محرم ١٤٤٤

لمولاي العباس عليه السلام


ردلنه مذبوح بحيرة
بعيونه سالفته جبيره
وجفوفه مغزرات بضهره
ومبينه بخطواته الكسرة

حسين مو هذا النعرفه مسومر ومذبوح جنه
طاح يم الخيمة كله واحنه طحنه يمه كلنه
بصكفة ايده والبواجي هنانه شي صاير عرفنه
ساكت واشر بصبعة عالنهر درنه وجهنه
عرفنه السالفة من شال ايدة
اثاري عالنهر ذبحو عضيدة

ردلنه الدم تارس ثوبه
وبعيونه جثه ومسلوبه
عباس الخيل مخليته
الدم صابغ لون الحيته




حسين فاض وعينه شربت من بوفاضل ماي غربه
لينه رد بلا عمامه وصل يمنه وكف كلبه
صاح راح حزام ضهري وجفه يبجيله عالجربة
ما مصدك ردت اوكفه مطشر وما بيه اكلبه
واصل للنهر دمة وعباته
خوية كوم سكتلي الشماته


اصيح كوم ورجع الخوه
خويه بدونك واكف كوه
يالماخذ روحي وعافيتي
اعثر يم شامت تاليتي



خوية زينب الحكيلي واكع وملجوم عفته
هاي اول مره بيها ابو فاضل ما عرفته
الخيل متونسه عالصدرة وايدي ترجف من لزمته
ضام زنودة يزينب وره ضهره من وصلته
خافن من اجي ما الكه الجفوف
وعاثر بيهن اني جيته ما شوف

رحت اركض واندهله ارجعلي
بس بيه الحافر شمخلي
كمت امسح بتراب عيونه
لحد تسال خوك شلونه




خوية والباقي بعذابج كافلج انطاج عمرة
الباقي منه عينه وحده وسهم خرب عينه الاخره
باجي حتى بلاية راسة دمعه فايض فوك نحرة
سوالفة بايكها حافر طشروهن فوك صدرة
راسه معلك علسهام ما طاح
باجر فوكها يعلكونه برماح


يا زينب جيبي العكازة
خلاني بنص هاي العازة
مكسور بحضنه اتبديت
كتله ارجع يا راعي البيت

حسين سولف عن ثيابه وماشيه عينه عالدمة
بلحوافر نشف عطرة ثوبه من بعيد شمه
الكمر مو ماي التبدة والنزف واصل لجدمة
جربتة متروسه غيرة انحسبت وي جفوفه زلمة
زلمة الجربة شايلها عالمكفاه
متلكية السهام وطاحت وياه

الجربة تبجي عالجفوفه
بيها تراب ودم ملفوفه
هذا شويه من الصاير
بعده بضلعه لسه الحافر





كرار فاهم الخفاجي

محرم ١٤٤٤

شور للعاشر...


شيلمك بعد يحسين
والطف ماخذ عيوني
وبناتك وكفن كلبي
يخوتي كومو عينوني

ليش انت نايم واختك وراها العيله ركضت
الحك عليها ابنيه عندك ابعطرك عثرت
وايدي عالكلبي والخيل اجتنه للخيمة وصلت
وصله الخيل جابن من عباتك
اسكتت بس كلي شيسكت بناتك
متت مو مره وحده انه وغلاتك
مطلوبه يكلي وناخذ الثار
وبالبر من ركضنه زغار واكبار
يخي حافي جدمنه اوصلت النار

الحر ضل يحز بينه
وجدمنه كاضي بلركضه
وعليل ويانه ضل محتار
اذا يعثر منو يكضه


باصرني خوية وطشت حرمكم شيلمها بله
اليوكف ميركض الله يرحمة يسحكونه غفله
بس واحد منكم خل يكعد ليه محتاره والله
َوحكك كلبي ضل يعارك وياي
يريد الماي واحنه ندور الماي
جزينه العطش خوية نريد الفياي
المن ضاله واكباله ذبحوني
وما شوفن كمت ورماد بعيوني
كلشي اتحمل وما ارضه يسبوني

