الليلة السابعه

اخوي لكيته اعله النهر متبدي كل عطره
اخوي الما عنده اخو بيمن يشد ظهره


****************

الماعنده اخو مبين تره يتلفت وظهره خلي
ميأمن بمكفاه بعد خاف اعله غفله ينولي
مبين علي فاكد اخو كسر الظهر ما ينجلي
علسيف اتجه كمت مو ذاكه حيلي الاولي


اموت. كلما اني اصدله اوكع بعثره
اخوي. الما عنده اخو بيمن يشد ظهره

************

من شفته طايح عالنهر. كلت الكمر لا ما سلم
ذاك الوجه صاير جرح وعيونه تنزف كلهه دم
هوه يفز واني افز. كلما اكض بيدي السهم
كلما اجر بيدي السهم. اسمع صريخ من الخيم


اخاف. اني من احضنه يلجم نحره
اخوي. الما عنده اخو بيمن يشد ظهره

************

الشمس والحر والعطش بينن عله وجه التعب
مو ذاكه لونه الاولي صاير مثل لون الذهب
ولساني جمره من الضمه. مايكدر يسولف عتب
واعذرني خويه لن شفت. عالرايه من دمه كتب

قريت اعذرني يخويه جفوفي منبتره
اخوي. الما عنده اخو بيمن يشد ظهره

************

افرشت جوا صايتي ودنكت بسته بمنحره
كمت وعله وجهي طحت خدوده شفتهه معفره
الحاجب عله عيونه نزل والهامه كلهه مطبره
وهنا شفت شيب ودمه وهنا ضلوع امطشره

شلم الشكبره كمرنه صاير ازغره
اخوي. الما عنده اخو بيمن يشد ظهره

************

رديت شايب للخيم خليت عمري اعله النهر
تلكتني زينب بالدمع شافت اديه اعله الظهر
كتلهه جايب دم الج بردني بقه من الكمر
ايسي يزيب ما يرد عباس لميته وذر

يعود. ايسي يالوديعه اعظامه متكسره
اخوي. الما عنده اخو بيمن يشد ظهره

************

من هجمت خيول العده كصدت الي مستعجله
زينب من الخيمه طلعت رادت تلم العايله
صاحت يبوفاضل عدل لحك تره حسين انوله
يحتار المن يلتفت. وبعيونه ضاكت كربله

تصيح. الحك خويه داست خيلهم صدره
اخوي. الما عنده اخو بيمن يشد ظهره


علي حسين المياحي

الليلة الثامنة

قصيدة الامام القاسم ع

حني يمه جف اديه. حتى اروحن للمنيه

عرسي يصير بالطف احلى لعراس
وخلي بعرسي كلها تسولف الناس

**********************

ييمه اليوم يومي انتي فرحيلي
دمعج من اشوفه ينهدم حيلي
لدمعج انطي ظهري شلون ياويلي
ابوس ايدج ييمه بداعتي دعيلي

حتى الله يسهل امري. دون الحسين انطي نحري

ويمشي الرمح بيه رافع الراس
وخلي بعرسي كلها تسولف الناس


******************

ييمه رفعي راسج ونج اذاني
فرحي وخلي حرگه تموت عدواني
بخيمة گمر هاشم ناسنه تاني
تنطرني المنيه لعقد قراني

الحاضر الموت المسيه الغايب تضمني الزجيه

بيده للمنيه يزفني عباس
وخلي بعرسي كلها تسولف الناس


******************

قسمتي يمه هايه وعشك دلالي
اليريد الغالي لازم ينطي شي غالي
ترضين الرمح لو مني ظل خالي
وبين الرووس راسي اني موعالي

ادري ترديلي الشهامه. يلا ودعيني بسلامه

وماخذ منج امشي زود واحساس
وخلي بعرسي كلها تسولف الناس


******************

ييمه دموع ابو السجاد اذتني
وانه من انصاره هيج الزهره حسبتني
على زفتي اذا فاطمه سالتني
اكلهه وي عمامي امي زفتني

ومن تمر زفه بغيابي. يمه ذكريني بشبابي

واذكريني بصواني الشمع والياس
وخلي بعرسي كلها تسولف الناس


******************

ييمه رايد اني رضاج وي حلمي
راسج ينرفع بيه اني يا امي
هدم العرس لونه يصير من دمي
وكل عريس اخلي يسولف باسمي

