يونس: اي ياعم محمد.. اللي واخدك مننا..
محمد: ازيك يايونس...
يونس: كويس يعم.. بس فينك كدا
محمد: مشااااغل... انتوا بتعملوا اي!
يونس: بنشرب يابروو.. مش شايف ولا اي..
محمد: انتوا لسه بتشربوا!
يونس: هو انت بطلت!
محمد: من زمان..
يونس: ودا من اي بقاا ينجم!!.. امسك بس.. دي حاجه نضيفه..
محمد: لا يعم.. دانا ماصدقت قدرت اسيطر ع نفسي ومشربش...
اسلام: يعم بطل بقاا النمره دي... فين محمد بتاع زمان!
محمد: مش عايز ياجماعه.. خليني كدا احسن...
يونس: وحياتك لو شربت السجاره دي، هتطير معاها... امسك بس دي حاجه نضيفه والله..
محمد: جبتها منين!
يونس: انا ليا معارفي.. بيجيبوا اصناف اي.. عنب.. خد نفسين بس وملكش دعوه...
محمد: هاات ياسطا..
___

كنت قاعده جنبه ع السرير وعماله اكتب وارسم ع الجبس وهو نايم...
ـ بتعملي اي!

جاكي: ياختتتتتتي... يابني خضتني..
جاك: نهار ابوكي اسود.. اي داااا!
طلعت اجري وقفت ع الارض...
جاكي: ماهو انا الصراحه كنت زهقانه ومش لاقيه حاجه اعملها..
جاك: تقومي ترسمي علياا... بتتسلي بيا يعني!!..
جاكي: معلش والله.. بس..
جاك: واي داا... اخاصمك اااه!!!.. اسيبك لا!!!
اي ياجاكي داا..
جاكي بضحك: دي نانسي عجرم.. وحشه دي كمان!!
جاك: نانسي ف عينك يابنت ال.....
منك لله ياشيخه.. فين فيروز... افيرووووووز... فيزووووو....

فيروز دخلت...
فيروز: اي بتزعق ليه!

شافته وقعدت تضحك...
جاك: تعالي شوفي بنت المجانين دي عملت اي!
فيروز: عملت اي!
جاك: شوفي كاتبه اي ع الزفت...
فيروز: وانا ولا عارف مالي ولا اي اللي جراالي!!!!... مين اللي كاتب كدا!
جاك: هيكون مين غير المجنونه دي..
فيروز: بتهزر معاك ياجاك.. وبعدين كدا كدا هيتشال كله..
جاك: ولما اروح افكه، الدكتور يقول اي!!!
جاكي: عادي كنت زهقانه وبتسلى...
جاك: بتتسلى عليا يافيروز... ادي اخرتها..
اي دا... احيه انتي كاتبه ع رجلي!!!
فيروز بضحك: وع وشك وحياتك...

وقف قدام المرايه...
جاك: اي دا!!
جاكي: احم..
جاك: جاكي اي دا..
جاكي: معلش ياسطوط همسحه..
جاك: راسمالي قلوب ع وشي ياجاكي!.. واي داا.... اي الحسنه دي.. انتي عبيطه!!

كنت واقفه اضحك انا وفيروز...

جاك: انتوا الاتنين انزلوا من هنا بدل والمصحف هزعلكوا مني...
فيروز: ماتتلم ياواد انت.. عادي يعني.. كانت زهقانه وبتتسلى... فيها اي يعني...
جاكي: ايون.. ماهي لو مايا مكنتش قولت كدا.. يابتاع الفخاد يالمشمحترم...
جاك: قوليلها اتلمي بدل والله هجيبها من شعرها...
فيروز: طب خلاص تعالى اغسل وشك...

فجأه الباب خبط وفيروز طلعت تفتح...

جاك: ان مافتحتلك دماغك، مبقاش انااا..
جاكي: يعم فرفش كدا.. دانت قمر والله.. حتى الصور كمان طلعت حلوه..
جاك بصدمه: صور اي!!..
جاكي: اي دا انا مقولتلكش!!..
جاك: لا مقولتليش..
جاكي: مانا صورتك وانت نايم..

بصلي شويه وهو ساكت...

جاكي: هتتهور.. هلم الناس.. انا بقولك اهو..

فيروز: اتفضل يادكتور..
جاك: دكتور!!!!.. يافضيحتي....

وقفت اضحك والدكتور دخل وهو قعد ع السرير...

الدكتور: يلا يابطل عشان نشوف الجرح..

جاك رفع وشه والدكتور تنح وانا وفيروز كاتمين الضحك..

جاك بغضب: في حاجه!
الدكتور: احم.. لا مفيش..

الدكتور شاف الجرح وغيرله عليه وكان بيحاول يكتم الضحك....

الدكتور: عال قوي.. الجرح لم خالص اهو... اهم حاجه خليك مرتاح لحد ماتصحى خالص..

راح بصلي...
جاك: وانا هشوف منين راحه...

الدكتور مشي...
جاك: عاجبك كدا!.. دانا هخلي وشك شوارع..
جاكي: اعااا... فيروز الحقيني...

طلعت اجري لبرا وهو طلع ورايا....

فيروز: بس خلاص ياجاك.. عندي انا المرادي..

جاك: انتي متخيله عملت فيا اي!!.. دي راسمه قلوب تحت عيني وحطالي حسنه... حطالي حسنه يافيروز!!!...

فيروز بضحك: طب والله لايقه عليك ياخي..

جاك: طب هاتيها بس هقولها حاجه...

جاكي: لا يافيروز هيضربني والله..

فيروز: خلاص ياجاك بقاا.. يلا اقعد هنا...

جاك: ماشي.. حسابك تقل معايا..

راح قعد وانا قعدت بعيد عنه عشان ابقى ف امان وفيروز دخلت جابت حاجه ومسحتله وشه...

فوني رن وكان ادم فرديت بسرعه...

جاكي: هاا ياادم... برن عليك من الصبح مش بترد..
ادم: معلش والله بس كنت مشغول شويه..
جاكي: حتى مجتش الجامعه... هو في حاجه!
ادم: ماما كانت تعبانه شويه عشان كدا كنت معاها ومروحتش..
جاكي: اي دا.. الف سلامه.. مالها..
ادم: لا هي كويسه دلوقتي.. هي بس الضغط بيتعبها..
جاكي: طب انا عايزه اشوفها...
ادم: لا مفيش داعي.. هي بقت كويسه..
جاكي: لا طبعا هاجي بكرا اشوفها.. لو مش هيضايقها يعني..
ادم: لا طبعا تنوري..
جاكي: خلاص سلملي عليها وانا هاجيلها بكرا...

قفلت معاه وبصيت لقيت جاك باصصلي...
فيروز: في اي..
جاكي: مامته تعبانه.. هروحلها بكرا..
فيروز؛ اي دا ليه!
جاكي: بيقول انها بقت كويسه دلوقتي.. بس بردو لازم اروح واتطمن عليها..
فيروز: ايوا طبعا لازم تروحي وانا هاجي معاكي...
جاكي: لا خليكي عشان جاك...
فيروز: لا جاك انا هظبتله كل حاجه ونروح انا وانتي ومحمد ونرجع ع طول...

جاك: والله!!.. اصحاب واجب انتوا قووي..
فيروز: عيب ياجاك... كفايه اللي عملوه مع جاكي..
جاك: خلاص روحي انتي.. مش لازم جاكي تروح..
جاكي: لا طبعا مينفعش... وبعدين عشان اشوف دومي..
جاك بعصبيه: انا لو قومت هقطعلك لسانك...
جاكي: وانت مالك انت...
جاك: بطلي قلة ادب.. بلا دومي..

طلعتله لساني ومردتش عليه...
جاك: ماشي.. انا هوريكي ازاي تطلعيلي لسانك يام لسانين انتي...
جاكي: ولاااا بطل صداع بقااا..
____

محمد بعدم وعي: جامد ياسطا...
يونس: اي رايك..
محمد: انا خرمان يامعلم.. اي الجمدان داا.
اسلام: ايوا ياعم كدا... مش تعملي فيها شيخ..
محمد: شيخ اي.. انا ع عايز امشي..
يونس: تمشي ليه ماحنا قاعدين مع بعض...
محمد بعدم وعي: لا عشان هروح اجيب المزه واروح..
يونس: الله عليك يامعلم.. هي فيها مزه!
محمد: جمداااان يلاااا والله..
اسلام: طب ماتجيبها هنا تطري القعده بدل ماهي ناشفه كدا..
محمد: لا ياعم.. دي بتاعتي انا... يلا باي..

سابهم ومشي وهو سكران ومش واعي لحاجه اصلا...
______

كنت قاعده انا وهو لوحدنا وفيروز دخلت...
جاكي: صحيح..
جاك: متتكلميش معايا...
جاكي: ولااا اسمع وانت ساكت... شكرا ع اللي حصل امبارح..
جاك: والمصحف لو اعرف انك هتعملي كدا مكنتش عبرتك وكنت سيبتك تنامي جعانه...
جاكي بدلع: واهون عليك!
جاك: اي دا في اي..
جاكي: ياسطوط والله كنت زهقانه.. مش احسن ماكنت قصيتلك شعرك!
جاك: مين ياختي... جاكي لو دا حصل.. اقسم بالله ادخل فيكي السجن..
جاكي: شعرك اهم مني يعني!..
جاك: طبعا..
جاكي: بس انت جبت الاكل ازاي.. وازاي انا مشوفتش الراجل اللي جابهم..
جاك: مانا اللي قولتله متخبطش.. حطهم وامشي ع طول...
جاكي: بس جاب حاجات كتيره جدا..
جاك بقرف: ع الله يطمر..
جاكي: ثانكس برووو..
هاتشوووووو...
جاك: يخربيتك خلعتيني.. في حد يعطس كدا...
جاكي: هاتشوووو.... معلش يابروو عندي برد..
جاك: نمتي ف البلاكونه طبعا..
جاكي: ايون..
جاك: وانا قولت اي!
جاكي: ماشهد كانت نايمه ع السرير..
جاك باستغراب: شهد مين!
جاكي: شهد بنت عمي... ماهي جت هي وعماد ومرات عمي عشان يتطمنوا ع بابا وبيتوا..
جاك: عماد ابن عمك!!
جاكي: ايوا
جاك: اللي كان....
جاكي: احم.. ااه..
جاك: ودخلتيه ليه.. انتي هبله!
جاكي: هزقتهم وبردو مفيش دم.. اعمل اي يعني!
جاك: سيبتيه ينام ف البيت كدا عادي... مخوفتيش لايعمل حاجه!
جاكي: مش هيقدر يعمل حاجه عندكوا...
جاك: بردو... مينفعش يبقاا موجود معاكي ف مكان واحد.. انا اصلا لو موجود كنت علمته الادب.. بس حظه بقاا..

فضلت بصاله شويه كدا...

جاك: بتبصيلي كدا ليه!
جاكي: لا ولا حاجه.. المهم فكك.. هما هيمشوا اكيد..
جاك: خلي بالك من نفسك كويس.. ولو حد قربلك اضربيه.. انتي مش صغيره.. انتي لسانك اطول مني.. لو حد ضايقك هزقيه وعرفيني ع طول..

جاكي: متقلقش.. كله تمام..

فوني رن وكان محمد..
جاكي: ايوا يامحمد..
محمد: يلا انزلي...
جاكي: انت جيت.. طب ماتطلع..
محمد: لا اخلصي عشان منتاخرش..
جاكي: مال صوتك..
محمد: لا عادي.. يلا بس بسرعه...

قفلت معاه وجبت حاجتي...

جاكي: يلا باي بقاا..
جاك: باي..

سيبته ونزلت ركبت مع محمد وطلع ع طول... كنت ببصله وكان شكله غريب وعمال يمسح وشه.. ومشغل راب ومعلي ع الاخر...
جاكي: مالك ياسطا..
محمد: مليش.. بس.. هو اي الحلاوه دي..
جاكي: ماشي ياعم.. ركز ف السواقه بس.. ووطي البتاع دا..