مخلين التراب سيوف
واحنه نسحك عليها
ورقيه كبرت من الخوف
وبالي يم تراجيها

جا خوية بتكم ضلت وحيده ياهو التحشمه
ليش بعباتك يلبسها اكبالي وعطرك يشمه
المتعودة بفيك صعبه ربابك ايطكها زلمة
جا هية المصايب مره وحده
نام حسين ياحافر يكعده
اخافن من يفز جبده يمرده
المن اشتكي ياناس حيره
ما كالو اخيتنه جبيره
شلون تروح مكيوده واسيره


مدري شبيها هاي الناس
يندهونه باسامينه
وكل هذا وسمع عباس
وكام تفور جفينه


الذابحني باجر شيخلصه خويه وعيوني خلصن
خوية بناتك كاضي كلبهن من الركض تعبن
يتحامن بيه واني جبيره وجفوفي بردن
وصلنه لمرحلة ما نعرف نكوم
وفرينه الصحاري طيور وتحوم
وكلها وره زينب هدت الكوم
جا شنهي البكه بروحي واشيله
ثكيل العاشر وزينب نحيله
مسافة موتي كصرت موطويلة


كمنه نطيح مثل الماي
عمدن من يبدونه
الله يساعدك يحسين
شاف الضيم بعيونه


يحسين اودعك وراسك يخويه يرافكنه باجر
يحسين اجيتك واني ارد اكلك بس كلبي حاير
باجر يسبوني واعذرني خوية لازم نسافر
يخويه كلبي يمك ما اخذته
يموت بحركة كلمن شايف اخته
يمشوني سبيه وطايح انت
كلمن ما عرف معنى السبيه
اطب لشام مثل الخارجيه
وكلها عيونهم تضحك عليه

باجر راسك عالرماح
وصوغة الراس ويانه
وما ترمش ابد عينه
ويضل يحرسها نسوانه


كرار فاهم الخفاجي

محرم ١٤٤٤

شور للقاسم ع

يا يبو عيون الحلوه اوساع
شيلمه هواي عللكاع
يوليدي.. يجاسم

رزق الله وجهك يا ليش... تتهنه بعيونك جيش
           ذيج الحوافر لاكته
         خربت عينه وضحكته
         من الكاع ذابل شالته
         والدم رسمها شفته
ليش.. يلطولك رزق عيني عليك الدنيا لحكتني
ليش.. عطرك بيدي ما خلص تعال ارجع يذابحني
ليش.. وين الله ويجي مهرك وليك نوب ياخذني

من عندي رايح فحطان
ذبحو من صيح عطشان
يوليدي.. يجاسم

الحيرة من شفته يصيح... مكطع وما يرضه يطيح.
           خايف الرايه لا تكع
          ومن شفته بجفوفه رفع
           الدم بصابيعه طلع
             هنانه كلبي النشلع
راح.. يماي وطشروك عناد حتى اهلك يشوفونك
راح..ما شمو عبيرك ذاك من رادو يذبحوك
راح..عذابي من اصيحلك وانت مغمض عيونك

يا خلكي اكعد بطل النوم
شتسوي بنص هاي الكوم
جسام.. يوليدي


اول مره يشوف اسهام.. ابصدره تعثر وتنام
شيطفي كلبي المحترك
وصدرك بحافر ينشبك
وسهامك الطبن طبك
وليدي اشوفه ينسحك
طاح.. يكلهم بس اشوف امي وما كملها سالفته
طاح..متعبينه وكع مخنوك وذيج الخيل ساحكته
طاح.. تزفه الناس جدامي واني محضره حنته

امطفين شموعة ابدم
شاب وما لاحك يحلم
يوليدي... يجاسم


يا وجهك اصفه من الماي... جاسم عندي حيل هواي
يايمه ضحيت بعرس
لجل الخيم لجل الشمس
ومنين اجيبنه امس
ويردلي ضحكاتك ونس
وين.. ييمه مغرب ورايح ويراحة بالي وسنيني
وين..ارجعلي العطش مكدور اعصرلك دمع عيني
وين.. من ارجع ينشدوني جاسم وينه تاذيني

يايمه ريت اني هناك
شابكتك واموت وياك
جاسم.. يوليدي


اعلوك بزنده شديت.. بلكي يرد راعي البيت
ويكحل عيوني ويرد
وبلخيمة يذبحني النشد
كالو رجع كلت الحمد
جابو الي ناقص زند
ااخ.. شفته مسلب وكاضي وما بي اثر للرجعه
ااخ..يشم الهوه ويه الدم وبصدره انطبع درعه
ااخ..زغير القاسم ومهضوم وبخده اثر دمعه

