سامعه الصوت
صوت كسر اعظام هذا وكَلبي حاير
سامعه الصوت
بس كَبل بسمار جان وهسه حــافر

نشلع كَلبي مَرِتين**ويالزجيه اوي حسين
سامعه الصوت
¯¯¯¯¯ ¯¯¯¯¯ ¯¯¯¯¯ ¯¯¯¯¯ ¯¯¯¯¯

بهيده ابجي.. المن احجي .. صوت اخذ روحي وعلي لمن سمعته .
كَبل عصرات… هسه سحكات… صوت جن ضلع انكسر هذا عرفته .

اخ من هاي الحوافر شيبتني
شما تدوس ابهيده اصيحن دولبتني
بصوت اه من امي طالع ذكرتني
داست بصدر الحسين ودوهنتني


بهيده ياخيل

هذا اخوي شبيجن بهيده على صدره
بهيده ياخيل
شو حوافرجن غـــدة من دمه حمره
شبجين تطلبني دين
نشلع كَلبي مَرتين
سامعه الصوت
*
شفت الحسين… طاح مرتين… اني ع التل وندهلي خلص الحــيل
بحسره اناديه ..حسين احاجيه… خويه هم روحك تره وصلنك الخيل


سحكن بصدر الحسين وكلها تشهد
واني انادي خيولكم سحكت محمد .
ردت واحد بي رحم بس مامش احد
جن اسمعه احســــين يازينب تنهد


والله حيره

بصدر اخوي احسين جم حافر لكيته

والله حيره

لو ابو فــــاضل عدل يفـــزع نخيته

وين ادير الوجه وين
نشلع كَلبي مَرتين

****

شفت واحد… فوكه كاعد… برجله داس حسين وكَبالي يرفسه
بعيني شفته… حز ركبته… واني انادي هذا اخونه لا تلمسه

يحز ركبته وتارسـه وجهه ابتسامه
دنت نفسه وباك من راسه العمامه
وهوه يذبح بيــه شافــنه اليتــامه
وجنه راس حسين ينــده بالسلامه


جيت اركض

بس احس بالراس جان يكلي ارجعي

جيت اركض

السبكَني بطيحته من اعيوني دمعي

انده بصوتي الحزين
نشلع كَلبي مَرتين
سامعه الصوت


واني ع التل ..كَلبي يسأل… اشلون اخلص حسين ورجع يم خيامه
المن امشي… رعب كلشي… شفت باكو محبسه وسلبو عمـــامه

للخيول احــسين صدره صار ملعب
واني ما اكدر ليمه شــلون اكرب
الموتتني بعيني شفته من تسـلب
شارب حسين وعلي بالدم تخضب

العذبتني
واحـــد لواحد شــمر ياناس راســـه
العذبتني
دم اكو بموضع كَبل بي جدي باســــه

بس انادي بالونين
نشلع كَلبي مَرتين
سامعه الصوت


هواي الجروح… التاخذ الروح ...وانتظر ليلي يحل خاطر اروحن
اجمع اضلوع… واحجي بدموع… غادي الم اوصاله ويم صدره انوحن

روحي اخلصها ردت دمعه على دمعه
اثر حافر هذا باقي فوك ظلعه
هذا جف احسين بس مكطوع اصبعه
وفوك صدره لجم رجل متروكه طبعه

يا زمن لا

هذا اخوي شلون الم جسمه باديــه

يا زمن لا

واني راح اطلع تره باجر سبيـــه

هاي قصتي ويالسنين
نشلع كَلبي مَرتين
سامعه الصوت
*

#خالد عبد الساده البديري

قصيدة ليلة العاشر من محرم
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

هلي الطيبين واخواني
واحد ودع الثاني
طفل يبچي اعله ابوه ويحظنه ويشمه
يحرگت كل ولد لمن يودع امه

/////////////////////////////////////

يليل العاشر بهيده
الظلام ابكربله انريده
لأن موت الفجر
تعال وشوف لمتنه
ولو مو هاي ديرتنه
عليك الله الصبر

اريد اخواني اگابلهم واحاجيهم
اريد الليل يطول خايفه اعليهم
يعاشر من محرم لا تأذيهم
هلي الغاليين من فدوه لمعانيهم

