيله

جربيل ناده بالفرح تستاهل الكوثر
خذ يامحمد هالهديه وبيها تتبشر
عالخير ومبارك. بالفرحه نتشارك
.........................

جن طير حب كلبي ويريد يسافر. من فرحته
لارض المدينه بلهفه يكصد زاير. من فرحته

كل ورده هب منهه العطر والغصن يتغنه
الله بعث من جنته فوك الأرض جنه
لو ماكدرنه نوصلج مولاتي نتعنه
نكصد لحضرة حيدره نترسها بالحنه

كرة عيونك ياعلي ونقره بقاصيدنا
غيرك وغير الطاهره لا والله ماعدنا
عالخير ومبارك. بالفرحه نتشارك
........................

احله ابتسامه من النبي مرسومه. يم المهد
ياهلا يم حسين صاح بيومه. يم المهد

مالمته الدنيا فرح من شاف ضحكتها
واجمل ايام المصطفى صارت ولادتها
رافع جفوفه للسمه رايد سلامتها
ويدعي يربي بارك بفاطمه وخلفتها

بضعة ابوها فاطمة وروحه وتفاصيله
وكل المدينه تعنته تباركله هالليله
عالخير ومبارك. بالفرحه نتشارك
.....................

الرحمه تننزل على كل الناس. بحب فاطمه
وام البنين الله رزقها العباس. بحب فاطمه

ام العطايا والكرم والخير والرحمه
خدام نبقه اعله العهد وانطينه هالكلمه
من المهد حد اللحد مانترك الخدمه
رازقنه بيها الله شكثر نعمه بأثر نعمه

ياسلسبيل ويرتوي من الطافها الضامي
جفت صحف أشعاري يمها وخلصت اقلامي
عالخير ومبارك. بالفرحه نتشارك



حسين صادق العقابي

قصيدة لولادة الامام الحسين ع


ياروحي روحي لحضرته وشمي هوه الجنه. نذر انتي اله
محبوبي روحي عشكته وادري جمال الله بشر ما اجمله

صلو على محمد وعلي. صلو.

……

لاجمل بشر. وجه الكمر. هاي الولاده بفرحه نحييهه
كلب المحب. بسمه يدك. هالدنيا الحسين المحليهه

رباني . واضح جماله كل خصاله وبصفاته والله رباني
خلاني. الهج بأسمه كل نهاري ويه ليلي اني خلاني

يسري بشراييني. هوه النبض بيه
فدوه اله فدوه. عمري وطواريه
عالامل عيشني. باحلام ورديه

رب الذين امنو. صلى عله حسيني. عظيم المنزله

محبوبي عيني عشكته بوجهه جمال الله بشر ما اجمله

صلو على محمد النبي. صلو.

……..

ما اجمله. ما اكمله. يارحمة الله الساكن بروحي
نسمة هوه. ذكره دوه. لو كلت بسمه تنشف جروحي

من عيونه. اشراقه ضوت. بالمحنه. چنهه جنه تضوي بعيونه

خيعونه. طير الحباري. چنه كلبي. لكربلائه. يروح خيعونه

من ايتامه يحسبني. امنيتي وحساسي
وبچفوفه اتمنه. يمسح على راسي
وبعطفه يشملني. اغلى واعز ناسي

من عنده بالدنيا مثل والد ابو الاكبر. بشر نتقبله

محبوبي عيني عشكته بوجهه جمال الله بشر ما اجمله

صلو على محمد النبي. صلو.

…….

الكل تنتظر. يوم الحشر. وامة محمد بيــه مرحومه
من نرتجي. شافع يجي. هذا الشفيع الاعظم ويومه

خدامك. احنه الكضينه كل عمرنه. وافتخرنه. نصير خدامك

خدامك. وحسين يدري. ويعرفنه. من عشكنه. احنه خدامك

ياسيدي ارزقنه. هالليله لو نظره
وكلوبنه ترفرف. طير وعلى الحضره
شكراً اذا تقبل. ياضنوة العتره

شمس الله ضوت بالسمه. بميلادك وانته تقود القافله.

محبوبي عيني عشكته بوجهه جمال الله بشر ما اجمله

صلو على محمد النبي. صلو.

……….

حسين صادق العقابي

اللهم صل على محمد وال محمد
اللهم عجل لوليك الفرج

الامام علي والايتام.


عشنه. وكلشي ماشفنه. بس علي عدنه. كهف اليتامه
الليله. ياعلي راحل. بالهجر قابل. جرحك علامه

دين النبي لو حالتك خطره
هالليله اخر ليله من عمره
........................