الرايد الله يرفع اسمه. ترضه عنه كون امه

مثلي شلون عندي رضاج نوماس
وخلي بعرسي كلها تسولف الناس


******************

بقت بلساني جلمه بخت يابختي
واذا ضمهه احس ماتنبري ذمتي
الوكت مابي امان وانت خو شفتي
ييمه خلي بالج فدوه ويه عمتي

مدري شنهو اللي تشوفه. بس وجهه اصفر اشوفه

واحنه اعله الرماح نصير حراس
وخلي بعرسي كلها تسولف الناس


علي حسين المياحي

الليلة الثامنة

( القصيدة بحق الامام القاسم ع )

يجسام بالرؤيه جن..شفت الحسن..للطف حضر يجسام
جاب الك حنه ونشد****آنه عندي جم ولد...يجسام

************************

ارد اسولف حلمي يمه شفته والحال ابتسم
جن ابوك ويانه حاضر يوم البعرسك عِلم
جنه ملتمين كلنه والفرح مالي الخيم
وأغله ماعنده ابوفاضل جابه ونطاك العلم

يكلك...تستاهله...ظل شايله...وزادك فخر...يجسام
وجفي بالرايه عكد****آنه عندي جم ولد...يجسام

*****************

جان مالي العشك عينك مستحه بيك اشكثر
وجن هديه انطاك عمك إغله من ذاك الامر
حسين كلك عكب عمك انته حماي الخدر
ابن اخوي انت واعرفك تكرم لزينب عمر

ابن من...واستغربك...شو والدك...أكرم نهر..يجسام
عالحسن طالع بعد...آنه عندي جم ولد...يجسام

********************

هوسه هوس شفت الاكبر ابن عمك مبتسم
هذا يمه حزام ظهرك حين للحومه تهم
رسّه مابيهـ لخواله شوفه ألمن بالعزم
بي ثلت لحسين اشوفه وثلث عباس الشهم

للحسين...أسمي اريد...أم الشهيد...انطي النحر...يجسام
فدوه للواحد أحد...آنه عندي جم ولد...يجسام

********************

يمه يابستان تعبي مشيتك تنكط ورود
ابوفاضل روح يمه وكله عمي انطيني جود
وتره ابوك يكلي رمله مو أوليدي المايجود
كون اسمع خبر عنك كطع الزينب زنود

أسميك...شيخ الورد...يلا استعد...تترك أثر...يجسام
ياحمامه ويااسد...آنه عندي جم ولد...يجسام

********************

من نزل جبريل يمنه علجنح شايل امل
من طرف خيمتنه شفنه يبارك لعمك نزل
ال هاشم صيت عدهم للعرش صيته وصل
الوحي ما شايف مثلكم وانتوا اصغركم فحل

علي وياك...لو نازلت...لو هوست..ليك النظر...يجسام
أويالحسين إعله العهد...آنه عندي جم ولد

********************

يمه حلمي بشاره صار وانته هذه الي تريد
من هداك الرايه عمك يعني تكطع ليهه ايد
وهوسه الاكبر بعرسك يعني أزفنك شهيد
الحسن من باسك بنحرك يعني ينحزلك وريد

أشارات...وضحن الي...بس وعلي...جفي انعصر...يجسام
يامه هزالك مهد....آنه عندي جم ولد...يجسام


علي حسين المياحي

اليله الثامنه

قصيدة الامام القاسم ع

وياك ما خذت الگلب
وياك جاسم للحرب

رايح شبابك

******************************

من رحت جسام عني عمرك الظل اعله بالي
ما شفت شي من شبابك بعدك بعازة دلالي
جفك الينكط محنه بعده من الحنه خالي
وانه ادري الزمن ياخذ شكو انسان بكلبي غالي

الشموع طفاهه الهوه
وحسيت. ما نرجع سوه

رايح شبابك

**************************

يبني ياجسام رادت روحي تطلع وي طلعتك
جفوفي ما قبلت تحلك بيها من اني حضنتك
ما ردت سيف اني بيدك ردت بيدك كون حنتك
جانت امنيت حياتي تفرح امك يوم زفتك