بصيت من الشباك وبصيت لقيته بيمسك ايدي بطريقه غريبه..

جاكي: انت بتعمل اي...

راح ركن العربيه ع جنب وكان طريق فاضي وضلمه.

محمد بسُكر: ماتحسي بيا بقاا..
جاكي: محمد انت شارب حاجه!!

قرب مني جامد وحط ايده ع رجلي..
جاكي: محمد انت اتجننت..
محمد: ماهو انتي مش حاسه بيا.. انا تعبان والله.. وانتي حلوه وعجباني الصراحه...

كان بيبصلي بنظرات مش كويسه وعمال يقرب..
فضلت اخبطه ع وشه..
جاكي: محمد فوووق.. انت شارب اي...

مكنش ف وعيه وكان عمال يتلقح كدا وكدا..

محمد: استني بس.. بقولك اي ماتيجي...

جاكي: ابعد ياحيوان...

لقيته قفل ببان العربيه بسرعه وقلع التيشرت و انا عماله اصوت واضرب فيه و.........

يُتبَع.....🕊

رأيكم♥🖇

Part 38:♥🥀

بارت راايق اهو♥🚶

"وايه الدُنيا سوىٰ عيونك" ♥🥀

_____

فيروز: امال فين جاكي!
جاك: مشت..
فيروز: اوعى تكون زعلتها..
جاك: ياشيخه بس بقاا.. انتي ع طول ظلماني كدا!
فيروز: لا مانا عارفك كلامك دبش..
جاك: انااا!!!.. والله ابدا.. دي بتقولي ياسطا ويابو الصحاب وبتاع فخاد.. انا بتاع فخاد يافيروز!!!!
فيروز: ماهي معاها حق.. انت زودتها قوي مع البت دي..
جاك: خليها تشرب..
فيروز: وانت بتغيظها ليه!
جاك: مش بغيظها.. انا مالي بيها..
فيروز بخبث: ياواااد.. عيب عليك.. مش ع فيروز الكلام داا... انت جبت البت دي هنا عشان تغيظ جي.. وفضلت قريب منها وبتتلزق فيها عشان تضايق جاكي.. مع ان دا مش طبعك.. ولا انت ليك ف كدا...
جاك: امال ضربتيني ليه لما انتي عارفه كدا!
فيروز: عشان دي قلة ادب.. بس قولي.. بتحب تغيظها ليه!
جاك: عادي.. بتسلى..
فيروز: بتتسلى ولا عشان تخليها تغير عليك..
جاك: وهي هتغير عليا ليه!
فيروز: جاك انت حبيتها!
جاك: لا طبعا.. انتي بتقولي اي..
فيروز: قولي الحقيقه.. اشمعنى دي اللي بتهزر معاها كدا.. وبتضحك ومفرفش مع انك اصلا نكدي..
جاك: محبتهاش يافيروز.. ولا عمري هحبها... كل الحكايه اني برتاح معاها معرفش ليه... يمكن عشان فيها شبه من اسيل.. نفس الشقاوه واللسان..
بس انا بحب اسيل.. مستحيل حد يدخل قلبي غير اسيل... وبعدين انا اصلا راجع امريكا تاني.. فكدا كدا مينفعش اتعلق بحد.. لا هي ولا غيرها..
فيروز: مش يمكن دي يابني عوض ربنا ليك... اسيل مشت من زمان.. وانت استحملت كتير... يمكن دي تكون طبطبة ربنا ع قلبك...
جاك: لا.. محدش هيقدر ياخد مكان اسيل..
فيروز: طب ع الاقل اديها فرصه.. يمكن تحبها..
جاك: فيروز اقفلي والنبي...
______

كنت عماله اقاومه وازقه بعيد وهو مش واعي لحاجه لحد ماخبطته ف الشباك ونزلت اجري بسرعه...
فضلت اجري كتيرر وانا بعيط ومش مصدقه لحد ماوصلت لمكان فيه ناس... وقفت تاكسي ورجعت...
_______

شهد: الله ياماما.. الاكل هنا تحفه... ولا اي الفواكه دي...
مرات عمي: ولا البسين.. شوفتي البسين عامل ازاي!
عماد: امال زينا عايشين ف كهف..
مرات عمي: ماتحاول بقاا..
عماد: هي مش طايقاني اصلا...
مرات عمي: يابني خليك مفتح كدا.. حاول توقعها.. ولو معرفتش، حاول توقع اي واحده من هنا.. البنات كتير اهوو..
عماد: هحاول...
____

خبطت ع الباب وفيروز فتحت لقتني بعيط ومتبهدله..

فيروز بخضه: يالهوي يابنتي!.. اي اللي عمل فيكي كدا..

جاك جه بسرعه...
جاك: جاكي!!.. اي اللي حصل...

كنت بعيط ومش قادره اتكلم...

فيروز: طب تعالي.. تعالي اقعدي..

قعدت وجابتلي مايه وقعدوا جنبي...

جاك: اهدي وقوليلي اي اللي حصل.. مش كنتي مع محمد!

جاكي بعياط: م محمد..

جاك: ماله!

جاكي: ا اتهجم عليا...

جاك: نعم!!!!... انتي بتقولي اي!

فيروز: اي اللي بتقوليه دا يابنتي!.. محمد ميعملش كدا...

جاكي: كان شكله شارب... واتهجم عليا وانا ف العربيه وانا عرفت اجري منه ورجعت ع هنا..

جاك: طب بس بس بطلي عياط... فيروز انتي مستوعبه!!

فيروز: استنى انا هرن عليه... بس وحياتك عندي.. لو دا حصل بجد..ماهيطلع عليه صبح...

جاكي: لا انا هرجع اخد بابا وهمشي...

سابتني ودخلت جابت الفون...

جاك: بس اسكتي.. احنا هنتصرف..

جاكي: لا... انا عايزه امشي..

جاك: طب خلاص.. بطلي عياط... هي هترن عليه وانا هعلمه الادب..

فيروز: انا رنيت عليه وهو جاي ف السكه..

قعدوا يهدوني لحد ماجه واول مادخل فيروز مسكته وقعدته...

فيروز بغضب: اي اللي حصل..

محمد:.......

فيروز: ماترد عليا

محمد:......

راحت ضربته بالقلم وانا اتخضيت..

فيروز: بتتجهم ع جاكي يامحمد!!... جاكي!!... انت اتجننت!

محمد: مكنتش ف وعيي..

فيروز: وعي اي ونيلة اي.. وانت بتشرب ليه اصلا...

فضلت تضرب فيه وانا قاعده اعيط وجاك قام وحاشها عنه...

جاك: اللي حصل دا صح!

محمد: مكنتش ف وعيي ياجاك..

راح ضربه بالبوكس ف وشه وفضل يضرب فيه وفيروز مش عارفه تحوشه...

جاك: هتفضل طول عمرك وسخ... فاشل وبتاع بنات... امشي اطلع بره ومشوفش وش اهلك هنا تاني..

بصيت لقيته قام وجه قعد ع الارض قدامي وعنيه كلها دموع...

محمد بقلة حيله: انا اسف.. معرفش عملت كدا ازاي..

جاك: فيروز طلعيه بره...

فيروز خدته ومشي....

فيروز: لا حول ولا قوة الا بالله... انا مش عارفه اي اللي بيحصل دا..

جاك: فيروز!.. جاكي مش هتمشي من هنا..

فيروز: لا تمشي فين.. بعد اللي حصل دا لازم تفضل هنا.. وبلاها جامعه اليومين دول لحد ماجاك يقوم ويبقى هو يوصلك... لحد مانشوف هنعمل اي مع الحيوان دا..

جاك: فيروز انا لو شوفته تاني مش هرحمه...

جاكي: ياجماعه هو مكنش واعي لحاجه.. محمد اكيد ميعملش كدا..

جاك بعصبيه: وانتي بتدافعي عنه ليه انتي كمان!

فيروز: بالراحه ياجاك.. ماهو بردو محمد ميعملش كدا الا لو كان مش ف وعيه فعلا.. دا اتغير جدا عن الاول وبيخاف عليها اكتر من نفسه..

جاك: وبعدين!.. نجيبه نبوس راسه يعني!!... لازم يتعاقب ع اللي عمله دا...

جاكي: لا.. انا همشي.. انا من ساعة ماجيت والمشاكل نازله عليكوا.. انا السبب ف كل دا اصلا...

فيروز: انتي السبب اي بس.. هو اللي انتي شوفتيه قليل..

فيروز: قومي ياحبيبتي ارتاحي.. والصبح يحلها ربنا....

جاكي:.......

جاك: قومي ياجاكي... بطلي عياط وقومي

جاكي: ايوا بس انا مش معايا هدوم.. وهدومي دي متبهدله..

جاك: خشي البسي اي حاجه من عندي...

مسحت دموعي ودخلت فتحت الدولاب وهو قاعد مع فيروز بره...
طب انا هلبس اي دلوقتي.. كله كبير عليا.. ولبسه كله اسود..
طلعت بيجامه سودا ولبستها وطلعت...
جاكي: احم...

هما شافوني وحاله من الضحك سيطرت عليهم والحقيقه معاهم حق.. ماهو دا مش منظر...

جاكي: كانت فكره لا بأس بهاا...

جاك بضحك: انتي شوفتي نفسك ف المرايه!

جاكي: احم.. شوفت..

جاك: وملقتيش غير دي وتلبسيها!!!

جاكي: مانت اللي هدومك كلها كبيره...

جاك: انتي اللي شبر ونص.. انا مالي..

فيروز: بس متضايقهاش... ادخلي ياحبيبتي نامي...

جاك: بت.. دي اكتر بيجامه بحبها.. اياك يحصل فيها حاجه...

بصتله بقرف ودخلت...

البنطلون كان واسع وطويل عليا قوي والبيجامه جايه لحد ركبتي وواسعه جدا عليا واكمامها ف ذمة الله.. ولكوا ان تتخيلوا المنظر بقااا...

دخلت قلعت الطرحه وقعدت ع السرير واتنهدت...
يارب هو انا مش هخلص من المصايب دي... يارب انا عايزه ارتاح بقااا..
حاولت انام بس معرفتش.. فضلت قاعده مكاني ع السرير بفكر...
ايوا بس محمد ميعملش كدا... هو بيخاف عليا جدا... بس بردو غلط... ياربببي....

فضلت قاعده شويه وبعدين جتلي مسدج.. فتحت بزهق..

ـ مش عارفه تنامي!

كان جاك.. شوفت المسدج وابتسمت بغلب...

جاكي: تؤتؤ..

جاك: مش عارف اي تؤتؤ بتاعتك دي.. ماتتكلمي زي الناس... ع العموم اطلعي لو حابه.. انا قاعد ف البلاكونه لو حابه تيجي يعني..

جاكي: اوكي..

طلعت لقيته قاعد وقافل النور بس في اضاءه كويسه يعني وفيروز مش موجوده....

جاكي: امال فين فيروز!

جاك: نامت...

جاكي: تمام..

جاك: انا اسف.. اسف بالنيابه عن محمد.. بس صدقيني هو مش كدا...

جاكي: عارفه.. عشان كدا مش عارفه اكرهه.. يمكن زعلانه منه بس هيفضل غالي عليا بردو...

جاك: ياقلبك... مبعرفش اسامح حد اذاني...

جاكي: لو اذاك بقصد... اما لو بدون مايقصد عادي..

جاك: طب فرفشي بقاا عشان انا مش متعود عليكي كدا...

جاكي: اقوم ارقص يعني..

جاك: ياريت..

جاكي: اتلم..

جاك: طب تحبي تسمعي اي!

جاكي: اي حاجه... ولا استنى اشغل انااا... فتحت موبايلي وشغلت اغنية الف ليله وليله لام كلثوم...