راجعلي متغير حيل
شمسويه يايمه الخيل
جاسم.. يوليدي


كرار فاهم الخفاجي

بمدينه واحنه طبينه
ندور وين اهالينه
كلها تصيح زينب خارجيه


طبينه لوادم مو وادم.. واحد يضحك..
واحد مدري بيده اشايل
علويه وطبت يم غربه... بلايه اخوتها
وكلها تصيح ام طول المايل
من كثر الحجي والصار تبجي علينه ناكتنه
حتى اطفالهم تركض ورانه بحجر طكتنه

غريبه الشام ذابحني
سبيه والضهر محني
كلها تصيح زينب خارجيه

حيره نريدنه بس واحد.. اي بس واحد
يطلع يعرفنه ويحمينه
عيد وكلها تصيح مبارك.. طبت زينب
وجدامي الراس مخلينه
هلاهلهم جوت كلبي ولا واحد يرف كلبه
الما عده اخو بالناس تطلع روحه بالغربه

ثكيله جنازتي باجر
بيها الشام والعاشر
كلها تصيح زينب خارجيه

تدنادس نسوان الديره... شوفن زينب
الجانت محد يوصل حدها
دك طبول وضحك وشامت.. اي كل ذني
عباس برمحه يشاهدها
علويه وتطب السوك غريبه بنص الولايه
حجاية هاي اخت عباس لجمت كلبي الحجايه

مجتوفه واسد بذني
حجيهم حيل تعبني
كلها تصيح زينب خارجيه


الجمال وبينه يستعرض.. اكبال الشامت
تميل الناكه ويعت بينه
سوك معزلينه من الفرحه.. وناس تهوس
وناس اندارت كلها اعلينه
واحد كال نزلو الراس حطه اكبال ناكتها
من نشتمها كون يفور ويسمع زين ونتها

ضيم الشام خلاني
حيل بعازة اخواني
كلها تصيح زينب خارجيه


جا هو شيبقه من كلبه...الجابو مسبي
وتتلكاه بحجاره الديره
وديوان تطب بت السادة.. محد دنك
وحيره مجتوفه بصف حيره
واحد كال اسمعوني وبديوان ضل يفتر
جبنه الرووس صوغه الكم وعفنه اجسامهم بالبر

اموت وبعد ما بيه
ومحد كال علويه
كلها تصيح زينب خارجيه

كرار فاهم الخفاجي

يوليدي محسن يمه كوم يبني

الباب مطلوب لعلي ماخذ اوليدة وحلمة
اوليدي يا اول نذر دمي انخبط وي دمه
ابطني ويحاميني ودفع البسمار حتى بجدمة
طاح وفطر كلب الارض بجلمة دخيلج يمه

تلكيتة بدمعت عيني كوم يبني
—————————
اول سبيل بلا نفس مشبوك كلبه ابسمار
اشهور عمره بلا غطه وتصيرله وسادة النا
لو باقي ساعة عالارض عاد اني احسبه خطار
عزبله بابي المحترك وضلوعة صارت طشار

واويلي منضر يهضم كوم يبني
——————————-
ابطني واحس بضحكته من جان عمره شهرين
مكيف يعيش بدنيته ويصبح بوجه حسين
تاليها ما لحك يون والدم صبغ حتى العين
جا بيش اشبكه من وكع مجويه هاي الجفين

ورغم الحرگ هم شلته گوم يبني
——————————
مقتل المحسن مو كسر ضيم وجريمة بعمره
الشاف امه تحترك شيضل بروحة وصبره
طايح ومنهم ما خلص ما رحمو ابن الزهره
الما كلف شويه الهوه تنباك روحة بعصرة

مودعتك بالله يمه گوم يبني
————————-
فرحان ببنك يا علي متاني يجي وتشيلة
وتضمه حيل عالصدر وتضحكه وتناغيله
الله يعينك يا علي شيحملها هاي الّيله
مكابل الكاروك وكعد ويهزه ويلوليله

كاسرني حيدر كسرة كوم يبني

مشتاكة الوليلك حرت جبت الكماط بحضني
متعودة احجي للفجر وياك وانت ابطني
مو كسر ضلعي يالولد انت الصرت توجعني
ايام يمه ونلتقي بس كلي شينيمني