للايتام. علي چان. عمره شمعه لليتامه
ابو يصير. والايام. تشهد شكد اهتمامه

عمره خلص لليتامه ليله ليله
بكل فرض نرفع ادينه ونندعيله
بيت بيت يمر علينه وهوه متعوب
ويعلي تمنينه عشرتنه طويله

خيمه. الله اليديمه. والوكت هيمه. ماعدنه غيره
كلبه. يشتكي الغربه. ودنيته الصعبه. وبدونه حيره

بدنية ظلام نشوفه چن كمره
هالليله اخر ليله من عمره
.........................

نتاني.. عله الباب. من يجينه ايلمنه كلنه
نشوفه. بحنانه. جنه واحد من اهلنه

مانمل من كعدته وذيج السوالف
ماكو واحد مثله هيج اعلينه خايف
الوحيد المانسانه بجور الايام
وهوه من هلدنيا گلبه جروح نازف

يمنه. راحته يمنه. مثله ما شفنه. ماينسه واحد
روحه. كلهه حنيه. نشوفه ليليه. وبنصنه كاعد

بكل سالفه تمر لازم انذكره
هالليله اخر ليله من عمره
......................

الفجر صاح. علي طاح.وسفه وبمحرابه طايح
سلامات. حرامات. بدمه حيدر ليش سابح

ياهو اليدك بابنه لو عيد اجانه
راح ابونه الچان يتفايض حنانه
اه ابو الكلب الحنين يموت تالي
الليله صار حسين محتار بزمانه

تالي. يازمن تالي. تاخذ الغالي
الخيمه الچبيره

بدمعه. وتنطفي الشمعه. والحزن ينعه. الليله الاخيره

اصبح رحيله بكل كلب كسره
هالليله اخر ليله من عمره
........................

اجينه. ولكينه. الناس كلهه اباب حيدر
سمعنه. يكولون.. وجهه من الضربه اصفر

اه ياذاك الفجر من طر علينه
واكفين ابابه بس نسمع ونينه
احتار بي دكتوره لمن شاف جرحه
والحسن شفنا وتجري دموع عينه

صعبه. ياعلي صعبه. ايتامك بغربه. بالدنيه هايه
رايح. وكل گلب نايح. والدمع طايح. هاي النهايه

يا ناس ابونه بهامته طبره
هالليله اخر ليله من عمره
........................

حرامات. علي مات. ونزلت دموع الثكاله
السفر صار. يكرار. لله سبحانه وتعاله

العيد اجه والملتقى يم كبرك احنه
روح الله وياك يل كلك محنه
ياخسارتنه الجبيره شلون بينه
بعد هيهات الملاگه وترجع النه

سفره. وروحتك كسره. شباقي للفقره. وحشه بغيابك

ضعنه. بغيبتك ضعنه. بالحزن صحنه. اه لمصابك

ضاع الحنان وضاعت العشره
هالليله اخر ليله من عمره

……….

نسألكم الدعآء
حسين صادق العقابي

الامام علي والسيدة زينب ع




يا اذان الجرح. كبر بكل صبح
دنيتي بلا علي . تخلي كلبي برمح

…….

ويه الفجر تكبيرة جروحي
اليوم تطلع روحي من روحي
الليله غالي يبچي عالغالي
الليله تبدي العشره وينوحي

بس بعد يازمن. حزني صاير وطن
من يموت الضوه. تخلي كلبي برمح

…….

اندكت الباب وصحت ربي
دخيلك وكمت اعثر بدربي
حين الشفت حيدر يتچوله
سابح بدمه شكد رجف كلبي

عمامته مايله. ودمعتي سايله
زينب انه شعجب. تخلي كلبي برمح

……..

البيت وحشه بلا ابو شلونه
ياهو اليردها وحشة عيونه
بلايه ابو البنيه تتغرب
الكضت طفولتهه عله متونه

بلا امان الوكت. يالابو لو متت
من الزغر ماردت. تخلي كلبي برمح

……..

كوم اعله حيلك فدوه لعيونك
بالنعش ماردنه يشيلونك
خليني الف جرحك بالعمامه
خاف الشماته لايشوفونك

كلبي فاكد حضن. لياوكت يطمئن
الوحشه من فركتك. تخلي راسي بجرح

……….

ياعيد المن جايني لبيتي
بالمكبره مدفونه عافيتي
متروس وحشه بويه ديوانك
ياهوه عذيبي بعازتك ريتي

وداعة الله علي. بس دمع ظل الي
دمعتي وغربتي. تخلي راسي برمح

……..

نسألكم الدعاء
حسين صادق العقابي

مبروك عليكم وعلينا وعلى جميع خدام الامام الحسين عليه السلام عيد الفطر المبارك..أعاده الله على الجميع بوافر النِعَم وقبول الطاعات واليمن والبركات💚🌺

تفائلت بالخير يحسين ولگيتك. 💚