ما صار. بخيمنه الفرح
واسمع. عريس انذبح

رايح شبابك

**************************

من اجاني خبر موتك يبني هد حيلي شبابك
حنتك محضرتهه امك شرد اكله اني بمصابك
شلون افهمها يجاسم صبح حنتك دم خضابك
يبست الحنه اعله ديها متانيه ترد من غيابك

عرفت. من عيني الدمع
كالت. ميموت السبع

رايح شبابك

**************************

روحي مختنكه اجيتك من شفت ما بيك جيه
يبن اخوي اني اجيتك ردت اشم ريح الخويه
هذه حكي من الخوه الجنت عايش جوه فيه
من الحسن بس انته ردتك والله مو مالت منيه

بس كوم. انطيك العمر
وخلي. يذبحني الشمر

رايح شبابك

**************************

احسب ابعمرك ثواني وجنت اشوف ابعيني تكبر
جنت اشربك ماي عيني مثل ما شربت الاكبر
اني ربيتك بديه وصعبه اعيش بدونك اكدر
يعني من اتموت ارجع محني ظهري وجدمي يعثر


ذابل. جن غصن الورد
وياي. ما جنك ترد

رايح شبابك

**************************

انه اخر واحد ابقه لا معين ولا مناصر
لا اخو يحميلي ظهري ولا ابن اخ اليناطر
وحدي اظل ابمهري افتر تجتمع ضدي العساكر
الشمر يكسرلي ظهري لجن يكسر لختي خاطر


ينحز. راسي من الكفه
وزينب. تمشي مجتفه

رايح شبابك


علي حسين المياحي

الليلة التاسعة
الامام علي الاكبر ع

ممكن يرجع طير لعشه من يودعه
بس موادع ابني الاكبر ما بي رجعه

بين كلشي من عيونه. نظرات افراك

*******************

من عيونه كلشي تفهمت وانكسر حيلي وكلبي
مدري الكبر بين علي لو من تعب كمت احبي
تعبانه جبت انه العمر. وشلون انطي تعبي
كبل السبي اني اعرفت فراك الابن هم يسبي

لوما شوفه كل صبحيه ما عيش اكدر
كل مصباح براسي وجفي يحبني الاكبر

لا ما حبهه العيشه بدونه. نظرات فراك

*******************

اكره شكو فكرة سفر. وما حب ابد طاريه
الياخذ من عيوني علي. ما عنده كل حنيه
الشمر ما عنده گلب. ما رحم كلش بيه
الطف كضاني من القهر ودموعي ما مكضيه

الطف ياخذ من عيوني غالي بغالي
انه شبيدي غير الدمعه والجف خالي

راح ابني ومتغير لونه. نظرات افراك

*******************

اتمنيت اموت ولا يجي. ميت اشوف الغالي
من سرج مهره للحرب. خوفي سرج بخيالي
بين الخيول ازاحمن جم حسبه داست بالي
شمتوقع يردلي علي يردلي المهر بس خالي

بين الخيل وزحمت بالي ضاع من ايدي
روحي تفرفح ياهو يجيبه لحضني اوليدي

الرايح الهم ميردونه. نظرات فراك

*******************

كاتب عله جبيني الوكت مكسوره اعيش ابدونه
العيوني صارتله مهد حسره اشوف عيونه
ليش الالوليله عمر ما ادري هسه شلونه
ابني انه مو للتعب والوادم يتعبونه


محد يعرف ابني الاكبر واحد يكدر
الاكثر مني يعرف روحه بس الاكبر

بس ما ادري هسه شلونه نظرات افراك

*******************

احسين اجاني لخيمتي بجفوفه لازم ظهره
كلي اجه ابنج علي واني كمت مبتشره
كمت وعله وجهي طحت لمن شفت دم نحره
ضلوعه شفت متشابكه والخيل ساحك صدره

ما ميزته هواي تغير من ارسومه
بس عرفته من شتميته عطر هدومه

الكبرته لشيبي يموتونه نظرات افراك

*******************

من اكعدت يمه شيبت كلساعه افتح عينه
بلكت يشوف امه ويفز ظليت احب جفينه
العمرك بعد يمه وكت ما واصل لعشرينه
عاوني خليني ارد ابجيتك افرح اسكينه