جاك: يارايق انت...

ضحكت وسكت..
فضلنا ساكتين واحنا قاعدين جنب بعض ع الارض وباصين للسما والهوا تحفه وام كلثوم بتقول...

"الليل وسمااه.. ونجومه وقمره.. وقمره وسهره.. وانت وانااا...
ياحبيبي انااا.. ياحياتي انااا...
كُلنا كُلنا.. ف الحُب سوااا...... والهوى.. ااه منه الهوى.. ااه منه الهوى
اااه.. منه الهوى... سهران الهوى.. يسقينا الهنا.. ويقول بالهنا...
ياحبيبي... يلا نعيش ف عيون الليل.. ونقول للشمس.. تعالي تعالي.. بعد سنه، مش قبل سنه...
دي ليلة حب حلوه.. بألف ليله وليله.. ألف ليله وليله... بكل العمر.. هو العمر ايه غير ليله، زي الليله..... ♥🥀"

الاغنيه كانت تحفه وماشيه جدا مع الجو والدنيا حلوه..
بس انا مكسوفه... انا مكسوفه اجدعاااان... ليلة حب اي بس... ياريتني ماشغلت ولا اتنيلت...
بصيت لقيته فجأةً بدأ يغني بهدوء مع الاغنيه وهو سرحان....

جاك: ازاي ازاي ازاي.. اوصفلك ياحبيبي ازاي.. قبل مااحبك كنت ازاي ياااحبيبي... كنت ولا امبارح فاكراه.. ولا عندي بكرا استناه... ولا حتى يومي عايشاه ياحبيبي...

كان بيغني وهو شارد ومبتسم ابتسامه خفيفه ومندمج..
والصراحه صوته قمرررر قووووي... اي ياض الجمال دااا.. مكنتش اعرف ان صوته حلو كدا...

بدات اغني انا كمان معاه بهدوء....

احنا الاتنين: يا حبيبي... ياحبيبي اييه اجمل من ليل واتنين زينا عاشقين...
تايهين... ماحناش حاسين العمر، ثواني ولا سنين ياحبيبي....
"بصلي وابتسم"...

حاسين اننا بنحب وبس نحب وبس....
عايشين لليل والحب وبس...
ياحبيبي الحب حياتنا وبيتنا وقوتنا...
للناس دنيتهم واحنا لينا دنيتنا....
وان قالوا عن عشاقه.. بيدوبوا ف نار اشواقه، اهي ناره دي جنتنا.. والحب... الحب عمره ماجرح.. عمره عمره.. ماجرح....
ولا عمر بستانه طرح.. غير الهنا وغير الفرح...
ياحبيبي.. يلا نعيش ف عيون الليل.. ونقول للشمس.. تعالي تعالي.. ياشمس تعالي.. بعد سنه مش قبل سنه.. دي ليلة حب حلوه بالف ليله وليله.. بكل العمر.. هو العمر اي غير ليله.. زي الليله... ♥🥀"...

كنا بنغني ومندمجين مع الاغنيه قووي وبنلحن كمان وبنبص لبعض ونبتسم ونرجع نغني ونبص للسما تاني.. وحقيقي اول مره احس بمعنى الاغنيه مع اني بقالي سنين بسمعها.....

ـ ايوا ياراايقين...

كان صوت فيروز جاي من جوااا... فضحكنا احنا الاتنين وسكتنا..
وام كلثوم كملت....
"ياقمر ليلي.. ياضل نهاري.. ياحبي.. ياايامي الهنيه...
عندي لك اجمل هديه... كلمه.. كلمة الحب اللي بيها، تملك الدنيا ومافيها.. واللي تفتحلك، كنوز الدنيا دياا.. قولها ليا.. قولها للطير.. للشجر.. للناس.. لكل الدنيا... قول.. قول الحب نعمه.. مش خطيه..
الله محبه... الخير محبه.. النور محبه...
ياااارب.. تفضل حلاوة سلام اول لُقى ف ادينا.. وفرح اول معاد، نلقى الشموع حوالينا..
ويفوت علينا الزمان، يفرش امانه عليناااا.... يااارب...
ولا عُمر كاس الفُراق المُر يسقينا.. ولا يعرف الحُزن، مَطرحنا ولا يجينا... وغير شموع الفرح، ماتشوف لياليناااا... ليالينا ياحبيبي... ♥🥀"..

صوت ام كلثوم ف اخر الليل مع السما الصافيه والبحر قدامنا والهوا يرد الروح حاجه تاااااااني....
الجو كان رايق وتحفه وحقيقي نسيت اللي حصل النهارده ومبقتش متضايقه ولا اي حاجه...

فضل الصمت مسيطر ع المكان.. ماعدا ام كلثوم.. دي مفيش حاجه تقدر تسيطر ع جمااال وروقان صوتها...

شويه وجاك قطع الصمت داااا...

جاك: تحبي نلعب!
______

نهى: البت مرجعتش لحد دلوقتي... هتكون فين كل دا!!
هند: انا بدات اقلق عليها.. ومحمد كمان موبايله مقفول..
نهى: انا متاكده انهم مخبيين حاجه..
سما: هيخبوا اي يعني!.. ياجماعه اكيد بيتمشوا او حاجه.. مانتي عارفه محمد بيحب يسهر...
هند: ممكن.. بس يقفل تليفونه ليه!
سما: ماهو ع طول قافل فونه.. اي الجديد يعني..
هند: خلينا قاعدين مستنيين اهو..
______

محمد كان قاعد عند قبر مامته ودموعه نازله....
محمد بكسره: وحشتيني.. وحشتيني ياامي...
اتكسرت جامد بعدك.. سيبتيني ليه... طب انتي عارفه ان بابا بيتخانق معايا لما بيعرف اني بجيلك!...
وحشتيني قووي.. بقيت بعمل حاجات كتير غلط...
واديني اهو النهارده عملت مصيبه كبيره مستحيل اسامح نفسي عليها... محدش حاسس بيا ياامي... انا تعبت والله.. تعبت وعايز اجيلك...
__

جاكي: اشطا.. بس هنلعب اي!
جاك: اممم.. بتعرفي تلعبي شطرنج!
جاكي: تؤتؤ..
جاك: يادي تؤتؤ بتاعتك دي.. امال بتعرفي تلعبي اي!!..
جاكي: امممم.. ممكن افلام..
جاك: اشطا.. ابدأي.. بس خلي عندك ضمير والعبي كويس...
بدأت العب وامثل وهو بيحاول يستنتج انا بقول اي...
جاك: مش فاهم...
جاكي: قدامك محاوله واحده.. لو معرفتش، هاخد بوينت..
رجعت مثلت تاني....
جاك: جاكي حبيبتي.. كدا انتي بتقوري محشي مش بتمثلي...
جاكي: مانت اللي غبي ومش فاهم..
جاك: انا غبي..
جاكي: ايون.. بقالي ساعه بشرح وانت مبتفهمش اصلا..

راح ضربني ف كتفي...
جاك: طب اتلمي بقاا..
جاكي: ياحيوااان.. ايدك تقيله..
جاك: يا ايه!!!..

روحت ضربته ف صدره..
جاكي: حيوان وستين حيوان.. انا غلطانه اني بلعب معاك..
جاك: انتي اي اللي جابك اصلا.. قومي قومي روقي الجو شويه.. جاتك القرف...
جاكي: ولاااا اتلم يااااض..
جاك: بت.. هجيبك من شعرك..
جاكي: طب لو راجل اعملها.. خليني اجيبك نصين..
جاك: هاهوو.. انتي مش شايفه شكلك!!..دانتي شبر ونص.. دانا اقيسك ع ركبتي ياحلوه..
جاكي: ولاااا.. متخلنيش اخرب عليك ياااض..
جاك: اي يابت السرسجه دي.. ماتقومي تاخديني قلمين...

ـ سبحان مغير الاحوال... انتوا مش كنتوا لسه بتغنوا ورايقين دلوقتي!!!.. قلبتوا من شبراااا ليه!!...

بصينا لقيناها فيروز..
جاكي: عمال يستقوى عليا اكمني بنت ومش هعرف ارد يعني...

جاك: نعم ياختي... دي شرشحتلي والمصحف... دانا خوفت...

فيروز: طب وعهد الله لو مالميتوا نفسكوا لانا جايبه الشبشب.. انا قولت اهووو..

جاك: لا شبشب لا.. خلاص انا هقعد ساكت والله..

جاكي: هو بيوجع قوي كدا..

جاك: هاتيه خليها تجربه يافيزوو..

جاكي: لاااا... اجرب اي.. شكرا مش عايزه..

فيروز: انا داخله واياك اسمعكوا بتتخانقوا تاني...
سابتنا ودخلت..

جاك: عاجبك كدا!

جاكي: وانا مالي.. مانت اللي مهزء..

جاك: بت.. اتلمي والله هضربك..

جاكي: طب جرب كدا..

ـ وبعدييييين... اجيب الشبشب!!!

جاكي: لا يافيزوو... دا جااك دا حبيبي.. يانهار.. عسل ياناس...

جاك بضحك: ايوا جيبي ورا كدا...

جاكي: شخصيتها قويه الصراحه...

جاك: والشبشب اقوى وحياتك...

سكتنا شويه...

جاكي: الا صحيح...
جاك: ارغي..
جاكي: هو انت ليه كنت بتحط ايدي ع قلبك وتنام...
ملامحه اتغيرت شويه..
جاك: احم.. بتسالي ليه..
جاكي: لا فضول عادي... لو مش حابب تقول اشطا...
جاك بتنهيد: عشان اتطمن...
جاكي: يعني اي...

جاك: الداده اللي كانت معايا ف امريكا وانا صغير كانت ع طول بتعمل كدا.. ومكنتش بعرف انام غير كدا.. عشان كنت بحلم بكوابيس وبقوم مخضوض.. وطبعا مكنش حد بيهتم.. فكانت بتدخل ع صوت عياطي وتعمل كدا.. فانا اتعودت ع كدا.. عشان كدا لما بتجيلي نوبة الخوف دي، لازم احط حاجه غاليه ع قلبي...
يعني لو في حد بحبه ممكن امسك ايده.. لو مش معايا حد زي مابيحصل اغلب الوقت، بحط صورة اسيل...

جاكي: اممم.. والنوبه دي بتجيلك كتير!

جاك: اغلب الوقت... بس انا اسف يعني لو ضايقتك وقتها.. انا بس محستش بنفسي وانا بعمل كدا...

جاكي: لا لا خالص... انا بس كنت مستغربه.. لان بالليل لما نعست ف اوضتي، كنت بتترعش اوي بالليل وكنت خايف.. ولما انا عملت كدا انت هديت ونمت ع طول...

جاك: هو انتي ليه مناديتيش ع حد او تصحيني انتي..

جاكي: استنيتك تصحى بس مصحتش.. وانا نعست...

جاك بضحك: ايوا ف حضني...

جاكي: هااا..
ابتسم وبص ف الارض..

جاكي: انت مش كنت نايم.. وبعدين لما انت صحيت انا كنت قومت...

جاك: صحيت بالليل..

جاكي: احلف!!!...
جاك بابتسامة: والله..
جاكي: ومخرجتش ليه!
جاك: انا قومت وقعدت شويه عشان استوعب المنظر وبعدين جيت اقوم بس معرفتش...
جاكي: يعني اي معرفتش!
جاك: احم.. يعني كنتي متبته فيا جامد...
جاكي: انااااا!!!
جاك: ايوا.. بس انتي كنتي نايمه يعني ومش حاسه بحاجه...
جاكي: ومشلتش ايدي ليه.. ولا كنت تصحيني..
جاك: كنتي حاضناني جامد والله.. وبعدين بصراحه كنت مرتاح جدا واول مره انام كدا.. فغمضت عيني ع طول ونعست تاني...