لاحگتك لا ما اعوفك گوم يبني


كرار فاهم الخفاجي

نزال

مرسومه بالسما فاطمه لوحتها
وكل ليلة. تنعرض عالارض عصرتها

التراب وماية. ناصبلها قرايه
ونزل جبيريل وصرخ يا نفس هوني
حجي من عباسها. يرتل بانفاسها
وخلها تعرف هلخلك بتمن تكوني
يارحمة الله عالارض منتشره
ترابج يذري بس عطر يا زهره
واليحب مفروضه بعيونه الكسره
ومن بابج مصنوعة العفة

مضلومة. بالضلع بالدمع. ونذكرج
وانتي الهيل مقدره ومصدره من اسمج

بكل بقاع العالم. انخلق ضي لفاطم
يا رسالة ونزلت من الله وجلاله
انتشر خير وبشرى. الواله اسم الزهره
يضمن الجنة اليحب هاي الرسالة
اليعشك علي لازم يحب الكوثر
من تحجي عنها بكل ادب لا تعثر
حيدر يحبها وانت تدري بحيدر
شيسكته الجرحو معشوكة


الرب يغضب لو سمع واحد. يبجيها
للرحمة انخلق وانوجد طاريها


يا حليم واعي. الما الك كل داعي
كونك اتحب وتعوف بكيفك انت
العصر فاطم واضح. اسمه عار وطالح
ولا تخليني اسولف خلها سكته
مرجعنه فاطم معتقدنه وثابت
شيقنعه هو بالاصل طب شامت
جايب حجي من اللسان الفالت
خط فاطم احمر لا تكرب

معلومة اليشك. لليغالط روحة
تره فاطم. من الحرك بنفس مذبوحة




يا خسارة روحة. العاف دمعة ونوحه
ورافك الذلة وشرب كاس المهانه
الما حضر بيامج. حطب عذره بابج
يطرد النعمة وتضل حيرة بزمانه
دين الله واكف عاليشك بالعصرة
لا تتعب ولا تدعي فاطم نضره
كونك محب لازم علن تتبره
اليتبره بنارج يطيفيها


افضحهم للعن. وانشر سوالفهم
واتبره. من عمر عائشة وشلتهم

يا عزائج دائم. لحد سيف القائم
نوب يتكفل تره بثار الزجية
بلجناسي يحطها. وبيده هوه يخطها
لعن الله عمر ابكل هويه
ينشل عمر من كبره ويصيح الثار
يعلكه عالشجرة وبيده سيفه الفقار
يكطعه وذر ويعصره ويحركه بنار
وما يبرد كلبه وينتشله

يا مهدي العجل. العجل ندعيلك
يا مهدي جدتك ندبتك تشكيلك

كرار فاهم الخفاجي

محرم 1445

قصيدة اساسية للخدمة



خليني وياك اشتم طاري حروفك وانحب
خليني وياك اكضي ايامي لغربة زينب
دوم احجيله انه بعيني
ويفهم كلبي ويبجيني
عبدك يمولاي. عبدك يمولاي



عودتني الحب خدمتك بلا شعور اتوسلك
عازل الضحكة للوادم والدمع خليته الك
امنيتي بس وحدة يجرحي كون اموت بمقتلك
الما يقبله حسين زحمة مثل غركان وهلك
اطلب منك بس هالوحدة
الما حبك عني تبعده

ويصير انسان. اليعطش بس لو ذكرو اسمك
ويصير انسان. الما طشر روحه ولمك
ادعي بس خادم خليني
يفهم كلبي ويبجيني

1ــــــــــــــــــــــــــــــــــــــ

حسين زارع بينه عادة نخدم ونتوسله
باجر يخضر بجينه ونمشي وي القافله
وترجع الدنيا ويسجلك راكض انت بكربله
باجر حسين عالطوله يوكف يكلك هلا
وتوكع انت وعابس يمك
يضمد جرحك ويحب دمك

يا ماي العين. يالشاتل بضنوني الواهس
يا ماي العين. اقبلني لو خادم عابس
جرحك انت المحليني
ويفهم كلبي ويبجيني