ما تتحمل اختك سكنه حيل اتحبك
صاحت گلبي من الخياله داست گلبك

لجموا گلبك بس لجمونه. نظرات فراك

علي حسين المياحي

الليلة التاسعة
القصيدة( بحق الامام علي الاكبر ع )

ربي ادعيك بصلاتي. عن ابويه انطي حياتي

حتى من اموتن بالي مرتاح
ابويه الهن خواتي يعوض الراح

***************************

يربي ادعيك اني بصدق وجداني
اني ارجيك موتي بطلبت لساني
حتى لو اموت وبعدي شاب اني
لجن احفظ ابويه خيمه لخواني

من عسى عمري اعله عمره. ونحري ينحز يبقى نحره

بصدري الخيل خل يدوس دورين
ولا اشوفن يدوس بصدر الحسين

***************************

انه اجواء الحسين اكبالي مرسومه
انكشف ليه الغطاء اوضحت علومه
اشوف حسين طايح سلبوا هدومه
ورقيه من ابوها تبقى محرومه

وبالهوه سهم المثلث. شفته عن عبدالله يبحث

يضحك لسهم وبنحره لاكا
اجه ابطوله السهم وتحاضن ويا

***************************

صوره جاي اشوفن اقسى من صوره
انه كبالي اشوف اجفوف مبتوره
وجربه تبجي ماي بشمس مشموره
وماتت ما سكَت عبدالله مقهوره

تنقذ اتمنت حياته. ويوصل الماي لهاته

كبل موته وصلها الموت عناي
وطاحت من جفوف الما شرب ماي

***************************

انه شفت الكفيل اجروحه مزدحمه
وجم جرح بجرح من الهوه يلجمه
عمه عينه السهم وابلايه كل رحمه
وما هم اعله روحه لخته كل همه

جانت امنيه الوحيده. يترس الماي العضيده

يرجع جان ظنه يفرح الايتام
لجن عطلت رجعته طبرت الهام

***************************

كضت روحي حياتي وماهي مكضيه
بدمعي جاي اشوفن تركض ارقيه
طاحت بيد واحد جنها مسبيه
جرها من اذنها وسلب ترجيه

زينب ادور عليها. ضاعت ارقيه من اديها

الشمر ما خله طفله لها اثار
ادور عن رقيه ابين الزغار

***************************

القاسم والعرس وشموعه والحنه
ظلن من مشه يتانن فرح منه
تسأل زينب امه بعرسه اتهنه
دكلها هناكه عرسه يصير بالجنه

احلي عرس يصير عدنه. هناكه ملتمين كلنه

الحسن بيده يزفه رفعت الراس
ونزين الجنه احنه بورد وبياس




علي حسين المياحي

الليلة العاشره

( القصيدة بحق الطفل الرضيع ع )


نحرك الدامي وكلبك الضامي
هيج اللامي يبني ا يبني


******************

دللول الولد يبني دللول
ذباحك هضم امك يمدللول
هسه انته الذبيح الساكن الجول
وذباحك ييمه يصول ويجول

عاريه جثتك عل رمل عفتك

ذابله شفتك يبني أ يبني

**********

ياهو بالمهد عكبك اهزبي
وياطفل الاشيله العندي اناغي
احسه يروح همي من احاجي
ينام بحضني بعدك منهو اخلي

طفت بعيوني شعمة اضنوني

بيك لوعوني يبني أ يبني


**********

يمه بأيد ترفه من يغسلوك
خافن من يغسلولك يلجموك
تبجي تريد امك ما يسمعوك
وحيد الكبر اظلم ليش دفنوك

كون دفنوني وياك خلوني

وما يردوني يبني أ يبني


**********

عليك العين جانت والله تربي
واشوفك تكبر اضويلي دربي
من تضحك ييمه يروح تعبي
وشكر بيك يبني الغالي ربي

امنياتي وياك ضاعت بلياك

البقى ذكراك يبني ا يبني


**********

اثاري بالهوى من حرك الباب
حسبالي اجيت بجيت احباب
علي ثاري الهوى والباب جذاب
وانه مصدگه زماني يرجع الغاب