سكت وبصيت قدامي من الكسوف...
جاك: متقلقيش.. انا محترم.. معملتش حاجه..
جاكي: لا عارفه.. انا بس..
جاك: فكك فكك... تعالي نعد النجوم..

بصيتله وضحكت..

جاكي: انت اهبل ياسطا!
جاك: يلا بس...

بصيت لقيته نام ع الارض وبص للسما....
جاك: يلا نامي...وشغلي اغنيه كمان...

شغلت ونمت انا كمان جنبه وقعدنا نتسابق ف عد النجوم ونضحك ونهزر وبعدين محسناش بحاجه تاااااني😴...
______

هند: لا كدا اكيد في حاجه...
سما: هي نهى راحت فين!
هند: تقريبا نعست جواا..
سما: طب جربتي ترني ع جاكي!
هند: جربت بس مش بترد...

فضلوا كدا لحد الصبح....
____

"استوووووب... نوصف ابطالنا بقااا...
*محمد: باد بوي طايش كدا ودمه خفيف وفرفوش..واجتماعي.. شكليا بقاا.. املس وابيضاني وعنيه بني وطويل وعنده عضلات وشعره طويل وكيرلي.....

*جاك: هو باد بوي بس راسِي وتقيل ف نفسه.. وجوده ليه هيبه كبيره.. وشخصيته ليها رهبه كدا... قاسي نوعا ما وجد ع طول ومش اجتماعي... شكليا... لونه خمري شويه وعنيه رمادي غامق وشعره طويل وناعم وهو طويل وعنده عضلات بردو بس مش اوڤر يعني.. حاجه كدا قمر وتقريبا جسمه كله عباره عن عضلات... واملس هو التاني...

*ادم: دمه خفيف ومحترم وهادي.. وشكليا.. عيونه خضرا وعنده دقن وحاجه قمر اصلا...

*جاكي: مشاكسه نوعا ما.. بس هاديه وخجوله ومنطويه.. شكليا.. عنيها عسلي وقصيره وكفايه كدا...

_______

الصبح طلع وانا بدات افوق...
فتحت عيني لقيتني نايمه وجاك نايم جنبي..
لقيت حد غطانا عشان كان الجو برد..
وهو نايم ع كتفي وايده عليا....

احييييييييه.... اي داااا....

قومت شيلت ايده بالراحة عشان مينفعش يصحى ويشوف المنظر دا عشان هيبقى شكلي مقرف قوووي...
حاولت ابعد عنه بالراحه راح مسك فيا جامد..

جاك بنعس: لا خليكي.. اسيل انتي من زمان ماجيتيش.. خليكي شويه...

مكنتش عارفه اعمل اي.. لحد ماحاولت اني اشيل ايده وشلتها بصعوبه والحمد لله انه مصحيش...
غطيته ودخلت ع جوه بسرعه.. ملقتش فيروز ... امال مين غطانا...
دخلت اتوضيت وصليت ودخلت المطبخ...
البنطلون كان طويل عليا ومكنتش عارفه اتحرك فيه روحت شمرته وظبطت الدنيا يعني وقعدت اعمل فطار وانا بغني ورايقه...

جاكي: القلب يعشق كل جميل... وياما شوفتي.. وياما شوفتي جمال ياعين...
واللي صدق ف الحب قليل... وان دام يدوم، يوم ولا يومين... اللي صدق... ف الحب.. قليل قليل..
واللي هويته اليوم.. دايم وصالُه دووم..

لسه بلف وشي لقيت حد ورايااا...

جاكي: اعااااااا...
جاك: اي يابنت المجنونه...
جاكي: ياخي منك لله... اي ياسطا حد يخض حد كدا...
جاك: مانتي اللي مندمجه مع كلام الحب بتاعك دااا...
جاكي: طب كح ولا اعمل اي حاجه.. وبعدين انت واقف كدا ليه اصلا... روح شوف وراك اي يلا..
جاك: ولا حاجه...
جاكي: ايوا وبعدين... قصدك هتفضل واقفلي كدا زي المره اللي فاتت!... امشي ياجاك...
جاك: هقف ساكت والله... بس قوليل بتعملي اي...

جاكي: ياسطا واقفه ف المطبخ ع الصبح كدا.. هكون بعمل ايييي...
جاك: هو انتي عنيفه ليه.. ماتهدي.. المفروض انك بنت.. يعني بلاش دبش..
جاكي: ااه عايزني مسهوكه زي البت بتاعتك..
جاك: اي البت بتاعتك دي...
جاكي: ياراجل..
جاك: طب معلش اعمليلي قهوه عشان مصدع...
جاكي: هاتشووووووو....
جاك:.......
جاكي: بتبصلي كدا ليه!
جاك: لا اصلك لو عطستي كدا وانا نايم هقوم مخضوض... اي العطسه دي... انا راجل ومبعطسش كدا...
جاكي: خليك ف حالك يااخ والنبي...
جاك: ماشي... بس البيجامه بتاعتي عامله شغل...
جاكي: يعم متخلنيش اقلعها دلوقتي...
جاك بخبث: ياريت...

روحت اتمشيت ومسكت السكينه..
جاكي: ع فكره انا خُلقي ضيق.. لو سمعتك بتستظرف تاني، هدخل السكينة دي ف بطنك واطلعها من رقبتك...

جاك بخوف: زي المحشي!!
جاكي: زي المحشي..
جاك: احم.. حاضر..
جاكي: مبتجوش غير بالعين الحمرا...
جاك: طب خلاص يلا نغني..
جاكي: ياسطا انت رايق ياسطا..
جاك: ماهو انا مش هبقى رايق كدا كل يوم... انا اصلا من زمان مغنتش...
جاكي: بس صوتك حلو ياسطا.. مقولتش ليه..
جاك: مش حلو.. انتي هتحليه من عندك!
جاكي: لا ياسطا بالله حلو جدا... بص خد قطع الحاجات دي وانا اعملك القهوه وتعالى نغني يلا...
*ياما عيون شاغلوني. *

جاك: اشطا حافظها...

الاتنين: ياما عيون شاغلووووني... لكن ولااا شغلووووني... الا عيونك انت... دول بس اللي خدوني خدوني... وبحُبَك امروووووني...
امروني احب لقيتني بحب... ااه لقيتني بحب وادوب ف الحب...
ادوب ف الحب وصبح وليل... ولييييل على بابه...

بصينا لقينا فيروز واقفه ومربعه ايدها وبتتفرج علينا...
فيروز: لا ماهو كدا في حاجه...

جاك بضحك: والله مافي حاجه ياست.. احنا بس رايقين فبنغني...

بصتلنا بخثبت وهزت دماغها وسابتنا ودخلت...

جاكي: تفتكر فكرت ف اي..
جاك: لا ادري يااختاااه...
جاكي: طب اتفضل قهوتك واتكل ع الله بقااا..

فجأه الباب خبط...
جاك: اي دا.. انتي مستنيه حد!
جاكي: لا... مش المفروض محدش يعرف المكان هنا!
جاك: ومش ممكن يكون محمد بعد اللي حصل امبارح...
جاكي: طب استنى افتح ونشوف...

طلعت وفتحت الباب و لقيتها.......

يُتبَع.....

Part 39:♥🥀

"خبإني في اُغنياتك التي تُكررها دون مَلل" ♥🥀

جاكي بصدمه: هند!
هند: كنت عارفه اني هلاقيكي هنا...
دخلت وقفلت الباب..
جاك: هند!.. جيتي هنا ازاي!
هند: انتوا مفكريني نايمه ع وداني ولا اي!.. انا عارفه كويس انتوا بتعملوا اي...
فيروز طلعت..
فيروز: اي دا انتي جيتي هنا ازاي!
هند: سمعتك انتي ومحمد وانتوا بتقولوا انكوا هتنقلوه هنا... بس متقلقوش.. محدش عرف حاجه.. وانا مبينتش قدام حد اني اعرف حاجه..
جاك: امال جيتي ليه دلوقتي!
هند: عشان الاستاذه بره من امبارح هي ومحمد ومحدش فيهم بيرد..
جاكي: هو محمد مرجعش!
هند: لا.. وقافل تليفونه.. فقولت اكيد هلاقيكوا هنا... دا غير ان نهى قالبه الدنيا عليكوا..
فيروز: سيبك من نهى دلوقتي.. انا خايفه ع محمد.. هيكون راح فين يعني!
جاك: اكيد بيتسرمح مع صحابه.. هيكون فين..
فيروز: لا ياجاك انا قلقانه عليه..
جاكي: طب جربي ترني ع صحابه وتشوفيهم..
فيروز: ايوا صح.. استنوا..
جابت الفون ورنت ع صحابه كلهم وكلهم قالوا مش معانا...
فيروز: لا كدا في حاجه..
هند: طب وهنعمل اي!
جاكي: مكنش المفروض تضربه كدا ياجاك..
جاك: ااه.. كان المفروض اسيبه يتهجم ع حضرتك وابقاا مبسوط..
هند: يتهجم!!!.. انتوا بتقولوا اي..
جاك: اللي حصل ان اخوكي الزفت حاول يتهجم عليها عشان كان سكران...
هند: لا طبعا محمد ميعملش كدا..
فيروز: واهو عمل.. المهم دلوقتي انا خايفه عليه..
هند: طب... انا عارفه ممكن نلاقيه فين..
جاكي: فين..
هند: انا هروح اشوفه وارجعلكوا...
جاكي: لا استني انا هاجي معاكي..
هند: لا خليكي..
فيروز: لا خديها معاكي.. هو مش هيرضى يرجع غير لو هي كلمته...

دخلت غيرت بسرعه وطلعت...
جاك: انتي فعلا هتروحي!.. بعد اللي عمله دا وهتروحي!
جاكي: انا خايفه عليه.. ف الاول وف الاخر هو مكنش واعي... يلا ياهند..

نزلنا وخدنا تاكسي وبصيت لقيته ماشي ف طريق غريب..
نزلت ومشيت ورا هند واتصدمت من المنظر...
____

نهى: فين هند ياسما!
سما: خرجت..
نهى: خرجت راحت فين يعني!
سما: معرفش..
نهى: مسيري هعرف وراكوا اي...
سما: ماتفكك بقاا.. هيكون ورانا اي يعني..
مرات عمي: هي جاكي فين!
نهى: والله احنا منعرفش.. من امبارح وهي بره البيت.. الله اعلم بتتسرمح فين..
سما: اي اللي بتقوليه دا.. اكيد مع محمد يعني..
نهى: وهو محمد اخوها ولا جوزها.. دا بالنسبالها حد غريب.. تبات معاه بره ازاي.. وبعدين مانتي عارفه ان محمد طايش...
عماد: انتوا بتقولوا اي!.. يعني اي بايته بره.. هي هتدور ع حل شعرها!
مرات عمي: استنى لما تيجي ونفهم منها...
_____

لقيت محمد نايم ع الارض جنب قبر مامته وحقيقي المنظر وجع قلبي...

روحت اصحيه... قام مخضوض..
جاكي: اهدى.. انا جاكي..
محمد: انتي بتعملي اي هنا..
جاكي: انت اللي بتعمل اي هنا!.. حد ينام كدا!
محمد: لو سمحتي امشي..
جاكي: همشي معاك...
محمد: لا انا مش راجع.. اتفضلي امشي لو سمحتي..
جاكي: محمد في اي!.. من امتى وانت بتشرب!

فضل باصص ف الارض والدموع بتتجمع ف عنيه...