شفتهم وانتهيت أني
واحد ودع الثاني

،،،،،،،،،،،،،،،،،،،،،،،،،،،،،،

ابو اليمه الشفت نوره
ترتله ابكربله السوره
عليه هيبة علي

رحت يمه وبرد گلبي
يحفظك يلاخو ربي
اجيتك يل الولي

زينب گلي خويه العاشر العاشر
تدرين اليصير من الصبح باچر
انتي بلا ولي ومكسورة الخاطر
وانه المنذبح ويدوسني الحافر

السيوف اتغير الواني
واحد ودع الثاني

،،،،،،،،،،،،،،،،،،،،،،،،،،،،،،،،،،،

بناتي ابكربله اوصيتي
وانه المعروفه تاليتي
صريع وعل الثرى

رقيه وسكنه ضميهن
خاف النار تچويهن
يقائد مو مره

اذا شفتيني وحدي ابين عدواني
وفتح گلبي السهم والرمح اذاني
سلمي اعله النحر لو شمر خلاني
مرمي اعله الوجه وبسيفه ذبحاني

واصيح اعله الاخت تاني
واحد ودع الثاني

،،،،،،،،،،،،،،،،،،،،،،،،،،،،،،،،

الاكبر گاعد وليلى
بخيمتهم تلوليله
وعليه هلت دمع

رمله الحاظنه القاسم
وتگله يلولد سالم
واضويلك شمع

بنات حسين كلهن يم ابو الغيره
مثل رجعة حمام مفارگ الديره
دارن يم ابوهن دورت الطيرة
اذا محروگ عشها وتشعر بحيرة

يكسرة روحي واغصاني
واحد ودع الثاني


،،،،،،،،،،،،،،،،،،،،،،،،،،،،،

كفيلي ورايته اوجوده
وبعدهه چفوفه موجوده
روتني بلا نهر

اخوي الما رضه بعيله
يضوي خيامنه الليله
لان ضاوي الگمر

يبعد اختك يكافل لا تخليني
جبتني الكربله وانته ال توديني
من هسه الظلام امچودر ابعيني
باچر والله باچر تنتهي سنيني


اخوي وكون دفاني
واحد ودع الثاني

كلمات خادم الحسين ✍️✍️
#رعد الفريجي
1442 للهجرة

اللهي ماذنبُ طفلي ينذبح بديه
اللهي حَنت قلوب الامهات اليه
انا الغريب انا الوحيد انا الحُسين انا الحُسين


.
.
.

فاللهُ خيرٌ حافظٍ تكفيني هاي الايه
يارب رحمتك عالگلب لمن تطيح الرايه
مو مشكلة راسي برمح ولاماتهم منايه
بس صعبه عندي ياللهي اعيالي بالسبايه

اللهي يامن اليه ملجأ العبادِ
اللهي هون عليه بعينك اعتقادي
انا الغريب انا الوحيد انا الحُسين انا الحُسين

.
.
.


يارب حبيبي دمعتي تچويني فوگ اخدودي
عطشان تعبني العطش جاف ويبسلي عودي
انا الحُسين وللاسف ماظلي من اجنودي
رجليه طبن بالنهر وعيني تصد الجودي

اللهي حسبي الله شگد صحت يربي
اللهي تقطعت مني نياطي گلبي
انا الغريب انا الوحيد انا الحُسين انا الحُسين

.
.
.

ظليت احوم اعله النهر وايدي على خاصرتي
محتار ارد ابلا گمر بالله شگولن لختي
عباس واعدنه يرد منتظره كل عائلتي
والساني الوكه من العطش ومفطره كل شفتي

اللهي راح ابو فاضل بس كسرلي ضهري
اللهي صبري اعله افگد الگمر يوجع صبري
انا الغريب انا الوحيد انا الحُسين انا الحُسين

.
.
.

لمن طلعت المعركة الدخان عامي عيني
لنه يجيني الجعفي ويطگني على جبيني
لمنن هويت من المهر صوت العقيلة حسيني
واختلفت بالانقباض اشمالي عن ايميني

اللهي طرفاً خفياً داير العيالي
اللهي محد يجي غير العقيله ابالي
انا الغريب انا الوحيد انا الحُسين انا الحُسين

.
.
.