وحدي خلاني دهري اذاني
صاح وجداني يبني ا يبني


**********

ياعمر الورد ياريحه الياس
اصبح من غيابك ابيض الراس
وين حسين يمه وين عباس
ظل البيت خالي بلايه حراس

منهو حامينه لو دنوا لينه

انه وسكينه يبني ا يبني



علي حسين المياحي

الليلة العاشرة
( القصيدة بحق الامام الحسين ع )

بين جروحي ظلت حايره روحي
من يا جرح اتطلع ترفض اجروحي
بيه ما ظلت مسافه ابلايه طبره

****************************

انه حسين. شوف العين
مو كل الوصلكم هذه بالمقتل
كدما صار. بيه الصار
فديوم ابشر والله ما يحصل
عشره خيول. ما معقول
من ادوس اعله صدري شلون يتحمل
ما ظل حيل. داست حيل
من كثر الحوافر صدري اتهدل


ما راحت الخيل امن اجت سحكتني
من صوب اعله صوب انوب جرتني
جسمي يطشر مثل سبحة الزهره

****************************

جروحي هواي. وابلا ماي
مثل طير انكسر جنحه بوسط صحره
عاري ظال. علرمال
تجويني شمس وتكلب ابحسره
مني السيف. ياخذ حيف
كل طعنه اعله طعنه وطبره علطبره
لا ما اشوف. معمي الشوف
من الحر طفت بعيوني جن جمره

من كد الحراره خشب لساني
واني من الحوافر صرت مو اني
ما رحم بيه ولا سلاب مره

****************************

جم سلاب. خنجر جاب
سلبوني لحد ما عاري خلوني
فوك الكاع. خنصر ضاع
كطعو خنصر ايدي ومنه سلبوني
صحت ال اه. والويلاه
بخنجر من كفاي انوب ذبحوني
موتي هان. والعدوان
عله كاع الشريعه اعضاء وذروني

طحن الرحه بيه. ينطحن عظمي
تالي بالحصيره. لملمو جسمي
شيبقه بيه ثلث تيام اعله صحره

****************************

تهيج الروح. بيه جروح.
الجرح ما يلجم احد غير راعيه
حسبو حساب. مو بكتاب
بس بصدري ذني الف وسبعميه
حيلي باد. ما ينعاد
من كد الضرب روحي اني مكضيه
رمحي لاح. راسي طاح
من كثر الدمه شيباتي مدميه

ما همتني روحي وشجره ابحالي
من الشمر همي يروح لطفالي
ويحرك الخيمه اعله زينب الحره

****************************

كلبي ايحوم. بيه هموم
من خوفي اعله زينب كصرت ايامي
شكد بالهيم. شبعت ضيم
زينب من على التل هيجت الامي
راح الزين مات الحسين
نعيهه من اسمعه اتكزبر اسهامي
يابس ريج. دمعي يهيج
ما ظل عظم صاحي مكسره عظامي

زينب من عله تل خويه من صاحت
من كد الهضيمه عثرت وطاحت
ولتصدلهه تره العيون عثره

****************************

تطفي نار. شبت نار
محتركه اديها بحرك المخيم
العله تزيد. ايد ابيد
مربوطه بحبل وبحركه تتألم
كلبي ناح. دمها ساح
من دمها العبايه كله صارت دم
بهذه الحال. شدهت بال
متنها زينب من السوط ما يسلم


مو سهله اعله زينب سال مدمعها
وبرمحه حسافه الشمر يدفعها
وتمشي مكيوده اسيره والله حسره


علي حسين المياحي

https://youtu.be/kuMLBlqpsuw

سهلة طيحتي

🔊الرادود ميرزا علي فرحان
📜الشاعر علي حسين المياحي

مكساج🎛️
ميرزا علي فرحان

توزيع🎹
علي عمار

في هيئة صوت الزهراء عليها السلام

قصيدة الامام علي الاكبر

كضه عمري سهر. لحدما شب وكبر
اخذ حيلي بدلاله

من ايدي ضاع من ايدي. وليدي راح وليدي

راح الحيد ذاكه اليسوه معموره
مو واحد بعيني اولايه مهجوره

تعب رباه. ضاع وياه
بس امه وحليب امه عليّ شاهد
شكد عانيت وتمنيت
ادكول الناس عنه يشبه الوالد

ما ادري بالوعد. اخذ مني الولد
مشه بحيله وخياله

من ايدي ضاع من ايدي. وليدي راح وليدي

******

الله يعين گلبه اليفكد اوليده
من يجيبه الخواته يوسده بهيده.