جاكي: طب خلاص يلا نمشي من هنا...
محمد: جيتي ليه!..
جاكي: عشانك..
محمد: مخوفتيش لاعمل حاجه تاني!
جاكي: لا.. عشان عارفه انك مش هتضرني طول مانت واعي..
محمد: ارجوكي امشي.. انا مقدرش ارجع بعد اللي حصل..
جاكي: طب انا مسامحاك.. بس ارجع بقاا عشان خاطري..
محمد: انا اسف.. صدقيني معرفش عملت كدا ازاي.. انتي عارفه انا بخاف عليكي قد اي..
جاكي: انا لو مش عارفه مكنتش جيت دلوقتي..
محمد: يعني مسامحاني!
جاكي: ايوا..
دموعه نزلت ولقيته حضني وفضل يعيط..
محمد: انا اسف والله.. والله ماهتتكرر تاني.. اعملي اللي انتي عايزاه.. وعاقبيني زي مانتي عايزه.. بس بالله عليكي ماتزعلي مني.. انا مبحبش قدك والله..
جاكي: احم.. طب خلاص.. بطل عياط.. انا مش زعلانه..
محمد: لا زعلانه..
جاكي: مش زعلانه والله خلاص...

وشه كان فيه دم فمسكت طرحتي ومسحته..
جاكي: يلا بقاا عشان نمشي...
قام معايا ورجعنا تاني...

فيروز فتحت بس بصتله بزعل ودخلت...

جاك: مين قال تجيبوه هنا!
جاكي: انااا..
جاك: وانتي تجيبيه هنا ليه!
جاكي: انت عارف هو كان فين الاول!
جاك: هيكون فين يعني!.. اكيد بيتنيل يشرب...
جاكي: لا.. وبعدين خلاص بقاا.. هو غلط واتعاقب..

بصيت ورايا لقيت فيروز قاعده ودموعها نازله وهو قاعد قدامها ع الارض وبيعيط..

محمد: مش هتسامحيني!
فيروز:....
محمد: انا اسف طيب..
فيروز:.....
محمد: مش انا ابنك!
فيروز: لا مش ابني... مش ابني يامحمد... انت ابن جميله.. انا ولادي محترمين ومتربيين.. مش بيشربوا ولا يتهجموا ع بنات الناس... الظاهر عدم وجود ام معاك اثر عليك قووي وخلاك مش هامك حد وماشي بدماغك... الظاهر اني معرفتش اربي...

كان باصصلها ومصدوم من اللي بتقوله ودموعه نازله..

فيروز: انت كنت بتقولي ياماما.. من هنا ورايح مسمعش الكلمه دي منك.. انت فاهم.. انت امك ماتت... بعد كدا انا مرات ابوك.. ويستحسن متتكلمش معايا تاني..

هند: ماما.. اي اللي بتقوليه دا!... محمد هيفضل ابنك وهيفضل اخونا مهما عمل...

فيروز: اخرسي انتي... هو مش اخوكوا ولا هو ابني.. وبعد كدا ملكيش دعوه بيه خالص.. الله اعلم ممكن يعمل اي فيكوا انتوا كمان...

كنت شايفه الكسره ع وشه ولقيته باس ايدها....
محمد: يمكن انا فعلا مش ابنك... وامي ماتت.. بس اعتبرتك امي التانيه... انا عارف اني طايش.. وبعمل حاجات كتير غلط... بس انا كنت حاسس بنقص.. محدش فيكوا عرف يملى النقص دا... محدش فيكوا قدر يحس بيا اصلا... ع العموم حقك عليا..

قام باس راسها...
محمد: متقلقيش ع بناتك.. مش هتشوفي وشي تاني.. عن اذنك..

جاكي: استنى يامحمد.. محمد استنى متمشيش..

سابني ونزل بسرعه... جيت انزل وراه راح جاك قفل الباب...

جاكي: جاك اوعى..
جاك: ادخلي جوه..
جاكي: ملكش دعوه انا هنزل وراه...
جاك: مفيش نزول..
جاكي: هو انت مفيش ف قلبك رحمه!!... انت مش شايفه عامل ازاي!!
جاك: يتحرق... خليه يتعلم الادب..
جاكي: وانتوا كدا بتعلموه الادب!!... دا ممكن يعمل ف نفسه حاجه..
جاك: ف داهيه.. اتفضلي اقعدي واسكتي بقاا...
جاكي: ملكش انك تمنعني.. اوعى من وشي..

زقني بعيد...
جاك: جاكي متخلنيش امد ايدي عليكي..
جاكي: والله!!.. مد.. وريني هتعمل اي!..
جاك: جاكي متعصبنيش..
جاكي: ماتتعصب.. انا هنزل وراه.. انت ملكش دعوه...
جاك: دلوقتي بقاا حلو.. مش دا اللي كنتي جايه تعيطي بسببه امبارح!
جاكي: خلاص هو غلط واتعاقب.. كفايه كدا..
جاك: اي اللي كفايه!.. دا اتهجم عليكي.. يعني المفروض انتي اكتر واحده تكوني مش طايقه تبصي ف وشه..
جاكي: انا سامحته..
جاك: بالسهوله دي... هو كان ع هواكي ولا اي!..

بصيتله بصدمه...

هند: جااك... اي اللي بتقوله دا..

كلمته والدموع ف عيني..

جاكي : هو اي اللي كان ع هوايا ياجاك!... قصدك يعني اني كنت مبسوطه وهو بيعمل كدا!!.. مكنتش جيت اجري ع هنا...بس عارف!.. عندك حق.. لازم تقول كدا.. مانا عطيتك فرصه انك تهيني اكتر من مره...
وانت لقيت الحوار سهل.. وعادي اهي واحده قاعده عندنا ملهاش حد.. اجرح فيها واهينها براحتي... بس عارف.. مهما محمد عمل.. مش هيبقى زيك...

سيبته ودخلت اجري ع جوه وقفلت ع نفسي...

هند: انت اتجننت انت كمان!.. حد يقول كدا..
جاك: معرفش بقاا..
سابها ودخل اوضته وفيروز قاعده مكانها تعيط...
هند: اهدي ياماما خلاص... ماهو مكنش ينفع نعايره بيُتمه ياماما.. هو مش ذنبه ان مامته متوفيه...
______

عدى وقت معرفش قد اي.. كنت قاعده بعيط ومنهاره..
بس خلاص.. مفيش قعاد بعد اللي حصل دا.. خدت شنطتي وخرجت...

هند: انتي رايحه فين!
جاكي: هروح اخد بابا وامشي..
فيروز: تمشي فين يابنتي.. مش كفايه اللي مشي..
جاكي: هرجعه.. هخليه يرجعلكوا تاني.. وانا هخرج من حياتكوا خالص..
هند: لا ياجاكي.. مينفعش.. هتروحي فين!
جاكي: متشغليش بالك ياحبيبتي انا هتصرف...

سيبتهم ومشيت.. اخدت تاكسي ورجعت...

نهى: اهي شرفت الهانم... كنتي فين!
جاكي: وانتي مالك!
نهى: اي قلة الادب دي!.. ماتحترمي نفسك..
جاكي: انا محترمه غصب عنك.. وانتي ملكيش انك تتحكمي فيا..
نهى: ااه ماهو باين الاحترام.. بايته بره من امبارح وتقوليلي محترمه..
جاكي: دلوقتي بس عرفت ابنك جايب الافكار دي منين.. شكلها وراثه..
نهى: شوفتي!.. انا كنت متاكده انكوا عارفين مكانه...
جاكي: انا مش عايزه مشاكل.. انا هاخد بابا وامشي.. ف الاول وف الاخر انا ضيفه هنا.. عن اذنك..

طلعت لميت حاجات بابا وعرفته اننا هنمشي.. هو اصر يعرف ليه.. بس انا قولتله هفهمك بعدين..

مرات عمي: انتي بتعملي اي!
جاكي: هنمشي..
مرات عمي: تمشي فين!..
جاكي: هروح اي حته..
مرات عمي: هترجعي القاهره!
جاكي: لا عشان الجامعه... انا هشوف اي شقه هنا...
عماد: طب انا عندي شقة واحد صاحبي هنا.. هو مسافر.. بس كان قايلي اني ممكن اقعد فيها وقت مااحب...
جاكي: طب كويس دا.. احنا نروح لحد مااتصرف واأجر شقه انا وبابا...
عماد: بس ليه.. مانتوا قاعدين هنا..
جاكي: دا مش بيتنا ياعماد.. مش هنفضل عاله ع الناس كدا..
اتفضلوا جهزوا نفسكوا عشان نمشي...

سيبتهم وروحت اوضتي ولميت حاجتي ورجعت الاوضه زي الاول.. كنت ببص ع الاوضه بزعل.. بس ف الاول وف الاخر دا واقع... انا مكاني مش هنا...

سيطرت ع نفسي واخدت حاجاتي وهما نزلوا بابا وركبوه العربيه وانا نزلت لقيت هند تحت...

هند: بردو هتعملي اللي ف دماغك!
جاكي: معلش ياهند.. سيبيني براحتي.. يمكن دا يحفظلي شويه من كرامتي.. بس ياريت محدش يعرف حاجه عن موضوع محمد داا.. وانا اوعدك اني هخليه يرجع...
هند: ياجاكي خليكي والنبي.. متمشيش..
جاكي: معلش.. صدقيني كفايه كدا...

سيبتها ومشيت وركبنا العربيه وعماد طلع.. بصيت ع البيت لاخر مره ودموعي نزلت..

مرات عمي: انا مش عارفه انت بتطاوعها ليه!.. ماحنا كنا قاعدين هناك..
عماد: كانت هتروح فين يعني..
جاكي: وانتي عايزه تفضلي هناك ليه!.. هو كان بيتنا!
شهد: وهو بردو حد يسيب الجمال دا ويمشي..
جاكي: احنا هنقعد ف الشقه دي النهارده بس.. وانا اكون اتصرفت واجرت شقه وهروح فيها انا وبابا وانتوا هترجعوا القاهره..
شهد: لا انا عايزه افضل هنا..
مرات عمي: تفضلي هنا تعملي اي بقاا.. ماخلاص..

شويه ووصلنا ونقلنا الحاجات فوق.. وانا مكنتش عارفه هعمل اي.. ولا هروح فين..
بابا كان نايم وهما قاعدين يتكلموا... سيبتهم ودخلت البلاكونه افكر هعمل اي...
جه ف دماغي ادم.. قولت يمكن هو يقدر يساعدني.. بس دا مش وقته هو مش فاضي....
فضلت محتاره كدا لحد مارنيت عليه..

ادم: الو..
جاكي: هاا.. ياادم عامل اي..
ادم: كويس الحمد لله.. انتي عامله اي..

جاكي: كويسه.. معلش اعذرني معرفتش اجي النهارده اشوف مامتك عشان حصل ظروف كدا وسيبت البيت..

ادم: لا بقت كويسه الحمد لله.. بس يعني اي سيبتي البيت!.. رجعتي القاهره تاني!

جاكي: لا.. عشان الجامعه وكدا..

ادم: امال روحتي فين!

جاكي: انا مش عارفه اعمل اي.. انا تعبت والله..

ادم: طب خلاص.. تحبي نتقابل دلوقتي وتقوليلي اي اللي حصل!

جاكي: ياريت.. انا محتاجه اتكلم معاك جدا..

ادم: تمام.. قوليلي العنوان فين وانا هاجي اخدك..

قولتله العنوان وقفلت معاه وشويه وجه وانا غيرت وطلعت...
مرات عمي: رايحه فين!
جاكي: مشوار سريع وراجعه..
عماد: مشاويرك مش هتخلص ولا اي!

سيبته ونزلت ماهي مش ناقصه قرف..
ركبت وهو طلع...
ادم: مالك يابنتي عامله كدا ليه..
جاكي:.....
ادم: اممم.. طب تحبي نروح نقعد فين..
جاكي: ع البحر..
ادم: ماشي...

روحنا حته كدا وقعدنا جنب البحر...

ادم: احكيلي بقاا ياستي اي اللي مضايقك كدا..