عشت اعله حالة من النزف گوه ادير الناظر
الهج باسمك سيدي وبحلگي اجاني الحافر
الاذاني الاكثر بالسحگ منهم المهر العاشر
اعمه ويجيني بقوته والمهر هذا كاسر

اللهي قد رشح للموت كل جيبني
اللهي شمسوي والحاجب نزل لعيني
انا الغريب انا الوحيد انا الحُسين انا الحُسين

.
.
.


خمسة فرق من كل جهه اتحاوطو عليه
هذا كسرلي الترقوه هذا گطع اديه
هذا رفسني ابرگبتي هذا يجر رجليه
هذا گعد فوگ الصدر ابسيفه يطبر بيه

اللهي وليه عليه صارت المعاره
اللهي ذبحوني بس جسمي شبع حجاره
انا الغريب انا الوحيد انا الحُسين انا الحُسين


#للشاعر محمد الظالمي

تانيـــني لحضات لا تـــسرج الخــــيل
عطر الورد مات يمــــــــسافر بلـــيل
يابعـد عـيني البيه يكفـيني
------ يمسافر بلــــيل -----------------**
1= أنـــه بــتــك * ونته ماخـــذ كل بناتك
ساعه ردتك * بخاطري كلمه وحياتك
ماشي شفتك * خل أشم ريحة عــباتك
هيه هاي أخر ثواني ساعه وتموت الأمـــاني
يلي عـايفني أعــاني شلـون لـــــو محد أجاني
ونته تدريــني البيه يكفـــيني
**** يمسافر بليل ************
2= كلمه وحده * بويه وتوكـــل عله الله
والله شــده * كلمه بس بعـــمري كله
لـو تعـــده * طيفــك بعـــيني شكله
نفرض شتاكيت الأمـــي شلون حالي وماهي يمي
لو رقـــيه تنادي بسمي لو فرض يذكـــرني عمي
الفركه تاذيني البيه يكفيني
**** يمسافر بليل **************




3= الله يستر * راح أضل باجر وحيده
نار تسعر * والحـزن حط أيدي بيده
بيك أفكر * ونــــته بديار البعيده
جــن رجعـــتك مستحيله وسفرتك جـــنهه طويله
يجرح أعـــتاب العليله بويه هاي شلـــــون ليله
ضاعت سنيني البيه يكفــــيني
************ يمسافر بليل ***********
4= لــو بديه * جان أشد كلبي بضعونك
بس أذيه * عـــمري يالرايح بدونك
كل مسيه * أحلم بشوفت عـــيونك
أنه جـــم حسين عــدي حته تمشي وأبقه وحدي
أنــته أبوي وأنته ودي ما أعوفك وحــك جدي
لا تخليــــــني البيه يكفــيني
******** يمسافر بليل **************
5= وحشه دارك * ويــن عــايفهه بسفرتك
أه يــــنارك * لمــــن أدخلهه حجرتك
بنــــتضارك * أبقه لــو أحسب خسرتك
جـنهه ليلـتـنه الأخــيره شراح أكلك والله حيره
روحي بــشواكك أسيره والكلـــب حدد مصيره
لا تـــبجيني البيه يكفيـــني
********* يمسافــــر بليل ***********
خادم العتره الطاهره عبد الجليل علي المالكي

الـ يلطم ويكتب قصيدة
كون ماكو چفوف بيده
نلطم ونكتب بـ دين ؟ * زحمه من ام البنين ؟
ــــــــــــــــــــــــــــــ
الينوي يكتبلك قصيده وعنده فكره ومستعد
ياخد من الجـربه ورقه و حبر من ماي الورد
بلا . قلم يحفظها گلبه وينوي ما عنده زنــد
هيچ يالله تصير توجع وامك توفـقه اليرد

هيچ أمك ما تملهـا
من ولادة مستهلها
القافيه الما بيها آنين * زحمه من ام البنين
ــــــــــــــــــــــــــــــ
لازم اليكتبها شاعر بالضوه البيـك انخسف
كون يحچي بماي وجهه لحد ما يشعر نشف
لازم الــ يقراها شايف ايد أخيه بلايه چــف
كون فاگد اخو و شايل گلب گد . وادي النجف