بيه شلون رايد عون
كمت اوكع وكوم وهم ارد اوكع
ذاك الطول شو مشيول
ابني راح سالم شو اجه مكطع

بحصيره ابني شفت. وكف گلبي وطحت
مو لولي جماله

من ايدي ضاع من ايدي. وليدي راح وليدي

**

اول مره احس بروحي المحير.
الاكبر مره اكول ومره مو لكبر.

رايح جاي وبلا ماي
ما عرفه كمت من ظهره لو صدره

ااا ياويل. من الخيل
داست فوك گلبه وطلع من ظهره


عظم يدفع عظم. شبع دوس وهضم
مو هذا ابني جاله

من ايدي ضاع من ايدي. وليدي راح وليدي

**

لمه شرد اكول وحيرتي حيره
مو زينه اكلهه طلعت الخيره

لطمي زين. راح الزين
موتي من النواعي كون عالاكبر

بگلبح داي. نواحي هواي
الام بفكد ابنها هواي تتغير

نعاويج دوه. علي نلطم سوه
شبيدي علجراله

من ايدي ضاع من ايدي. وليدي راح وليدي

**

الله يساعدج ادري انتي تعبانه
هي ام الولد بس هي خسرانه


الام هواي. في وماي
ملهوفه اعله ابنها دوم برباها

يروح بساع. تعب وضاع
من يموت ابنها تعمه عيناها

تعب وشكه العمر. تاليته للگبر
يصير الگبر حلاله ؟

من ايدي ضاع من ايدي. وليدي راح وليدي


علي حسين المياحي

الامام السجاد ع

غمض ارتاح من الرماح
شافت اعيونك مواقف مؤلمه
وعله كل موقف تصبرك فاطمه

***************

شافت اعيونك مصاب الغاضريه
انته ساعتهه تمنيت المنيه
ولا تشوف اعله الهزل عمتك سبيه
والشمر كلساعه يضرب خد رقيه

هواي الجروح....شيبقه بالروح
ضعن كلمن جرحه وبعينه دمه
وعله كل موقف تصبرك فاطمه

***********

تعثر ابشهكه كبل لا جدم تعثر
ويه كل صرخت طفل عمرين تكبر
من تصيحك طفله وجهك كوه يفتر
تحز بيك السنسله واتجرحك اكثر

ترفع العين...لراس الحسين
تكله بعدك بويه عالعين العمه
وعله كل موقف تصبرك فاطمه

***********

كلبك شيحمل بعد من يا فجيعه
علرمح راس الابو هو ورضيعه
وابو فاضل طوله ظل اعله الشريعه
راسه مسبي وعالنهر جفه الكطيعه

راس عباس...ينزف احساس
ينزف وبشفافه جلمات الضمه
وعله كل موقف تصبرك فاطمه

***********

بعينك اتصد بالسبي خياله عشره
تصيح ذوله والدي الهشمو صدره
ويه كل طكت عظم تنشغ الزهره
كلبته الخيل بحوافرها اعله ظهره

فوك الارمال...صاير اوصال
سالبين ثيابه سلطان السمه
وعله كل موقف تصبرك فاطمه


***********

ياعلي السجاد هاي الدنيه حيره
تشوف زينب عمتك صارت اسيره
اتعز عليك هواي وانته البيك غيره
بالخرابه تشوف كعدوهه الاميره