قعدت حكيتله كل حاجه....
__

جاك: هي جاكي مطلعتش!
فيروز: مشت..
جاك: يعني اي مشت!
فيروز: يعني خدت ابوها ومشت..
جاك: انتي بتقولي اي.. ومين سمحلها تخرج..
فيروز: اسكت ياجاك.. اسكت انا فيا اللي مكفيني..
جاك: طب هي هتروح فين دلوقتي.. هي متعرفش حد هنا...
فيروز: عشان بعد كدا تبقى تلم لسانك.. مفكر اي.. انك هتهينها كل شويه وتسكتلك!!.. اياك كنت اشتريتها!...
جاك: انا هرن عليها..
فيروز: مش هترد عليك.. ريح نفسك..

سابته وقامت...
___

ادم: ياااه.. كل دا..

جاكي: انا تبعت والله..
ادم: متشيليش هم حاجه.. انا هتصرف..
جاكي: هتعمل اي..
ادم: بصي انتي بتعتبريني اخوكي.. صح!
جاكي: ايوا..
ادم: بصي ياستي.. احنا عندنا هنا شقتين.. احنا قاعدين ف واحده والتانيه محدش بيروحها خالص.. يعني احنا يعتبر مش محتاجينها ف حاجه...
تقدري تجيبي باباكي وتيجي تقعدي فيها براحتك واعتبريها من النهارده شقتكوا... وكمان هي قريبه مني شويه.. يعني هعدي عليكي الصبح اخدك الجامعه ونرجع مع بعض... بس وكل حاجه اتحلت اهي..

جاكي: لا لا مينفعش.. انا عايزاك تشوفلي شقه عشان اقعد فيها بالايجار...
ادم: وليه ماهي دي موجوده.. صدقيني هي مركونه ومحدش بيروحها نهائي... اي المشكله بقاا..
جاكي: ممكن اوافق بس هدفع ايجار..
ادم: وهو دا ينفع بردو!
جاكي: لا مش هقعد غير كدا.. لو مش هتوافق خلاص..
ادم: خلاص ياست.. ادفعي.. المهم هي جاهزه من دلوقتي لو حابه..
جاكي: لا ممكن بكرا.. عشان احنا لسه ناقلين بابا.. عشان ميتعبش يعني..
ادم: تمام.. بكرا الصبح هاجي اخدكوا.. واي حاجه تحصل او احتاجتوا اي حاجه انا موجود..
جاكي: والله انا مش عارفه اقولك اي.. انا تعبتك معايا قوي..
ادم: انتي مش لسه قايله اني اخوكي دلوقتي!.. وهو في اخ بيسيب اخته بردو!..

فوني رن وكان جاك.. وانا مردتش..

قعدت اتكلم معاه شويه وبعدين روحني تاني...

____

عماد: مين الواد اللي كنتي راكبه معاه دا!
جاكي: وانت مالك..
عماد: يعني اي انا مالي.. هسيبك تدوري ع حل شعرك يعني!
جاكي: بقولك اي احترم نفسك.. وبعدين انت مالك اصلا.. انا كدا كدا لقيت شقه وبكرا هاخد بابا وهمشي..

سيبته ودخلت وجاك عمال يرن وانا مردتش...
الليل جه وانا لسه ف الاوضه وجاك رن فوق ال١٠٠ مره..
ف الاخر زهقت ورديت..

جاكي:.......
جاك: بصي.. انا عارف انك زعلانه.. خليكي زعلانه مني زي مانتي عايزه.. بس قوليلي انتي فين!
جاكي:....
جاك: جاكي باباكي تعبان.. مينفعش تدوري بيه ف الشارع..
جاكي: انا مش دايره بابويا ف حته.. انا قاعده ف شقه..
جاك: ماشي.. بس فين!

جاكي: وانت مالك!
جاك: جاكي.. اخلصي وقولي انتي فين!..
جاكي: ليه.. عشان تيجي تكمل اهانه فيا هنا..
جاك: مقدرش اهينك..
جاكي: ياراجل..
جاك: مانتي عصبتيني ياجاكي.. وانا كنت خايف عليكي..
جاكي: فتتهمني ف شرفي..
جاك: لا.. انا عارف انك محترمه.. مقدرش اقول كدا..
جاكي: قولت.. قولت ياجاك.. ومش مره واحده كمان..
جاك: صدقيني مكنتش اقصد.. ومع ذلك بقولك ازعلي مني براحتك.. بس ارجعي..
جاكي: لا مش هرجع.. انا مليش حاجه عندكوا عشان ارجع.. وبالنسبه لمحمد.. فانا هصلح كل حاجه وهرجعه... ولو سمحت كفايه كدا.. وياريت مترنش تاني.. انا كنت فتره ف حياتكوا وخرجت.. سلام..

قفلت وبعدين قفلت فوني خالص....
فضلت قاعده مكاني كدا لحد الصبح.. معرفتش انام ولا عارفه انا بعمل اي... اهي الدنيا ماشيه وانا ماشيه معاها وخلاص..
الفجر اذن.. قومت صليت وفضلت قاعده للصبح.. ادم جه ونزلنا بابا...
مرات عمي: ايوا يعني انتوا هتروحوا فين دلوقتي!
جاكي: لقيت شقه كويسه هنروح نقعد فيها..
عماد: ومين دا..
جاكي: دا اخويا..
شهد: اخوكي ازاي..
جاكي: مش لازم يكون شقيقي عشان يبقاا اخويا.. يكفي اللي عمله معايا...
مرات عمي: طب ادينا العنوان..
جاكي: لا.. لحد مااشوف هستقر فين الاول... سلام..

سيبتهم ومشيت وادم طلع ع الشقه...
الشقه كانت كبيره وجميله جدا وكمان بتطل ع البحر.. انا خوفت من الايجار الصراحه.. ماهو اكيد شقه زي دي ايجارها هيكون غالي..

ادم: متقلقيش..
جاكي: اي!
ادم: انتي تقدر تقعدي من غير فلوس عادي جدا.. بس عشان عارف انك عنيده هسيبك براحتك.. بس انا مش هاخد غير عشره جنيه ف الشهر..
جاكي: كاااام!!!
ادم: انتي مش بتشتغلي.. وعمي تعبان.. يعني مش سهل انك تدفعي ايجار ياجاكي..
جاكي: لا ملكش دعوه.. شوف بس ايجارها كام وانا هتصرف... وبعدين مانا كدا كدا هشتغل يعني..
ادم: طب ياستي لحد ماتشتغلي..
جاكي: ادم حقيقي مينفعش..
ادم: ياست لما تشتغلي وتبدأي تطلعي فلوس.. ابقى ادفعي اللي انتي عايزاه.. بس دلوقتي صدقيني ملوش لزوم خالص... وبالنسبه للشغل فانتي مش مضطره ع فكره.. انا ممكن ا..
جاكي: لا.. كفايه لحد كدا.. انا هشتغل وهصرف ع نفسي...
ادم: طيب.. انا بس عشان جامعتك..
جاكي: لا انا هعرف اظبط الدنيا..
ادم: تمام.. انا هشوفلك شغل كويس وكمان مرتبه يكون حلو..
جاكي: انا مش عارفه اقولك اي.. حقيقي انا لو عندي اخ مش هيعمل معايا كدا..
ادم: عيب.. متقوليش كدا... يلا هسيبك ترتاحي دلوقتي.. والصبح هعدي عليكي ونروح الجامعه مع بعض...
سابني ومشي.. وانا بدات انقل هدومي وحاجاتي.. وحقيقي الشقه كانت كبيره جدا واجمل مما كنت اتصور... ومش عارفه اشكر ربنا ازاي.. بينقذني من كل مشكله بقع فيها..

خلصت وطلعت اشوف حاجه اكلها عشان ماكلتش من الصبح..
دخلت المطبخ وفتحت التلاجه ولقيت حاجات كتير جدا... ابتسمت وطلعت الاكل وقعدت اكل...
عدا شوية وقت وفتحت فوني لقيت جاك متصل كتير قووي.. بس طنشت ورنيت ع محمد... مردش.. فضلت ارن كتير وبردو مردش....
زهقت وقومت اتطمنت ع بابا ونمت....
_____

فيروز: مردتش عليك!
جاك: ردت.. بس مرضتش تقولي مكانها..
فيروز: يعني كدا لا هي ولا محمد موجودين..
جاك: انا هفك الجبس بكرا واروحلها الجامعه..
فيروز: مش هترضى تكلمك..
جاك: انا هتصرف..
سابها ودخل نام
_______

نور: انتي بتقولي اي!
هند: زي مابقولك كدا..
سما: طب مشت ليه ياجماعه..
هند: مش حابه تقعد..
سما: طب مش تستنى لحد مافيروز ترجع..
هند: معرفش بقاا.. انا طالعه انام..
_____

الصبح طلع.. قومت عملت الفطار ودخلت اكلت مع بابا وبعدين لبست وادم رن عليا فنزلتله...

جاكي: صباح الخير..
ادم: صباح النور... اي الحلاوه دي ع الصبح..
جاكي: يعم انت رايق والله..
ادم: يعم فك.. الدنيا سهله والله..
طلع وروحنا الجامعه وقضينا اليوم مع بعض وخلصنا محاضرات وطلعت لقيت جاك واقف وراكن ع العربيه وبيلعب ف الفون...
حاولت اتدارى عشان ميشوفنيش...

جاك: جاكي..
وقفت ومبصتلوش...
جاك: مش سامعاني يعني...

عديت الطريق وروحتله...
جاكي: نعم!
جاك: اركبي..
جاكي: وانا اركب معاك بامارة اي..
جاك: عايز اتكلم معاكي شويه..
جاكي: مفيش كلام بينا ياجاك..
جاك: طب اديني فرصه اتكلم...
جاكي: لو سمحت انا سايبه بابا لوحده ف البيت ولازم ارجعله بسرعه..
جاك: طب ع الاقل قوليلي قاعده فين..
جاكي: لا مش هقولك..
جاك: جااكي!!... اخلصي واركبي..
جاكي: هو انت كمان بتزعق!
جاك: مش هقول اركبي تاني..
ركبت وبصتله..
جاكي: نعم!... هو اللي هيتقال ف العربيه ميتقالش بره يعني!

جاك: انتي مش شايفه البنات بتبص ازاي!
بصيت لقيت البنات مركزه معاه فعلا..
جاكي: طيب.. انجز عشان عايزه امشي..
جاك: انا اسف..
جاكي: في في حاجه تاني!
جاك: جاكي انا فعلا اسف.. لما بتعصب مبعرفش انا بقول اي...
جاكي: وانا مش مضطره استحمل اهانتك ليا عشان حضرتك متعصب..
جاك: طب حقك عليا.. خلاص..
جاكي: خلاص ياجاك انسى.. انا لازم امشي..
جاك: مش هترجعي!
جاكي: حتى لو مكنش حصل حاجه كنت همشي بردو.. كفايه كدا... وبعدين انت جيت ازاي.. وفكيت الجبس امتى..
جاك: النهارده.. طب قوليلي قاعده فين عشان بس ابقاا متطمن..
جاكي: اتطمن... انا تمام.. عن اذنك..

نزلت وكان ادم واقف عند العربيه مستنيني.. شاورلي..

كنت بعدي الطريق والرباط اتفك.. ميلت اربطه..

جاك: جاااكي..
ادم: حاااااسبي!!!!...

يُتبَع... 🕊

Part 40:♥🥀


*"‏فمتى اللِقاءُ وكم يطول تساؤلي
هل في الحياة بقية لأراكَ؟! ♥🥀

رفعت وشي ع صوت الاتنين لقيت عربيه فرملت ومفيش بيني وبينها خمسه سم حتى...
برقت من الصدمه...

الراجل: اي ياانسه دا.. انتي مجنونه!
ادم وجاك جم يجروا وانا ثابته مكاني..
جاك: مش تاخدي بالك!
الراجل بعصبيه: انتي عبيطه يابت انتي.. كنتي هتوديني ف داهيه..
جاك: صوتك ميعلاش... اتفضل روح عربيتك يلا...