كون يترك حچيه بصمه
بليل سابع تحضـــر أمه
كون يحچي بجرحه زين * زحمه من ام البنين
ــــــــــــــــــــــــــــــ
مو فقط شاعرها حته اليلطم اعليك ويدگ
ايخلي اديك إگبال عينه وينسى روحه من العشگ
كون الاسهام الاجتك تشبع ابگلبه رشگ
كون حاله يصير عابس ثوبه بالمجلس يشگ

وباللطم ينكسر ظهره
هيچ يالله يوافي ذره
يعيش بالعاشه الحسين * زحمه من ام البنين
ــــــــــــــــــــــــــــــ
ليل سابع كون نعطش حته لو يمنه النهــر
وشكو اطفال الليله عدنه تعطش وتشبع سهر
كون لجل الجره بزينب نترس المجلس قهر
هيچ يالله نوفي گطره من وفاء أم الگـمر

اليبچي كون يموت برضه
حـته أمه الليلــه ترضـه
بيها . بس خل . يستعين * زحمه من ام البنين
ــــــــــــــــــــــــــــــ
و اليـوزع ماي فشـله إلمــن يـوزع بعـد ؟
الترس جربه وطاح چفه لهسه گلبه ما برد
عله الروس ابچفنه نلطم كون نلطمها بعمد
عيون عدنه نشوف بيها وعينه بيها الدم جمد

إبذّني كون اعليه قابل
بجاه أمـك يابو فاضـل
مقصره عيني وصلفه عين * زحمه من ام البنين
ــــــــــــــــــــــــــــــ
هيچ وين الله واموتن كون وانه ابمجلسك
ألفظ أنفاسي الأخيره و أختنگ و اتنفسك
يوم سابع يوم غـيره من يهــل أتحسـسك
راح اذب اچفوفي والطم حته زندي ايلامسك

هيچ يالله ويـاك أوفّي
استحي ألطم بيدي چفّي
منكسرلك ضلعي زين * زحمه من ام البنين
ــــــــــــــــــــــــــــــ

مهدي التقي

ما شربت مـاي گالت بعـدين
أي واويلاه عطشان حسـين
ـــــــــــــــــــــ••ـــــــــــــــــــــ

جابـو مــاي بـس مـــو مـــاي
چـــن جـابــــولها الجـــنه
صـاحــت شـربــو وانطــوني
وخـلــو الوالـــــدي مـنـه

شوفولي حسـين وگولو عنـد بنيتك طـاست مــاي
صح هوه شوي العندي بس وي دمعي يصير هواي
گلــولـه المــاي البــارد يحــتر چــي مــا يمه فـياي
ومــا تشـرب گبــلك حلفــت هيــج معلمها الوفـاي

يمها الاطفـال ناحـو صـوبين
أي واويلاه عطشـان حسـين
ـــــــــــــــــــــ••ـــــــــــــــــــــ

كلمات الشاعر .. [ علي الابراهيمي ]

رايح مشي للأهواه
هذا الدرب يامحلاه
بيتي قفلته الله وياه
متعني ازور الغالي

يم حبيب الروح گاصد بيرغي يرف بسماي
جدمي لو يتعب احسه هم اعوفنه وراي
وانه امشي چني احسن چف الحسين بگفاي
ارتوي من الفظ اسمه انه مايرويني ماي
هوه الصراط المذكور
درب المشي من انزور
هذا الواء المنشور
لمن يرف يحلالي

هاالمواكب والخدامه ماتحس دربك بعيد
واحد يحيك واگف واحد يخدمك يريد
جنن العالم بأسره حب الحسين الشهيد
هله باالزاير اشوفه هوه هذا اجمل نشيد
جنه ونعم بيه انواع
سفره اصبحت كل الگاع
كل رايه تنعد اشراع
بيه اعقدت امالي

سفره صارت هل الشوراع اطلب اشتتمنه غاد
البيه مرض مستعصي صارو باالمشي يوصفوله زاد
لكربله من البصره طلعت قطعه وحده من السواد
انته كل موكب تطبله تلگه بيه باب المراد
تسوه العمر هل الخطوات
كل موكب البيه انبات
مقضيه عنده الحاجات
بهذا الدرب هنيالي