2ـــــــــــــــــــــــــــــــــــــ

انت اول كلشي عندي يابو شفه مفطره
جايب عيال لمنيته وشكو عنده مخدره
والله زحمة وعلمودي بالحرب تركض مره
وينسحك صدره وينحز بالخناجر منحره
واني اضحك والعب بيامي
وبغيرك متروسه احلامي

اطيني جروح. خليني بعازة بس جرحك
اطيني جروح. وخل يبجي دم كلبي اليضحك
بس حبك رايد بسنيني
يفهم كلبي ويبجيني

3ــــــــــــــــــــــــــــــــــــــ

وبعذابك عشنه كلنه وماكو بينه الينجرح
عيونك متاع لرقية الله لا ينطي الذبح
فاض عطرك والبواجي موش دمك عالرمح
تنشرح كل السوالف وجرحك الما ينشرح
اشاف بصدرك ذاك الحافر
محبوبي اتطشر بالعاشر

وخيام ونار. حلمي اركض لو بالهيمة
وخيام ونار. وبدموعي اطفيها الخيمة
ادعي محبوبي ينجيني
ويفهم كلبي ويبجيني

4ــــــــــــــــــــــــــــــــــــــ

خادمك وارزقني دمعة اجوي عيني واحترك
الغرّب وما ضاك حزنك طاح من ذاك العثك
مالي خلك الدنيا كلها وبس الك كلي خلك
اقره والطم وابجي واجزع هذا ميزان العشك
عندي اوصية اني بموتي
راية تنحط بتابوتي

يا اعذب حب. يالقابل حرك اقبلني
يا اعذب حب شوكي عد بابك شاتلني
يالعشكك مني شاريني
يفهم كلبي ويبجيني

5ــــــــــــــــــــــــــــــــــــــ



كرار فاهم الخفاجي

محرم 1445

لمولاتي العليلة عليها السلام


كرب يومي وبعدني مكابله البيبان
وصوركم راسمتها وتارسه الحيطان
من اصد لصوركم اتحير
ارشها بماي تتفطر

1ــــــــــــــــــــــــــــــــــــــ

اخط عالكاع اساميكم. بويه واشبك عليكم
اليذبحله عزيز يذبحه بفراك
وصلت لمرحلة بخوفي. اخاف تعوفني جفوفي
متعودة تلزمك لمن تشتاك
فركتكم احر من حر الصواب
عمر الفاكدة تلكونه بلباب
شيسكتها عيني وجرحي ما طاب


ما مقسومة اعيش ولا اروح وياك
مكتوبتلي بس يم الله اتلكاك
بس الموت جان الحل
بصوركم باقية اتوسل

2ـــــــــــــــــــــــــــــــــــــ

علردن اثيابك اغفه اني. ودمعي مبلل ارداني
صفيت بحالت المكسور عشة
فكري شكد يراويني. من اسافر للطف بعيني
مجتوفات شو عماتي غبشة
مراكض والخيول براسي تفتر
شيركض بنات حسين بالبر
الكاع بكربله شو لونها احمر


وام عون الجبيرة زحوف صعدت تل
نولينه تصيح كومو وبقت تتوسل
افز مرعوبه من ليلي
جا ياهو اليشد حيلي

3ـــــــــــــــــــــــــــــــــــــ

وحشت مكبره داري. ومحد يسمع اخباري
كمت اشرب قهر والماي اعوفه
المدللني بس حزني. وراكم ابد ما هدني
مره وجهي يضحك حلمي اشوفه
تتكسر دمعتي من التجاعيد
غطة الشيب رمشي والمواليد
بس يرجع اريد وكلشي ما اريد

كلبي يكلي موتي وعيني ما ترضه
اله تشوفهم لو بالعمر لحظة
كلبي لو جدم عنده
وراهم يركض لوحده

4ــــــــــــــــــــــــــــــــــــــ

يبويه شثكل عازتكم. جنازة بلا اهل بتكم
الغريب يشوف كل الوادم كبور
يابويه فحط كلبي. شوكت ارتاح من تعبي
عاشور الفراك وذاك عاشور
عشتهن مرة وحدة الله شاهد
فراك الابو حار الموت بارد
كلبي كله يمكم دوم شارد

ابراسك رمح بس رمحي اني فراك
كمت اشتاك الك ولموتي هم اشتاك
كلبي انياطه متكطعه
وجهك كلي شيرجعه