مالهه اخوان. تطب ديوان
عله زينب هاي اصعب خاتمه
وعله كل موقف تصبرك فاطمه




علي حسين المياحي

شكراً الك ما قصرت يابوالفضل شكراً

شكراً عله الخدمه
شكراً يبو النعمه

شكراً. شكراً

****

ابو الموكب نصب خيمة هالسنه مقسوم اله
يصيح زاير بيش اخدمك يلي ماشي الكربله


متحضر انه العاشور
مشتاق الكلمة مأجور
من الناس

يا زاير لحسين انخاك
جوه الكبه ادعيلي وياك
بيها احساس

شكراً الك ما ينسي هذا الفضل شكراً

شكراً عله الخدمه
شكراً يبو النعمه

شكراً. شكراً

****

العنده خدمه بأربعينك يوزع اعيونه ثواب
خدمه حلوه وتعب ماكو الشايب ايرد لشباب

يسألونه ويخبرهه الناس
فاتحهه بوجهي العباس
هذا العام

يستاهل اهديله العين
حاسبني بخدمة لحسين
من الخدام

شكراً الك ماينكطع حبل الوصل. شكراً

شكراً عله الخدمه
شكراً يبو النعمه

شكراً. شكراً

****
ماكو احلى من الخدامه وانته قائد للخدم
وين نلكه مثل گلبك ينطي عينه للسهم

احنه بكيفك يامولاي
من ايدك هاي الايدك هاي
يا عباس

العايف خدمتكم خسران
وليخدمكم عالي الشان
بين الناس


شكراً الك نخدم نموت وما نمل شكراً

شكراً عله الخدمه
شكراً يبو النعمه

شكراً. شكراً

****

حسين گلبة رحمة الله وانته يالب الگلب
تترس ايدي من اكصدك ماكو شي يمك صعب

كلما كصدك شايل هم
ارجع يمشي بوجهي الدم
يامولاي

يعطش گلبي وانته الماي
ما تاخذ بس تنطي هواي
هواي هواي

شكراً الك تقضي الحوائج بالسهل شكراً

شكراً عله الخدمه
شكراً يبو النعمه

شكراً. شكراً

****

ترضه عني ولون ترضه الخدمه وياك الوصل
شما اكلك ما اجازي منك اني كل فضل

فضلك عابر حتى الهام
من انعده انعد ايام
يابو الخير

شما اطلب منك ممنون
استنكف من غيرك كون
من الغير

شكراً الك اصبر لون مال الحمل شكراً الك

شكراً عله الخدمه
شكراً يبو النعمه

شكراً. شكراً

****
بالنهايه من اشكرك مقصر بكلمة شكر
يديمك الله يابوفاضل خيمه فوگاي وستر

الله يديمك وبكل عام
بعينك محروسه الخدام
ياوفاي

من جفك ماكل كل طير
تارس جفي وجف الغير
في وماي


شكراً الك كول وفعل يابوالفضل شكراً

شكراً عله الخدمه
شكراً يبو النعمه

شكراً. شكراً

علي حسين المياحي

أستشهاد الرسول محمد (ص)

بلسم الجان الجروحي
روحه طلعت مدري روحي

مثل النفس عندي رايح وجاي
خنكه بلا محمد حيل دنياي

****

العمري ما فارگته لقرب من خيالي
غمضت عيونه انتهت ذيج الليالي
جنت بسماي اني اشوفه گمر عالي
وهسه حتى بصفي ظل مجانه خالي

بكلبي نار شلون تخمد
كبالي مات اني محمد

اليكفد مثل طه يفكد الراي
خنكه بلا محمد حيل دنياي

****

روحه من طلعت محمد اني شفته
حضنت اوداع الاخو بروحي حضنته
مغمض عيونه وشفت نزلت دمعته
عله فراگي بينت دمعت عشرته

تلاگن ادموعه ونحيبي
وكتله لا ترحل حبيبي

لتخليني وحدي ابقه وياي
خنكه بلا محمد حيل دنياي

****

الشايل الدنيه عله جتافه بعظمته
على جتافي للمگابر اني شلته
من الجنازه جن همسلي ابجي سكته
دمعك اكبال الشماته موش وكته

بعدي يردون الخلافه
وانته صاحب هلكلافه

شماتك يحيدر صاروا هواي
خنكه بلا محمد حيل دنياي

****

من دفنته وأيست ميرد اليه
من گمت اعله الظهر حطيت اديه
واني راجع ناده من گبره عليه
ياعلي هم مر علي وكت المسيه

اني اشتاگ الكعدتك
والگبر يمنع رفگتك

كاسر ظهرك ادري حيل فركاي
خنكه بلا محمد حيل دنياي

****

من بعد ملگه محمد كلشي فرگه
اجدامي ما يمشن يريدن اله رفگه
الملگه ميت والگبر ما عنده ملگه
ودنيه ما بيها محمد حيل خنگه