خدمه ابد ماكو مثلها لو تفر كل الوجود
شما كثر دوي الزياره النعمه والخدمه تزود
عل الحدود انتاني صرنه الجاي من بره الحدود
نشيله بعيون الضيافه بخدمته لحد مايعود
كلمن اجانه من بعيد
نتسابگ نخدمه نريد
چن شوفته هلال العيد
ننظرله وجهه يلالي
**
اربعين حسين صارت سالفه لكل الامم
بعد من عدها وتبطل لا تسولف عل الكرم
فرصه هاي الخدمه والله خاسر المنهه انحرم
چن علم رهمت علينه بيد ابو فاضل رهم
ماكو احله من هل الايام
تگضيها وي الخدام
حته الهوه شد احزام
هم يتجه للوالي

الشاعر : سعد العبودي

م̷ـــِْن تجي المشاية… راية تسبگ راية
للحبيب الغالي…… يعني  وحدة الغاية
……………………………

خل يجي نيوتن يشاهد هل قضية
حتى يبدي أيعيد فهم الجاذبية
هنانة قطب الرحة ومحور للبرية
راح يلگاهة القوانين الذكية

م̷ـــِْن يشوف انصارك… وهيكلة زوارك
يبقة حاير بيهم…… بالرقم يتبارك
……………………………………

الما مشى لحسين مو واظح طريقة
وبالبشر تلگة ولا واحد يطيقة
خلي كل واحد بعد يعرف صديقة
الدنية ݘذبة وبس الحسين الحقيقة

موسم اهل الغيرة… ديرة تسبگ ديرة
الما قرة عنوانك… ماعرف تفسيرة
……………………………

كل جدم باجر يبو اليمة مشالك
راح يدخل جنة الله م̷ـــِْن خلالك
تهيأت مشاية تتعنة رجالك
يالجمال الجنة ذرة يم جمالك

ياجمال اعيونك… حگهم يحبونك
حگة عابس والله… م̷ـــِْن صرخ مجنونك
……………………………………

العالمك  باجر تجي كل العوالم
بين مشاي اليگصدك بين خادم
الك جم زاير يجيك بشوگة هايم
بأربعينك ماندور  جــو  ملائم

نمشي بالحر جينة… يا برد ياذينة
ماكو شي يمنعنة… ولا خطر يلفينة
……………………………
نزرع دروبك خيم ساعة عزائك
الدنية كلهة تصير باجر كربلائك
ماكو باجر عاطفة أتحد كبريائك
الگاع گاعك والسماء ايظأ سمائك

بصحنك الوفاية… أية تلو الأية
تنجمع زوارك….. باللطم وقراية
……………………………………
تمت
الْحٍمَدٍ للـّہ
✍خادمكم… حسين حمدان الدلفي

في حق السيده زينب. ع


يالرايحين الكربله ابعث سلام وياكم
لمن تطبون الصحن عباس يتلكاكم
من مجلسك انوي وزور واقره زيارت عاشور
عباس يتلكاكم
___________
ابابه اوكف واقره بحسره الزياره
وانثر ادموع الخذته عله المناره
كله زينب عاودت تسئل اخباره
من يمر طاريه كلبي تطفي ناره
من تمشي اكصد للكمر وياك اخذ دمعاتي
وسولفله همي وغربتي ومن الكلب حسراتي
لمن تطب من الباب خل دمع عينك سجاب
عباس يتلكاكم
_____________
وكبل ما تمشيله الك عندي وصيه
طوف كبر الفاركاني ابن الزجيه
كله مشتاكه. نرد. نكعد. سويه
وارد اشمه واحضنه ما بين اديه
لون يا زاير رحت اوصيك اخبره بحالي
والله مشتاكه الكلب لحسين اخوي الغالي
بعيوني صورت ذكراه. ابن امي لا ماانساه
عباس يتلكاكم
____________
عله الرايه. وجربته انه سوالي
وكله زينب ما نست دوم عل بالي
عشت وحدي حايره بعدك يوالي
راح ذاك الخدر مني وكل دلالي
من توكف اباب الصحن عاين وصد الرايه
اتلوك الك يابو الفظل بسمك تره مسمايه
هاك اخذ وياك اعتاب بالغربه دلالي انصاب
عباس يتلكاكم
_____________
اخذ دمعت عيني واكصد يم جفيلي
ودري كل حجايه انه تجرح دليلي
كله بعدك حايره ونهدم حيلي
كطع جفني النوم خبره وشال ليلي
توضه من توصل يزاير يم ضريحه
واخذ من زينب اخبرك هل نصيحه
شما تمر بالغربه سنين ماينسي مصاب حسين
عباس يتلكاكم
_____________
عني خبره وكله زينب ما تنام
ويه زوار التجي ابعث سلام
بكلبي ضلت حركه من غربت الشام
بالخرابه تلوعت هاي اليتام
انه. كل. زاير يجي استقبله ملهوفه
واشم بي ريحت هلي ولهل سبب ما عوفه
تربي عيوني عل الباب بلجن تجيني الحباب
عباي يتلكاكم
_____________
للشاعر. رحيم الصالحي