5ــــــــــــــــــــــــــــــــــــــ


من كد الحزن بيه. قريت الفاتحة عليه
وصورك دافنتهن بويه بعيوني
امنيتي يمك اتوسد. من اموت بحضنك اتمدد
جفوف الغربة تلجم من يشيلوني
يكولون اليموت هواي يرتاح
وانه ميته واشوف الركض ورماح
وحتى بكبري اشوف حسين من طاح


تموت بنيتك وجف غربه اليشيعون
جنازة بلا صياح ولا اهل يبجون
حتى بموتي هم اتعب
بتابوتي وبقيت انحب


كرار فاهم الخفاجي

محرم 1445

لمولاتي ام البنين عليها السلام

هذني اعظاي ضلن بس يرجفن
البنات براسي احس كلهن يركضن
براسي هوسة وخيام
نار وحرك والشام

1ــــــــــــــــــــــــــــــــــــــ

طلعت مشرعبة وضاك النفس بيه
ساعة ايدي التموت وساعة رجليه
شميت الحرك مثل اليشم الموت
وترس اذني اسمعه اصياحها ارقيه
حسين راح. الوادم محزمة وتصيح. حسين راح
وكلبي طاح. وعالوجهي كمت اطيح. وكلبي طاح

اجتني الناس تركض واني اكابر
موتي انداس كلبج بالحوافر
كولو حسين مامات
ميعوف العزيزات

2ـــــــــــــــــــــــــــــــــــــ


مبينه كسرته من يركض البدوي
احط ايدي عالكلبي النار بي تجوي
اجذب الناس اكلهم باجر حسين
يرد كايد كمر وجفوفه هم تضوي
مدللات. ما يعوف حسين بلبر. مدللات
شلون هاي. والفضل مو توه خضر. شلون هاي

شيقنع اوليد الكمر يا ناس
وبعده ما شبع من وجه عباس
ما بيه بعد حيل
شكله داسته الخيل

3ـــــــــــــــــــــــــــــــــــــ

ضليت اركض بكل صوب واتلفت
من راحو عيوني عالضعن رفت
عرفت ارماح باجر توكف عالحسين
وجسمة بكل كتر مرضوض ومفتت
شهالعذاب. حسين راح ويدري باجر. شهالعذاب
والخيول. حافر يدفعه عالحافر. والخيول

هسه ام عون وين بيا خرابه
لا عباس يمها ولا كرابة
تضل تصفج بالايدين
الرايح منها الحسين

4ــــــــــــــــــــــــــــــــــــــ

اصيح وناسي ما عدهم عرف بالله
كلها تصيح ذبحو حتى عبدالله
سديت اذني بس شيسدها العيون
اكبالي كمت اشوف السهم بي صله
مو حرام. الرباب تموت غبشة. مو حرام
الطفل مات. وصفه جف حسين نعشه الطفل مات

والكاروك مشتاك لضحكته
وخليت الفضل بيه وشبكته
جانو من ينامون
سوه تغطيهم ام عون

5ــــــــــــــــــــــــــــــــــــــ

اموت احسلي شيرد الضعن وارتاح
هسه اليحدي بيهن اخو لو ذباح
هو الينتضر ضعن الحسين يموت
دكات البكلبه تصير كلها ارماح
راح اموت . شلون طلعن هاي صعبه. راح اموت
هناك شام. غربة ويلاكون غربه. هناك شام

الشام اسمع عليهم حجي موزين
شلون وطبن عليهم نساوين
مسبيات وعناد
اليطكهن ياخد مراد

كرار فاهم الخفاجي

محرم 1445

نزال للانصار عليهم السلام


اليوم زينب حشمت سبعينها
فزعو وكاع الله الله يعينها

1ــــــــــــــــــــــــــــــــــــــ

ذبت اعمايمها كلها بكربله شيب وشباب
ام عون صاحت يلا حيهم دنكت كل الركاب
كلها صاحت عمه ابشري اليوم نكلبها كلاب
كل الف احنه نكتله بسم زينب لثواب
رفت شورابها كلها
والزلم ذبت عكلها

2ــــــــــــــــــــــــــــــــــــــ

باجر نلف الخواجي نخضر بكل في رطب
ونخط عالكاع بدمانه احنه سادات العرب
جمه تخضر كاع الله هاي لو عابس غضب
رزق من عباس غيرة بشوفة عيونه شرب
ابشري يم عون وعلي
انطيح كلنه ادللي