جاك خدني ع جنب وادم جه ورانا..
جاك: هو انتي هبله!!.. في حد يربط الكوتشي ف نص الطريق!
جاكي: متزعقليش كدا..
ادم: بس خلاص.. الحمد لله انها عدت ع خير...
جاكي: يلا انا عايزه امشي..
ادم: يلا...
مشيت معاه وعداني وانا متبته ف ايده جامد من الخوف...
ركبنا العربيه وطلعنا...
ادم: ياشيخه اقسم بالله وقعتي قلبي.. هو في حد عاقل ف الدنيا يعمل كدا.. طب استني لما تركبي وبعدين اربطيه..
جاكي: معرفش بقاا.. وبعدين الطريق كان فاضي...
ادم: طب خلاص.. حصل خير.. تحبي تروحي ف حته ولا هتروحي!
جاكي: لا روحني عشان بابا لوحده..
ادم: ماشي..
وصلنا وانا طلعت اشوف بابا لقيته صاحي ع السرير...
جاكي: عامل اي ياقمر..
بابا: الحمد لله يابنتي..
جاكي: ثواني.. هغير هدومي وهجهز الاكل ع طول..
سيبته ودخلت غيرت وطلعت عملتله الاكل...
___

فيروز: عملت اي..
جاك: مرضتش ترجع..
فيروز: طب معرفتش هي فين!
جاك: معرفش..
انا اتخنقت.. يلا نرجع البيت..
فيروز: هنرجع النهارده!
جاك: ايوا انا بقيت كويس اهو.. مش محتاجين نقعد تاني..
فيروز: طب هجهزلك حاجتك...
____

خلصت واتغدينا وسيبته ينام ودخلت اذاكر.. ماهو انا كدا هسقط اجدعان...
عملت شاي وقعدت ع المكتب اذاكر...
ايوا مانا نسيت اقولكوا ان القمر دا كان مجهزلي مكتب وعليه حاجات تفيدني كمان...
اندمجت ف جو المذاكره وفضلت اذاكر كتير عشان كان فايتني كتير....
______

ف الڤيلا...

نهى: اهلا اهلا.. اهلا بابني الغالي..
فيروز: نهى!!!... مش ناقصينك خالص..
نهى: والنبي اي!...كمان انتوا اللي زعلانين!
وانتي يابطه.. بقيتي كويسه دلوقتي!
جاك بغضب: نهى!!!!...
نهى: نهى ف عينك قليل الادب.. انا امك ياحيوان...
جاك: مش امي.. عمرك ماكنتي امي.. ومتشرفش بان واحده زيك تبقى امي.. تمام..

سابها ودخل وفيروز دخلت وراه...
نور اول ماشافته طلعت تجري عليه حضنته...
نور: وحشتني اوي.. حمدلله ع السلامه..
جاك: الله يسلمك ياحبيبتي..
نور: بقيت كويس دلوقتي!
جاك: تمام.. سيبيني اطلع بس عشان تعبان...

سابها وطلع ودخل اوضتي.. لقاها فاضيه ورجعت زي الاول... دخل البلاكونه لقاها رجعت زي الاول... راح دخل اوضته وقفل ع نفسه...

جتلي مسدج ع الموبيل.. فتحت لقيته ادم...
ادم: جيجي.. بقولك...
استغربت انه قال اسمي بالطريقه دي بس تمام..
جاكي: قوول..
ادم: تحبي تخرجي بالليل!
جاكي: وبابا!!
ادم: لو نام وكنتي فاضيه تمام..
جاكي: تمام.. هشوف الدنيا فيها اي وهبلغك..
ادم: اشطا..

قفلت وجيت اكمل مذاكره بس افتكرت محمد... رنيت عليه اول مره مردش.. رنيت تاني وفتح..

جاكي: الوو.. محمد..
محمد: نعم..

صوته كان تعبان ومكسور...
جاكي: مش بترد عليا ليه!
محمد: عايزه اي ياجاكي!
جاكي: عايزه اعرف انت فين..
محمد: مش فارقه.. كله واحد..
جاكي: محمد.. الجو برد.. مينفعش تفضل ف الشارع كدا.. دا غير انك وراك جامعه ومذاكره..
محمد: تفتكري ينفع ارجع بعد اللي اتقال!
جاكي: دا بيتك.. حتى لو حصل مشاكل.. بس بردو هيفضل بيتك.... وع فكره انا مشيت..
محمد: مشيتي!.. ليه!
جاكي: كفايه عليكوا كدا.. انا عملتلكوا مشاكل كتير..
محمد: وكنتي انتي الضحيه فيها...
جاكي: وجودي كان السبب.. المهم دلوقتي ارجع لو سمحت..
محمد: لا ياجاكي.. مش هرجع...
جاكي: طب انت ف الشارع بردو!
محمد: ايوا..
جاكي: اكلت حاجه!
محمد: لا..
جاكي: ارجع يامحمد والنبي.. من امبارح وانت ف الشارع..
محمد: مش مُرحب بيا ياجاكي.. خايفه ع بناتها مني...
جاكي: لا يامحمد.. هو في اطيب من فيروز!.. هي بس زعلانه منك.. وقالت اي كلام وخلاص.. صدقني هي متقصدش..
محمد: لا تقصد.. وهي مغلطتش اصلا.. انا فعلا مش ابنها...
جاكي: طب ممكن ترجع عشان خاطري... صدقني هي قلقانه عليك قووي..
محمد: هروح اقعد عند واحد صاحبي..
جاكي: وجامعتك!
محمد: معرفش.. بس هو انتي رجعتي القاهره!
جاكي: لا.. انا لسه هنا..
محمد: هنا ازاي!.. انتي متعرفيش حاجه هنا..
جاكي: اجرت شقه وقاعده فيها انا وبابا..
محمد: اووف.. انا السبب ف كل دا..
جاكي: لا ابدا... انا كنت همشي اصلا...
محمد: يعني مش هشوفك تاني!
جاكي: كدا احسن... بس لو سمحت ارجع..
محمد: هقعد يومين عند واحد صاحبي بس وبعدين هشوف...

خلصت وقفلت معاه ورجعت اذاكر تاني... الوقت عدى عليا بسرعه وبصيت ف الفون لقيت الساعه ٩...
دخلت لقيت بابا هينام...

جاكي: انت هتنام يابابا!
بابا: ايوا نعست.. هنام شويه..
جاكي: طب نام ياحبيبي وكل حاجه جنبك اهي.. وانا هخرج شويه كدا وهرجع ع طول...
بابا: طب متأخريش وخلي بالك من نفسك..
جاكي: حاضر.. تصبح ع خير..

غطيته وطلعت لبست وبعت مسدج لادم...
وصل بالعربيه وانا نزلتله....
ادم: تحبي نخرج فين!
جاكي: اي حته..
ادم: ع فكره ماما فرحت جدا لما عرفت انك قعدتي هنا..
جاكي: محتاجه اشوفها والله.. هي عامله اي دلوقتي!
ادم: كويسه الحمد لله... المهم.. لقيتلك شغل..
جاكي: بالله!..
ادم: ايوا.. في مكتبه كبيره هنا محتاجين حد معاهم.. واظن دي شغلانه سهله ومفهاش تعب.. وكمان الوقت اللي هتقعدي فيه هناك تقدري تذاكري فيه... دا غير ان المرتب حلو جدا.. واظن دا شغل مناسب..
جاكي: جدا.. موافقه طبعا.. بس هروح امتى...
ادم: بكرا لو حابه...
جاكي: تمام.. الحمد لله.. كل حاجه بتتحل اهي.
ادم: قولتلك الدنيا سهله والله... يلا وصلنا...

دخلنا كافيه وقعدنا نتكلم ونهزر وقضينا شوية وقت
وبعدين رجعت...
طلعت غيرت ونمت....

____
تاني يوم.....

صحيت واتوضيت وصليت خرجت عملت الفطار وفطرت مع بابا ولبست ونزلت لقيت ادم مستنيني تحت...
جاكي: صباح الفل..
ادم: اخيرا نزلتي... صباح النور.. يلا..
ركبت وطلعنا...
ادم: هنخلص محاضرات ونطلع ع مكان الشغل..
جاكي: اشطا...
_____

فيروز: اطلعي نادي جاك عشان يفطر...
سما: ماشي...
هند: مش متعوده ع البيت من غير جاكي..
فيروز: وهي فين جاكي.. ماخلاص..
نور: انا مش فاهمه هي مشت ليه.. ماكانت قعدت معانا وخلاص..
فيروز: اهو عمك هييجي بكرا وهنشوف هيعمل اي..
هند: صحيح مش كان المفروض ييجي معاكوا!.. هو فين..
فيروز: لا ماهو سافر يومين كدا للشغل.. بس راجع بكرا..
نور: طب هو فين محمد!
هند: محمد خرج..
بصت لفيروز عشان تفهم...
نور: خرج فين يعني!.. دا مرجعش بقاله يومين..

ـ وانتي بتسألي عليه ليه!

بصوا لقوه جاك...
نور: اي اللي بتسألي عليه ليه!.. هو فين!
هند: محمد اتخانق هو وجاك.. عشان كدا خرج شويه..
نور: اتخانقوا ليه!
هند: شدوا مع بعض شويه... بس هيرجع يعني...
____
خلصنا محاضرات وخرجت انا وهو وروحنا مكان الشغل... كانت مكتبه كبيره قوي وشكلها حلو جدا... دخلنا واستلمت الشغل وفهمت الدنيا ماشيه ازاي...

ادم: المكان قريب من الشقه.. يعني مش هتتوهي ولا حاجه... وانا هخلص شغلي وارجع اخدك..
جاكي: اشطا.. تعبتك معايا يابرووو...
ادم: عيييب.. يلا باي...
جاكي: بااي...

هو مشي وانا قعدت ع الكرسي... فضلت قاعده شويه مبعملش حاجه وبعدين طلعت كتبي وقعدت اذاكر...

ـ لو سمحتي... ياانسه..
جاكي: نعم..
ـ كنت عايز كتاب..
جاكي: حضرتك عايزه عن اي!
انتهد وحط ايده ع خده...
ـ عن الحب..
حاولت اكتم الضحكه...
جاكي: احم.. تمام.. النوع دا موجود هنا.. اتفضل شوف حضرتك عايز اي...
بصلي شويه وبعدين دخل...
دا ماله دا... ربنا يشفي والله...
قعدت كملت...
ـ لو سمحتي..
ماهو يوم مش فايت النهارده...
جاكي: نعم..
ـ كنت عايز كتاب اسمه*
جاكي: نوعه اي دا!
ـ خيال علمي...
جاكي: تمام.. اتفضل الناحيه دي هتلاقي اللي انت عايزه..
ـ نعم!.. هو حضرتك مش هتدوري عليه!
جاكي: ليه وانت اتكسرت!
ـ نعم!.. انتي عبيطه..
جاكي: عبيطه ف عينك ماتحترم نفسك..
ـ هو انتي شغلتك اي!.. ماهو دا شغلك ياانسه..
جاكي: هو انا المفروض ادورلك!
ـ المفروض..
جاكي بقرف: معلش.. متأخذنيش اصلي لسه جديده.. عن اذنك...
سيبته ودخلت ادور.. ماهي ناقصه مرار هي... دورت كتير لحد مالقيته...
جاكي: اتفضل..
ـ حضرتك انتي لو سافرتي تجيبيه كان زمانك جيتي..
جاكي: انت كمان مش عاجبك...
ـ اشش.. بس خلاص.. انتي هتتخانقي...
سابني وراح قعد ع الترابيزه اللي قدامي يقرا فيه..
وانا قعدت اكمل...
______

جاك: انا رايح الشغل..
فيروز: طب دور ع محمد..
جاك: هو بعد اللي انتي قولتيه دا تفتكري هيرجع تاني!
فيروز: جاك.. دورلي عليه وهاته..
جاك: هحاول.. سلام...
_____

ـ بس.. بس..
رفعت وشي لقيته الاخ اللي قاعد قدامي.. بيبسبس ليه الاهبل دا...
ـ هو انتي اسمك ايه!
جاكي بقرف: وبتسال ليه!
ـ لا واضح انك جديده فعلا...مفهاش حاجه لما اعرف اللي بتشتغل هنا اسمها اي..
جاكي: جاكي.. اسمي جاكي..
ـ جاكي!..
جاكي: مش عاجبك كمان!!!
ـ ياست بالراحة... انا قولت حاجه.. عاجبني ياست..
جاكي: طب ركز ف اللي انت فيه بقاا..