مَا اسْمُ هٰذي الأرضِ يَا صَحْبُ فقالوا
هٰذي كربلاءْ
هٰذي كربلاءْ

١/ما اسْمُ هٰذي الأرضِ؟ يَا أَهْلَ العزائمْ
أَسْمِعُوا الدَّهْرَ وَمَنْ في الدَّهْرِ قادِمْ
إنَّني أسألُكُمْ والقلْبُ عالِمْ
فأنا نجلُ عليٍّ وابنُ فاطِمْ!

هٰذي كربلاءْ
هٰذي كربلاءْ

٢/أيُّها المُهْرُ فما هذا الوقوفُ؟!
وعلى مَ الدَّمْعُ في الخدِّ ذروفُ؟
قال ليتَ الكونَ أعماهُ الكسوفُ
قدْ وصلنا سيِّدي..هٰذي (الطُّفُوفُ)!

هٰذي كربلاءْ
هٰذي كربلاءْ

٣/للثَّرى رائحةٌ فاحَــتْ زكِيَّهْ
وعليْــها حُمْــرةٌ تبْـــدو جَلِــيَّهْ
عَرَفَتْني وانحنتَ تُلقي التحيَّهْ
ما اسمُها؟ قالوا تُسمَّى (الغاضِريّهْ)!

هٰذي كربلاءْ
هٰذي كربلاءْ

٤/بدّل المهرَ فَلَمْ يمْضِ ارتحالا
قيلَ هٰذي (نينوى) تأبى الزوالا
أيَّ سرٍّ ضمَّنَ اللهُ التِّلالا؟
عجباً! قدْ سمَّرتْ فيها النِّعالا

هٰذي كربلاءْ
هٰذي كربلاءْ

٥/وانثنى النَّخلُ لِظَعْنِ المَكْرُماتِ
قائلاً أهلاً وسهلاً بِالأُباةِ
أَيُّها السّائلُ عنْ هٰذي الفلاةِ
إنَّها تُدعى هُنا (شاطي الفراتِ)

هٰذي كربلاءْ
هٰذي كربلاءْ

٦/لستُ أدري أترابٌ أم سماءُ
جاوبتْهُ فبكى حتى الهواءُ:
يَا حُسينٌ إنَّ هٰذي (كربلاءُ)
قال: كربٌ في ثراها وبلاءُ

هٰذي كربلاءْ
هٰذي كربلاءْ

٧/فأنِيخوا الظَّعْنَ يَا أَهْلَ الوفاءِ
ها هنا قدْ خُطَّ بالموتِ قضائي
قُرْبَ ماءِ النَّهرِ لكنْ دونَ ماءِ
إنني أمضي خضيباً بالدِّماءِ

هٰذي كربلاءْ
هٰذي كربلاءْ

٨/ها هنا كلُّ رجالي يُذبحونَا
وعلى رأسِ العوالي يُرفعونا
يغمضونَ العينَ لمَّا يسمعونا
صَوتَ أطْفَالي بِخَيْلٍ يُسْحقونا

هٰذي كربلاءْ
هٰذي كربلاءْ

٩/خالياً يَا أخْتُ يأتيكِ جَوادي
إِذْ هُنا حرملةٌ يرمي فُؤادي
وهنا يَذبَحُني شمرُ العِنادِ
بعْدَها يُطحنُ صدري بالعَوادي

هٰذي كربلاءْ
هٰذي كربلاءْ

١٠/مِنْ هنا زينبُنا تمشي سبيّهْ
يَا أبَا الفضْلِ إلى شامِ أُميّهْ
وبِحبلٍ يسحَبُ الطَّاغي رقيّهْ
ويناديها: "اسكتي يَا خارجيهْ"

هٰذي كربلاءْ
هٰذي كربلاءْ!