3ــــــــــــــــــــــــــــــــــــــ

احنه تربات المضيف نفور نجويها الدلال
نبايع حسين عالدمنه بيعة ابناء الحلال
باجر لزينب وسكنه زلم نترسها السلال
وما نخلي عيون واحد تصد حتى للخيال
زلم كلفين وعرفنه
حسين ابونه شكد يحبنه

4ــــــــــــــــــــــــــــــــــــــ

اجتمعو اباب الخيام وبده ازماط المرجلة
قسمو كل الجيوش هنا بدت هالمشكله
الف كله ما يكفي اطيني فوج باكمله
تباوعو لن ابو فاضل يريد كل الجيش اله
الكمر يضحك وحبهم
حصتي هالجيش كلهم

5ــــــــــــــــــــــــــــــــــــــ

نصلي خلف العشك باجر احلا فرضين الضهر
نعطش ونشرب عيونه ونرتوي ونكتب شعر
سادة صرنه احنه بعشكنه كلوبنه صارت خضر
والجفافي تصير حمرة والخدود اله سمر
صح يسومر هم وجهنه
عدنه ارخص شي عمرنه

6ـــــــــــــــــــــــــــــــــــــ

الموت هوه العال بينه واحنه كلنه معلمين
بالوفة خذنه امتياز بمدرسة ام البنين
والهوه نكطعله راسه لو يغث ريت الحسين
لو يغمض حسين عينه احنه كلنه نصير عين
الموت بس لحسين يحله
يلوك للما عنده خله



كرار فاهم الخفاجي

محرم 1445

لمولاي ابا الفضل عليه السلام



كسرت خوة بيه من اجيتك
كايدني التعب كوة اعتنيتك
اوصلت يمه وصحت عباس عباس
كوم اكعد يخوية تضحك الناس


1ــــــــــــــــــــــــــــــــــــــ

يا عضيدي. من وصلتك كلها صاحت عافك وطاح
يا عضيدي. وانه اكلهم بيه نفس عباس ما راح
شيقنع عيوني بعد من شفته طايح كله
ثكلان رمشه من الدمة مشبوكة عينه بنبله
فتح عيونك يروحي
شوف وني وشوف نوحي


جفوفي ترجف وما بيه الزمة
اسهام وموش ثوبه مغطية جسمه
طحت كلي وسمعته يكلي يحسين
عذري خوية وصله للنساوين

2ــــــــــــــــــــــــــــــــــــــ

ااخ بويه. ردت منه مره اخيرة بطولة يوكف
ااخ بويه. حتى اعليه ما يشمت الطف
كمت اصفك بأيدي وكلت هيج الله اخوي ويرجع
بعيونك اشلاكي السهم امجلب وما يطلع
خوية مو وكته عذابك
استوحدوني انه بغايبك


بداعت خوتك اشلعها السهام
كوم بحضني خوية سولف ونام
ما لايك بصدرك شابك ارماح
معودني اشمك يله ارتاح

3ــــــــــــــــــــــــــــــــــــــ

كوم خوية . خوية كلها تحضرتلي هاي السيوف
كوم خوية. ومن كد ما بجيتك بعد ما شوف
السكته خوية موش الك شو ساكت وعايفني
هاي الخيول الداستك عكبك ترد تسحكني
ما يضل بحسين تالي
وهم مثل حالك يحالي

باكو ثوبه ما خلولي عطره
وخطو بسهم اسمي عالصدرة
بذني اسمع يصيحون الشماته
نطينه جفوفه نشمرلك عباته

4ــــــــــــــــــــــــــــــــــــــ



فحط كلبي. اول مرة احس بروحي مغلوب
فحط كلبي من اكبالي شفته هواي مكلوب
عالكاع ارسم ضحكته واشبك الكاع بعيني
عباس بس انت الصدك تضحكني وتبجيني
خوية صوتك ما سمعته
احجي مو كلبي شلعته

بعدك خوية جا ياهو البقالي
اكبالي وحضرولي رمح عالي
ما رحموك بيه ما يرحمون
اول ما طحت فكرت بم عون