بدونه ما تحله حياتي
بالترب دافن غلاتي

ما شوفه بعد ليريد ملكاي
خنكه بلا محمد حيل دنياي

****

ابلا محمد راجع امبين مصابي
وفاطمة لاكتني منتظره اعله بابي
وين ابويه اتكلي لتيتم شبابي
وشافت اتراب الگبر بعده بثيابي

نزلت الدمعه بهضيمه
فاطمة صارت يتيمه

شافت من ابوها خالي مكفاي
خنكه بلا محمد حيل دنياي

علي حسين المياحي

#جديد_عافيتي_كلهه

رابط القصيده كاملة
https://youtu.be/wtVrIGgk964

اداء : الرادود حامد الحياوي
كلمات : الشاعر علي حسين المياحي

الولادات الشعبانية

ما يوصف فرحتي حتى اليوصفون
احساسي بمولدك من يكدر يفسره
هلا بجيتك حبيبي ويا اعز مخلوق
هلا وميت هلا ياريحة الزهره
هلا بشمل الائمة واخر العنگود
شعري والوزن والقافيه مقصره
هلا ابيت المحنه ودفو الكل بردان
هلا بجفك اليشبع جوعت الفقره
هلا بيوسف ولكن ما تمره عجاف
اليجيلك ما ترده وتعتذر مره
هلا بطعم الملاكه ولهفة العشاك
هلا براحت البال شما تمر حسره
هلا بغبشت صبحنه وذيج البروده
هلا اليطفي بكلبنه حرورة الجمره
هلا وما عندي غير الهلا من تلكاك
بس ياهلا بريحة فاطمة الزهره

شع نورك يمهدي ولمحنه
وزاح التعب مني ولمحنه
يشمل اكلوبنه انته ولمحنه
فرحنه بمولدك وي الزجيه


علي حسين المياحي

شع نور الحسين وهذا ميلاده
كتمل نور الكساء بخامس الساده

***

عن باقي الايام اليوم فرحتنه
بينت بالوجه نسمات ضحكتنه
مبتسمه اطلعت لحسين جلمتنه
بميلاده اليعيد ياخذ امراده
كتمل نور الكساء بخامس الساده

***

الديره اليوم حلوه وحلوه كشختنه
الوادم من فرحنه اليوم حسدتنه
شمحلاهه اعله طاري حسين لمتنه

فرحانه الولاية بيوم ميلاده
كتمل نور الكساء بخامس الساده

***

نعيد نبتسم ابهوسه وبصفكه
جم حسين عدنه خاطر نعشكه
يحبنه وهم نحبه وغيره ما نلكه

عادتنه نحبه شمحلى هالعاده
كتمل نور الكساء بخامس الساده


***


مثل حسين ماكو ومثل حنيته
ظم الخدم كلهه جوه خاجيته
كل خادم يخدمه يعلي من صيته

كلما ينطي حاجه ترجع ازياده
كتمل نور الكساء بخامس الساده


***

كتمل نور النبوه بخامس الشجره
مثل الدر طلع من جابته الدره
هديه من الله جان لفاطمة الزهره

ومن صلب النبوه تصبح اولاده
كتمل نور الكساء بخامس الساده

***

من الله نسأل احنه ايديم نعمتنه
وتضوي كل سنه وكل عام شمعتنه
يبقه حسين عايش ويه فطرتنه

ونبقه احنه بخدمتة وخدمت اولاده
كتمل نور الكساء بخامس الساده

علي حسين المياحي

#جديد_عجل_امر_القائم

رابط القصيده. 👇👇👇👇👇
https://youtu.be/02b6nNEvvO0

كلمات الشاعر علي حسين المياحي

اداء الرادود حامد الحياوي

هيئة الامام موسى الكاظم موكب جابر / بغداد مدينة الصدر

#جديد
▫️القصيدة - مشه ضعن الاحبهم

• رابط القصيدة ⬇️

https://youtu.be/YQWd2zR4PMw

الحان وأداء/ الرادود علاء العكيلي
كلمات / الشاعر علي حسين المياحي

موكب عزاء خدام الزهراء عليها السلام
محرم الحرام ١٤٤٥هجري