ماهو يوم باين اصلا...
ـ لو سمحتي..
جاكي: هو احنا مش هنخل......
معلش اسفه فكرتك حد تاني...

بصيت عليه لقيته بيبصلي ويضحك.. اما انت عيل مهزء صحيح...
ـ لا تمام... كنت عايز....
______
جاك: في مواعيد اي النهارده!
السكرتيره: في خمسه يافندم...وكلهم ورا بعض..
جاك: طب تمام.. جهزيلي كل حاجه..
السكرتيره: يعني ابلغهم ان المعاد مش هيتلغي يافندم!
جاك: ايوا...
السكرتيره: تمام.. عن اذنك يافندم...
هي خرجت ومالك دخل...
مالك: اي ياعم الغيبه دي... فينك كدا..
جاك: كنت عامل حادثه..
مالك: نعم!
جاك: اللي سمعته..
مالك: ومقولتليش ليه!
جاك: سيبك انا كويس... المهم.. خد الفايل دا وكمل انت...
مالك: ماشي.. بس فهمني في اي!
جاك: مش دلوقتي... المهم عايزك تعرفلي محمد فين..
مالك: يعني اي..
جاك: يعني هو مش ف البيت ومنعرفش راح فين.. حاول تعرفلي مكانه...
مالك: تمام.. اعتبره حصل...
___

ـ انسه..
جاكي بزهق: يانعم...
بصيت لقيته ادم..
ادم: اي دا..
جاكي: فكرتك حد تاني..
ادم: انتي بتعاملي الناس كدا!
جاكي: ياسطا رخمين قووي.. وانا مرارتي واحده...
ادم: طب يلا ياختي.. يلا دانتي ايامك عسل...
لميت حاجتي ومشيت معاه ورجعت البيت..
لقيت بابا نايم.. حضرتله الغدا ودخلت اتوضيت وصليت وشويه وفوني رن...
جاكي: الو..
محمد بخوف: جاكي.. جاكي.. تعالي.. تعالي بسرعه..
جاكي: في اي.. اي اللي حصل..
محمد: ا انا خايف.. انتي فين..
جاكي: اسمعني.. تعالى ع العنوان دا فورا.. دي الشقه اللي قاعده فيها..
محمد: ماشي ماشي يلا..
جاكي: العنوان هو**
لقيته قفل وانا قلقت عليه جامد.. فضلت رايحه جايه ف الشقه وانا قلقانه لحد ماالباب خبط.. روحت فتحت بسرعه واول ماشافني ساب دموعه تنزل...
جاكي: ادخل..
دخل وقفلت الباب... قعدته وجبتله مايه... مكنش عارف يشرب وجسمه بيترعش...
جاكي: قولي في اي...
بصلي بكسره..
محمد: محتاج حضن بس... وهمشي ع طول والله.. انا.. انا بس خايف..
جاكي: بس بس. اهدي..
حضنته وبصيت لقيته تبت فيا جامد وعمال يعيط...
جاكي: اششش.. بس خلاص... اهدى..
فضل كدا شويه وبعدين حسيت ان ايده بتقع..
بعدته كدا لقيته مبيتحركش...
فضلت افوق فيه وبردو مش بيصحى... فضلت افوقه كتير بس جسمه كان سخن قوي.. اتصلت ع الدكتور وجه ع طول...
___

هند: محمد مرجعش بردو!
فيروز: لسه..
هند: انا بدات اقلق..
فيروز: ربنا يجيب العواقب سليمه...
سما: انا مش عارفه الدنيا اتلغبطت كدا ليه...
هند: كل المصايب جايه ورا بعض.. ربنا يستر..
____

جاكي: ها يادكتور..
الدكتور: متقلقيش.. دا هبوط بس... هو محتاج ياكل ويرتاح شويه عشان شكله مُرهَق...
جاكي: طب والسخونه دي..
الدكتور: لا هو عنده برد جامد شويه... اعمليله كمادات واديله الدوا دا وهيبقى كويس...
جاكي: طب شكرا يادكتور...

مشيت الدكتور ونزلت جبت الدوا و اشتريتله بيجامه تقيله وطلعت...
دخلت لقيته رايح ف النوم خالص ومش حاسس بحاجه..
جبت الكمادات وقعدت اعمله وجسمه كان مولع اصلا...
قعد شويه وبعدين الحراره نزلت.. بس كان عمال يكح.. وبردان...
حاولت اصحيه عشان يغير هدومه المتبهدله دي ويلبس تقيل بس مصحيش..
ساعدته وقلعتله التيشرت ولبسته البيجامه... بس مقدرتش البسه البنطلون... ماهو انا هستحمل لحد امتى اجدعان...
خلاص مش لازم.. مش مهم البنطلون... بس حرام دا بردان... فضلت ف الصراع دا لحد مااتشجعت وحاولت اقلعه ووديت وشي بعيد ولبسته البنطلون واخيرا خلصت....
اوووف... اخيرا...
غطيته وقفلت النور وطلعت اشوف بابا لقيته صحي..
جاكي: اي دا انت صحيت.... ثواني وهجيبلك الاكل...
طلعت جبتله الاكل واكلته...
بابا: اخرتي كدا ليه!
جاكي: مانا كنت ف الشغل...
بابا: شغل اي..
جاكي: ااه مانا نسيت اقولك.. انا دورت ع شغل ولقيت..
بابا: يابنتي انتي مش حمل مرمطه... ركزي ف مذاكرتك..
جاكي: وهنصرف منين!
بابا: انا مش فاهم انتي اصريتي ليه اننا نمشي..
جاكي: مينفعش يابابا.. دا مش بيتنا.. عيب نفضل عاله ع الناس كدا... المهم سيبك انت.. اعملك حاجه تشربها!
بابا: لا لا مش عايز... شغليلي بس التليفزيون دا عشان زهقت..
جاكي: حاضر...
فتحتله التليفزيون وطلعت...
روحت عند محمد لقيته لسه نايم.. شوفت جسمه بس الحراره كانت نزلت الحمد لله... فضلت قاعده جنبه وبلعب ف الفون لحد مايصحى...
عدا وقت كتير وبردو مصحيش... ماهو بقاله يومين مش نايم...
سيبته وروحت اوضتي وقعدت اذاكر...
فضلت كدا لحد الساعه ١٢.. وبعدين سمعت صوت حد بره.. طلعت لقيته صحي..
جاكي: اخيرا صحيت!
محمد: معلش انا اسف.. همشي ع طول..
جاكي: لا لا مش قصدي خالص... انا بس كنت قلقانه عليك عشان كنت تعبان...

بص ع هدومه وبصلي باستغراب...
محمد: هو اي دا..
جاكي: ااه مانت هدومك كانت خفيفه وانت بردت فنزلت اشتريتلك دي...
محمد: متشكر.. هدخل اغير وامشي...
جاكي: تمشي فين ياعم بس اقعد كدا...
قولي بقاا كنت فين كل دا
محمد: ف داهيه..
جاكي: ياساتر... ليه كدا.
محمد: كنت ف الشارع ياجاكي..
جاكي: طب وليه.. مانت عندك بيتك موجود..
محمد: هو انا مش قادر اجيب شقه واقعد فيها يعني!.. مانا معايا فلوس.. انا بس مش حابب اروح ف حته..
جاكي: طب استنى اشوف السخونه..
حطيت ايدي ع وشه لقيت السخونه بترجع تاني...
جاكي: السخونه بترجع تاني اهي.. استنى اجيبلك الدوا...
دخلت جيبته وطلعت...
جاكي: اتفضل...
محمد: مش عايز..
جاكي: اي اللي مش عايز..
محمد: مش عايز ياست.. سيبيني بس انا عايز امشي..
جاكي بعصبيه: امسك يامحمد
محمد: احم.. هاتي...
جاكي: بص ياسطا.. اللي حصلكوا دا انا السبب فيه.. ولازم اصلحه.. ودلوقتي انا خرجت من حياتكوا وانت لازم ترجع... ع الاقل عشان الجامعه...
محمد: هرجع.. بس مش دلوقتي..
جاكي: طب استنى هجيبلك تاكل..
محمد: لا لا مش عايز..
جاكي: اسكت يامحمد..
سيبته ودخلت جيبت الاكل..
جاكي: ماتاكل..
محمد: مش عايز اكل ياست..
جاكي: ااه بتعمل كدا عشان اأكلك انا يعني..
محمد بضحك: ياست لا والله.. بس انا مش جعان..
جاكي: احنا هنهزر!.. انت بقالك يومين مكلتش... اتفضل يلا كل...
_____
فيروز: هيكون راح فين يعني..
جاك: معرفش.. انا حاولت وملقيتهوش..
هند: يمكن عمل حاجه ف نفسه...
فيروز: ياشيخه اي اللي بتقوليه دا.. بعد الشر.. ان شاء الله هيرجع بخير...
جاك: قومي نامي ياهند عندك جامعه.. وانتي قومي يافيروز كفايه كدا..
فيروز: مش هيجيلي نوم وهو بره..
جاك: قومي يافيروز وهو هيرجع.. وبعدين عمي فين.. مش المفروض رجع النهارده!..
فيروز: رجع بس كان تعبان فنام ع طول ومحدش قاله حاجه...
جاك: خلاص لما يصحى هو هيتصرف...
_____
جاكي: كمل..
محمد: كلت والله.. تمام.
جاكي: تمام.. اعملك حاجه تشربها!...
محمد: انا عايز حاجه للصداع...
جاكي: تمام هجيبلك برشام واعملك قهوه...
دخلت جبتله البرشام وعملتله القهوه وطلعت..
جاكي: اتفضل..

محمد: شكرا...
جاكي: اشرب القهوه وادخل نام عشان انت تعبان..
محمد: انام فين.. انا همشي..
جاكي: تمشي اي الساعه واحده...
محمد: هتخطف يعني!
جاكي: لا بس انت تعبان والجو برد قوي...
محمد: متشغليش بالك...
جاكي: ولااا متصدعنيش بقااا... خلص القهوه وادخل نام..
خلص ودخل نام وانا دخلت اوضتي ونمت.....
______
تاني يوم...

صحيت اتوضيت وصليت وخرجت.. لقيت محمد خارج من اوضته..
جاكي: صباح الخير..
محمد: صباح النور..
جاكي: وريني الحراره كدا... لا تمام نزلت اهي... ثواني وهعمل الفطار..
محمد: لا فطار اي.. انا نازل..
جاكي: افطر وبعدين روح ع البيت..
محمد: قولتلك مش هروح دلوقتي...
فجأه الباب خبط...
بصيت من الباب..

جاكي بصدمه: محمد دا باباك!!!!!!

يُتبَع... 🕊

‏مُريحه فكرة ان ربنا عارفك من جوا 🫀❤️❤️❤️❤️❤️❤️❤️❤️❤️❤️❤️❤️❤️❤️❤️".

" يُؤْتِيكُمْ خَيْرًا مِّمَّا أُخِذَ مِنكُمْ" .🤍

اللى يمشيلك خطوه امشيله خطوه زيها اصل المبالغه بتعوجهم .

"‏ صاحبي اللى شالني في كُل مرة وقِعت ، شُكرًا لانك كُل مرة سِمِعت.