5ــــــــــــــــــــــــــــــــــــــ

خوية ليش. جسمك بين الرماح الكيته ضايع
خويه ليش. وانه من عينك بعد ما جني شابع
خوية الحوافر شافتك كلبك حنين واخضر
داسنك لحد ما صحت الحكلي يا بو الاكبر
من صحتلي طحت كلي
واعرفت مسحوك حملي

من عدها وضعت بلهيمة وحدي
اصحين يا خلك بس هوه عندي
اخذوني بمجانه وعوفو عباس
عمود خيامي راح بهوسة الناس

6ــــــــــــــــــــــــــــــــــــــ

وحك دمك. خوية زينب ناطرتنه ترد سالم
وحك دمك. شلون بس جفك اكوده وانت نايم
راح اخذ الرايه عذر جيب اليقنع اخيامي
ومن كثر ما كلبي وكف ما بيه احرك اجدامي
كوم وتوجه عالمتني
ليش خوية عذبتني

ما ضل واحد وما شافني ابجي
اذا ارد للخيم عباس شحجي
شكللها العشت بعيونها هواي
التعطش شوفتك شتسوي بلماي


كرار فاهم الخفاجي

محرم 1445

قصيدة ليلة العاشر

لسان حال السيدة زينب عليها السلام


بين الرماح الكيته ضايع كله
جايبني عطرة وعيني ما تندله
شاردة من الحرك جيته
حسين متطشر لكيته

1ــــــــــــــــــــــــــــــــــــــ

كوة اجيته
اجيت اكله كلها صاحت اخته طلعت
الخيل من طاحت الراية علينه هدت
الجانت بفيك عزيزة حافي ركضت
ما لايكه. تتونس بجسمك خيول وباقي عاري
ما لايكه. مسومر الماكو بحلاته من الضهاري
اني هاي الهاضمتني
الساحكاتك ركضني

يبن امي اكعد لا تشمت الوادم
بهاي الصحاري شلون اعوفك نايم
فتح عيونك يحملي
شيوجعك يحسين كلي

2ــــــــــــــــــــــــــــــــــــــ

يا بن امي
للخيم يا خوية عندي امنية ارجعك
ايست من بالدرب مشمور اصبعك
خوية من بين السهام شلون اطلعك
والكيته. الرمح واكف بصدرة شلون وكفه
والكيته. لازم بجفه الرمح وانكطع جفه
كمت افكر بالنسواين
شلون اكلهن هذا الحسين

السهم ما خلاني اشوف عيونه
شمسوي اخوي من الكفه يذبحونه
جامد الدم بلحيته
فاكده روحي واجيته

3ــــــــــــــــــــــــــــــــــــــ

ااخ خوية
ليش نايم وانت تدري كلبي محروك
مدلله يا خوية مو مال اصعد النوك
غمض عيونك يخوية من اطب لسوك
لتشوفني. تكودني الغربة ويصحولي السبيه
لتشوفني. من اعثر اكبال الرمح وتفز رقية
خوية ويعتوني كوة
باجر بعازة الخوة

يا خوية كوم وشوفني بيا حاله
الدنيا اليل وتفتر الخياله
من السحك الله يعينه
جسمة كله ساحكينه

4ــــــــــــــــــــــــــــــــــــــ

الهاضمتني
اخوي جافينه عالضهره وساحكينه
اسمه لو ينلزم جا هم سالبينه
الطعنة البكلبي شفتها بهاي عينه
ما راهمه. ينذبح ذبحة كبش والناس تضحك
ما راهمه. باجر احبال بركبتي وعالي رمحك
حسين مو مشلوع كلبي
باجر يصيحون اركبي

ياريت اموت ولا اسمعه الصايح
اركب اكبالك وانت كلك طايح
اكعد بداعت غلاتي
الضال مني بس عباتي

5ــــــــــــــــــــــــــــــــــــــ

ليش خوية
وين راسك وين طولك وينك انت
وعالخدة دمعة باقي باجي سكته
حارمتني اسهام صدرة وما شبكته
ما صايرة. الذابحة بسيف عالكيفة وشلع كلبه
ما صايرة. الترب من الحرارة الدم تشربه
الشمر ما عنده رحمة
سلب راسه وسلب هدمة

وشلون راح ارجع يخوية بدونك
اشضال مني بس اسم وعيونك
باقي بس انفاس بيه
هناك شيقنع رقية


كرار فاهم الخفاجي